បក្សប្រឆាំងថាការមិនចូលប្រជុំសភារឿងលោក អ៊ុំ សំអាន ព្រោះមិនចង់រំលោភរដ្ឋធម្មនុញ្ញ
ដោយ ឡេង ម៉ាលី
2016-04-12
មន្ត្រីជាន់ខ្ពស់បក្សសង្គ្រោះជាតិ លោក សុន ឆ័យ (កណ្ដាល) ថ្លែងក្នុងសន្និសីទកាសែត នាស្នាក់ការកណ្ដាលបក្សសង្គ្រោះជាតិ នៅថ្ងៃទី១២ ខែមេសា ឆ្នាំ២០១៦។ RFA/Rann Samnang
RFA/Rann Samnang
មន្ត្រីគណបក្សសង្គ្រោះជាតិ ថ្លែងថា ការធ្វើពហិការរបស់តំណាងរាស្ត្របក្សប្រឆាំងមិនចូលរួមកិច្ចប្រជុំរដ្ឋសភា នៅថ្ងៃទី១២ មេសា ព្រោះតែមិនចង់រំលោភច្បាប់។ ពហិការនេះ គឺទាក់ទងនឹងការចាប់ឃុំខ្លួនតំណាងរាស្ត្រ អ៊ុំ សំអាន ដែលគណបក្សសង្គ្រោះជាតិ នៅតែចាត់ទុកថាជាការរំលោភរដ្ឋធម្មនុញ្ញ។
មន្ត្រីជាន់ខ្ពស់គណបក្សសង្គ្រោះជាតិ លោក សុន ឆ័យ បញ្ជាក់ថា ជំហររបស់គណបក្សសង្គ្រោះជាតិ នៅតែថ្កោលទោស និងចាត់ទុកការចាប់ខ្លួន លោក អ៊ុំ សំអាន ថាខុសច្បាប់ ព្រោះសកម្មភាពរបស់ លោក អ៊ុំ សំអាន ជាការបញ្ចេញមតិស្របច្បាប់ក្នុងនាមជាអ្នកតំណាងរាស្ត្រ៖ «»។
លោក សុន ឆ័យ ថ្លែងក្នុងសន្និសីទកាសែតនាទីស្នាក់ការកណ្ដាលគណបក្សសង្គ្រោះជាតិ នៅព្រឹកថ្ងៃទី១២ មេសា ថា ជំហររបស់ក្រុមតំណាងរាស្ត្រគណបក្សសង្គ្រោះជាតិ ធ្វើពហិការមិនចូលប្រជុំគណៈកម្មការអចិន្ត្រៃយ៍រដ្ឋសភា និងកិច្ចប្រជុំពេញអង្គសភា នៅរសៀលថ្ងៃដដែល គឺមិនចង់ចូលរួមធ្វើអំពើខុសច្បាប់៖ «ទីមួយ យើងមិនចង់ស្ថាប័នជាតិទៅធ្វើការមួយដែលមិនច្បាស់លាស់ មិនត្រឹមត្រូវតាមគោលការណ៍នៃរដ្ឋធម្មនុញ្ញ។ គឺយើងមិនចូលរួមធ្វើខុស គឺចង់ជំរុញឲ្យធ្វើការធានាអំពីឯករាជភាពរបស់ស្ថាប័នរដ្ឋសភានេះ។ គណបក្សសង្គ្រោះជាតិ មានការបារម្ភណាស់ស្ថាប័នជាតិហ្នឹង ចង់ស្ថាប័នជាតិហ្នឹងពង្រឹងទៅឲ្យរឹងមាំទៅ បំពេញការងារឲ្យមានការទទួលខុសត្រូវទៅ ផ្ដល់សេវាឲ្យល្អជូនពលរដ្ឋទៅ ដើម្បីឲ្យនាំមកនូវយុត្តិធម៌សង្គម សុខុមាលភាព សុភមង្គលសង្គម ម៉្លោះហើយចេះតែខំជជែក»។
ហេតុផលទីពីរដែលបក្សប្រឆាំងមិនទៅចូលរួមប្រជុំសភាពេញអង្គនោះ ព្រោះតំណាងរាស្ត្រគណបក្សសង្គ្រោះជាតិ ដឹងមុនថា កិច្ចប្រជុំនោះនឹងមិននិយាយអ្វីក្រៅពីការសម្រេចលើកអភ័យឯកសិទ្ធិអ្នកតំណាងរាស្ត្រ ឬត្រូវបញ្ឈប់ការចាប់ចងនោះទេ។ លោក សុន ឆ័យ បញ្ជាក់ថា ការលើកអភ័យឯកសិទ្ធិអ្នកតំណាងរាស្ត្រតាមមាត្រា៨០ នៃរដ្ឋធម្មនុញ្ញ ត្រូវតែមានការសម្រេចពីសំឡេងសមាជិកសភាចំនួន ៨៣នាក់ឡើងទៅ។ រីឯការបញ្ឈប់ការចាប់ចងអ្នកតំណាងរាស្ត្រ គឺត្រូវការសំឡេងគាំទ្រចំនួន ៩២នាក់ឡើងទៅ។
ទាក់ទងនឹងចំណុចនេះ លោក សុន ឆ័យ ថ្លែងថា ការដកអភ័យឯកសិទ្ធិអ្នកតំណាងរាស្ត្រ ត្រូវតែមានសំឡេងសមាជិកសភា ២ភាគ៣ ចំណែកឯលោកនាយករដ្ឋមន្ត្រី ហ៊ុន សែន លើកហេតុផលថា ការបញ្ឈប់ដំណើរការក្ដីនេះ ក៏ត្រូវមានសំឡេង ៣ភាគ៤ ដែរ។ ដូច្នេះ តម្រូវការទាំងពីរនេះ មិនអាចបានទេ នៅពេលដែលអ្នកតំណាងរាស្ត្រគណបក្សសង្គ្រោះជាតិ មិនចូលរួមប្រជុំនោះ។
បញ្ហាឃាត់ខ្លួន លោក អ៊ុំ សំអាន នេះ លោកនាយករដ្ឋមន្ត្រី ហ៊ុន សែន ថ្លែងថា ធ្វើឡើងតាមបទល្មើសជាក់ស្ដែងដែល លោក អ៊ុំ សំអាន នៅតែបន្តបង្ហោះលើហ្វេសប៊ុក (Facebook) អំពីបញ្ហាព្រំដែន និងផែនទីក្លែងក្លាយ៖ «»។
លោកនាយករដ្ឋមន្ត្រី ក៏ចេញបញ្ជាឲ្យចាប់ខ្លួនបន្តទៀត ចំពោះជនណាដែលនិយាយអំពីបញ្ហាផែនទីក្លែងក្លាយ។ លោកសំអាងហេតុផលពីរយ៉ាងលើការបញ្ជានេះ គឺទីមួយ ដោយសារមាត្រា២ នៃរដ្ឋធម្មនុញ្ញ ឲ្យប្រើផែនទីខ្នាត ១/១០០.០០០ បោះពុម្ពដោយក្រុមភូមិសាស្ត្រឥណ្ឌូចិន ក្នុងចន្លោះឆ្នាំ១៩៣៣ ដល់ឆ្នាំ១៩៥៣៖ «ខ្ញុំសុំប្រកាសដាច់ណាត់ អ្នកណានិយាយពីផែនទីក្លែងក្លាយ គឺត្រូវចាប់ខ្លួនភ្លាម មិនថាអ្នកហ្នឹងជាអ្នកណាទេ»។
ប្រធានបច្ចេកទេសផ្នែកស៊ើបអង្កេតនៃអង្គការសិទ្ធិមនុស្សលីកាដូ (LICADHO) លោក អំ សំអាត កត់សម្គាល់ថា ការនិយាយអំពីបញ្ហាព្រំដែន គឺជាការងាររបស់អ្នកតំណាងរាស្ត្រ អំពីកង្វល់របស់ជាតិ៖ «»។
លោក សុន ឆ័យ អំពាវនាវឲ្យរដ្ឋាភិបាលដោះលែង លោក អ៊ុំ សំអាន ជាបន្ទាន់ ហើយកុំធ្វើបែបនេះតទៅទៀត ព្រោះពេលនេះជាពេលដែលរដ្ឋាភិបាលកំពុងពង្រឹងនីតិរដ្ឋ។ លោកថា គណបក្សសង្គ្រោះជាតិ នៅតែបន្តអនុវត្តគោលនយោបាយអហិង្សា និងបន្តពង្រឹងវប្បធម៌សន្ទនា។ លោកថា គណបក្សសង្គ្រោះជាតិ នឹងនៅតែរក្សាជំហរជជែកជាមួយគណបក្សប្រជាជនកម្ពុជា ដើម្បីដោះស្រាយបញ្ហានេះ។ លោក សុន ឆ័យ បញ្ជាក់ថា ការចាប់ខ្លួននេះ មិនអាចបិទមាត់គណបក្សសង្គ្រោះជាតិ ក្នុងការរិះគន់ឡើយ៕
No comments:
Post a Comment