ដោយ យាង សុជាមេត្តា
2016-04-14
ក្រុមសន្តិសុខខណ្ឌដូនពេញ ប៉ះទង្គិចជាមួយក្រុមសហជីពដែលតវ៉ានៅក្រៅរបងរដ្ឋសភា កាលពីថ្ងៃទី៤ ខែមេសា ឆ្នាំ២០១៦ ខណៈរដ្ឋសភាកំពុងប្រជុំអនុម័តច្បាប់សហជីព។
RFA/Rann Samnang
មន្ត្រីរដ្ឋាភិបាលនៅថ្ងៃទី១៤ ខែមេសា ថ្លែងច្រានចោលចំពោះរបាយការណ៍របស់សហរដ្ឋអាមេរិក ដែលរិះគន់ពីការរំលោភសិទ្ធិមនុស្សនៅកម្ពុជា។ ក្រសួងការបរទេសសហរដ្ឋអាមេរិក កាលពីថ្ងៃទី១៣ ខែមេសា បានផ្សព្វផ្សាយរបាយការណ៍រំលោភសិទ្ធិមនុស្សក្នុងឆ្នាំ២០១៥ ដោយចាត់ទុកស្ថានការណ៍រំលោភសិទ្ធិមនុស្សនៅកម្ពុជា នៅតែមានភាពធ្ងន់ធ្ងរ។
មន្ត្រីរដ្ឋាភិបាលចាត់ទុករបាយការណ៍រំលោភសិទ្ធិមនុស្សរបស់ក្រសួងការបរទេសសហរដ្ឋអាមេរិក មកលើកម្ពុជា នៅពេលនេះ ថាមិនឆ្លុះបញ្ចាំងពីការពិត។
មន្ត្រីរដ្ឋាភិបាល និងជាអ្នកនាំពាក្យទីស្ដីការគណៈរដ្ឋមន្ត្រី លោក ផៃ ស៊ីផាន ប្រតិកម្មថា របាយការណ៍របស់សហរដ្ឋអាមេរិក បានច្បិចយកតែរឿងរ៉ាវអវិជ្ជមានរបស់កម្ពុជា មកនិយាយ ប៉ុន្តែអាមេរិក មិនបានសិក្សាលំអិតពីទិដ្ឋភាពច្បាប់របស់កម្ពុជា នោះឡើយ។ លោកថា សេរីភាពរបស់បុគ្គលម្នាក់ៗត្រូវផ្សារភ្ជាប់នឹងការគោរពច្បាប់ និងការទទួលខុសត្រូវដែលលោកថា សូម្បីតែនៅសហរដ្ឋអាមេរិក ក៏ដូចគ្នាអ៊ីចឹងដែរ។
លោក ផៃ ស៊ីផាន៖ «ដូច្នេះរបាយការណ៍ហ្នឹងគ្រាន់តែលើកឡើងនូវភាពអវិជ្ជមាន វាមិនមែនតំណាងនូវភាពពិតប្រាកដរបស់ខ្មែរនោះទេ។ ចំពោះការឃាត់ខ្លួន ការដាក់ទោសបុគ្គលដែលរំលោភច្បាប់ គឺមិនគិតបុគ្គលទាំងអស់នោះជានរណាទេ ពីព្រោះយើងទាំងអស់គ្នាស្មើគ្នាចំពោះមុខច្បាប់ ដោយសារតែគាត់រំលោភច្បាប់នោះហើយបានគាត់ជាប់ទោស មិនមែនឲ្យតែគណបក្សប្រឆាំង មិនបាច់យល់ដឹងពីច្បាប់ មិនបាច់អនុវត្តច្បាប់ មិនគោរពច្បាប់ គឺមិនមែនអ៊ីចឹងទេ លទ្ធិប្រជាធិបតេយ្យ គឺស្ថិតនៅក្នុងទម្រង់នៃនីតិរដ្ឋនេះឯង»។
របាយការណ៍សិទ្ធិមនុស្សរបស់សហរដ្ឋអាមេរិក បញ្ជាក់ថា បញ្ហាសំខាន់ជាងគេដែលកំពុងកើតមាននៅកម្ពុជា គឺប្រព័ន្ធយុត្តិធម៌ពុំមានប្រសិទ្ធភាព ការរឹតត្បិតសេរីភាពក្នុងការបញ្ចេញមតិ និងការប្រមូលផ្តុំដើម្បីតវ៉ា ការចូលរួមក្នុងការបង្កើតសមាគម ការប្រើប្រាស់អំពើហិង្សា និងការគំរាមកំហែងចាប់ដាក់ពន្ធនាគារដើម្បីសម្លុតបំភ័យគណបក្សប្រឆាំងជាដើម។
ក្រៅពីនោះ នៅមានបញ្ហារំលោភបំពានអ្នកទោស ការដាក់កំហិតនានាលើសេរីភាពសារព័ត៌មាន ករណីមិនបានអនុវត្តដោយសមភាព និងត្រឹមត្រូវចំពោះជនភៀសខ្លួន ការរីករាលដាលនៃអំពើពុករលួយ និងការរត់ពន្ធមនុស្ស។
ទន្ទឹមនឹងនោះ រដ្ឋាភិបាលកម្ពុជា បានកាត់ទោសមន្ត្រីមួយចំនួនដែលធ្វើខុស តែបែរជានៅតែមាននិទណ្ឌភាពចំពោះអំពើពុករលួយ ហើយការប្រព្រឹត្តកំហុសកម្រិតធ្ងន់នានា នៅតែកើតមានជាបន្តបន្ទាប់។
ផ្ទុយពីការរិះគន់របស់សហរដ្ឋអាមេរិក លោក ផៃ ស៊ីផាន ថ្លែងពីមោទនភាពរបស់កម្ពុជា ដែលថា ពលរដ្ឋខ្មែរសព្វថ្ងៃទទួលបាននូវសុខសន្តិភាព និងសប្បាយរីករាយតាមរយៈការពង្រឹងសណ្ដាប់ធ្នាប់របស់រដ្ឋាភិបាល។
ទោះជាយ៉ាងណាក៏ដោយ នេះមិនមែនជារឿងចម្លែករបស់រដ្ឋាភិបាលកម្ពុជា នោះទេ ក្នុងការច្រានចោលរបាយការណ៍របស់សង្គមស៊ីវិល និងសហគមន៍អន្តរជាតិដែលរិះគន់ការរំលោភសិទ្ធិមនុស្សនៅកម្ពុជា បើទោះជាមនុស្សជាទូទៅមើលឃើញថា កម្ពុជាពិតជាមានភាពមិនប្រក្រតីក្នុងការគោរពសិទ្ធិមនុស្សនេះក្តី៕
No comments:
Post a Comment