A Change of Guard
សូមស្តាប់វិទ្យុសង្គ្រោះជាតិ Please read more Khmer news and listen to CNRP Radio at National Rescue Party. សូមស្តាប់វីទ្យុខ្មែរប៉ុស្តិ៍/Khmer Post Radio.
Follow Khmerization on Facebook/តាមដានខ្មែរូបនីយកម្មតាម Facebook: https://www.facebook.com/khmerization.khmerican
Tuesday 12 April 2016
តំណាងរាស្ត្របក្សប្រឆាំងរិះគន់មិនសំចៃមាត់រឿងព្រំដែនកម្ពុជា-វៀតណាម ត្រូវបានចាប់ខ្លួន
លោក អ៊ុំ សំអាន ត្រូវសមត្ថកិច្ចចាប់ដាក់ខ្នោះបញ្ជូនមកក្រសួងផ្ទៃ កាលពីយប់មិញ។ រូបថត សហការី
តំណាងរាស្ត្របក្សប្រឆាំងរិះគន់មិនសំចៃមាត់រឿងព្រំដែនកម្ពុជា-វៀតណាម ត្រូវបានចាប់ខ្លួន
ppp Mon, 11 April 2016
ម៉ិច ដារ៉ា and លាង ផាន់ណារ៉ា
សៀមរាប៖ មិនដល់ ២៤ ម៉ោងក្រោយត្រឡប់មកដល់កម្ពុជាវិញ តំណាងរាស្រ្តគណបក្សសង្រ្គោះជាតិ និយាយមិនសំចៃមាត់លោក អ៊ុំ សំអាន ដែលសកម្មលើកិច្ចការព្រំដែន កម្ពុជា‑វៀតណាម ដែលមានភាពចម្រូងចម្រាសនោះ ត្រូវបានសមត្ថកិច្ច ស្លៀកពាក់ស៊ីវិល ចាប់ខ្លួនកាលពីម៉ោង ១២ រំលងអាធ្រាត្រ ឈានចូលថ្ងៃទី ១១ ខែមេសា នៅក្នុងខេត្តសៀមរាប។ នេះបើតាមការបញ្ជាក់ប្រាប់ពីសមត្ថកិច្ចមូលដ្ឋាន និងមន្ត្រីគណបក្សនៅព្រឹកថ្ងៃចន្ទនេះ។
លោក សារ៉ន សំអឿន អនុប្រធានការិយាល័យសន្តិសុខផ្ទៃក្នុងខេត្ត បានថ្លែងថា «ពួកយើងបានចាប់ខ្លួនគាត់ នៅមុខធនាគារ កាណាឌីយ៉ា វេលាម៉ោង ០០:៤០ នាទី កណ្តាលអាធ្រាត្រ ខណៈពេលដែលគាត់កំពុងធ្វើការដកលុយ [ពីម៉ាស៊ីន ATM]។ ពួកយើងបានប្រើប្រាស់កងកម្លាំងសមត្ថកិច្ចជាច្រើន រួមមានទាំងប៉ូលិស និងកងរាជអាវុធផងដែរ»។
លោកបន្តថា «លោក [អ៊ុំ សំអាន] មិនបានធ្វើការតបតទេ នៅពេលដែលអាជ្ញាធរពួកយើងចាប់ខ្លួនគាត់ ហើយយើងបានបញ្ជូនគាត់មកក្រសួងមហាផ្ទៃរួចហើយ»។
នៅពេល ភ្នំពេញ ប៉ុស្តិ៍សួរថា តើការចាប់ខ្លួននេះមានដីកាចាប់ខ្លួនទេ លោក សារ៉ន សំអឿន បានបដិសេធមិនផ្តល់អធិប្បាយឡើយ។
លោក សុខ គឹមសេង សមាជិកក្រុមប្រឹក្សាខេត្ត របស់គណបក្សសង្រ្គោះជាតិ បានឲ្យដឹងដែរថា «មានប៉ូលិស និងកងរាជអាវុធ ៤០នាក់បានមកឡោមព័ន្ធផ្ទះរបស់ខ្ញុំ តាំងពីម៉ោង ៩:៣០ រហូតដល់ម៉ោង ១២:៣០ ហើយម៉ោង ១២:៤០ នាទី ពួកគេនាំខ្ញុំទៅកាន់ស្នងការខេត្ត ដោយសារពួកគេសង្ស័យថា ខ្ញុំស្នាក់នៅជាមួយគាត់... ពួកគេក៏បានពិនិត្យមើល Call ទូរស័ព្ទដៃខ្ញុំដែរ។
លោកបន្តថា «ពួកគេព្យាយាមសួរខ្ញុំថា លោក អ៊ុំ សំអាន នៅកន្លែងណា»។ «ទង្វើរបស់ពួកគេបានរំលោភសិទ្ធិរបស់ខ្ញុំ និងបានធ្វើការគំរាមខ្ញុំទៀត»។
កាលពីខែមេសា ឆ្នាំមុន លោកនាយករដ្ឋមន្រ្តី ហ៊ុន សែន បានគំរាមចាត់ការផ្លូវច្បាប់ប្រឆាំងនឹងបុគ្គលណា ឬក្រុមណាដែលចោទប្រកាន់រដ្ឋាភិបាលថាប្រើប្រាស់ផែនទីក្លែងក្លាយ ក្នុងការកំណត់បង្គោលព្រំដែនហើយក៏បានព្រមានបុគ្គលណាដែលបន្ត រិះគន់កិច្ចការព្រំដែនរបស់ប្រទេសនេះថានឹងប្រឈមមុខនឹងតុលាការ។ ការគំរាមកំហែងនេះបានធ្វើឡើងមួយថ្ងៃបន្ទាប់ពីរដ្ឋាភិបាលបានទទួល ផែនទីពីអង្គការសហប្រជាជាតិដែលខ្លួននិយាយថាត្រូវជាមួយផែនទីផ្ទាល់ របស់ខ្លួន។
មួយសប្តាហ៍ក្រោយមកសមាជិកព្រឹទ្ធសភាលោក ហុង សុខហួរ ត្រូវបានចាប់ខ្លួនតាមបញ្ជារបស់លោកនាយករដ្ឋមន្រ្តី ហ៊ុន សែន ពាក់ព័ន្ធនឹងការបង្ហាញច្បាប់ចម្លងក្លែងក្លាយនៃសន្ធិសញ្ញាព្រំដែន ជាមួយប្រទេសវៀតណាមនៅក្នុងវីដេអូមួយដែលបង្ហោះនៅលើហ្វេសប៊ុករបស់ លោក សម រង្ស៊ី។
នៅព្រឹកថ្ងៃចន្ទ ទី១១ មេសានេះ គណបក្សសង្រ្គោះជាតិ បានចេញសេចក្តីថ្លែងការណ៍ ថ្កោលទោសយ៉ាងដាច់អហង្ការចំពោះការចាប់ខ្លួន លោក អ៊ុំ សំអាន តំណាងរាស្ត្រមណ្ឌលសៀមរាប ដោយចោទថា ការចាប់ខ្លួននេះ គឺជាទង្វើរំលោភបំពាន យ៉ាងធ្ងន់ធ្ងរលើអភ័យឯកសិទ្ធិអ្នកតំណាងរាស្ត្រ។
មាត្រា ៨០ នៃរដ្ឋធម្មនុញ្ញកម្ពុជាចែងថា តំណាងរាស្ត្រមានអភ័យឯកសិទ្ធិសភា។ តំណាងរាស្ត្ររូបណាក៏ដោយមិនអាចត្រូវបានចោទប្រកាន់ ចាប់ខ្លួន ឃាត់ខ្លួន ឬឃុំខ្លួន ដោយហេតុពីបានសំដែងយោបល់ ឬបញ្ចេញមតិក្នុងការបំពេញមុខងាររបស់ខ្លួនសោះឡើយ។ ការចោទប្រកាន់ ការចាប់ខ្លួន ការឃាត់ខ្លួន ឬការឃុំខ្លួនសមាជិកណាមួយនៃរដ្ឋសភា នឹងអាចធ្វើទៅកើតលុះត្រាតែមានការយល់ព្រមពីរដ្ឋសភា ឬពីគណៈកម្មាធិការអចិន្ត្រៃយ៍របស់រដ្ឋសភា ក្នុងចន្លោះសម័យប្រជុំនៃរដ្ឋសភា វៀរលែងតែ ក្នុងករណីបទល្មើសព្រហ្មទណ្ឌជាក់ស្តែង៕
Subscribe to:
Post Comments (Atom)
No comments:
Post a Comment