ទេសចរបរទេសមកលេងប្រាសាទអង្គរវត្តកាលពីឆ្នាំមុន។ អង្គរសង្ក្រាន្តនៅឆ្នាំនេះនឹងទាក់ទាញទេសចរច្រើន។ ហេង ជីវ័ន |
អង្គរសង្ក្រាន្ត បានទាញទេសចរជាច្រើនចូលអង្គរ
ppp Mon, 11 April 2016
ចេង សុខហ័ង
ភ្នំពេញៈ ជារៀងរាល់ឆ្នាំចាប់តាំងពីព្រឹតិ្តការណ៍អង្គរសង្ក្រាន្តត្រូវបានធ្វើឡើងនៅទឹកដីអង្គរអាជីវកម្មសណ្ឋាគារ និងផ្ទះសំណាក់ទទួលបានប្រយោជន៍ជាច្រើន ខណៈភ្ញៀវទេសចរបានសម្រុកទៅខេត្តទេសចរណ៍វប្បធម៌មួយនេះ។
នេះជាលើកទី ៤ ហើយនៃព្រឹត្តិការណ៍អង្គរសង្ក្រាន្តសម្រាប់បុណ្យចូលឆ្នាំខ្មែរ។ ស្របពេលនេះដែរការកក់បន្ទប់នៅខេត្តសៀមរាបស្ទើរតែពេញអស់ ខណៈតម្លៃក៏បានកើនឡើង។
អង្គរសង្ក្រាន្ត ជាព្រឹត្តិការណ៍ដ៏ធំដែលត្រូវបានធ្វើឡើងជារៀងរាល់ឆ្នាំក្នុងពិធីបុណ្យចូលឆ្នាំខ្មែរនៅខេត្តសៀមរាប ដើម្បីទាក់ទាញភ្ញៀវទេសចរកាន់តែច្រើនមកកម្ពុជា។
លោក ឆឺយ ឆន អនុប្រធានមន្ទីរទេសចរណ៍ខេត្តសៀមរាបថ្លែងថា អង្គរសង្រ្កាន្ត គឺជាកត្តាដ៏សំខាន់ក្នុងការទាក់ទាញភ្ញៀវទេសចរកាន់តែច្រើនចូលមកខេត្តនេះ។
លោកបន្តថា៖ «វានឹងទាក់ទាញភ្ញៀវទេសចរជាច្រើន ទាំងភ្ញៀវទេសចរអន្តរជាតិ»។ លោកបន្ថែមថា ភ្ញៀវទេសចរអន្តរជាតិនិងក្នុងស្រុកជាង ១ លាននាក់ត្រូវរំពឹងថា នឹងមកទស្សនាខេត្តសៀមរាប ក្នុងអំឡុងពេលនេះ។
ចំណូលបានពីការលក់សំបុត្រចូលទស្សនាប្រាសាទអង្គរវត្តនៅត្រីមាសទី ១ កើនឡើង ២,៥ ភាគរយរហូតដល់ ២០ លានដុល្លារអាមេរិកបើធៀបរយៈពេលបីខែដំបូងឆ្នាំ ២០១៥ ដែលមាន ១៩,៨ លានដុល្លារ ខណៈចំនួនភ្ញៀវទេសចរមាន ៧០១ ០០០ នាក់កើនឡើង ១,៧ ភាគរយ។ នេះបើយោងតាមទិន្នន័យបានពីអាជ្ញាធរអប្សរា។
ផ្ទះសំណាក់ HappyGuest House ដែលមាន ៣០០ បន្ទប់ ត្រូវកក់បន្ទប់អស់ហើយតាំងពីដើមខែនេះ។
អ្នកស្រី ភេម ឆព័ណ្ឌ ម្ចាស់ផ្ទះសំណាក់នេះបានថ្លែងថា អង្គរសង្ក្រាន្តគឺជាព្រឹត្តិការណ៍ដ៏ពេញនិយម និងទាក់ទាញភ្ញៀវទេសចរក្នុងស្រុកច្រើន ខណៈដែលវាស្ថិតក្នុងរដូវភ្ញៀវទេសចរទាប។
អ្នកស្រីបញ្ជាក់ថា៖ «អតិថិជនរបស់ខ្ញុំ ៥០ ភាគរយគឺប្រជាជនខ្មែរ។ វាទាក់ទាញមិនគ្រាន់តែភ្ញៀវទេសចរកម្ពុជាប៉ុណ្ណោះទេ ប៉ុន្តែថែមទាំងភ្ញៀវអន្តរជាតិផងដែរ»។
អ្នកស្រីបន្តថា តម្លៃកើនឡើងជាង ២ ដុល្លារគឺចាប់ពី ១៥ ដុល្លារដល់ ១៧ ដុល្លារ។
លោក សៀង សុវណ្ណ អ្នកគ្រប់គ្រងផ្នែកកក់បន្ទប់របស់ផ្ទះសំណាក់ Home Sweet Home បានឲ្យដឹងថា ៧០ ភាគរយនៃចំនួនបន្ទប់ត្រូវបានកក់ដោយអតិថិជនខ្មែរ ហើយបានរំពឹងថានឹងកក់អស់នៅថ្ងៃបន្ទាប់ជាមួយហើយតម្លៃជួលចាប់ពី ១៥ ដុល្លារដល់ ២៥ ដុល្លារ។
លោកបន្តថា៖«ព្រឹត្តិការណ៍នេះនាំយកប្រាក់ចំណូលជាច្រើនដល់យើង ខ្ញុំមានមោទនភាពខ្លាំងណាស់ចំពោះព្រឹត្តិការណ៍នេះ ដោយសារតែវាជួយដល់វិស័យទេសចរណ៍របស់យើង និងលើកកម្ពស់ប្រពៃណីនិងវប្បធម៌របស់យើង»។
កាលពីខែមុន គេហទំព័រTripAdvisor បានផ្ដល់ចំណាត់ថ្នាក់សៀមរាបជាទិសដៅឈានមុខគេនៅក្នុងតំបន់អាស៊ី និងទិសដៅធ្វើដំណើរទូទាំងពិភពលោកល្អបំផុតទី ៥។
លោក អាង គឹមអៀង ប្រធានសមាគមទីភ្នាក់ងារទេសចរណ៍ កម្ពុជាឲ្យដឹងថា ព្រឹត្តិការណ៍នេះបានទាក់ទាញភ្ញៀវទេសចរជាច្រើនពិសេសប្រជាជនកម្ពុជា។
លោកថ្លែងថា៖ «អង្គរសង្រ្កាន្តជាព្រឹត្តិការណ៍តែមួយគត់នៅខេត្តសៀមរាបដែលលើកកម្ពស់ប្រពៃណី និងវប្បធម៌របស់យើង ដូច្នេះវាទាក់ទាញភ្ញៀវទេសចរជាច្រើនមកទស្សនានៅទីនោះ។ ព្រឹត្តិការណ៍នេះធ្វើឲ្យប្រទេសកម្ពុជាយើងល្បីល្បាញ និងលើកកម្ពស់វិស័យទេសចរណ៍ និងប្រាក់ចំណូលជាតិរបស់យើង»៕LA
No comments:
Post a Comment