 |
| យុវជន ៣០០ នាក់ចូលរួមក្នុងព្រឹត្តិការណ៍អ៊ីនធឺណិតបើកទូលាយ កាលពីថ្ងៃអាទិត្យសប្តាហ៍មុន។ |
ភ្នំពេញៈ ដោយមានការរៀបចំពីអង្គការ ខុមហ្រ្វែល មជ្ឈមណ្ឌលកម្ពុជាដើម្បីប្រព័ន្ធផ្សព្ធផ្សាយឯករាជ្យ វេទិកានៃអង្គការមិនមែនរដ្ឋាភិបាលស្តីពីកម្ពុជា មជ្ឈមណ្ឌលអប់រំច្បាប់សម្រាប់សហគមន៍ និងអង្គការបណ្តាញយុវជនកម្ពុជា ព្រឹតិ្តការណ៍ អ៊ីនធឺណិតបើកទូលាយឆ្នាំ ២០១៥ ត្រូវបានប្រព្រឹត្តទៅនៅក្នុងបរិវេណភោជនីយដ្ឋានទន្លេបាសាក់ ២ កាលពីថ្ងៃអាទិត្យសប្តាហ៍មុន ដោយមានការចូលរួមពីសំណាក់ យុវជនដែលជាអ្នកឯកទេសខាងប្រព័ន្ធបច្ចេកវិទ្យាគមនាគមន៍ និងព័ត៌មានវិទ្យា និងអ្នកប្រើប្រាស់បណ្តាញសង្គមប្រមាណជា ៣០០ នាក់។
កម្មវិធីដែលសម្បូរទៅដោយយុវវ័យចូលរួមនេះត្រូវបានរៀបចំឡើងក្នុងគោលបំណងផ្តល់ឱកាសឲ្យយុវជន និងប្រជាពលរដ្ឋទូទៅស្វែងយល់អំពីប្រធានបទចំនួន ៥ គឺ សេរីភាពនៃការប្រើប្រាស់ អ៊ីនធឺណិត ឧក្រិដ្ឋកម្មតាមប្រព័ន្ធបច្ចេកវិទ្យា សុវតិ្ថភាពអ៊ីនធឺណិត សារព័ត៌មានអនឡាញ និងព័ត៌មានទាន់ហេតុការណ៍ បណ្តាញសង្គមយក្ស និងយុគសម័យអ៊ីនធឺណិត។
កម្មវិធីនេះផងដែរក៏ជាវេទិកាមួយសម្រាប់អ្នកចូលរួមទាំងអស់ពិភាក្សាគ្នា និងចែករំលែកដោយសេរីពីសារប្រយោជន៍នៃ International Communication of Technology (ICT)។
លោក ទឹម ម៉ាឡៃ ប្រធានបណ្តាញយុវជន ហើយក៏ជាអ្នករៀបចំក្នុងកម្មវិធីនេះបានប្រាប់ឲ្យដឹងថា៖ «ដោយសារកំណើតនៃការប្រើប្រាស់អ៊ីនធឺណិតមានការកើនឡើង ហើយគាត់ (យុវជន) ជាអ្នកដើរតួនាទីយ៉ាងសំខាន់ក្នុងការប្រើប្រាស់បច្ចេកវិទ្យានេះ បើសិនគាត់បានដឹងពីព័ត៌មានស្តីពីសុវិត្ថភាពនៃការប្រើប្រាស់អ៊ីនធឺណិត នេះ គាត់នឹងបានយល់ដឹងពីការចែកចាយព័ត៌មាននិងប្រើប្រាស់ដោយមានសុវត្ថិភាព ហើយការងាររបស់គាត់ក៏មានគុណភាពផងដែរ»។
វាគ្មិនក្នុងកម្មវិធីនេះ។
បើយោងតាមរបាយការណ៍របស់ មជ្ឈមណ្ឌលកម្ពុជាដើម្បីប្រព័ន្ធផ្សព្ធផ្សាយឯករាជ្យ ធ្វើការស្ទង់មតិមួយក្នុងខែមេសា ឆ្នាំ ២០១៥ ស្តីពីអ្នកប្រើប្រាស់ អ៊ីនធឺណិត ក្នុងប្រទេសកម្ពុជា ដោយសាកសួរលើក្រុមមនុស្សមួយក្រុមលើបណ្តាញសង្គមបង្ហាញថា មានអ្នកប្រើប្រាស់ហ្វេសប៊ុក ៩៩ ភាគរយ Google Plus ៨៨ ភាគរយ Line ៨៤ ភាគរយ Instagram ៤៩ ភាគរយ និង Twitter ៣២ ភាគរយ។
បើតាមទិន្នន័យរបស់បញ្ញតិ្តករទូរគមនាគមន៍កម្ពុជាបានឲ្យដឹងថា ចំនួននៃអ្នកប្រើប្រាស់សេវាអ៊ីនធឺណិតនៅក្នុងប្រទេសកម្ពុជាមានការកើនឡើងពី ៣.៨៦ លាននាក់ នៅដំណាច់ឆ្នាំ២០១៣ ដល់ជាង ៥ លាននាក់ នៅដំណាច់ឆ្នាំ ២០១៤។ ចំនួនអ្នកប្រើប្រាស់សេវាទូរស័ព្ទចល័តបានកើនឡើងចំនួន ២១,៩២ លាននាក់ត្រឹមខែមិថុនា ឆ្នាំ ២០១៤។
យោងតាមរបាយការណ៍ខាងលើ មនុស្សជាច្រើនបានប្រើប្រាស់អ៊ីនធឺណិតដោយមិនបានដឹងពីសុវត្ថិភាពនៃការប្រើប្រាស់របស់ខ្លួន ការគិតពីសុវត្ថិភាពនៃការប្រើប្រាស់អ៊ីនធឺណិតគឺសំដៅទៅលើ ការបញ្ចូលទិន្នន័យ ឬព័ត៌មានផ្ទាល់ខ្លួនទៅក្នុង អ៊ីនធឺណិត ដែលជាកត្តាមួយធ្វើឲ្យជនអាក្រក់មួយចំនួន ឆ្លៀតឱកាសធ្វើរឿងមិនល្អដោយប្រយោល និងដោយផ្ទាល់ ហើយកត្តាខ្លះទៀតដូចជាមានមនុស្ស លួចចូល (Hack) ទៅក្នុងគណនីរបស់អ្នកដើម្បីប្រពឹត្តអំពើអាក្រក់អ្វីផ្សេង។ ឧទាហរណ៍ជាក់ស្តែងដូចជា ករណីបង្ហោះប្រាក់ដុល្លាច្រើន ឬបង្ហោះរូបម៉ូតូទើបតែទិញក្នុងបណ្តាញសង្គមហ្វេសប៊ុក។
លោក ឡាច វណ្ណៈ ស្ថាបនិក កាហ្វេនយោបាយនិងជាវាគ្មិនក្នុងកម្មវិធីនេះបាននិយាយ ក្នុងកិច្ចពិភាក្សាថា៖ «យើងមិនទាន់ដឹងថាសុវត្ថិភាពនៃការប្រើប្រាស់អ៊ីនធឺណិតនៅប្រទេសកម្ពុជាស្ថិតនៅក្នុងកម្រិតណានោះទេព្រោះថា យើងអត់មានអ្វីវាស់ព្រោះវាទូលំទូលាយណាស់ហើយកន្លងមក យើងក៏មិនទាន់មានរបាយការណ៍ដែរ។ តែតាមការសិក្សារបស់ខ្ញុំ យើងឃើញថា ការប្រើអ៊ីនធឺណិតនូវបើកប្រើប្រាស់សេរីច្រើន កាលណាយើងបានទូលំទូលាយ និង សេរីពេក ហានិភ័យរបស់យើងក៏ទូលំទូលាយតាមនោះដែរ»។
យុវជន ព្រីង ស៊ីដេត ដែលបានចូលរួមក្នុងកម្មវិធីនេះបានប្រាប់ឲ្យដឹងថា៖ «ខ្ញុំបានចូលប្រធានបទឧក្រិដ្ឋកម្មតាមប្រព័ន្ធបច្ចេកវិទ្យា (ប្រធានបទដែលនិយាយពីមនុស្សដែលមានបំណងអាក្រក់លួចចូលទៅប្រើប្រាស់ និងយកទិន្នន័យពីក្នុងកុំព្យូទ័ររបស់អ្នកដទៃ) ប្រធានបទនេះល្អព្រោះថា អ៊ីនធឺណិត វាពេញនិយមខ្លាំងដូច្នេះយើងត្រូវដឹងពីសុវត្ថិភាពនៃការប្រើវា»៕
អត្ថបទដោយ រៀម ចំរើន reamchamroeun@gmail.com
No comments:
Post a Comment