ស្ដាប់ ឬ ទាញយកសំឡេង
តំណាងប្រជាពលរដ្ឋរងគ្រោះដីធ្លីនៅក្រចេះ ហែក្បួនដាក់ញត្តិជូនស្ថានទូតអូស្ត្រាលី ប្រចាំរាជធានីភ្នំពេញ នៅព្រឹកថ្ងៃទី១៦ ខែឧសភា ឆ្នាំ២០១៤។
RFA/Den Ayuthyea
តំណាងរាស្ត្រមកពីគណបក្សប្រឆាំងឲ្យដឹងថា អភិបាលខេត្តក្រចេះ នឹងដកដីពីក្រុមហ៊ុនសម្បទានសេដ្ឋកិច្ចប្រមាណ ៧ មកឲ្យរដ្ឋគ្រប់គ្រងវិញ បន្ទាប់ពីរកឃើញថា ក្រុមហ៊ុនទាំងនោះមិនបានបំពេញការងារតាមកាតព្វកិច្ច។ បើទោះយ៉ាងនេះក្តី លោកអភិបាលខេត្តមិនទាន់បញ្ជាក់ឲ្យស៊ីជម្រៅលើរឿងនេះនៅឡើយទេ។
ក្រុមហ៊ុនដីសម្បទានសេដ្ឋកិច្ចដែលប្រឈមនឹងការដកហូតត្រឡប់វិញនេះ មិនទាន់មានការបញ្ជាក់ពីមន្ត្រីណាមួយថា មានក្រុមហ៊ុនណាខ្លះ ដីមានទំហំប៉ុន្មាន ឬស្ថិតក្នុងតំបន់ណាខ្លះនៃខេត្តក្រចេះនោះទេ។
លោក កែវ ភីរម្យ តំណាងរាស្ត្រប្រចាំខេត្តក្រចេះ មកពីគណបក្សសង្គ្រោះជាតិ ថ្លែងឲ្យវិទ្យុអាស៊ីសេរី ដឹងនៅថ្ងៃទី២៨ ខែធ្នូ ថា ក្នុងកិច្ចប្រជុំរវាងលោក និងអភិបាលខេត្តក្រចេះ កាលពីពេលថ្មីៗនេះ គឺលោកអភិបាលថា អាជ្ញាធរខេត្តគ្រោងនឹងដកដីពីក្រុមហ៊ុនសម្បទានសេដ្ឋកិច្ចដែលមិនបានបំពេញកាតព្វកិច្ចរបស់ខ្លួន។
អ្នកតំណាងរាស្ត្រគណបក្សប្រឆាំងរូបនេះគាំទ្រយ៉ាងពេញទំហឹងចំពោះចំណាត់ការរបស់អាជ្ញាធរខេត្ត៖ «យើងគាំទ្រវិធានការនេះ គឺរដ្ឋាភិបាលចាប់ផ្ដើមអនុវត្តច្បាប់ដីសម្បទានសេដ្ឋកិច្ច»។
ការបង្ហើបឲ្យដឹងនៅពេលនេះ បន្ទាប់ពីអាជ្ញាធរខេត្តក្រចេះ បានដកហូតដីពីក្រុមហ៊ុនមួយឈ្មោះ ធី.ធី.វ៉ាយ (TTY) ដែលក្រុមហ៊ុននេះធ្វើឲ្យប៉ះពាល់ដីពលរដ្ឋកាលពី២ខែមុន។ អភិបាលខេត្តក្រចេះ លោក ស ចំរ៉ុង មិនទាន់បញ្ជាក់ឲ្យដឹងថា មានក្រុមហ៊ុនប៉ុន្មាន ឬក្រុមហ៊ុនណាខ្លះដែលរងការដកហូតដីវិញនេះទេ។
លោកអភិបាលថា រឿងនេះអាស្រ័យលើក្រុមការងារថ្នាក់ជាតិធ្វើការសម្រេច ហើយពេលនេះគឺស្ថិតនៅក្នុងដៃរបស់ក្រសួងកសិកម្ម និងលោក ឧបនាយករដ្ឋមន្ត្រី ប៊ិន ឈិន ដែលជាប្រធានអាជ្ញាធរជាតិដោះស្រាយទំនាស់ដីធ្លី៖ «ដកមិនដកជារឿងរបស់គណៈកម្មាធិការអន្តរក្រសួងមួយ»។
នៅរយៈពេលចុងក្រោយនេះ រាជរដ្ឋាភិបាលកម្ពុជា បានដកហូតដីពីក្រុមហ៊ុនសម្បទានសេដ្ឋកិច្ចមកគ្រប់គ្រងវិញស្ទើរគ្រប់ខេត្ត បន្ទាប់ពីរកឃើញថា ក្រុមហ៊ុនទាំងនោះគ្មានសកម្មភាពអ្វីក្រោយពីកាប់ឈើអស់ និងដីក្រុមហ៊ុនខ្លះប៉ះពាល់ប្រជាពលរដ្ឋ។ សង្គមស៊ីវិលបានទាមទារឲ្យរដ្ឋាភិបាលមានចំណាត់ការលើក្រុមហ៊ុនទាំងនោះ ប៉ុន្តែគេមិនឃើញក្រុមហ៊ុនណាមួយទទួលវិន័យនៅឡើយ។
យ៉ាងណាក៏ដោយ អភិបាលរងខេត្តក្រចេះ លោក ខាន់ ចំណាន ឲ្យដឹងថា អាជ្ញាធរខេត្តក្រចេះ បានសិក្សាស្រាវជ្រាវលើក្រុមហ៊ុនដីសម្បទានសេដ្ឋកិច្ចចំនួន ១៩ ដែលជាក្រុមហ៊ុនប្រឈមនឹងការដកហូត ប៉ុន្តែមិនដឹងថា ថ្នាក់ជាតិសម្រេចយ៉ាងណានោះទេ។ ចំណែករដ្ឋមន្ត្រីក្រសួងកសិកម្ម អ៊ុក រ៉ាប៊ុន ឲ្យដឹងយ៉ាងខ្លីថា រឿងនេះក្រសួងកសិកម្ម បានធ្វើរួចអស់ហើយ។
តំណាងរាស្ត្រគណបក្សសង្គ្រោះជាតិ លោក កែវ ភីរម្យ ទាមទារឲ្យអាជ្ញាធរខេត្តក្រចេះ យកដីដែលដកហូតពីក្រុមហ៊ុនទាំងនោះប្រគល់ឲ្យពលរដ្ឋដែលមានបញ្ហាដីធ្លីនៅខេត្ត ស្របពេលដែលប្រជាពលរដ្ឋក្រីក្រក្នុងខេត្តនេះគ្មានដីបង្កបង្កើនផលចិញ្ចឹមជីវិត៕
No comments:
Post a Comment