December 29, 2014 CEN
លោកស្រី ឡាក់ សុភាព ជំនួយការលោកកឹម សុខា
ភ្នំពេញ: គណៈកម្មាធិការវិន័យគណបក្សសង្គ្រោះជាតិ បានកោះប្រជុំជាបន្ទាន់មួយ នៅរសៀលថ្ងៃអាទិត្យ ទី២៨ ខែធ្នូ ឆ្នាំ២០១៤ នេះ ដើម្បីធ្វើការប្រជុំដាក់វិន័យទៅលើលលោកស្រី ឡាក់ សុភាព សមាជិកគណៈកម្មការនាយក និងជាជំនួយការលោក កឹម សុខា អនុប្រធានគណបក្សសង្គ្រោះជាតិ និងជាអនុប្រធានទី១ នៃរដ្ឋសភា ទាក់ទងការនិយាយពីរឿងពុករលួយនិងការបែកបាក់ផ្ទៃក្នុងគណបក្សសង្គ្រោះជាតិ។ នេះបើតាមការបញ្ជាក់ឲ្យពីមន្ត្រីជាន់ខ្ពស់គណបក្សសង្គ្រោះជាតិ ដែលបានប្រាប់គេហទំព័រ CEN នៅព្រឹកថ្ងៃទី២៨ ខែធ្នូ ឆ្នាំ២០១៤ នេះ។
លោក អ៊ូ ច័ន្ទឫទ្ធិ ប្រធានគណៈកម្មាធិការវិន័យគណបក្សសង្គ្រោះជាតិ បានប្រាប់គេហទំព័រ CEN ឲ្យដឹងថា គណបក្សមិនអាចអនុញ្ញាតឲ្យសកម្មជន ជាពិសេសសមាជិកគណបក្សណាម្នាក់ ដែលធ្វើការបរិហាកេរ្តិ៍ខុសការពិត ហើយជាពិសេសធ្វើឲ្យប៉ះពាល់ដល់កិត្តយសថ្នាក់ដឹកនាំ ក៏ដូចជាកិត្តិយសគណបក្ស។ ដូច្នេះគណៈកម្មាធិការវិន័យបានអញ្ជើញលោកស្រី ឡាក់ សុភាព មកបំភ្លឺ ហេតុអីបានជាគាត់ថា ថ្នាក់ដឹកនាំប្រព្រឹត្តអំពើពុកករលួយ? មានការបែកបាក់ផ្ទៃក្នុង ដែលខុសពីការពិតនេះ នៅមុខគណៈកម្មការវិន័យ?។
លោកបានបញ្ជាក់ថា “អ្វីដែលគាត់មានប្រសាសន៍ជាសាធារណៈ ជាពិសេសចំពោះសារព័ត៌មាននេះ គឺជាទង្វើមួយខុសឆ្គងធ្ងន់ធ្ងរបំផុត ដែលយើងត្រូវឲ្យគាត់សុំទោសទៅសាធារណៈជនថា អ្វីដែលគាត់លើកឡើងគឺជាការចោទប្រកាន់គ្មានមូលដ្ឋាន ហើយបើមិនដូច្នោះទេ យើងមិនអាចអនុញ្ញាតឲ្យគាត់បន្តនៅក្នុងគណបក្សរបស់យើងបានទៀតទេ ពីព្រោះខុសគោលការណ៍គណបក្ស ហើយខ្ញុំប្រជុំគណៈកម្មការវិន័យនៅរសៀលនេះ(២៨ធ្នូ) ដើម្បីចាត់វិធានការចំពោះសំដីរបស់គាត់”។
សូមជម្រាបថា ការកោះប្រជុំបន្ទាន់របស់គណៈកម្មាធិការវិន័យគណបក្សសង្គ្រោះជាតិ នៅរសៀលថ្ងៃអាទិត្យនេះ គឺធ្វើឡើង មួយថ្ងៃបន្ទាប់ពីលោកស្រី ឡាក់ សុភាព បានធ្វើការលាតត្រដាងរឿងអាស្រូវ ក្នុងការប្រព្រឹត្តអំពើពុករលួយរបស់មេដឹកនាំគណបក្សសង្គ្រោះជាតិ និងអះអាងថា គណបក្សសង្គ្រោះជាតិ មានការបែកបាក់ផ្ទៃក្នុង ទាំងនៅក្នុងប្រទេស និងទាំងនៅក្រៅប្រទេស។
ការថ្លែងរបស់លោកស្រី ឡាក់ សុភាព បានធ្វើឡើង កាលពីថ្ងៃទី២៧ ខែធ្នូ ឆ្នាំ២០១៤ នៅមជ្ឈមណ្ឌលអប់រំច្បាប់សម្រាប់សហគមន៍ នៅពេលដែលលោកស្រី ចូលរួមជាមួយក្រុមបណ្តាញសង្គម ដឹកនាំដោយលោក កែម ឡី ដែលគ្រោងនឹងបង្កើតគណបក្សថ្មីមួយ៕ ប្រភពៈCEN
លោកអ៊ូ ច័ន្ទឫទ្ធិ ប្រធានគណៈកម្មាធិការវិន័យគណបក្សសង្គ្រោះជាតិ
No comments:
Post a Comment