ដោយ៖ ជន ស្រីណុច និង អ៊ឹង ប៊ុនថន | ថ្ងៃសុក្រ ទី13 ខែកញ្ញា ឆ្នាំ2013 | VOD
មន្ត្រីជាន់ខ្ពស់គណបក្សប្រជាជនកម្ពុជា មិនបានបង្ហាញពីរបៀបវារៈ សម្រាប់កិច្ចប្រជុំជាមួយគណបក្សសង្គ្រោះជាតិ ក្រោមអធិបតីភាពព្រះមហាក្សត្រ នៅថ្ងៃសៅរ៍ ស្អែកនេះទេ។
នៅពេលដែល VOD ព្យាយាមសួរម្តងទៀត នៅរសៀលថ្ងៃសុក្រនេះ លោក ស ខេង បានបញ្ជាក់ថា គណបក្សប្រជាជនកម្ពុជា មិនបានត្រៀមចំណុចណាមួយ ដើម្បីលើកឡើងនៅក្នុង កិច្ចប្រជុំនោះទេ តែគណបក្សកាន់អំណាចនេះនឹងគោរពតាមព្រះរាជតម្រាស់ព្រះមហាក្សត្រ ៖ "យើងត្រូវដឹងអញ្ចឹង ព្រះមហាក្សត្រលោកគង់ជាព្រះរាជអធិបតីភាពដ៏ខ្ពង់ខ្ពស់ ហើយជាទីសក្ការៈដ៏ខ្ពង់ខ្ពស់ ហើយលោកមានព្រះរាជបន្ទូលថាម៉េច យើងទាំងអស់គ្នាត្រូវតែគោរពតាមលោក ដើម្បីធានានូវការឯកភាពជាតិ និងនិរន្តភាពជាតិ អញ្ចឹងហើយគណបក្សប្រជាជនអត់មានអីលើសពីហ្នឹងទេ"។
សម្រាប់គណបក្សសង្គ្រោះជាតិ លោក កឹម សុខា នៅក្នុងបទសម្ភាសន៍ជាមួយVODនៅព្រឹកថ្ងៃសុក្រនេះ បានបញ្ជាក់ថា ប្រសិនបើមិនមានគណៈកម្មការចម្រុះទេ ការចរចារឿងបែងចែកអំណាច មិនអាចមានទេ ៖ "គណបក្សសង្គ្រោះជាតិនៅដដែល គឺការពារឆន្ទៈប្រជាពលរដ្ឋ រកយុត្តិធម៌ជូនប្រជាពលរដ្ឋ ហើយទាមទារឲ្យមានការផ្លាស់ប្តូរនៅក្នុងសង្គមកម្ពុជាយើងនេះ នេះហើយដែលជាជំហររបស់គណបក្សសង្គ្រោះជាតិ ដែលយើងនឹងចូលជជែកគ្នា ក្នុងក្របខណ្ឌហ្នឹង គឺយើងមិនទៅជជែកពីរឿងការចែកអំណាច មុនរំលងឆន្ទៈប្រជាពលរដ្ឋជាដាច់ខាត"។
លោកបន្តថា មហាបាតុកម្មរយៈពេល៣ថ្ងៃ នៅតែមាន បើទោះជាមានព្រះរាជសាររបស់ព្រះអង្គក៏ដោយ៕
សរសេរមកកាន់កញ្ញា ជន ស្រីណុច តាមរយៈ chornsreynoch@vodhotnews.com
No comments:
Post a Comment