នៅក្នុងបញ្ជីឈ្មោះបេក្ខជនតំណាងរាស្ត្ររបស់គណបក្សសង្គ្រោះជាតិ
មានកំហុសថ្ងៃខែឆ្នាំកំណើត និងឈ្មោះរបស់បេក្ខជនខ្លះ
ដែលនៅមិនទាន់អាចទទួលស្គាល់ជាផ្លូវការបាន ។
នេះបើយោងតាមការបញ្ជាក់ពីមន្ត្រីគ.ជ.ប ។
លោកទេព នីថា អគ្គលេខាធិការ នៃគណកម្មាធិការនេះ
បានប្រាប់ប្រព័ន្ធផ្សព្វផ្សាយក្នុងស្រុកមួយថា
បញ្ជីឈ្មោះរបស់គណបក្សសង្គ្រោះជាតិ ដែលបានដាក់ជូនគ.ជ.ប
កាលពីថ្ងៃពីរសៀលថ្ងៃសុក្រកន្លងទៅ
នៅមានការសរសេរថ្ងៃខែឆ្នាំកំណើតរបស់បេក្ខជនខុស
ពោលគឺបេក្ខជនតែម្នាក់ មានលិខិតស្នាមផ្នែករដ្ឋបាល
ដែលមានសរសេរថ្ងៃខែឆ្នាំកំណើតខុសគ្នា ហើយក៏មានកំហុសអក្ខរាវិរុទ្ធ
នៃការសរសេរឈ្មោះបេក្ខជន ដែរ ។
លោកថា ករណីបែបនេះ
បានកើតឡើងទៅលើឈ្មោះបេក្ខជនមួយចំនួននៃគណបក្សសង្គ្រោះជាតិ ហើយដែល
គជប នឹងបញ្ជូនត្រឡប់ទៅគណបក្សនេះវិញ
ដើម្បីធ្វើការកែតម្រូវអោយបានទាន់ពេល ។
ទាក់ទងនឹងកំហុសថ្ងៃខែឆ្នាំកំនើតរបស់បេក្ខជននេះ លោក ញ៉ែម
ប៉ុញ្ញរិទ្ធ បានទទូចអោយ គជប
ប្រញ៉ាប់ប្រញ៉ាល់ផ្ញើឈ្មោះបេក្ខជនដែល គជប បានរក
ឃើញថាមានកំហុសថ្ងៃខែឆ្នាំកំណើតនោះ ដោយសារពួកគេនៅសល់ពេលវេលាតិច
សំរាប់ការដាក់បញ្ជីនេះជូនគជប ជាថ្មី ។
នេះបើយោងតាមការផ្សាយរបស់វិទ្យុសម្លេងប្រជាធិបតេយ្យ VOD ។
យោងតាមប្រតិទិនរបស់ គជប កាលបរិច្ឆេទបិទឈប់ទទួល
ការដាក់បញ្ជីបេក្ខជនតំណាងរាស្ត្រនៃការបោះឆ្នោតអាណត្តិទី៥ ជូន គជប
គឺនៅវេលា ម៉ោង ៥.០០ ល្ងាច នៃថ្ងៃទី១៣ ខែឧសភា ឆ្នាំ២០១៣ ។
គួរជំរាបផងដែរថា
ករណីស្នើអោយមានការកែតម្រូវបញ្ជីបេក្ខជនឈរឈ្មោះបោះឆ្នោតតំណាងរាស្ត្រ
នេះ ក៏ធ្លាប់កើតមានចំពោះគណបក្សពីរផ្សេងទៀត ដែរ
គឺគណបក្សសាធារណរដ្ឋប្រជាធិបតេយ្យ និងគណបក្សសម្ព័ន្ធប្រជាធិបតេយ្យ
ប៉ុន្តែរហូតមកដល់ពេល គណបក្សទាំងពីរបានធ្វើការកែតម្រូវអោយ
មានលក្ខណៈត្រឹមត្រូវតាមច្បាប់ រួចរាល់ ហើយ គជប
ក៏បានទទួលស្គាល់រួចរាល់ហើយ ។
យោងតាមគេហទំព័ររបស់គជប រហូតមកទល់ពេលនេះ មានគណបក្សចំនួន ៧
ដែលបានចុះបញ្ជី ហើយគណបក្សចំនួន៦ បានត្រូវ គជប ប្រកាស
បញ្ជីឈ្មោះជាផ្លូវការហើយ ។
គណបក្សទាំងនោះ រួមមាន៖ គណបក្សប្រជាជនកម្ពុជា
គណបក្សសញ្ជាតិកម្ពុជា គណបក្សហ្វ៊ុន សិនប៉ិច
គណបក្សសាធារណរដ្ឋប្រជាធិបតេយ្យ គណបក្សសម្ព័ន្ធ
ដើម្បីលទ្ធិប្រជាធិបតេយ្យ និងគណបក្សខ្មែរឈប់ក្រ ។
ដោយឡែក គណបក្សសង្គ្រោះជាតិ
នៅត្រូវធ្វើការកែតម្រូវដោយប្រើពេលមួយថ្ងៃនេះទៀត ដោយហេតុថា
គណបក្សនេះ ដាក់បញ្ជីឈ្មោះបេក្ខជន យឺតយ៉ាវ គឺដាក់នៅរសៀលថ្ងៃសុក្រ
ដែលថ្ងៃបន្ទាប់ឈានចូលដល់ថ្ងៃចុងសប្តាហ៍ ។
កាលពីពេលថ្មីៗនេះ សម្តេចនាយករដ្ឋមន្ត្រី ហ៊ុន សែន
បានថ្លែងពីអាថ៌កំបាំងនៃការដាក់បញ្ជីឈ្មោះបេក្ខជនរបស់គណបក្ស
សង្គ្រោះជាតិនេះថា
មានសេចក្តីរាយការណ៍សំងាត់ពីផ្ទៃក្នុងគណបក្សសង្គ្រោះជាតិមកថា
មានការខ្វែងគំនិតគ្នា ក្នុងការដាក់បេក្ខជននៅខេត្តខ្លះ
ដែលធ្វើអោយពួកគេ
មិនអាចដាក់ចេញនូវបញ្ជីឈ្មោះដែលមានការឯកភាពទាំងស្រុង
ដូចគណបក្សដ៏ទៃ ៕
No comments:
Post a Comment