Cambodian migrant workers escaped back to Cambodia after their Thai employers told them that they have to work 10 months to repay the debt, saying that their employment agencies had took 20,000 Baht $666) from them for each employee. The 4 workers were recruited by KLM Manpower and sent to work for a Thai construction company in October 2012. They said that the Thai employers forced them to work long hours without pay and without sufficient food. When they were sick, the Thai employers did not let them return home, saying they can return only if their wives repaid the $20,000 Baht debt first. On 3 January 2013, they decided to escape back to Cambodia.
ដោយ អ៊ុក សាវបូរី 2013-01-03 RFA
ពលរដ្ឋដែលចំណាកស្រុកទៅប្រទេសថៃ
កំពុងរត់ពីការងារវិលមកប្រទេសខ្មែរវិញ។ ក្រុមពលករអះអាងថា
ពួកគាត់ដាច់ចិត្តរត់មកស្រុកខ្មែរវិញនោះ ដោយសារថៅកែថៃ ប្រាប់ថា
ក្រុមហ៊ុនដែលបញ្ជូនគាត់ទៅនោះ
បានបើកយកប្រាក់ខែរបស់ពួកគេម្នាក់ ២ម៉ឺនបាត ពីថៅកែថៃ ហើយ
ហេតុនេះពលករខ្មែរត្រូវធ្វើការ ១០ខែ
ទើបអាចរួចលុយក្រុមហ៊ុនខ្មែរបើកមុននោះ។
ពួកគាត់បន្តថា បានជារត់គេចមកពីទី១
មិនទាន់ចូលធ្វើការផងជំពាក់ប្រាក់គេ។ ទី២ ប្រាក់កម្រៃប្រចាំថ្ងៃ
និងប្រាក់ថ្លៃអាហារមិនទទួលបានតាមការសន្យានោះទេ។ ទី៣
ការងារធ្វើខុសកិច្ចសន្យាមុនបញ្ជូនទៅ ទើបពួកគាតរត់គេចមកវិញ។
ពលករស្របច្បាប់ ៤នាក់ ចេញទៅធ្វើការនៅប្រទេសថៃ តាមក្រុមហ៊ុន
ខេ.អិល.អឹម មែនផាវើ (KLM Manpower) កាលពីខែតុលា ឆ្នាំ២០១២
រត់គេចពីប្រទេសថៃ តាំងពីថ្ងៃទី១ ខែមករា ឆ្នាំ២០១៣
បានមកដល់កម្ពុជា ហើយនៅរសៀលថ្ងៃទី៣ ខែមករា។
ពលករអាយុ ៥០ឆ្នាំ សុំមិនបញ្ចេញឈ្មោះបានអះអាងថា ក្រុមហ៊ុន
ខេ.អិល.អឹម មែនផាវើ បានបញ្ជូនគាត់ទៅធ្វើការសំណង់នៅប្រទេសថៃ
ពីថ្ងៃទី៩ ខែតុលា ឆ្នាំ២០១២។ ពេលទៅដល់ថៃ
ពួកគាត់មិនបានធ្វើការសំណង់តាមការសន្យាទេ
បែរជាធ្វើការសំណង់ប្រភេទម៉ៅការ ដោយថៅកែថៃ
បង្ខំឲ្យធ្វើការដើម្បីឲ្យឆាប់ ហើយគេទទួលលុយចំណេញច្រើន។
ពួកគាត់ ៣៩នាក់ ដែលចេញទៅថៃ ពីខែតុលា ឆ្នាំ២០១២ នោះ
បានរត់ទៅសំណង់ផ្សេងៗខ្លះ
និងខ្លះធ្លាក់ខ្លួនឈឺត្រឡប់មកភូមិស្រុកវិញ កាលពីខែធ្នូ។
ចំណែកពួកគាត់បន្តទ្រាំធ្វើការមកដល់ដើមឆ្នាំ២០១៣
ប៉ុន្តែមិនអាចទ្រាំតទៅទៀត ព្រោះមនុស្សធ្វើការកាន់តែតិច ថៅកែថៃ
បង្ខំឲ្យធ្វើការបន្ថែម ដោយគ្មានឲ្យលុយ និងឲ្យអាហារ
ទើបរត់គេចពីការដ្ឋានសំណង់កាលពីយប់ថ្ងៃចូលឆ្នាំសកល ២០១៣៖ «ការងារ
យកទៅម៉ៅរ៉ាប់សោះ។ ហើយដល់ទៅ ខ្ញុំឈឺ ២សារ ថាឲ្យខ្ញុំមកផ្ទះ។
តែក្រុមហ៊ុនថៃ អ្នកម៉ៅការនោះគេថាទេ ឲ្យប្រពន្ធមកធានាមក
ហើយឲ្យយកប្រាក់ ២ម៉ឺនបាតមកលោះទៅ បានហើយ ព្រោះ ចាន់ សារ៉ន នោះ
យកលុយគេក្នុងម្នាក់ ២ម៉ឺនមកហើយ»។
បុរសម្នាក់ទៀតអះអាងថា ពួកគាត់ ៤នាក់ មានប្រុស ៣នាក់ ស្រីម្នាក់
កំពុងធ្វើដំណើរមកដល់ខេត្តកំពង់ឆ្នាំង ហើយ
ព្រោះតែទ្រាំធ្វើការសំណង់នៅប្រទេសថៃ
តទៅទៀតគាត់នឹងកាន់តែឈឺធ្ងន់៖ «គេអត់ទទួលខុសត្រូវ
ដល់មែនទែនទៅ គេរុញយើងតែពីនឹងទៅៗដូចយកទៅលក់ឲ្យគេ។
មេការខាងនោះគេថាតាហ្នឹងយកលុយពីគេ ២០-៣០ម៉ឺនមកហើយ
ក្រុមបងឯងហ្នឹងអត់មានសិទ្ធិអីមកផ្ទះបានទេ»។
ស្ត្រីអាយុ ២០ឆ្នាំ មិនបញ្ចេញឈ្មោះ អះអាងថា ពេលទៅដល់ថៃ
គាត់ធ្វើការធ្ងន់ដូចបុរសដែរ ប៉ុន្តែប្រាក់ឈ្នួលបានតែ
២៤០បាតក្នុង១ថ្ងៃ ខុសពីបុរសបាន ២៧០បាតក្នុង១ថ្ងៃ។ អ្នកស្រីថា
គាត់រត់គេចពីការងារប្រទេសថៃ ពីព្រោះការសន្យារបស់ក្រុមហ៊ុន
ខេ.អិល.អឹម មែនផាវើ មុនបញ្ជូនគាត់ទៅ
ប្រាប់ថាពលករគ្មានជំនាញសំណង់ប្រុស ឬស្រី ក៏ទទួលបាន
៣០០បាតក្នុង១ថ្ងៃ មានកន្លែងស្នាក់នៅ ផ្តល់អាហារ ៣ពេលក្នុង១ថ្ងៃ
និងជួយព្យាបាលជំងឺ។
ប៉ុន្តែពេលគាត់ទៅដល់ភ្លាម ថៅកែថៃ បានដកយកលិខិតឆ្លងដែន។
ពលករទាំងអស់ត្រូវសងប្រាក់ម្នាក់ ២ម៉ឺនបាត
ដែលក្រុមហ៊ុនបញ្ជូនគាត់ទៅ បើកយកលុយមុនក្នុងម្នាក់ៗ។ ថៅកែថៃ
ឲ្យគាត់ធ្វើការសងរំលោះលុយ ២ម៉ឺនបាតចំនួន ១០ខែ។ ចំពោះថ្លៃអាហារ
គឺទិញខ្លួនឯង។ ថ្លៃព្យាបាលជំងឺ ក៏ខ្លួនឯងដែរ។ ថៃ
ឲ្យតែកន្លែងស្នាក់នៅដែលខ្វះអនាម័យ។ ដោយសារក្រុមហ៊ុនបញ្ជូន
និងទទួលមិនអនុវត្តតាមការសន្យា ទើបពួកគាត់រត់គេចមកវិញ៖ «ស្រីលើកស៊ីម៉ងត៍ ២នាក់ ហើយអូសទៅឲ្យគេលាយពូនឲ្យគេ»។
តំណាងក្រុមហ៊ុន ខេ.អិល.អឹម មែនផាវវើ មានទីតាំងនៅស្ទឹងមានជ័យ កញ្ញា
រស្មី ថ្លែងថា ពលករម្នាក់ត្រូវបង់ប្រាក់មុនចេញដំណើរ ២០០ដុល្លារ
ដើម្បីក្រុមហ៊ុនរត់ការ និងធ្វើលិខិតឆ្លងដែន។ ពេលទៅដល់ថៃ
ក្រុមហ៊ុនឲ្យកម្មករបង់ ២ម៉ឺនបាតម្នាក់
ដើម្បីសុំសិទ្ធិធ្វើការស្របច្បាប់នៅប្រទេសថៃ
ប្រសិនបើកម្មកររត់ពីការងារ ក្រុមហ៊ុននោះខាត
ហើយត្រូវសងប្រាក់ទៅថៅកែថៃ វិញ៖ «កាត់ ១ខែ ២ពាន់បាត។ អីចឹង
កន្លះខែគេកាត់ ១ពាន់បាត សម្រាប់រយៈពេល ១០ខែ វាស្មើនឹង ២ម៉ឺនបាត។
កាត់ហ្នឹងក្នុងការរត់ឯកសារផ្សេងៗទៀត
ព្រោះអីនៅទីនេះខ្ញុំរត់ឯកសារអីទៅ ហើយដល់ថៃ ខ្ញុំរត់ផ្សេងទៀត»។
ប្រធានកម្មវិធីសិទ្ធិការងារនៃមជ្ឈមណ្ឌលអប់រំច្បាប់សម្រាប់
សហគមន៍ លោក មឿន តុលា ថ្លែងថា ក្រុមហ៊ុនបញ្ជូនពលករ
ហើយឲ្យមនុស្សទៅសងបំណុល និងដកយកលិខិតឆ្លងដែនគេទុក
គឺជាការដាក់ខ្នោះពលករឲ្យធ្វើការងារបែបទាសភាព។ ទី២
បើក្រុមហ៊ុនបញ្ជូន
និងក្រុមហ៊ុនទទួលមិនគោរពតាមការសន្យាដូចមានចែងក្នុងកិច្ចសន្យា
ទេ ហើយពលកររត់គេចមកភូមិស្រុកវិញ ឯក្រុមហ៊ុនតាមរករឿងពលករនោះ
ក្រុមហ៊ុននោះក៏ត្រូវប្រឈមផ្លូវច្បាប់ជួញដូរដែរ។
ប្រធានសេវាកម្មមេធាវីកម្ពុជា លោក គង់ សំអុន ពន្យល់ថា
កម្មករស្របច្បាប់ គឺកម្មករដែលមានរដ្ឋាភិបាលបញ្ជូនពលករ
និងរដ្ឋាភិបាលទទួលពលករ បានធ្វើកិច្ចសន្យាជាមួយគ្នា៕
No comments:
Post a Comment