A Change of Guard
សូមស្តាប់វិទ្យុសង្គ្រោះជាតិ Please read more Khmer news and listen to CNRP Radio at National Rescue Party. សូមស្តាប់វីទ្យុខ្មែរប៉ុស្តិ៍/Khmer Post Radio.
Follow Khmerization on Facebook/តាមដានខ្មែរូបនីយកម្មតាម Facebook: https://www.facebook.com/khmerization.khmerican
Monday 25 July 2016
ក្រុមហ៊ុនដីសម្បទានលើកពីបញ្ហាដែលពួកគេប្រឈម
តំបន់ដីសម្បទានសេដ្ឋកិច្ចមួយកន្លែងនៅខេត្តរតនគិរីកាលពីឆ្នាំមុន។ រូបថត អង្គការអាដហុក
ក្រុមហ៊ុនដីសម្បទានលើកពីបញ្ហាដែលពួកគេប្រឈម
Fri, 22 July 2016 ppp
ផាក់ ស៊ាងលី
ភ្នំពេញៈ ក្រុមឧកញ៉ា និងម្ចាស់ក្រុមហ៊ុនខ្មែរ និងបរទេសបានប្រាប់ក្រសួងកសិកម្មពីចំណុចខ្វះខាតនៅក្នុងការអនុវត្តច្បាប់ និងលើកឡើងពីបញ្ហារបស់ពួកគេនៅក្នុងការវិនិយោគលើដីសម្បទានសេដ្ឋកិច្ចនៅកម្ពុជាដែលប្រឈមខ្លាំងជាមួយនឹងសហគមន៍មូលដ្ឋានខណៈដែលអង្គការសង្គមស៊ីវិលបានរកឃើញថាការផ្តល់ដីសម្បទានសេដ្ឋកិច្ចគឺជាមូលហេតុចម្បងដែលធ្វើឲ្យកើតមានជម្លោះដីធ្លីនៅស្ទើរទូទាំងប្រទេស។
មន្ត្រីក្រសួងកសិកម្ម និងក្រុមហ៊ុនដីសម្បទានសេដ្ឋកិច្ចខ្មែរ និងបរទេសបានជួបជុំគ្នាដ៏កម្រមួយកាលពីម្សិលមិញក្នុងរាជធានីភ្នំពេញដែលជាការបើកឱកាសឲ្យភាគីក្រុមហ៊ុនទាំងនោះលើកឡើងពីភាពអវិជ្ជមាននៃការអនុវត្តច្បាប់របស់មន្ត្រីរដ្ឋាភិបាលនាពេលកន្លងមក។
លោកឧកញ៉ា លីម ហេង ម្ចាស់ក្រុមហ៊ុនលីមហេងគ្រុបបានលើកឡើងថាការផ្សព្វផ្សាយព័ត៌មានពីដីសម្បទានសេដ្ឋកិច្ចទៅដល់សហគមន៍មូលដ្ឋានគឺមានការខ្វះខាត។ នេះបានបង្កឲ្យមានទំនាស់រវាងពលរដ្ឋ និងក្រុមហ៊ុនហើយធ្វើឲ្យពលរដ្ឋចាត់ទុកក្រុមហ៊ុនថាជា «សត្រូវ» ទៅវិញ។ ឆ្លៀតឱកាសនោះក៏មានអ្នកនយោបាយខ្លះបានបំផុសពលរដ្ឋថាក្រុមហ៊ុនទៅយកដីពួកគាត់។
លោកថា៖ «យើងមានទំនាស់ផលប្រយោជន៍ជាច្រើននៅមូលដ្ឋាន។ ដោយសារអី? ដោយសារខ្វះការផ្សព្វផ្សាយ។ ក្រសួង ឬរដ្ឋគួរតែផ្សព្វផ្សាយពីផលប្រយោជន៍ និងគុណសម្បត្តិរបស់ដីសម្បទានសេដ្ឋកិច្ចឲ្យពលរដ្ឋមូលដ្ឋានបានយល់ថាការវិនិយោគនេះគឺដើម្បីប្រយោជន៍សេដ្ឋកិច្ចជាតិ និងពលរដ្ឋនៅមូលដ្ឋាន»។
លោកឧកញ៉ាបានស្នើឲ្យក្រសួងកសិកម្មផលិតជាខ្សែវីដេអូខ្លីៗពីគុណប្រយោជន៍ដីសម្បទានសេដ្ឋកិច្ចហើយធ្វើការផ្សព្វផ្សាយជាសាធារណៈ។
លោកបន្ថែមថា ក្រុមហ៊ុនមានសិទ្ធិតែស្នាក់នៅ និងអាស្រ័យផលលើដីនោះប៉ុណ្ណោះហើយនឹងប្រគល់ឲ្យរដ្ឋវិញបន្ទាប់ពី ៥០ ឆ្នាំក្រោយមក។ ហេតុនោះលោកក៏បានស្នើឲ្យក្រសួងកសិកម្មជាអ្នកធ្វើការចុះបញ្ជីដីដែលជួលឲ្យក្រុមហ៊ុននោះវិញគឺមិនមែនម្ចាស់ក្រុមហ៊ុននោះទេ។ លើសពីនោះលោកក៏សុំឲ្យក្រសួងធ្វើការពិគ្រោះជាមួយនឹងក្រុមហ៊ុននៅមុនពេលដែលចេញអនុក្រឹត្យ ឬសេចក្តីសម្រេចណាមួយដែលពាក់ព័ន្ធទៅនឹងដីសម្បទានសេដ្ឋកិច្ច។
ជំនួបនេះត្រូវបានធ្វើឡើងក្រោយពីលោក វេង សាខុន បានឡើងកាន់តំណែងជារដ្ឋមន្ត្រីក្រសួងកសិកម្មបានជាង ៣ ខែ។
លោកឧកញ៉ា ឡេង រិទ្ធី តំណាងសមាគមវិនិយោគិនវៀតណាមដែលមានក្រុមហ៊ុនជាង ២០ នៅកម្ពុជាបានស្វាគមន៍ចំពោះជំនួបដែលមិនធ្លាប់មាននេះហើយបានលើកឡើងការវិវឌ្ឍក្រោយពីមានរដ្ឋមន្ត្រីថ្មីពិសេសគឺការយកចិត្តទុកដាក់លើការផ្តល់សិទ្ធិឲ្យមន្ត្រីកសិកម្មថ្នាក់ក្រោមធ្វើការសម្រេចលើការងារដីសម្បទានមួយចំនួន។
លោកបញ្ជាក់ថា៖ «ខ្ញុំនិយាយតាំងពី ២០១០។ ពីមុនអត់មានប្រជុំរួមលើកឡើងចឹងទេ។ មន្ទីរជាអ្នកនៅក្បែរក្រុមហ៊ុនដឹងសុខទុក្ខយើង។ ពីដើមស្អីៗក៏ក្រសួង [ដែល] នៅភ្នំពេញអង្គុយក្នុងម៉ាស៊ីនត្រជាក់មិនដែលដឹងអ្នកនៅក្រោមទេ»។
លោកបានឲ្យដឹងថា ក្នុងរយៈពេលជាង ១០ ឆ្នាំមកនេះក្រុមហ៊ុនវៀតណាមទាំងអស់បាននិងកំពុងតែដាំដុះលើផ្ទៃដីប្រមាណជា ១៥ ម៉ឺនហិកតា។
លោកឧកញ៉ាបានស្នើឲ្យក្រសួងបញ្ជាក់ប្រាប់ពីនាយកដ្ឋាននីមួយៗឲ្យបានច្បាស់ដើម្បីងាយស្រួលក្នុងការយកឯកសារពាក់ព័ន្ធទៅដាក់ និងចៀសវាងចំណាយពេលយូរ ឬបាត់ឯកសារដូចលើកមុន។
លោក ហេង សារ៉ាត់ តំណាងក្រុមហ៊ុន TTY Agriculture របស់លោកឧកញ៉ា ណា ម៉ារឌី ដែលមានដីសម្បទាននៅក្នុងស្រុកស្នួលខេត្តក្រចេះថ្លែងប្រាប់ថាក្រុមហ៊ុនបានទទួលដីសម្បទានសេដ្ឋកិច្ចចំនួន ៩៨៧០ ហិកតាប៉ុន្តែនាពេលបច្ចុប្បនេះក្រុមហ៊ុននៅសល់ដីតែ ២១៥ ហិកតាតែប៉ុណ្ណោះក្រោយពីកាត់ផលប៉ះពាល់ហើយនៅមានមន្ត្រីរាជការខ្លះបានកំពុងតែសុំដី ១ គ្រួសារ ៥ ហិកតាទៀតផង។ លោកថាដំបូងឡើយមានតែ ៣៣ គ្រួសារដែលប៉ះពាល់ហើយក្រុមហ៊ុនបានកាត់ដីពួកគាត់ចេញ។ តែក្រោយមកចំនួនគ្រួសារបានកើនទៅដល់ ២៧០ គ្រួសារ។
លោកត្អូញត្អែរថា៖ «យើងធ្វើការឈូសឆាយដីមានការលំបាកណាស់គ្រាន់តែដាក់គ្រឿងចក្រចូលភ្លាមមានបាតុកម្មតែម្តង។ ចំនួនពលរដ្ឋគឺកើនឡើងរហូតដល់យើងធ្វើការលែងកើត។ អ្នកបានដីហើយក៏បាតុកម្មជាមួយអ្នកលំហូរមកថ្មី»។ លោកថាក្រុមហ៊ុនលោកបានចំណាយប្រាក់ច្រើនណាស់ក្នុងការសង់ហេដ្ឋារចនាសម្ព័ន្ធ។
លោកឧកញ៉ា សូ ងួន អគ្គនាយកក្រុមហ៊ុនវើលទ្រីស្តារបានសម្ដែងក្តីបារម្ភនៅពេលដែលក្រសួងកាត់បន្ថយរយៈពេលវិនិយោគមកនៅត្រឹម ៥០ ឆ្នាំដែលនេះបានធ្វើឲ្យប៉ះពាល់ដល់ដៃគូបណ្តាក់ទុនបរទេសរបស់លោក។ លើសពីនោះលោកក៏បានលើកឡើងពីរឿងដែលមានមន្ត្រីតម្រូវឲ្យក្រុមហ៊ុនលោកធ្វើការបង់ពន្ធលើផ្ទៃដីព្រៃដែលមិនទាន់ធ្វើការឈូសឆាយនោះផងដែរ។
លោករដ្ឋមន្ត្រី វេង សាខុន បានថ្លែងថាក្រសួងនឹងធ្វើការពិនិត្យពីករណីនីមួយៗដើម្បីធ្វើការដោះស្រាយជាមួយនឹងក្រុមការងារ។
លោករដ្ឋមន្ត្រីបញ្ជាក់ថា៖ «រយៈពេលជាង ១០ ឆ្នាំមកនេះគឺជាបទពិសោធដែលក្រសួងបានមើលឃើញថាតើគួរធ្វើបែបណានៅពេលខាងមុខដើម្បីឈានដល់ការដោះស្រាយរួមប្រកបដោយប្រសិទ្ធភាព។ រយៈពេលប៉ុន្មានខែនេះខ្ញុំនិងក្រុមការងារបានខិតខំប្រឹងប្រែងដើម្បីដោះស្រាយ»។
ទាក់ទងទៅនឹងការលើកឡើងរឿងផ្សព្វផ្សាយលោករដ្ឋមន្ត្រីបានស្នើឲ្យក្រុមហ៊ុនធ្វើការលើកប៉ាណូនៅហ្នឹងក្រុមហ៊ុនដោយសរសេរលម្អិតពីគោលដៅរបស់ខ្លួន ឬពីផែនការអនុវត្តជាដើម។ ប៉ុន្តែពេលខ្លះក្រុមហ៊ុនមិនសរសេរព្រោះចង់លាក់លៀមព័ត៌មាន។
លោករដ្ឋមន្ត្រីក៏បានឆ្លើយតបទៅនឹងលោក សូ ងួន ផងដែរថាលោកអត់មានពាក្យស្នើសុំឈូសឆាយ។ តែក្រុមហ៊ុនត្រូវបង់ពន្ធទៅលើផ្ទៃដីដែលដាំដុះជាក់ស្តែង។ ដោយឡែកចំពោះរឿងចុះបញ្ជីដីវិញលោករដ្ឋមន្ត្រីសុំឲ្យក្រុមហ៊ុនជាអ្នកធ្វើដដែល។
ត្រឹម ៦ ខែដើមឆ្នាំនេះក្រសួងកសិកម្មបានផ្តល់សិទ្ធិវិនិយោគដល់ក្រុមហ៊ុនចំនួន ២២៣ លើផ្ទៃដី ១៥៥២៧០០,០៤ ហិកតានៅក្នុងខេត្តចំនួន ១៨ ហើយគិតទាំងក្រុមហ៊ុនស្ថិតក្រោយក្រសួងបរិស្ថានផងគឺមានមិនតិចជាង ៣០០ ក្រុមហ៊ុននោះទេ។
លោក អៀង វុទ្ធី នាយកប្រតិបត្តិនៃអង្គការសមធម៌កម្ពុជាបានយល់ឃើញថាវាជាការល្អដែលក្រសួងបានជួបពិគ្រោះយោបល់ជាមួយនឹងក្រុមហ៊ុនបែបនោះនៅពេលដែលមានបញ្ហាជាច្រើនកំពុងតែកើតមាននៅទូទាំងប្រទេសពាក់ព័ន្ធនឹងដីសម្បទាន។
លោកថាដើម្បីដោះស្រាយបញ្ហារដ្ឋាភិបាលត្រូវធ្វើយ៉ាងណាឲ្យប្រាកដថាក្រុមហ៊ុនគោរពតាមច្បាប់ក្នុងការសិក្សា និងវាយតម្លៃផលប៉ះពាល់សង្គម និងបរិស្ថាន។ រីឯក្រុមហ៊ុនវិញក៏ត្រូវតែមានភារកិច្ចគោរពសិទ្ធិមនុស្សផងដែរ។
បើតាមរបាយការណ៍របស់អង្គការសិទ្ធិមនុស្សអាដហុក និងលីកាដូដែលបានចេញផ្សាយជាបន្តបន្ទាប់នាពេលកន្លងមកបានបង្ហាញថាជម្លោះដីធ្លីដែលបានកើតឡើងនៅស្ទើរពាសពេញផ្ទៃប្រទេសក្នុងរយៈពេលជាច្រើនឆ្នាំកន្លងមកនេះមូលហេតុចម្បងគឺដោយសារតែរដ្ឋាភិបាលបានផ្តល់ដីសម្បទានសេដ្ឋកិច្ចទៅឲ្យក្រុមហ៊ុនឯកជនដោយពុំបានធ្វើការសិក្សាពីផលប៉ះពាល់ហើយបានជាន់លើដីស្រែដីចម្ការ និងផ្ទះសំបែងរបស់ប្រជាពលរដ្ឋ៕
ជិន ស្រីលាភ រាយការណ៍បន្ថែមដោយ Jack Davies
Subscribe to:
Post Comments (Atom)
No comments:
Post a Comment