ដោយ សូត សុខប្រាថ្នា
2016-07-07
គោយន្តដឹកឈើចេញពីតំបន់ព្រៃឡង់ ត្រង់ចំណុចផ្លូវបំបែកចូលឃុំដងកាំបិត ស្រុកសណ្ដាន់ ខេត្តកំពង់ធំ ជាប់ចំការកៅស៊ូក្រុមហ៊ុនវៀតណាម ស៊ី.អ.ស៊ី.ខេ (CRCK) ខណៈប្រជាសហគមន៍ព្រៃឡង់ ស្រុកសណ្ដាន់ ចុះល្បាតកាលពីថ្ងៃទី១ ខែកុម្ភៈ ឆ្នាំ២០១៦។
Photo provided
ពលរដ្ឋនៅស្រុកសណ្ដាន់ ខេត្តកំពង់ធំ ចោទប្រកាន់ប្រពន្ធ និងកូនៗរបស់អធិការស្រុក ថាជាមេខ្លោងនាំឱ្យមានការកាប់បំផ្លាញឈើនៅក្នុងតំបន់ព្រៃឡង់។ ការចោទប្រកាន់នេះ ធ្វើឡើងបន្ទាប់ពីពលរដ្ឋទាំងនោះបានចូលទៅស៊ីឈ្នួលជាកម្មករអារឈើឱ្យក្រុមគ្រួសារអធិការស្រុកសណ្ដាន់ កាលពីពេលកន្លងទៅ។ បញ្ហានេះ អធិការស្រុកសណ្ដាន់ បានច្រានចោលការចោទប្រកាន់នេះ។
កម្មករអារឈើនៅតំបន់ព្រៃឡង់ ឱ្យប្រពន្ធអធិការស្រុកសណ្ដាន់ ព្រួយបារម្ភខណៈឃើញសកម្មភាពអារឈើនៅតែកើតឡើងដោយលួចលាក់ ព្រោះមានមេខ្លោងជាប់សែស្រឡាយជាប្រពន្ធអធិការស្រុកជាអ្នកនៅពីក្រោយខ្នង។ ពួកគេប្រើរូបភាពជួលប្រជាពលរដ្ឋនៅស្រុកសណ្ដាន់ ឱ្យចូលទៅកាប់ឈើក្នុងតំបន់ព្រៃការពារមួយនេះ ជាថ្នូរនឹងថវិកាកាប់ឈើបានមួយម៉ែត្រគូប ១៦ម៉ឺនរៀល។ ពួកគេអះអាងថា ត្បិតតែតំបន់ព្រៃឡង់ ត្រូវដាក់ជាតំបន់ព្រៃការពារក៏ដោយ ប៉ុន្តែក្រុមគ្រួសារលោក អួង ម៉ូលី ជាអធិការស្រុកសណ្ដាន់ នៅតែអាចជួលមនុស្សចូលទៅកាប់ឈើដោយលួចលាក់បាន។
ពលរដ្ឋម្នាក់ដែលអះអាងថា ជាកម្មករអារឈើឱ្យប្រពន្ធអធិការស្រុកសណ្ដាន់ សុំមិនបញ្ចេញឈ្មោះ និងសំឡេងនិយាយថា ប្រពន្ធលោក អួង ម៉ូលី គឺអ្នកស្រី ផាន់នី បានជួលអ្នកស្រុកសណ្ដាន់ ជាច្រើននាក់ និងមានម៉ាស៊ីនចាប់ពីជាង ១០គ្រឿង ដល់ ២០គ្រឿង ដើម្បីឱ្យពលរដ្ឋចូលកាប់ឈើតំបន់ព្រៃឡង់។ សកម្មភាពទាំងនេះ កើតឡើងប្រមាណ ៤ឆ្នាំមកហើយ ដោយមានការឃុបឃិតជាប្រព័ន្ធដើម្បីការពារមុខរបរអារឈើរបស់ប្រពន្ធអធិការស្រុករូបនោះ។ បន្ថែមពីនេះ កូនប្រុសពីរនាក់ទៀតរបស់លោក អួង ម៉ូលី គឺឈ្មោះ បូរ៉េត និង បូរី ក៏ជាប់ពាក់ព័ន្ធរកស៊ីឈើ និងមានកន្លែងស្តុកទុកឈើមួយចំនួននៅក្នុងស្រុកសណ្ដាន់ ដែរ។
ប្រភពដដែលអះអាងថា មូលហេតុពួកគាត់ព្រមធ្វើជាកម្មករឱ្យប្រពន្ធអធិការស្រុករូបនោះ គឺដោយសារតែជីវភាពក្រីក្រ គ្មានមុខរបរ ទើបព្រមចូលទៅកាប់ឈើទាំងភ័យខ្លាច ពិសេសគឺភ័យខ្លាចក្រុមសហគមន៍ និងក្រុមបរិស្ថានចាប់បាន។ ដោយឡែកអាជ្ញាធរស្រុករួមមានប៉ូលិស មន្ត្រីកងរាជអាវុធហត្ថ និងមន្ត្រីជំនាញថ្នាក់ស្រុកជាដើម គឺពួកគាត់មិនបារម្ភឡើយ ព្រោះមេរបស់លោកបានបង់ប្រាក់ជូនស្ថាប័ននីមួយៗ ក្នុងមួយខែចាប់ពី ៣០០ដុល្លារឡើងទៅ សម្រាប់ការដឹកជញ្ជូន និងចូលកាប់ដោយសេរី ដោយមានគោយន្តច្នៃដឹកចេញពីព្រៃ ហើយមានរថយន្តធំៗ ចាំដឹកបន្តយកទៅលក់នៅតាមដេប៉ូឈើក្នុងប្រទេសកម្ពុជា។
ឆ្លើយតបបញ្ហានេះ អធិការនគរបាលស្រុកសណ្ដាន់ លោក អួង ម៉ូលី បដិសេធចំពោះការចោទប្រកាន់ទាំងនោះ។ លោកបញ្ជាក់ថា គ្មានសមាជិកគ្រួសារលោកណាម្នាក់ជាប់ពាក់ព័ន្ធរឿងរកស៊ីឈើ ឬនៅពីក្រោយខ្នងឡើយ ប៉ុន្តែអាចជាការចោទប្រកាន់ដើម្បីបង្ខូចកិត្តិយសរបស់ក្រុមគ្រួសារលោកប៉ុណ្ណោះ។ លោកថែមទាំងទាត់ចោលរឿងថា បានបង់ប្រាក់ទៅគ្រប់ស្ថាប័នក្នុងស្រុក ព្រោះគ្រួសារលោកមិនបានរកស៊ីផង ដូច្នេះមិនមានអ្វីត្រូវយកប្រាក់ទៅបង់ឱ្យគេទេ៖ «បើសម្រាប់ខ្ញុំ គឺអត់មានបញ្ហាអីទេ។ គេចោទម៉េចចោទទៅ បើយើងមិនធ្វើ។ កូនខ្ញុំណាទៅធ្វើ ហើយខ្ញុំក៏អត់ធ្វើដែរ បរិស្ថានគេនៅពេញព្រៃ ទៅធ្វើម្ដេចកើត»។
ទោះជាយ៉ាងនេះក្ដី អភិបាលស្រុកសណ្ដាន់ លោក ឡង គីសឺង មានប្រសាសន៍នៅថ្ងៃទី៧ កក្កដា ថា កន្លងមកលោកធ្លាប់ឮពាក្យចចាមអារ៉ាមបែបនេះ ប៉ុន្តែលោកមិនបានដឹងថា ដំណឹងនោះពិត ឬយ៉ាងណាទេ។ ក្រោយពេលលោកទទួលតំណែងជាអភិបាលស្រុកលោកបានណែនាំដល់អធិការស្រុករូបនោះឱ្យបញ្ឈប់សកម្មភាពរបស់ខ្លួន ប្រសិនបើពាក់ព័ន្ធដូចការចោទប្រកាន់មែន។ អភិបាលស្រុករូបនេះ បដិសេធថា អាជ្ញាធរស្រុកក្រោមការដឹកនាំរបស់លោក គឺមិនបានពាក់ព័ន្ធការយកប្រាក់ពីក្រុមឈ្មួញឡើយ៖ «តាំងពីខ្ញុំកាន់ការងារនេះ ខ្ញុំមិនដែរមានបញ្ហាប្រើកូនចៅខ្ញុំទៅ ប្រមែប្រមូលរបៀបអ៊ីចឹងដើម្បីជាប្រយោជន៍របស់ខ្ញុំទេ»។
ទាំងអភិបាលស្រុក និងសហគមន៍ព្រៃឡង់ បញ្ជាក់ថា បទល្មើសកាប់ឈើក្នុងតំបន់ព្រៃការពារមួយនេះថយចុះក្រោយពេលរាជរដ្ឋាភិបាលដាក់ជាតំបន់ព្រៃជម្រកសត្វកាលពីដើមខែឧសភា។
បើទោះបីជាព្រៃឡង់ ត្រូវបានរាជរដ្ឋាភិបាលដាក់ជាតំបន់ព្រៃជម្រកសត្វ ឬព្រៃការពារក៏ដោយ ប៉ុន្តែបណ្ដាញព្រៃឡង់ លើកឡើងថា បទល្មើសនឹងនៅតែកើតមាន ប្រសិនបើអាជ្ញាធរមិនបានអនុវត្តច្បាប់លើមេខ្លោងធំៗនោះ។
អ្នកសម្របសម្រួលលេខាធិការដ្ឋាននៃបណ្ដាញសហគមន៍ព្រៃឡង់ ទាំង ៤ខេត្ត លោក សេង សុខហេង បញ្ជាក់ថា សកម្មភាពកាប់បំផ្លាញព្រៃឡង់ ពិតជាមានមន្ត្រីថ្នាក់មូលដ្ឋាននៅស្រុកសណ្ដាន់ ជាប់ពាក់ព័ន្ធប្រាកដមែន។ លោកថា បើទោះបីជាព័ត៌មានបានបង្ហាញថា មន្ត្រីអាជ្ញាធរស្រុកជាប់ពាក់ព័ន្ធការកាប់បំផ្លាញព្រៃឈើតំបន់ព្រៃឡង់ ក៏ដោយ ប៉ុន្តែគ្មានចំណាត់ការផ្លូវច្បាប់ណាមួយលើពួកគេឡើយ។
បញ្ហានេះ លោកយល់ថា អាចមានមន្ត្រីថ្នាក់ជាតិនៅកាងពីក្រោយបន្តទៀត៖ «រឿងនេះដោយសារវាមានការឃុបឃិតគ្នាជាប្រព័ន្ធ តាំងពីថ្នាក់លើដល់ថ្នាក់ក្រោម។ អ៊ីចឹងហើយរឿងរបស់សែស្រឡាយអធិការស្រុកសណ្ដាន់ហ្នុង ខ្ញុំគិតថា មិនមែនត្រឹមតែថ្នាក់ហ្នុងទេ គឺមានការពាក់ព័ន្ធជាមួយមន្ត្រីថ្នាក់កំពូល ថ្នាក់ជាតិណោះទៀត»។
លោក សេង សុខហេង អបអរសាទរចំពោះការកំណត់យកតំបន់ព្រៃឡង់ ដាក់ជាតំបន់ព្រៃការពារ ប៉ុន្តែលោកនៅតែបារម្ភចំពោះវិនាសកម្មព្រៃឈើនៅតំបន់ព្រៃមួយនេះ ដរាបណារាជរដ្ឋាភិបាលមិនបានចាត់វិធានការផ្លូវច្បាប់ដល់ក្រុមឈ្មួញធំៗ និងមន្ត្រីពាក់ព័ន្ធទាំងនោះ៕
No comments:
Post a Comment