ដោយ យាង សុជាមេត្តា
2016-06-06
ប្រជាសហគមន៍ព្រៃឡង់ ស្រុកសណ្ដាន់ ខេត្តកំពង់ធំ ចុះល្បាតព្រៃនៅក្នុងតំបន់ព្រៃឡង់ ចាប់ពីថ្ងៃទី៨ ដល់ថ្ងៃទី១០ ខែមីនា ឆ្នាំ២០១៦។ រូបថតសហគមន៍ព្រៃឡង់
រូបថតសហគមន៍ព្រៃឡង់
សកម្មជនការពារព្រៃឈើលើកឡើងថា សកម្មភាពកាប់បំផ្លាញព្រៃឈើខុសច្បាប់ កំពុងតែកើតមាននៅឡើយក្នុងប្រទេសកម្ពុជា។ ការលើកឡើងដូចនេះរបស់សកម្មជនបរិស្ថាន ស្របពេលដែលរដ្ឋមន្ត្រីក្រសួងបរិស្ថាន ប្រកាសនៅក្នុងទិវាបរិស្ថានពិភពលោកកាលពីថ្ងៃទី៥ មិថុនា ថា សកម្មភាពកាប់ឈើដោយខុសច្បាប់លែងមានទៀតហើយ។
សកម្មជនការពារព្រៃឈើលើកឡើងថា មិនត្រឹមតែនៅមានសកម្មភាពកាប់ឈើដោយខុសច្បាប់ប៉ុណ្ណោះទេ ប៉ុន្តែសកម្មជនមួយចំនួនថែមទាំងត្រូវបានជនល្មើសគំរាមបាញ់សម្លាប់ទៀតផង។
សេចក្តីប្រកាសព័ត៌មានរបស់បណ្ដាញសហគមន៍ការពារព្រៃឡង់ទាំង ៤ខេត្ត គឺខេត្តព្រះវិហារ ស្ទឹងត្រែង ក្រចេះ និងខេត្តកំពង់ធំ ផ្សព្វផ្សាយឲ្យដឹងនៅថ្ងៃទី៦ មិថុនា ថា សកម្មភាពកាប់បំផ្លាញឈើដោយជនអនាធិបតេយ្យ និងក្រុមហ៊ុនអាជីវកម្មអារឈើ កំពុងកើតមានជាហូរហែ ហើយសកម្មភាពដឹកឈើចេញពីតំបន់ព្រៃឡង់ កំពុងកើតមានខ្លាំងក្លាដដែល។
រាជរដ្ឋាភិបាលកាលពីពាក់កណ្ដាលខែឧសភា បានដាក់តំបន់មួយចំនួនជាតំបន់ព្រៃការពារ និងអភិរក្សព្រៃឈើ ក្នុងនោះក៏មានតំបន់ព្រៃឡង់ផងដែរ។ ប្រមុខរដ្ឋាភិបាល លោក ហ៊ុន សែន ក៏បានប្រកាសស្នើឲ្យសកម្មជនការពារបរិស្ថាន ពលរដ្ឋ និងសហគមន៍ ចូលរួមសហការជាមួយរដ្ឋាភិបាល ដើម្បីការពារតំបន់ព្រៃការពារទាំងអស់នោះកុំឲ្យមានការកាប់បំផ្លាញខុសច្បាប់។
ទោះបីជាយ៉ាងណាក៏ដោយ បណ្ដាញសហគមន៍ការពារព្រៃឡង់អះអាងថា សកម្មភាពកាប់បំផ្លាញព្រៃឈើនៅក្នុងតំបន់ព្រៃការពារទាំងនោះ នៅតែកើតមានឡើងរហូតមកទល់បច្ចុប្បន្ន។ ពួកគេថា ក្នុងមួយថ្ងៃៗឈើជាច្រើនម៉ែត្រគូបត្រូវបានគេដឹកដោយគោយន្ត និងរថយន្តកែច្នៃ ចេញពីក្នុងតំបន់ព្រៃឡង់។ លើសពីនេះ នៅពេលសហគមន៍ចាប់បាន និងដកហូតឧបករណ៍កាប់ឈើរបស់ជនល្មើស ជនល្មើសថែមទាំងប្រើអាកប្បកិរិយា សម្ដីប្រមាថ និងគំរាមបាញ់សម្លាប់ប្រជាសហគមន៍ដោយកាំភ្លើងកែច្នៃរបស់ពួកគេថែមទៀតផង។ បណ្ដាញសហគមន៍ការពារព្រៃឡង់ មើលឃើញថា ទង្វើទាំងអស់នេះ ជនល្មើសហាក់មិនខ្លាចច្បាប់បន្តិចណាសោះឡើយ។
សមាជិកបណ្ដាញសហគមន៍ព្រៃឡង់ខេត្តកំពង់ធំ លោក ហឿន សុភាព មានប្រសាសន៍ថា ដោយសារការអនុវត្តច្បាប់របស់សមត្ថកិច្ចនៅមិនទាន់តឹងរ៉ឹង ទើបធ្វើឲ្យបទល្មើសកាប់ឈើនៅតែបន្តកើតមាន។ លោក ហឿន សុភាព អះអាងថា ពេលខ្លះបណ្ដាញសហគមន៍ចាប់បានវត្ថុតាងពីជនល្មើស ហើយប្រគល់ទៅឲ្យសមត្ថកិច្ច ប៉ុន្តែពុំឃើញមានចំណាត់ការអ្វីជាក់លាក់ពីសមត្ថកិច្ចឡើយ។ លោក ហឿន សុភាព ដាក់ការសង្ស័យថា ជនល្មើសទាំងនោះអាចមានខ្នងក្រាស់នៅការពារពីក្រោយ ទើបសមត្ថកិច្ចមិនហ៊ានចាត់វិធានការ៖ «ការស្រាវជ្រាវក្រុមពួកយើងឃើញថា បទល្មើសការបំផ្លាញព្រៃឈើនៅតែកើតមាន ទោះបីរដ្ឋាភិបាលបានដាក់ព្រៃជាតំបន់ព្រៃការពារក៏ដោយ ប៉ុន្តែវាអត់ទាន់មានចំណាត់ការអីតឹងរ៉ឹងផ្លូវច្បាប់»។
អ្នកនាំពាក្យក្រសួងបរិស្ថាន លោក សៅ សុភាព លើកទឹកចិត្តឲ្យមានការសហការរបស់បណ្ដាញសហគមន៍ ដើម្បីចូលរួមលុបបំបាត់ការកាប់បំផ្លាញព្រៃឈើ។ លោកស្នើឲ្យសហគមន៍ ផ្តល់ព័ត៌មានបទល្មើសទៅកាន់សមត្ថកិច្ចមូលដ្ឋានដើម្បីចាត់វិធានការ។ លោក សៅ សុភាព បញ្ជាក់ថា ក្រសួងនឹងការពារបណ្ដាញសហគមន៍ទាំងនោះ បើព័ត៌មានដែលពួកគេផ្តល់ទៅឲ្យសមត្ថកិច្ចជាព័ត៌មានពិត៖ «ការសហការគ្នា គឺត្រូវជួយគ្នាទៅវិញទៅមក ព្រោះទិសដៅយើងត្រូវធ្វើការជាមួយគ្នាទាំងក្នុងពេលនេះ និងក្នុងពេលខាងមុខ»។
អង្គការឃ្លាំមើលព្រៃឈើពិភពលោក (Global Forest Watch) រកឃើញថា ព្រៃឈើនៅកម្ពុជា ប្រមាណ ១លាន ៥សែនហិកតារ ត្រូវបានគេកាប់បំផ្លាញនៅកម្ពុជា ចាប់តាំងពីឆ្នាំ២០០១ មក។ អង្គការនេះរកឃើញថា រហូតមកទល់ពេលនេះ កម្ពុជា មានគម្របព្រៃឈើប្រមាណ ៧លាន ៥សែនហិកតារ ឬស្មើប្រមាណ ៤១ភាគរយនៃផ្ទៃដីសរុបរបស់ប្រទេសកម្ពុជា។ ប៉ុន្តែក្រសួងកសិកម្ម ថាសព្វថ្ងៃ កម្ពុជា មានគម្របព្រៃឈើប្រមាណ ៥០ភាគរយនៃផ្ទៃដីសរុប។
បញ្ហាប្រឈមនឹងការកាប់បំផ្លាញព្រៃឈើនៅតំបន់ព្រៃឡង់ បណ្ដាញសហគមន៍ព្រៃឡង់ ទទូចឲ្យរដ្ឋាភិបាលចាត់វិធានការជាបន្ទាន់ ដកហូតឧបករណ៍កាប់ឈើ បិទបញ្ចប់ការទិញលក់ឈើ និងបិទអាជីវកម្មឈើ និងសិប្បកម្មកែច្នៃឈើទាំងអស់នៅជុំវិញតំបន់ព្រៃឡង់៕
No comments:
Post a Comment