ដោយ ថា កិត្យា
2016-06-14
ផែនទីខេត្តព្រៃវែង។
Photo: RFA
អ្នកគាំទ្រគណបក្សសង្គ្រោះជាតិ មួយចំនួននៅស្រុកមេសាង ខេត្តព្រៃវែង ត្រូវបានអាជ្ញាធររារាំងមិនឲ្យឡើងមកជួបជុំនៅទីស្នាក់ការគណបក្សនៅភ្នំពេញឡើយ នៅព្រឹកថ្ងៃទី១៤ ខែមិថុនា។ សង្គមស៊ីវិលចាត់ទុកចំណាត់ការរបស់អាជ្ញាធរនេះ ថាជាទម្រង់នៃការរំលោភសិទ្ធិពលរដ្ឋធ្ងន់ធ្ងរ។
ក្តីប្រាថ្នារបស់ពលរដ្ឋនៅឃុំព្រៃឃ្នេស ស្រុកមេសាង ដែលចង់ឡើងមកភ្នំពេញដើម្បីឃ្លាំមើលស្ថានការណ៍នយោបាយទាក់ទងករណីលោក កឹម សុខា តាមការអន្ទោកអន្ទោលរបស់គណបក្សសង្គ្រោះជាតិ ត្រូវបានរំខានយាយីដោយអាជ្ញាធរមូលដ្ឋាន។
សមាជិកក្រុមប្រឹក្សាឃុំព្រៃឃ្នេស លោក ឆន សុផាត មានប្រសាសន៍នៅព្រឹកថ្ងៃទី១៣ ខែមិថុនា ថា អាជ្ញាធរប្រមាណ ៦នាក់ បានស្ទាក់ចាំឃាត់ពួកគាត់មិនឲ្យឡើងមកភ្នំពេញឡើយ។ អាជ្ញាធរគំរាមថា ប្រសិនបើពួកគាត់នៅតែជម្នះមកភ្នំពេញនោះ គឺអាជ្ញាធរនឹងនាំខ្លួនពួកគាត់ទៅអធិការស្រុកមេសាង ដើម្បីធ្វើកិច្ចសន្យា៖ «គេឃាត់ដោយឲ្យខាងខ្ញុំទៅធ្វើកិច្ចសន្យានៅកន្លែងប៉ុស្តិ៍ និងនៅអធិការស្រុក តែខ្ញុំថាមានរឿងហេតុអី ឲ្យខ្ញុំត្រូវទៅ? ដូច្នេះ ខ្ញុំមិនទៅទេ។ ទោះបីអ្នកឯងចាប់ចងខ្ញុំម៉េចចងទៅ ព្រោះខ្ញុំអត់មានទោសអីដែលត្រូវធ្វើ ហើយឡានខ្ញុំជួលនោះមានច្បាប់មានទម្លាប់គ្រប់គ្រាន់ នៅតែគេមិនឲ្យទៅ។ គេលើកហេតុផលថា សកម្មជនមិនឲ្យទៅ»។
ក្រោយពីអាជ្ញាធរហាមឃាត់ដាច់ណាត់មិនឲ្យពួកគាត់បន្តដំណើរមកភ្នំពេញនោះ គឺពួកគាត់បានសម្រេចត្រឡប់ទៅលំនៅឋានវិញ។ ទោះបីជាយ៉ាងណា ពួកគាត់បានរិះគន់ចំណាត់ការរបស់អាជ្ញាធរ ថាបានបំបិទសិទ្ធិពួកគាត់ធ្ងន់ធ្ងរ ដែលទាមទារឲ្យសង្គមស៊ីវិលជាតិ និងអន្តរជាតិពិនិត្យមើលរឿងនេះ៖ «ខ្ញុំយល់ថាចំណាត់ការអាជ្ញាធរមិនអព្យាក្រឹត្យ និងរំលោភបំពានសិទ្ធិសេរីភាព ព្រោះខ្ញុំអត់មានធ្វើអីខុសសោះ»។
រីឯមេប៉ុស្តិ៍ឃុំព្រៃឃ្នេស លោក ឯម ស៊ាប លើកឡើងថាការរារាំងមិនឲ្យពលរដ្ឋឡើងមកភ្នំពេញនេះ គឺអនុវត្តទៅតាមបទបញ្ជារបស់ថ្នាក់លើ មិនមែនធ្វើទៅតាមចិត្តរបស់លោកនោះទេ៖ «ផែនការពីលើដែលឃាត់មិនឲ្យទៅ»។
ដោយឡែកស្នងការខេត្តព្រៃវែង លោក ស្រេង ជា អះអាងថា លោកពុំបានចេញបញ្ជាឲ្យអាជ្ញាធរតាមភូមិ-ឃុំមានចំណាត់ការទប់ស្កាត់ ឬរារាំងពលរដ្ឋមិនឲ្យឡើងមកភ្នំពេញនោះទេ៖ «សេរីភាពរបស់ប្រជាពលរដ្ឋ គាត់ធ្វើម៉េចធ្វើទៅ ខ្ញុំគ្មានទៅដាក់បញ្ជាដាក់អីឲ្យទៅឃាត់ទេ»។
ការឆ្លើយដាក់គ្នានេះ អគ្គលេខាធិការអង្គការសម្ព័ន្ធភាពការពារសិទ្ធិមនុស្សកម្ពុជា លោក សួន ប៊ុនស័ក្តិ មានប្រសាសន៍ថា គឺជាលេសដោះសាយករួចខ្លួនដែលខ្វះការទទួលខុសត្រូវ។ លោកបញ្ជាក់ថា ការហាមឃាត់សកម្មជនបក្សប្រឆាំងមិនឲ្យមកប្រមូលផ្តុំគ្នានៅភ្នំពេញនេះ គឺជាការរំលោភសិទ្ធិ និងសេរីភាពយ៉ាងច្បាស់ក្រឡែតដែលមានចែងក្នុងរដ្ឋធម្មនុញ្ញ៖ «នៅក្រោមច្បាប់រដ្ឋធម្មនុញ្ញ ក៏ដូចជាច្បាប់សិទ្ធិមនុស្សអន្តរជាតិ ដែលខ្មែរចូលជារដ្ឋភាគីនោះ គឺរដ្ឋាភិបាលមានកាតព្វកិច្ចសំខាន់ណាស់ក្នុងការជួយសម្រួលទៅដល់ប្រជាពលរដ្ឋគ្រប់រូប ដើម្បីអនុវត្តសិទ្ធិសេរីភាពរបស់ពួកគេ។ ដូច្នេះរឿងនេះខ្ញុំសូមអំពាវនាវដល់រដ្ឋាភិបាល មេត្តាបំពេញកាតព្វកិច្ចតាមរយៈការសម្របសម្រួល ធ្វើយ៉ាងម៉េចឲ្យជនកម្ពុជា គ្រប់រូប ជារូបវន្តបុគ្គល និងនីតិបុគ្គល អាចប្រើប្រាស់សិទ្ធិរបស់ពួកគេបានដោយសេរី ស្របតាមក្របខណ្ឌច្បាប់ដែលកម្ពុជា ចែងទុកបច្ចុប្បន្ននេះបាទ»។
មួយរយៈពេលចុងក្រោយនេះ ប្រជាពលរដ្ឋមួយចំនួនបានត្អូញត្អែរយ៉ាងខ្លាំងថា សិទ្ធិនយោបាយ និងសេរីភាពបញ្ចេញមតិរបស់ប្រជាពលរដ្ឋកំពុងរងការរំលោភបំពាន និងធ្វើទុក្ខបុកម្នេញដោយអាជ្ញាធររដ្ឋាភិបាល ដែលហាក់មិនខុសពីសម័យខ្មែរក្រហមកាន់កាប់ប្រទេសឡើយ។ ស្ទើរគ្រប់ភូមិ-ស្រុក នៅពេលសកម្មជនបក្សប្រឆាំងដើរប្រមូលស្នាមមេដៃដាក់ថ្វាយព្រះមហាក្សត្រនោះ ត្រូវបានអាជ្ញាធរតាមដាន និងឃាត់ខ្លួនសួរនាំជាបន្តបន្ទាប់ ព្រមទាំងគំរាមចាប់ដាក់គុក បើនៅតែបន្តសកម្មភាព។
កតិកាសញ្ញាអន្តរជាតិស្ដីពីសិទ្ធិពលរដ្ឋ និងសិទ្ធិនយោបាយមាត្រា១៩ ចែងថា ជនគ្រប់រូបមានសិទ្ធិប្រកាន់មតិយោបល់ដោយគ្មានការជ្រៀតជ្រែក ហើយជនគ្រប់រូបមានសិទ្ធិសេរីភាពក្នុងការបញ្ចេញមតិ។ កាលពីពេលថ្មីៗនេះ អគ្គលេខាធិការអង្គការសហប្រជាជាតិ លោក បាន គីមូន (Ban Ki-moon) សង្ឃឹមថា រដ្ឋាភិបាលកម្ពុជា នឹងធានានូវការគោរពសិទ្ធិមនុស្សពេញលេញ រួមបញ្ចូលទាំងសេរីភាពនៃការបញ្ចេញមតិ សេរីភាពខាងសមាគម និងសេរីភាពនៃការប្រមូលផ្តុំ ជាដើម៕
No comments:
Post a Comment