សង្គមស៊ីវិលនិងបក្សប្រឆាំងជំរុញឲ្យរដ្ឋាភិបាលអនុវត្តច្បាប់តឹងរ៉ឹងចំពោះប្រឆាំងការចរាចរអង្ករខុសច្បាប់
ដោយ អ៊ុំ រង្សី
2016-05-19
ស្រូវ និងអង្ករផ្ការំដួល ត្រូវបានគេដាក់តាំងបង្ហាញក្នុងវេទិកាស្រូវអង្ករកម្ពុជា លើកទី៥ នារាជធានីភ្នំពេញ កាលពីថ្ងៃទី២៥ ខែមករា ឆ្នាំ២០១៦។
RFA/Tha Kitya
សង្គមស៊ីវិល និងបក្សប្រឆាំងយល់ថា លំហូរអង្ករពីប្រទេសជិតខាង គឺជាបញ្ហាចម្បងដែលត្រូវដោះស្រាយបន្ទាន់ ព្រោះវាប៉ះពាល់ដល់ជីវភាពប្រជាកសិករកម្ពុជា។ ទន្ទឹមគ្នានេះ ទាំងសង្គមស៊ីវិល និងបក្សនយោបាយ ជំរុញឲ្យអាជ្ញាធររដ្ឋាភិបាល អនុវត្តច្បាប់ឲ្យតឹងរ៉ឹង ដើម្បីប្រយុទ្ធប្រឆាំងនឹងការចរាចរអង្ករខុសច្បាប់នៅតាមច្រកព្រំដែនឲ្យមានប្រសិទ្ធភាព។
សង្គមស៊ីវិល និងបក្សប្រឆាំង លើកឡើងថា ការបន្តទម្លាប់នាំចូលអង្ករ និងអនុវត្តច្បាប់មិនបានតឹងរ៉ឹងរបស់អាជ្ញាធរតាមព្រំដែន វាមិនត្រឹមតែបន្តគំរាមកំហែងដល់ការរីកលូតលាស់វិស័យកសិកម្មប៉ុណ្ណោះទេ វាក៏គំរាមកំហែងដល់ទីផ្សារស្រូវកសិករ និងសេដ្ឋកិច្ចជាតិខ្លាំងផងដែរ។
នាយកប្រតិបត្តិមជ្ឈមណ្ឌលសិក្សាដើម្បីអភិវឌ្ឍន៍កសិកម្ម និងប្រព័ន្ធចិញ្ចឹមជីវិត លោក សួន សេង កត់សម្គាល់ថា កន្លងមក រដ្ឋាភិបាលបានបង្កើតយន្តការច្រើនក្នុងការគ្រប់គ្រងចំណីអាហារ ឬទំនិញ និងទប់ស្កាត់ការនាំចូលខុសច្បាប់ ប៉ុន្តែលោកថា ការអនុវត្តជាក់ស្ដែងនៅពុំទាន់មានប្រសិទ្ធភាពនៅឡើយ ដោយសារតែមានអំពើពុករលួយ និងអភិបាលកិច្ចគ្មានប្រសិទ្ធភាព។ លើសពីនេះ លោកថា ការគ្រប់គ្រងការត្រួតពិនិត្យអង្ករនាំចូលពីបរទេស ក៏នៅមានភាពធូររលុងនៅឡើយ៖ «បើសិនជារដ្ឋាភិបាលគាត់បានពង្រឹងគ្រប់ច្រកព្រំដែនដែលធ្វើឡើងតាមច្រកព្រំដែនតូចៗ ពង្រឹងអភិបាលកិច្ចល្អ ធ្វើឲ្យគាត់គិតពីផលប្រយោជន៍របស់កសិករ ឲ្យគាត់ចេះការពារពីការប្រកួតប្រជែងខាងក្រៅ ទើបអាចជួយរកទីផ្សារឲ្យកសិករបានពិតប្រាកដ»។
ពាក់ព័ន្ធនឹងលំហូរអង្ករពីក្រៅប្រទេសនេះដែរ ប្រធានគណៈកម្មការទី៧ នៃរដ្ឋសភា និងជាអ្នកនាំពាក្យគណបក្សសង្គ្រោះជាតិ លោក យ៉ែម បុញ្ញឫទ្ធិ ក៏បានឲ្យដឹងតាមបណ្ដាញសង្គមហ្វេសប៊ុក (Facebook) របស់លោក ខណៈលោកជួបពិភាក្សាការងារជាមួយរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ កាលពីពេលថ្មីៗថា តាមរបាយការណ៍ដែលលោកទទួលនៅឆ្នាំ២០១៥ កម្ពុជា បាននាំចូលអង្ករជាង ១លានតោន ខណៈអង្ករកម្ពុជា បាននាំចេញទៅកាន់ទីផ្សារអន្តរជាតិជាង ៥០ម៉ឺនតោនប៉ុណ្ណោះ។
លោកដាក់ការសង្ស័យថា បញ្ហានេះកើតឡើងដោយសារមន្ត្រីនៅតាមព្រំដែនឃុបឃិតជាមួយឈ្មួញ ដើម្បីនាំចូលអង្ករខុសច្បាប់។ លោកបន្តថា បញ្ហានេះមិនត្រឹមតែជាក្តីបារម្ភដល់ទិសដៅនាំចេញអង្កររបស់កម្ពុជា ប៉ុណ្ណោះទេ បញ្ហានេះក៏ធ្វើឲ្យកសិករខ្មែរទទួលបានទីផ្សារគ្មានតម្លាភាពផងដែរ។
លោក យ៉ែម បុញ្ញឫទ្ធិ យល់ថា ដើម្បីជៀសវាងលំហូរអង្ករខុសច្បាប់មកកម្ពុជា លោកបានស្នើរដ្ឋាភិបាល ត្រូវរឹតបន្តឹងការត្រួតពិនិត្យការនាំចូលទំនិញនៅតាមច្រកនានាតាមព្រំដែន ត្រូវពង្រីកការត្រួតពិនិត្យផលិតផលខុសច្បាប់ដល់ថ្នាក់មូលដ្ឋាន និងត្រូវដាក់ទោសទណ្ឌទៅលើមន្ត្រីដែលប្រព្រឹត្តអំពើពុករលួយដែលអនុញ្ញាតឲ្យឈ្មួញនាំចូលអង្ករខុសច្បាប់។
ក្នុងឱកាសជួបពិភាក្សាការងារជាមួយគណៈកម្មការទី៣ នៃរដ្ឋសភា កាលពីថ្ងៃទី១៧ ឧសភា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន ឲ្យដឹងថា ករណីទប់ស្កាត់លំហូរអង្ករពីក្រៅប្រទេស មិនមែនជាដែនសមត្ថកិច្ចរបស់ក្រសួងកសិកម្ម នោះឡើយ វាជាតួនាទីរបស់ក្រសួងពាណិជ្ជកម្ម។ ប៉ុន្តែក្រសួងកសិកម្ម នឹងខិតខំបង្កើនការស្រាវជ្រាវ និងរិះរកបច្ចេកទេសថ្មីៗដើម្បីបង្កើនប្រសិទ្ធភាព គុណភាពនៃការផលិតពូជដល់កសិករ ដើម្បីសម្រេចទិសដៅនាំចេញអង្ករ។
វិទ្យុអាស៊ីសេរី មិនអាចទាក់ទងអ្នកនាំពាក្យក្រសួងពាណិជ្ជកម្ម លោក កែន រដ្ឋា ដើម្បីដឹងពីវិធានការទប់ស្កាត់លំហូរអង្ករខុសច្បាប់បានឡើយ នៅថ្ងៃទី១៩ ខែឧសភា។
ក្រុមហ៊ុននាំចេញអង្ករ និងកសិករកន្លងមក ធ្លាប់អះអាងថា លំហូរអង្ករខុសច្បាប់ពីប្រទេសវៀតណាម យ៉ាងគំហុក បានធ្វើឲ្យរោងម៉ាស៊ីនមួយចំនួននៅកម្ពុជា មិនអាចប្រកួតប្រជែងបាន ហើយសម្រេចចិត្តបិទទ្វារអាជីវកម្មរបស់ខ្លួន៕
No comments:
Post a Comment