 |
| ទិដ្ឋភាពគ្រោះថ្នាក់ចរាចរណ៍តាមដងផ្លូវក្នុងរាជធានីភ្នំពេញនាពេលកន្លងមក។ ហេង ជីវ័ន |
បញ្ឈប់ការទម្លាក់កំហុសគ្រោះថ្នាក់ចរាចរណ៍ ថាមកពីទេវតាឆ្នាំថ្មីកាចទៅ!
Tue, 19 April 2016 ppp
តុង សុប្រាជ្ញ
បន្ទាប់ពីទេវតាចាស់ឆ្នាំមមែដែលមានអាណត្តិមួយឆ្នាំបានចាកចេញទៅក៏មានពិធីផ្ទេរតំណែងមកទេវតាថ្មីឆ្នាំវកមកជំនួសរយៈមួយឆ្នាំពេញហើយប្តេជ្ញាចិត្តធ្វើសុខដុមនីយកម្មប្រជារាស្ត្រតាមបែបលទ្ធិប្រជាធិបតេយ្យដែរ។
ក្នុងអំឡុងចូលឆ្នាំនេះក៏ដូចជាឆ្នាំមុនៗដែរគឺអ្នកលក់ស្រា និងស្រាបៀរបានត្អូញត្អែរថារោងចក្រស្រាបៀរផលិតអត់ទាន់អ្នកផឹក អ្នកលក់ដេប៉ូចែកចាយតាមខេត្ត ក្រុង ស្រុក ឃុំ និងភូមិក៏លក់ស្ទើរតែអស់អ្នកលក់ចាប់ហួយសល់តិចតួចគ្រាន់លក់រាយប៉ុណ្ណោះ។
ការទិញនេះមានលក្ខណៈទ្រង់ទ្រាយធំទាំងកេសតែម្តងដើម្បីផ្ទៀងយករង្វាន់បន្ទាប់ពីហូបស្រា ឬក៏ស្រាបៀរនោះផងមានលក្ខណៈបង្ខំគ្នាផង និងមានលក្ខណៈអួតអាងចង់ផឹកខ្លួនឯងថាពូកែផងបើទោះបីជាដឹងថាឥទ្ធិពលនៃជាតិសុរា និងស្រាបៀរធ្វើឲ្យប៉ះពាល់សុខភាពខ្លួនឯងផង និងធ្វើឲ្យគ្រោះថ្នាក់ដល់អ្នកដទៃតាមរយៈការប្រើអំពើហិង្សា និងគ្រោះថ្នាក់ចរាចរណ៍ពេលស្រវឹងធ្លាក់ភ្នែកក៏ដោយ។
តាមរយៈរបាយការណ៍របស់អគ្គស្នងការដ្ឋាននគរបាលជាតិនៃក្រសួងមហាផ្ទៃបានបង្ហាញពីគ្រោះថ្នាក់ចរាចរណ៍ក្នុងអំឡុងបុណ្យចូលឆ្នាំខ្មែរពីថ្ងៃទី ១៣ ដល់ទី ១៦ ខែមេសាឆ្នាំ ២០១៦ មានអ្នកស្លាប់ដល់ទៅ ៤៧ នាក់គឺមានការកើនឡើង ១១ នាក់បើប្រៀបធៀបកាលពីឆ្នាំ ២០១៥ កន្លងទៅនេះ។
នៅថ្ងៃចូលឆ្នាំទី ២ ខ្ញុំបានឃើញហេតុការណ៍ប្រមាណជា ១០ នាទីបន្ទាប់ពីគ្រោះថ្នាក់ចរាចរណ៍ដ៏តក់ស្លុតមួយនៅលើស្ពានព្រែកតាមាក់នៅម៉ោងប្រមាណជា ៤ រសៀលពេលធ្វើដំណើរពីស្រុកខ្សាច់កណ្តាលពីស្ពានខាងកើតមើលទៅឃើញរថយន្តម៉ាក Montero ដែលបានបើកវ៉ាពីត្រើយខាងកើតបុករះម៉ូតូដែលបើកពីត្រើយខាងលិចបញ្ច្រាសគ្នាពេញទំហឹងឃើញមនុស្សស្លាប់ របួសធ្ងន់ និងរបួសស្រាលរដូករណែលនៅលើថ្លុកឈាម ប៉ើងម៉ូតូ និងអីវ៉ាន់ខ្ចាយពេញថ្នល់តាំងពីពាក់កណ្តាលដើមស្ពានដល់លើកំពូលស្ពានឮសូរតែសម្រែកទ្រហោយំពេញថ្នល់រីឯអ្នកបើកបររថយន្តបុកនោះឈប់នៅលើស្ពានហើយរត់ចោលបាត់ស្រមោល។
ក្រឡេកមើលទៅជុំវិញកន្លែងកើតហេតុមិនទាន់ឃើញមានសមត្ថកិច្ចណាមកតាមចាប់អ្នកបើកបរនោះទាន់ពេលទេហើយរថយន្តសាមុយសង្គ្រោះបន្ទាន់ក៏មិនដឹងនៅទីណាដែរ។ មកទល់ពេលនេះនៅមិនទាន់លេចឮព័ត៌មានចាប់អ្នកបើកបររថយន្តនោះបាននៅឡើយទេ។ នេះគឺជាផ្នែកមួយនៃការធ្វេសប្រហែសរបស់សមត្ថកិច្ចចំពោះថ្ងៃបុណ្យទានដោយមិនមានអ្នកប្រចាំការនៅលើស្ពានខ្វះការទទួលខុសត្រូវក្នុងនាមសមត្ថកិច្ចធ្វើឲ្យជនល្មើសមានឱកាសគេចខ្លួនបាត់ហើយករណីនេះសមត្ថកិច្ចយកទិន្នន័យពីគ្រោះថ្នាក់មកវិភាគធ្វើឲ្យមានភាពលម្អៀង និងមិនច្បាស់លាស់គឺបានត្រឹមតែសាក្សីឃើញផ្ទាល់ភ្នែកថាបើកវ៉ាគ្នា បើកហួសល្បឿន រំលោភឆ្លងគំនូសផ្លូវ ឬងុយដេកតែប៉ុណ្ណឹងតែជាក់ស្តែងឫសគល់នៃបញ្ហាគឺអាចបណ្តាលមកពីអ្នកបើកបរស្ថិតនៅក្នុងស្ថានភាពស្រវឹងស្រា ឬក៏មិនទាន់អស់ចំហាយស្រវឹងពីយប់សោះដល់មែនៗទៅសូម្បីតែរថភ្លើងក៏មិនលើកលែងដែរ។
នៅពេលមានគ្រោះថ្នាក់ចរាចរណ៍ច្រើនប្រជាពលរដ្ឋចេះតែមានជំនឿតៗគ្នាទៅទេវតាឆ្នាំនេះកាចឆ្នាំនោះស្លូត ឬក៏ផ្លូវ និងស្ពានហ្នឹងមានជើងកបជាដើម។
តាមពិតទៅទឹករបស់ទេវតាមានទឹកស្លូត មានទឹកកាច ទឹកស្លូតមានដូចជាទឹកសុទ្ធ និងភេសជ្ជៈចំណែកឯទឹកកាចនោះគឺស្រា និងស្រាបៀរជាដើមចមនៃគ្រោះថ្នាក់ចរាចរណ៍ដែលអ្នកផឹកម្នាក់ៗខំប្រឹងផឹកដេញតាមយករង្វាន់ឲ្យដូចការផ្សាយពាណិជ្ជកម្មនោះដូចដែលមានករណីតំណាលតៗគ្នាថាមានស្ត្រីម្នាក់គាត់ឲ្យប្តីគាត់ផឹកស្រា និងស្រាបៀរស្លាប់អស់ ៣ នាក់ហើយនៅតែមិនបានរង្វាន់ទៀតតែអ្នកភូមិបានលើកហេតុផលផ្សេងថាមកពីស្ត្រីរូបនោះគាត់មានប្រជ្រុយ ឬក៏ក្រយៅស៊ីប្តីបានជាប្តីគាត់តែងស្លាប់ងាយយ៉ាងនេះ។
ម្យ៉ាងវិញទៀតសឹងតែគ្រប់បទចម្រៀងខារ៉ាអូខេវ៉ុលថ្មីៗសុទ្ធតែបំពាក់ទៅដោយគ្រឿងស្រវឹងមានតាំងពីស្រាវីស្គី ស្រាក្រហម ស្រាបៀរ ស្រាស រហូតដល់ទឹកត្នោតជូរពុលរាំទាំងចាស់ទាំងក្មេង ទាំងស្រី ទាំងប្រុស។ ដូចបទ ស៊ូឃ្លាត របស់ផលិតកម្មរស្មីហង្សមាសក៏បង្ហាញពីតួសម្តែងប្រុសខូចចិត្តនឹងមិត្តស្រីបើកឡានដៃម្ខាងឯដៃម្ខាងទៀតលើកដបស្រាក្រហមអកស្រួលដូចផឹកទឹកអ៊ីចឹង។
ជាងនេះទៅទៀតនោះដោយសារតែទាញផលប្រយោជន៍នយោបាយធ្វើឲ្យរាជរដ្ឋាភិបាលសម្រេចឲ្យអ្នកបើកបរម៉ូតូក្រោម ១២៥ CC មិនចាំបាច់មានប័ណ្ណបើកបរក៏បានដែរហើយប័ណ្ណបើកបរចាស់ៗតាំងពីពេលណាក៏ប្រើបានដែរ។
នេះហើយគឺកត្តាដែលមិនគោរពច្បាប់ចរាចរណ៍នោះធ្វើគ្រោះថ្នាក់កាន់តែសាហាវទៅៗដោយការបើកបរប្រមាថអាយុជីវិតអ្នកដទៃលែងខ្វល់ពីបុណ្យពីបាបអ្វីទាំងអស់គឺមនុស្សទេដែលផឹកចំទឹកកាចសាហាវនោះគ្មានទេវតាណាកាចហើយឃោរឃៅនោះទេ។
ជាផលវិបាកគ្រាន់តែចំណាយទៅលើការគ្រោះថ្នាក់ចរាចរណ៍ទូទាំងប្រទេសដែល ១ ឆ្នាំៗខាតបង់ ៣៣៧ លានដុល្លារក្នុងឆ្នាំ (HIB, 2013) ។
បើធ្វើការសង្កេតមើលពីផលគ្រោះថ្នាក់រវាងបារី និងស្រាវិញគឺស្រា និងស្រាបៀរមានកម្រិតគ្រោះថ្នាក់សុខភាពខ្ពស់ជាងហើយគ្រោះថ្នាក់អាយុជីវិតអ្នកដទៃក៏ខ្ពស់ជាងបារីដែរឧទាហរណ៍គេមិនដែលនិយាយថាជក់បារីវ៉ៃនរណាម្នាក់ ឬបើកល្បឿនលឿននោះទេគឺមានតែថាផឹកស្រាមួយកែវវ៉ៃប្រាវឥឡូវ ឬក៏ស្រវឹងបើកដេញបុកចោលឥឡូវហ្នឹង។ តែបារីត្រូវបានច្បាប់កំណត់យ៉ាងតឹងរ៉ឹងនូវការផ្សាយពាណិជ្ជកម្ម និងការជក់កន្លែងបិទជិតទៀតគឺទុកឲ្យផ្សាយមួយផ្នែកតូចនៅកន្លែងលក់ប៉ុណ្ណោះ។
ផ្ទុយទៅវិញ ស្រា និងស្រាបៀររកទិញបានគ្រប់ទីកន្លែងផឹកបានគ្រប់ទីកន្លែងទីណាក៏បានដែរហើយផ្សាយពាណិជ្ជកម្មម៉ាសេរីសូម្បីតែព្រះសង្ឃ ព្រះមហាក្សត្រ ថ្នាក់ដឹកនាំប្រជាពលរដ្ឋទូទៅពេលខ្លះក៏ធ្វើដំណើរក្រោមស្លាកប៉ាណូរបស់ស្រា និងស្រាបៀរជាមួយស្ត្រីស្លៀកសិចស៊ីដែរ។ គឺផ្ទុយទៅនឹងព្រះពុទ្ធសាសនាដែលជាសាសនារបស់រដ្ឋតែបែរជាឲ្យព្រះសង្ឃតំណាងឲ្យព្រះពុទ្ធនិមន្តកាត់ក្រោមស្លាកទាំងនោះទៅវិញលែងស្គាល់បុណ្យបាបហើយឲ្យតែបានលុយហើយការផ្សាយពាណិជ្ជកម្មស្រា និងស្រាបៀរគាស់ភ្លាមបានរង្វាន់ភ្លែតគឺជំរុញឲ្យមនុស្សកាន់តែឈ្លក់វង្វេងនឹងទទួលទានម្តងហើយម្តងទៀតដេញតាមយករង្វាន់នោះធ្វើឲ្យការប្រឈមនឹងគ្រោះថ្នាក់ចរាចរណ៍កាន់តែខ្ពស់។
អ៊ីចឹងហើយបានជាអ្នកបើកយានយន្តខ្លះមានគំនិតទុកជាមុនថាបើបុកគេអាងអីអាងបុកគេរួចធ្វើយ៉ាងណាឲ្យតែអញបានរត់រួចពីកន្លែងកើតហេតុហើយចាំសងតាមក្រោយ និងយ៉ាងច្រើនជាប់គុកបន្តិចបន្តួចទៅតាមច្បាប់ហើយសូកលុយគេឲ្យច្រើនទៅចេញមកក្រៅវិញយ៉ាងរំភើយដោយគ្មាននរណាទៅតាមដានករណីបើកបុកគេហ្នឹងនោះទេដែលនេះគឺជានិទ្ទណ្ឌភាពនៅស្រុកខ្មែរនោះ។
ប៉ុន្តែអ្វីដែលអាចដោះស្រាយបានខ្លះនោះគឺ ទី ១-មានរថយន្តទំនើបស៊េរីថ្មីៗដែលមានកាមេរ៉ា ៥ នោះគេអាចកំណត់ទៅល្បឿននៅខាងមុខរថយន្ត ២ ទៅ ៣ ម៉ែត្រគឺរថយន្តដែលខ្លួនកំពុងតែបើកនោះធ្លាក់ល្បឿនដោយស្វ័យប្រវត្តិមិនអាចជាន់បើកបុកគេនៅខាងមុខបាននោះទេ។ នេះគឺជាចំណុចល្អមួយដែលអ្នកមានរថយន្តប្រភេទនោះគួរតែកំណត់មុនជាការល្អប្រសើរដើម្បីកាត់បន្ថយគ្រោះថ្នាក់ចរាចរណ៍បានខ្លះ។
ទី ២-ចំពោះថ្ងៃឈប់បុណ្យទានសមត្ថកិច្ចដែលជាប់ភារកិច្ចគួរតែផ្លាស់ប្តូរវេនគ្នាប្រចាំការនៅតាមតំបន់គោលដៅដើម្បីធានាសុវត្ថិភាពចរាចរណ៍ដល់ប្រជាពលរដ្ឋដែលធ្វើដំណើរតាមដងវិថីនោះតាមចាប់ជនល្មើសបានដោយស្រួល និងព័ត៌មានត្រឹមត្រូវច្បាស់លាស់សម្រាប់ធ្វើកំណត់ហេតុទៅតុលាការផង និងសម្រាប់វិភាគដើម្បីស្វែងរកដំណោះស្រាយទៀតផង។
ទី ៣-ចំពោះនៅលើស្ពានវិញត្រូវដាក់ស្លាកសញ្ញាឲ្យបានច្រើនគឺហាមវ៉ាគ្នានៅលើស្ពានជាជាងដាក់តែផ្ទាំងផ្សាយពាណិជ្ជកម្មស្រា និងស្រាបៀរដែលកំពុងវ៉ៃលុកដណ្ដើមទីផ្សារគ្នានោះការផ្សាយពាណិជ្ជកម្មគ្រឿងស្រវឹងគួរកំណត់នៅក្នុងច្បាប់ឲ្យដូចបារីទៅ ឬមួយក៏ពិបាកធ្វើច្បាប់នោះព្រោះក្រុមហ៊ុនគ្រឿងស្រវឹងភាគច្រើនជាប់សែស្រឡាយអ្នកធំៗ។
ទី ៤-កាដូសម្រាប់លោក ស៊ុន ចាន់ថុល រដ្ឋមន្ត្រីសាធារណការ និងដឹកជញ្ជូនថ្មីថាតើអាចសង់កូនស្ពានអាកាសតូចមួយដើម្បីឲ្យខ្សែរថភ្លើងឆ្លងកាត់ថ្នល់ជាតិបានដើម្បីកាត់បន្ថយគ្រោះថ្នាក់រថភ្លើងបុកជាមួយរថយន្តដែលកើតឡើងថ្មីៗនេះទាំងនៅស្រុកកណ្តាលស្ទឹង ខេត្តកណ្តាលថ្ងៃចូលឆ្នាំទី ២ និងនៅជិតបូកគោខេត្តកំពតកាលពីចុងឆ្នាំទៅ។
សរុបមកវិញ គឺមានតែអ្នកបើកបរគ្រប់ៗរូបត្រូវតែមានភាពម្ចាស់ការទទួលខុសត្រូវ និងប្រុងប្រយ័ត្នខ្ពស់លើអាយុជីវិតខ្លួនឯង និងអ្នកដទៃជាជាងបើកបរធ្វេសប្រហែសដោយសារតែគ្រឿងស្រវឹងចូលខ្លួនហើយនាំគ្នាមានជំនឿទៅលើទេវតាឆ្នាំថ្មីកាច ឬក៏ស្លូត ឬក៏ផ្លូវនោះមានជើងកបរាល់ឆ្នាំ។ ជាពិសេសគួរតែបញ្ឈប់ការបង្អក ឬក៏បង្ខំគ្នាឲ្យផឹកគ្រឿងស្រវឹងចំពោះមិត្តភក្តិបងប្អូន ឬក៏នរណាម្នាក់ដែលជាអ្នកមានភារកិច្ចត្រូវបើកបរនោះ៕
ចូលរួមផ្តល់យោបល់តាមរយៈ soprach.tong@phnompenhpost.com
No comments:
Post a Comment