ដោយ ខែ សុណង
2016-04-09
កញ្ញា ខុម ចាន់តារាទី ហៅ ស្រីមុំ ក្នុងវេទិកាអ្នកស្ដាប់វិទ្យុអាស៊ីសេរី កាលពីយប់ថ្ងៃទី១១ ខែមីនា ឆ្នាំ២០១៦។
Photo: RFA
សង្គមស៊ីវិលដែលធ្វើការលើកស្ទួយសិទ្ធិស្ត្រី ព្រួយបារម្ភពីបញ្ហាហិង្សាលើផ្នែកយេនឌ័រ ដែលចេះតែបន្តកើនឡើងឥតឈប់ឈរនៅកម្ពុជា។ ការព្រួយបារម្ភនេះ ពួកគេបានលើកយកករណីកញ្ញា ខុម ចាន់តារាទី ហៅ ស្រីមុំ ដែលបណ្ដាញសង្គម និងសារព័ត៌មានក្នុងស្រុកមួយចំនួនបានចុះផ្សាយនូវជីវិតឯកជនរបស់នាងជាបន្តបន្ទាប់។ បច្ចុប្បន្នករណីនេះត្រូវបានតុលាការចេញដីកាកោះហៅទាក់ទងនឹងការចោទប្រកាន់រូបនាងចំនួនពីរបទចោទ គឺបទផ្ដល់សក្ខីកម្មក្លែង និងករណីអំពើពេស្យាចារ។
សង្គមស៊ីវិលចាត់ទុកអ្នកនយោបាយនៃគណបក្សធំៗទាំងពីរ ថាប្រើប្រាស់ស្ត្រីជាកម្មវត្ថុក្នុងការទាញយកផលប្រយោជន៍ផ្នែកនយោបាយ។
នាយិកាអង្គការសីលការ អ្នកស្រី ធីតា ឃឹះ មានប្រសាសន៍ថា រដ្ឋាភិបាលកម្ពុជា ត្រូវធានាដល់ការគោរព និងការពារសិទ្ធិស្ត្រី។ ស្ថាប័នតុលាការដែលជាស្ថាប័នឯករាជ្យត្រូវប្រើតួនាទីរបស់ខ្លួនតាមច្បាប់ប្រកបដោយតម្លាភាព និងយុត្តិធម៌។ ជនដែលពាក់ព័ន្ធក្នុងករណីនេះ ត្រូវចូលរួមទទួលខុសត្រូវ និងបញ្ឈប់ជាបន្ទាន់នូវការយកស្ត្រីជាកម្មវត្ថុដើម្បីទាញយកប្រយោជន៍នយោបាយ។
អ្នកស្រី ធីតា ឃឹះ បានសំដៅទៅលើគណបក្សទាំងពីរ គឺគណបក្សប្រជាជនកម្ពុជា និងគណបក្សសង្គ្រោះជាតិ ថាមួយជាអ្នកបង្ករឿង មួយមិនបានចូលរួមឆ្លើយឆ្លងរកដំណោះស្រាយ ដែលស្ត្រីក្លាយជាជនរងគ្រោះ៖ «គេយកស្ត្រីធ្វើជាកម្មវត្ថុមួយដើម្បីប្រកាន់ មានជារឿងអ៊ីចឹងណា។ សូមឲ្យរដ្ឋាភិបាលចាត់វិធានការការពារសិទ្ធិរបស់មនុស្សរបស់ស្ត្រី ហើយធ្វើម៉េចបញ្ឈប់នូវការប្រើប្រាស់ស្ត្រីក្នុងករណីរបៀបនេះ»។
ពាក់ព័ន្ធនឹងការលើកឡើងនេះ អ្នកនាំពាក្យគណបក្សប្រជាជនកម្ពុជា លោក សុខ ឥសាន មានប្រសាសន៍ថា ទស្សនៈរបស់សង្គមស៊ីវិលនេះគឺប្រាសចាកការពិត និងសុំកុំឲ្យលាបពណ៌គណបក្សប្រជាជន៖ «សង្គមស៊ីវិលអស់ហ្នឹងមានឯករាជ្យឯណា? គាត់លំអៀងហ្នឹង គាត់យកស្អីអូសមកដាក់គណបក្សកាន់អំណាចហ្នឹង អាណាល្អគាត់និយាយអាក្រក់ អាណាអាក្រក់តិច គាត់ពង្រីកអាក្រក់ធំ នេះជាទម្លាប់របស់គាត់ វាមានបញ្ហាអីអាហ្នឹង។ រឿងគាត់ទេ! គណបក្សប្រជាជនអត់ពាក់ព័ន្ធរឿងហ្នឹងទេ រឿងបុគ្គលគាត់ផ្ទាល់ខ្លួន ឯកឧត្ដម កឹម សុខា ហើយសមាជិកអ្នកមានជំនឿគាត់អ្នកជឿលើគាត់ ឥឡូវនេះខកដំណើរ ដោយសារជឿគាត់ហើយគាត់ធ្វើផ្ដេសផ្ដាសរឿងតែប៉ុណ្ណឹងទេ»។
វិទ្យុអាស៊ីសេរី មិនអាចទាក់ទងអ្នកនាំពាក្យគណបក្សសង្គ្រោះជាតិ បានទេ នៅថ្ងៃទី៩ ខែមេសា។ ប៉ុន្តែកន្លងមកគណបក្សនេះ បានប្រកាន់ជំហរលើគោលការណ៍មិនឆ្លើយមិនឆ្លងមិនឈ្លោះលើករណីនេះឡើយ។
កញ្ញា ខុម ចាន់តារាទី ហៅ ស្រីមុំ ដែលត្រូវបានគេចោទថា មានស្នេហាលួចលាក់ជាមួយអនុប្រធានគណបក្សសង្គ្រោះជាតិ លោក កឹម សុខា បានដាក់ពាក្យសុំពន្យារពេលចូលបំភ្លឺនៅតុលាការដោយសារមិនទាន់រកមេធាវីការពារ។
ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ ចេញដីកាកោះហៅ កញ្ញា ខុម ចាន់តារាទី ហៅ ស្រីមុំ ឲ្យចូលបំភ្លឺនៅតុលាការ នៅថ្ងៃទី៨ ខែមេសា ឆ្នាំ២០១៦ បន្ទាប់ពីរបាយការណ៍របស់សមត្ថកិច្ចនៃនាយកដ្ឋានប្រឆាំងភេរវកម្ម និងឧក្រិដ្ឋកម្មឆ្លងដែនរកឃើញថា កញ្ញាជាប់ពាក់ព័ន្ធការផ្ដល់សក្ខីកម្មក្លែង និងអំពើពេស្យាចារ។
សេចក្ដីថ្លែងការណ៍រួមរបស់សង្គមស៊ីវិលចំនួន២០ ចេញផ្សាយនៅថ្ងៃទី៩ ខែមេសា បានសរសេរថា ករណី កញ្ញា ខុម ចាន់តារាទី ការដែលជ្រៀតជ្រែកដោយធ្វើការផ្សព្វផ្សាយអំពីជីវិតឯកជនរបស់នាង ហើយក៏ជាការរំលោភសិទ្ធិមនុស្ស ដោយផ្អែកទៅលើការប្ដេជ្ញាចិត្តរបស់រដ្ឋាភិបាលក្នុងនាមរដ្ឋជាភាគីនៃកតិកាសញ្ញាអន្តរជាតិស្ដីពីសិទ្ធិពលរដ្ឋ និងសិទ្ធិនយោបាយ។ ម្យ៉ាងវិញទៀត ដីកាកោះហៅរបស់តុលាការពីបទផ្ដល់សក្ខីកម្មក្លែង និងករណីអំពើពេស្យាចារ គឺជាការចោទប្រកាន់ដោយគ្មានមូលដ្ឋានច្បាស់លាស់។
សង្គមស៊ីវិលយល់ឃើញថា ករណីនេះកំពុងតែធ្វើឲ្យប៉ះពាល់យ៉ាងខ្លាំងដល់កិត្តិយសកេរ្តិ៍ឈ្មោះ និងសេចក្ដីថ្លៃថ្នូររបស់គាត់ ហើយស្ថានភាពនេះបានធ្វើឲ្យគាត់បាត់បង់ការងារ និងកំពុងរស់នៅដោយភ័យខ្លាចព្រួយបារម្ភពីសុវត្ថិភាពផ្ទាល់ខ្លួន ដោយសារតែបុគ្គលជាប់ពាក់ព័ន្ធគឺជាអ្នកនយោបាយ និងជាថ្នាក់ដឹកនាំគណបក្សជំទាស់៕
No comments:
Post a Comment