A Change of Guard

សូមស្តាប់វិទ្យុសង្គ្រោះជាតិ Please read more Khmer news and listen to CNRP Radio at National Rescue Party. សូមស្តាប់វីទ្យុខ្មែរប៉ុស្តិ៍/Khmer Post Radio.
Follow Khmerization on Facebook/តាមដានខ្មែរូបនីយកម្មតាម Facebook: https://www.facebook.com/khmerization.khmerican

Monday 18 April 2016

ក្រុម​សិល្បៈ​របាំ​ត្រុដិ​ត្អូញត្អែរ​ថា​ទីផ្សារ​របាំ​ត្រុដិ​អំឡុង​បុណ្យ​ចូល​ឆ្នាំ​មិន​សូវ​មាន​អ្នក​គាំទ្រ


ដោយ អ៊ុំ រង្សី
2016-04-17

របាំ​ត្រុដិ ២០១៦ ៨៥៥
ក្រុម​សិល្បៈ​របាំ​ត្រុដិ​មក​ពី​សមាគម​ចលនា​វប្បធម៌​ជាតិ សម្ដែង​ក្នុង​កម្មវិធី​សប្បុរសធម៌ និង​អបអរ​បុណ្យ​ចូល​ឆ្នាំ​ប្រពៃណី​ជាតិ យក​ថវិកា​ឧបត្ថម្ភ​ដល់​កុមារ​ក្រីក្រ​ឲ្យ​ទទួល​បាន​ការ​អប់រំ កាល​ពី​ថ្ងៃ​ទី​៣ ខែ​មេសា ឆ្នាំ​២០១៦។ RFA/Um Rainsey
 RFA/Um Rainsey


ត្រុដិ គឺ​ជា​របាំ​ប្រជាប្រិយ​ខ្មែរ​មួយ​ប្រភេទ ដែល​ភាគ​ច្រើន​គេ​និយម​សម្ដែង​ក្នុង​រដូវ​ចូល​ឆ្នាំ​ថ្មី​ប្រពៃណី​ជាតិ ដើម្បី​បួង​សួង​សុំ​សេចក្តី​សុខ និង​បណ្ដេញ​ឧបទ្រព​ចង្រៃ​ពី​ឆ្នាំ​ចាស់ និង​នាំ​សិរី​សួស្តី​ក្នុង​ឆ្នាំ​ថ្មី។ ក្រុម​សិល្បៈ​របាំ​ត្រុដិ លើក​ឡើង​ថា បើ​ទោះ​បី​ជា​របាំ​ត្រុដិ គឺ​ជា​របាំ​បុរាណ​ខ្មែរ​ក៏​ពិត​មែន ប៉ុន្តែ​បច្ចុប្បន្ន ទីផ្សារ​របាំ​ត្រុដិ ហាក់​ដូចជា​នៅ​ចាញ់​របាំ​មុងសាយ​ចិន ទៅ​វិញ។

តើ​មាន​មូលហេតុ​អ្វី​ខ្លះ ដែល​បណ្ដាល​ឲ្យ​ទីផ្សារ​របាំ​ត្រុដិ មិន​ទទួល​បាន​ការ​គាំទ្រ​ដូច​របាំ​មុងសាយ​ចិន?

«ចម្រៀង​របាំ​ត្រុដិ»

នេះ គឺ​ជា​សំឡេង​ក្រុម​សិល្បៈ​របាំ​ត្រុដិ ដែល​បាន​សម្ដែង​ក្នុង​សាលា​រៀន​ឯកជន​មួយ​នៅ​ក្នុង​រាជធានី​ភ្នំពេញ មុន​ពេល​បុណ្យ​ប្រពៃណី​ចូល​ឆ្នាំ​ខ្មែរ​មក​ដល់។

តាម​សៀវភៅ​របាំ​ប្រជាប្រិយ​ខ្មែរ បោះពុម្ព​ដោយ​វិទ្យាស្ថាន​ពុទ្ធសាសនបណ្ឌិត្យ បាន​សរសេរ​បញ្ជាក់​ថា ពាក្យ “ត្រុដិ” គឺ​ជា​ពាក្យ​ដើម​មក​ពី​ភាសា​សំស្ក្រឹត ដែល​មាន​ន័យ​ថា “ផ្តាច់” ឬ “កាត់​ផ្តាច់” ដែល​គេ​ភាគ​ច្រើន គេ​ប្រើ​ដើម្បី​ផ្តាច់​ចោល​នូវ​ឧបទ្រព​ចង្រៃ​ដែល​មាន​នៅ​ក្នុង​ឆ្នាំ​ចាស់ ហើយ​ផ្លាស់​ចូល​ឆ្នាំ​ថ្មី និង​សម្រាប់​ប្រសិទ្ធ​សព្វ​សាធុការ​ពរ​ជូន​ដល់​អ្នក​ស្រុក ជាទូទៅ​ក្នុង​ឱកាស​ចូល​ឆ្នាំ​ថ្មី។



នាយក​កម្មវិធី​សមាគម​ចលនា​វប្បធម៌​ជាតិ ដែល​តែង​តែ​ដើរ​សម្ដែង​តាម​ក្រសួង ឬ​មន្ទីរ​នានា លោក ស៊ូ វណ្ណៈ បាន​ប្រាប់​វិទ្យុ​អាស៊ីសេរី ថា របាំ​ត្រុដិ​នេះ គឺ​មាន​ឱកាស​មួយ​ឆ្នាំ​អាច​សម្ដែង​បាន​តែ​មួយ​ដង​ទេ គឺ​ក្នុង​អំឡុង​ពិធី​បុណ្យ​ចូល​ឆ្នាំ​ខ្មែរ និង​មាន​ម្តងម្កាល​បាន​សម្ដែង​ក្នុង​ពិធី​បន់​ស្រន់​សុំ​ទឹកភ្លៀង។ លោក​បន្ត​ថា បើ​តាម​ជំនឿ គេ​លេង​របាំ​ត្រុដិ​ដើម្បី​បណ្ដេញ​ឧបទ្រព​ចង្រៃ​ក្នុង​ឆ្នាំ​ចាស់ និង​នាំ​មក​នូវ​ភាព​សម្បូរ​សប្បាយ ព្រម​ទាំង​លាប​សក្ការៈ និង​ប្រកប​ដោយ​សុភមង្គល​សម្រាប់​ឆ្នាំ​ថ្មី៖ «របាំ​ត្រុដិ​គេ​សម្ដែង​ក្នុង​គោល​បំណង​ពីរ​សំខាន់។ ទី​១ គឺ​បណ្ដេញ​ឧបទ្រព​ចង្រៃ។ ទី​២ គឺ​ដើម្បី​សុំ​ទឹក​ភ្លៀង ដោយសារ​ខែ​នេះ​ជា​ខែ​ចេត្រ ដើម្បី​អំពាវនាវ​ដល់​អារុក្ខអារក្ខ​អ្នកតា ឲ្យ​ផ្តល់​ទឹក​ភ្លៀង​មក​ភព​ផែនដី»។

លោក​ឲ្យ​ដឹង​ទៀត​ថា ដើម្បី​លេង​របាំ​ត្រុដិ​បាន ត្រូវ​មាន​មនុស្ស​យ៉ាង​ហោច​ណាស់​ជាង ២០​នាក់។ តួអង្គ​សំខាន់​ក្នុង​របាំ​ត្រុដិ គឺ​តួ​សត្វ​ប្រើស។ ក្រៅ​ពី​នេះ ក៏​មាន​តួ​ព្រាន​ព្រៃ តួ​យក្ស​ពីរ​នាក់ តួ​ស្រី​ព្រាយ​ក្រចក​វែង​ពីរ​នាក់ តួ​សត្វ​ក្ងោក​ពីរ​នាក់ ដែល​ស្លៀកពាក់​តាម​ប្រពៃណី​ខ្មែរ​ធម្មតា និង​មាន​កាន់​កន្ទុយ​ក្ងោក​ពីរ ជា​និមិត្ត​សញ្ញា​ផង​ដែរ។ ទន្ទឹម​នោះ របាំ​ត្រុដិ​ក៏​មាន​ក្រុម​តន្ត្រីករ​អ្នក​កាន់​ស្គរ ទ្រ​សោ ទ្រ​អ៊ូ ប៉ី និង​អ្នក​ច្រៀង​មួយ​ចំនួន​ទៀត៖ «ពី​ដើម​ដោយ​បើ​សិន​ជា​សត្វ​ប្រើស​ចូល​ទៅ​ភូមិ-ឃុំ​ណា​មួយ គឺ​តែង​នាំ​មក​នូវ​ភាព​ចង្រៃ​ទៅ​ដល់​កន្លែង​ដែល​គាត់​រស់នៅ ហើយ​ចឹង​ទៅ អ្នក​ស្រុក​អ្នក​ភូមិ គាត់​តែង​នាំ​គ្នា​ដេញ​សត្វ​ប្រើស​នោះ​ចេញ​ពី​ភូមិ។ ដូច្នេះ​ហើយ ការ​បង្កើត​របាំ​ត្រុដិ គឺ​លាយ​ជាមួយ​អបិយ​ជំនឿ​ខ្លះ។ ចឹ​ង​ឲ្យ​សត្វ​ប្រើស​ចូល​ដល់​ក្នុង​ភូមិ ប្រជាជន​គាត់​តែង​នាំ​គ្នា​ដេញ​បាញ់​សត្វ​ប្រើស មាន​តាំង​ពី​មនុស្ស ព្រាយ យក្ស ព្រាន​ព្រៃ ព្រៃ​ប្រឹក្សា ចូលរួម​ទាំងអស់​គ្នា​ដេញ​សត្វ​ប្រើស​នោះ​ចេញ»។

មក​ដល់​ត្រង់​ចំណុច​នេះ នាយក​កម្មវិធី​សមាគម​ចលនា​វប្បធម៌​ជាតិ និង​ជា​អ្នក​នាំ​ក្រុម​សិល្បៈ​របាំ​ត្រុដិ លោក ស៊ូ វណ្ណៈ និយាយ​ក្នុង​ទឹក​មុខ​ហាក់​ស្រពោន​ថា បច្ចុប្បន្ន ប្រជាពលរដ្ឋ​ខ្មែរ​ចាប់​អារម្មណ៍ និង​គាំទ្រ​វិស័យ​សិល្បៈ​របាំ​ត្រុដិ តិចតួច និង​បាន​ថយ​ចុះ​ជា​បន្តបន្ទាប់​ក្នុង​រយៈពេល​ប៉ុន្មាន​ឆ្នាំ​ចុង​ក្រោយ​នេះ។ ជាក់ស្តែង សម្រាប់​បុណ្យ​ចូល​ឆ្នាំ​នេះ ទីផ្សារ​របាំ​ត្រុដិ​ទទួល​បាន​តែ ៣០​កន្លែង​ប៉ុណ្ណោះ ដែល​ចំនួន​នេះ​គឺ​តិច​ជាង​ឆ្នាំ​មុន។ បញ្ហា​នេះ ដោយសារ​មក​ពី​ការ​កង្វះ​ការ​ផ្សព្វផ្សាយ​ក្នុង​ស្រុក និង​ខ្វះ​ការ​គាំទ្រ​ទំនុក​បម្រុង​ពី​ស្ថាប័ន​ពាក់ព័ន្ធ​ទាំង​ទីផ្សារ និង​ថវិកា។ លោក​ថា ដោយសារ​កត្តា​ទាំងអស់​នេះ​ហើយ ទើប​ធ្វើ​ទីផ្សារ​ត្រុដិ​បច្ចុប្បន្ន​នៅ​ចាញ់​ទីផ្សារ​របាំ​មុងសាយ​ចិន៖ «ទម្រង់​សិល្បៈ​ប្រពៃណី គ្នា​គាត់​និយម​ដែរ តែ​គាត់​សូវ​ឲ្យ​តម្លៃ​ក្នុង​ការ​លើក​ទឹក​ចិត្ត និង​គាំទ្រ​ដូច​វប្បធម៌​បរទេស។ ចឹង​ខ្ញុំ​ចង់​បំផុស​គំនិត​អ្នក​ទាំងអស់​គ្នា​ឲ្យ​ចូលរួម​ការពារ​សិល្បៈ​របាំ​ត្រុដិ​យើង»។

ជា​តួ​សម្ដែង​ម្នាក់​នៅ​ក្នុង​ក្រុម​របាំ​ត្រុដិ លោក សម្ភ័ស រាត្រី សម្ដែង​ជា​តួ​សត្វ​ប្រើស​នៅ​ក្នុង​របាំ​ត្រុដិ បាន​និយាយ​ប្រៀបធៀប​របាំ​ត្រុដិ និង​របាំ​មុងសាយ​របស់​ចិន​ថា មាន​ប្រជាពលរដ្ឋ​ខ្មែរ​មួយ​ចំនួន​បាន​ឲ្យ​តម្លៃ​របាំ​ត្រុដិ​ខ្មែរ ដូចជា​សម្លៀកបំពាក់​ដែល​ចាស់ មិន​ទាន់​សម័យ ដែល​ស្លៀក​ទៅ​មិន​ស្អាត។ ដូច​នេះ ធ្វើ​ឲ្យ​ពួក​គេ​ទាំង​នោះ​គិត និង​ឲ្យ​តម្លៃ​លើ​សម្ភារៈ​បរទេស​ជាង​របស់​ខ្លួន។ លោក​ក៏​អំពាវនាវ​ឲ្យ​ក្រសួង​វប្បធម៌ និង​ប្រព័ន្ធ​ផ្សព្វផ្សាយ ចាក់​ផ្សាយ​ឲ្យ​បាន​ទូលំទូលាយ​នូវ​សិល្បៈ​ខ្មែរ​ឲ្យ​បាន​ច្រើន៖ «កន្លង​មក អ្វី​ដែល​ពួក​ខ្ញុំ​អន់​ចិត្ត គឺ​គេ​ស្គាល់​របាំ​បរទេស ពិសេស​របាំ​មុងសាយ​ចិន ជាង​របាំ​ត្រុដិ ដែល​ជា​របាំ​របស់​ជាតិ​យើង»។

ទន្ទឹម​គ្នា​នេះ ជា​តួ​សម្ដែង​ក្នុង​ក្រុម​សិល្បៈ​របាំ​ត្រុដិ ដែល​សម្ដែង​ជា​តួ​ព្រាន​ព្រៃ​ម្នាក់​ទៀត លោក ឆេវ មានរិទ្ធិ ក៏​សម្ដែង​ការ​សោកស្ដាយ និង​ខក​ចិត្ត នៅ​ពេល​ដែល​មិន​សូវ​មាន​ការ​លើក​ទឹក​ចិត្ត និង​គាំទ្រ​ចំពោះ​របាំ​ត្រុដិ បើ​ប្រៀបធៀប​នឹង​របាំ​មុងសាយ​ចិន ថា មុងសាយ​មិន​ត្រឹម​តែ​មាន​ទីផ្សារ​ច្រើន ហើយ​ថែម​ទាំង​ទទួល​បាន​កម្រៃ​ខ្ពស់​ថែម​ទៀត។ តួ​សម្ដែង​ម្នាក់​នេះ អំពាវនាវ​ឲ្យ​ប្រជាពលរដ្ឋ​ខ្មែរ​ទាំងអស់ គួរ​នាំ​គ្នា​លើក​កម្ពស់​របាំ​ប្រពៃណី​ខ្មែរ៖ «សំណូមពរ​ទៅ​ដល់​ក្រសួង និង​ស្ថាប័ន​ពាក់ព័ន្ធ​ទាំងអស់ ហើយ​និង​ទស្សនិកជន​ខ្មែរ​ទាំងអស់ ឲ្យ​ងាក​មក​មើល និង​គាំទ្រ​របាំ​ត្រុដិ​ខ្មែរ​យើង​ឡើង​វិញ កុំ​នាំ​គ្នា​យក​វប្បធម៌​បរទេស​មក​ដាក់​មុខ ហើយ​យក​វប្បធម៌​ខ្លួន​ឯង​ចេញ​នោះ»។

ករណី​នេះ​ដែរ សាស្ត្រាចារ្យ​ផ្នែក​ល្ខោន និង​របាំ​បុរាណ នៃ​សាកលវិទ្យាល័យ​ភូមិន្ទ​វិចិត្រ​សិល្បៈ អ្នកស្រី អ៊ុយ លតាវណ្ណ ឲ្យ​ដឹង​ថា ពី​មួយ​ឆ្នាំ​ទៅ​មួយ​ឆ្នាំ មាន​ពលរដ្ឋ​ខ្មែរ​តិចតួច​ណាស់​ដែល​ចាប់​អារម្មណ៍​រៀន និង​គាំទ្រ​ផ្នែក​សិល្បៈ​របាំ​បុរាណ មិន​ថា​តែ​របាំ​ត្រុដិ​នោះ​ទេ។ កត្តា​នេះ អ្នកស្រី​យល់​ថា មក​ពី​កង្វះ​ការ​ផ្សព្វផ្សាយ កង្វះ​ទីផ្សារ​ការងារ លំហូរ​ចូល​វប្បធម៌​បរទេស និង​ការ​ឲ្យ​តម្លៃ និង​និយម​ជ្រុល​វប្បធម៌​បរទេស។ សាស្ត្រាចារ្យ​រូប​នេះ ក៏​ជំរុញ​ឲ្យ​ពលរដ្ឋ​ខ្មែរ ងាក​មក​គាំទ្រ​សិល្បៈ​របាំ​បុរាណ​ខ្មែរ​ឡើង​វិញ៖ «សូម​ឲ្យ​យុវវ័យ​យើង​ទាំងអស់ ពិសេស​ពលរដ្ឋ​ខ្មែរ ងាក​មក​គាំទ្រ​សិល្បៈ​បុរាណ​ខ្មែរ ព្រោះ​យុវជន​យើង​ទាំងអស់​គ្នា គឺ​ជា​អ្នក​បន្ត​វេន​ក្នុង​ការ​ផ្សព្វផ្សាយ​សិល្បៈ​ខ្មែរ»។

ដោយ​មើល​ឃើញ​ទីផ្សារ​របាំ​ត្រុដិ ខ្វះ​ការ​គាំទ្រ​នេះ​ដែរ ជា​មន្ត្រី​ផ្នែក​ទីផ្សារ​នៃ​មជ្ឈមណ្ឌល​អូស្ត្រាលី សម្រាប់​ការ​បណ្តុះបណ្តាល (ACE) កញ្ញា ប៉ាន វុទ្ធី បាន​ឲ្យ​ដឹង​ថា កញ្ញា​តែង​រៀបចំ​កម្មវិធី​អបអរ​ចូល​ឆ្នាំ​ដោយ​មាន​វត្តមាន​របាំ​ត្រុដិ ដើម្បី​រួម​ចំណែក​ជួយ​ផ្សព្វផ្សាយ​ពី​សារសំខាន់​របាំ​ប្រភេទ​នេះ។ បន្ថែម​ពី​នេះ​ទៀត កញ្ញា​យល់​ថា របាំ​ត្រុដិ គឺ​ជា​របាំ​ប្រពៃណី​ខ្មែរ មាន​កាយវិការ កំប្លុកកំប្លែង ធ្វើ​ឲ្យ​អ្នក​មើល​មាន​អារម្មណ៍​រីករាយ​ថែម​ទៀត។ ប៉ុន្តែ​កញ្ញា​សោកស្ដាយ​នៅ​ពេល​ពលរដ្ឋ​ខ្មែរ​ជាច្រើន មិន​បាន​យល់​ពី​អត្ថន័យ និង​មិន​សូវ​មាន​ការ​អើពើ​នឹង​សិល្បៈ​មួយ​នេះ​ទៅ​វិញ៖ «ចូល​ឆ្នាំ​ខ្មែរ យើង​ត្រូវ​គាំទ្រ​របាំ​ត្រុដិ​យើង ហើយ​ម្យ៉ាង​របាំ​ត្រុដិ គឺ​ជា​របាំ​ប្រពៃណី​យើង តែ​បើ​យើង​យក​របាំ​បរទេស​វា​អត់​ល្អ​ទេ ដូច​ខ្ញុំ​ចឹង រៀបចំ​កម្មវិធី​មាន​មនុស្ស ៧០០​នាក់ ចូលរួម​យ៉ាង​ហោច​ណាស់ ធ្វើ​ឲ្យ​ពួក​គាត់​បាន​ដឹង​ដែរ ហើយ​បើ​គាត់​ថ្ងៃ​ក្រោយ​ទៅ​ក្លាយ​ជា​អ្នក​រៀបចំ​កម្មវិធី​ដូច​ខ្ញុំ គាត់​អាច​នាំ​យក​របាំ​ត្រុដិ​មក​ផ្សព្វផ្សាយ​ដូច​គ្នា»។

ឆ្លើយ​តប​នឹង​បញ្ហា​នេះ រដ្ឋលេខាធិការ​ក្រសួង​វប្បធម៌ និង​វិចិត្រ​សិល្បៈ លោក ថៃ នរៈសត្យា មាន​ប្រសាសន៍​ថា ការ​ប្រៀបធៀប​ទីផ្សារ​របាំ​ត្រុដិ និង​របាំ​មុងសាយ គឺ​ជា​ការ​យល់​ឃើញ​របស់​មនុស្ស​ម្នាក់ៗ​ប៉ុណ្ណោះ។ លោក​ថា ការ​និយម​យក​មុងសាយ​ចិន មក​សម្ដែង​ក្នុង​អំឡុង​បុណ្យ​ចូល​ឆ្នាំ ដោយសារ​តែ​គេ​មាន​ជីវភាព​ធូរធារ​ជាដើម។ ហេតុ​នេះ វា​មិន​បាន​ប៉ះពាល់​អ្វី​ដល់ទី​ផ្សារ​របាំ​ខ្មែរ​នោះ​ទេ ព្រោះ​កម្ពុជា បាន​ចូល​សមាហរណកម្ម​អាស៊ាន​ហើយ ប៉ុន្តែ​ទោះ​ជា​យ៉ាង​ណា ក្រសួង​វប្បធម៌ និង​វិចិត្រ​សិល្បៈ បាន​យក​ចិត្ត​ទុក​ដាក់​ចំពោះ​សិល្បៈ​ប្រពៃណី​ខ្មែរ មិន​ថា​តែ​របាំ​ត្រុដិ​ប៉ុណ្ណោះ​ទេ។ ជាង​នេះ លោក​ថា កន្លង​មក ទោះ​ជា​ក្រសួង​មិន​បាន​គាំទ្រ​រក​ទីផ្សារ​ជូន​ក្រុម​របាំ​ត្រុដិ តែ​ក្រសួង​តែង​បាន​គាំទ្រ​ទាំង​ការ​ផ្សព្វផ្សាយ បណ្តុះបណ្តាល​ធនធាន​ជំនាន់​ក្រោយ ដើម្បី​ចូលរួម​ថែ​រក្សា​របាំ​បុរាណ​ខ្មែរ​ជាដើម។

សៀវភៅ​របាំ​ប្រជាប្រិយ​ខ្មែរ បោះពុម្ព​ដោយ​វិទ្យាស្ថាន​ពុទ្ធសាសនបណ្ឌិត្យ បាន​សរសេរ​បញ្ជាក់​ដែរ​ថា របាំ​ត្រុដិ គឺ​ជា​របាំ​ប្រពៃណី​របស់​ខ្មែរ​ដែល​មាន​អាយុកាល​ចំណាស់​មួយ មាន​កំណើត​ពី​មនុស្ស​ជាន់​ដើម​មួយ​ពួក ហៅ​ថា “សំរែ” ដែល​រស់នៅ​លើ​ទឹក​ដី​សុវណ្ណ​ភូមិ​ចាស់ តាំង​ពី​ដែនដី​នេះ​មិន​ទាន់​ទទួល​អារ្យធម៌​ពី​ប្រទេស​ឥណ្ឌា នៅ​ឡើយ។ សព្វថ្ងៃ ជនជាតិ​នេះ​មាន​រស់នៅ​តិចតួច​នៅ​ក្នុង​ភូមិ​ភាគ​ខាង​កើត​បឹង​ទន្លេសាប ក្បែរ​ខេត្ត​សៀមរាប ដែល​ជា​រាជធានី​ចាស់។

ក្រុម​សិល្បៈ​របាំ​ត្រុដិ អះអាង​ថា បើ​ទោះ​បី​ជា​របាំ​ត្រុដិ គឺ​ជា​របាំ​មួយ​ដែល​បញ្ជាក់​អត្តសញ្ញាណ​ខ្មែរ និង​មាន​អាយុកាល​ចំណាស់​យ៉ាង​ណា​ក៏ដោយ ក៏​ទីផ្សារ​ត្រុដិ​បច្ចុប្បន្ន​នៅ​តែ​មិន​ទាន់​ទូលំទូលាយ បើ​ធៀប​នឹង​ទីផ្សារ​របាំ​មុងសាយ​ចិន ព្រោះ​ក្រុម​សិល្បៈ​របាំ​ត្រុដិ ជា​អ្នក​ស្វែងរក​ទីផ្សារ​សម្ដែង​ដោយ​ខ្លួន​ឯង។ ជាក់ស្តែង ក្រុម​សិល្បៈ​របាំ​ត្រុដិ​ខ្លះ ត្រូវ​បង្ខំ​ចិត្ត​ដើរ​សម្ដែង​តាម​ផ្សារ ឬ​ទីផ្សារ​សាធារណៈ អំឡុង​បុណ្យ​ចូល​ឆ្នាំ ដើម្បី​មក​ផ្គត់ផ្គង់​ជីវភាព។ ជាង​នេះ​ទៀត ក្រុម​សិល្បៈ​របាំ​ត្រុដិ ក៏​ចង់​ឃើញ​ប្រជាពលរដ្ឋ​ខ្មែរ គាំទ្រ​ទីផ្សារ​ត្រុដិ​ឲ្យ​មាន​ដំណើរ​ការ​ទៅ​មុខ ដើម្បី​ថែ​រក្សា​របាំ​ត្រុដិ​កុំ​ឲ្យ​បាត់បង់ ព្រម​ទាំង​ជួយ​លើក​ស្ទួយ​កម្រិត​ជីវភាព​សិល្បករ​របាំ​ត្រុដិ​នៅ​កម្ពុជា៕

No comments: