A Change of Guard
សូមស្តាប់វិទ្យុសង្គ្រោះជាតិ Please read more Khmer news and listen to CNRP Radio at National Rescue Party. សូមស្តាប់វីទ្យុខ្មែរប៉ុស្តិ៍/Khmer Post Radio.
Follow Khmerization on Facebook/តាមដានខ្មែរូបនីយកម្មតាម Facebook: https://www.facebook.com/khmerization.khmerican
Thursday 14 April 2016
អង្គការមាតាធម្មជាតិស្នើសហភាពអឺរ៉ុបនិងអ.ស.បអន្តរាគមន៍ជួយសកម្មជនការពារបរិស្ថាន
ដោយ សុជីវី
2016-04-13
ពលរដ្ឋហែក្បួនទិវាសិទ្ធិមនុស្សអន្តរជាតិក្នុងរាជធានីភ្នំពេញ និងទាមទារឲ្យដោះលែងសកម្មជនបរិស្ថាន ៤នាក់នៅខេត្តកោះកុង កាលពីថ្ងៃទី១០ ខែធ្នូ ឆ្នាំ២០១៥។ RFA/Sochivy
RFA/Sochivy
អង្គការមាតាធម្មជាតិ និងអង្គការដៃគូជាង ២០ ទៀត ស្នើឲ្យអង្គការសហប្រជាជាតិ (អ.ស.ប) និងសហភាពអឺរ៉ុប ជួយអន្តរាគមន៍ផ្ដល់យុត្តិធម៌ដល់សកម្មជនការពារបរិស្ថានចំនួន ៤នាក់ ក្នុងនោះមាន ៣នាក់កំពុងជាប់ឃុំនៅពន្ធនាគារខេត្តកោះកុង។
ប្រធានអង្គការមាតាធម្មជាតិ អះអាងថា ការដាក់សំណើនេះ ដោយសារកន្លងមក ស្ថាប័នទាំងពីរនេះ ហាក់មិនអើពើចំពោះភាពអយុត្តិធម៌ដែលកើតឡើងចំពោះសកម្មជនការពារបរិស្ថានក្នុងខេត្តកោះកុង។
សំណើរបស់អង្គការមាតាធម្មជាតិ និងសម្ព័ន្ធអង្គការការពារសិទ្ធិជនជាតិដើមភាគតិច ហៅកាត់ថា អេ.អាយ.ភី.ភី (AIPP) ធ្វើឡើងតាមរយៈលិខិតចំនួនពីរដាច់ដោយឡែកពីគ្នា ដោយមានអត្ថន័យដូចគ្នាដាក់ទៅសហភាពអឺរ៉ុប និងអ្នករាយការណ៍ពិសេសអង្គការសហប្រជាជាតិ ទទួលបន្ទុកស្ថានភាពអ្នកការពារសិទ្ធិមនុស្ស។
ស្ថាបនិកអង្គការមាតាធម្មជាតិ លោក អាឡិកហាន់ដ្រូ ហ្គន់ហ្សាឡេស ដេវិតសឹន (Alejandro Gonzalez Davidson) ដែលជាអ្នកដាក់លិខិត មានប្រសាសន៍ប្រាប់វិទ្យុអាស៊ីសេរី នៅរសៀលថ្ងៃទី១៣ ខែមេសា ថា មកដល់ពេលនេះ សកម្មជនការពារបរិស្ថានចំនួន ៣នាក់ កំពុងជាប់ពន្ធនាគារដោយអយុត្តិធម៌អស់រយៈពេលជិត ៨ខែមកហើយ។ លោកថា គួរតែដល់ពេលដែលសហភាពអឺរ៉ុប និងអ្នករាយការណ៍ពិសេសរបស់អង្គការសហប្រជាជាតិ ត្រូវយកចិត្តទុកដាក់ជួយជំរុញឲ្យរដ្ឋាភិបាល ងាកមកគោរពសិទ្ធិរបស់ពួកគេ និងដោះលែងពួកគេឲ្យមានសេរីភាព៖ «អ្វីដែលយើងទាមទារសម្រាប់សកម្មជនទាំង ៣នាក់ គឺដោះលែង តែបើមិនដោះលែងទេ សុំចាប់ផ្ដើមជំនុំជម្រះដោយត្រឹមត្រូវ ដោយយុត្តិធម៌នៅក្នុងពេលឆាប់ៗនេះ ព្រោះ ៨ខែវាហាក់ដូចជាហួសពីនីតិវិធីហើយ»។
នៅក្នុងលិខិតរបស់អង្គការមាតាធម្មជាតិ និងអង្គការដៃគូ បានសរសេរថា សហភាពអឺរ៉ុប គួរមានវិធានការឲ្យស្របតាមគោលការណ៍ណែនាំស្ដីពីអ្នកការពារសិទ្ធិមនុស្សរបស់ខ្លួន និងត្រូវតាមដានដោយយកចិត្តទុកដាក់បញ្ហានេះ ដោយចេញសេចក្ដីថ្លែងការណ៍ និងចូលរួមតាមដានសវនាការលើអ្នកទាំង៣ ជាពិសេសត្រូវជួយលើកបញ្ហាទាំងនេះនៅពេលជួបប្រជុំជាមួយអាជ្ញាធររដ្ឋាភិបាលកម្ពុជា ទាំងក្នុងកម្រិតជាតិ អាស៊ាន និងវេទិកាដទៃទៀត។ សហភាពអឺរ៉ុប ក៏ត្រូវជំរុញឲ្យរដ្ឋាភិបាលកម្ពុជា យកចិត្តទុកដាក់ចំពោះការពង្រឹងសិទ្ធិសេរីភាពជនជាតិដើមភាគតិច និងសេរីភាពបញ្ចេញមតិ។
ចំណែកលិខិតដាក់ទៅកាន់អ្នករាយការណ៍ពិសេសរបស់អង្គការសហប្រជាជាតិ ទទួលបន្ទុកស្ថានភាពអ្នកការពារសិទ្ធិមនុស្ស អ្នកស្រី មីសេល ហ្រ្វុស (Michel Frost) បានស្នើឲ្យមន្ត្រីរូបនេះសហការជាមួយអ្នករាយការណ៍ពិសេសដទៃទៀត ហើយជំរុញឲ្យរដ្ឋាភិបាលកម្ពុជា ឲ្យឈានជំហានជាក់លាក់ និងបន្ទាន់ ក្នុងការពិនិត្យឡើងវិញចំពោះការចោទប្រកាន់សកម្មជនអារ៉ែង លោក វ៉ែន វ៉ន និងធានាសិទ្ធិទទួលបានសវនាការដោយយុត្តិធម៌របស់ស្ថាបនិកអង្គការមាតាធម្មជាតិ លោក អាឡិកហាន់ដ្រូ ហ្គន់ហ្សាឡេស ដេវិតសឹន។ ស្របគ្នានេះ ក៏បានស្នើឲ្យអ្នករាយការណ៍ពិសេសអង្គការសហប្រជាជាតិ មានវិធានការយ៉ាងណាឲ្យរដ្ឋាភិបាលកម្ពុជា គោរពតាមបទដ្ឋានច្បាប់ និងសន្ធិសញ្ញានានាស្ដីពីសិទ្ធិមនុស្ស ដែលរដ្ឋាភិបាលបានផ្ដល់សច្ចាប័ន។
សកម្មជនការពារបរិស្ថានទាំង ៤នាក់ ដែលអង្គការមាតាធម្មជាតិ លើកឡើងនៅក្នុងលិខិតនោះរួមមាន លោក វ៉ែន វ៉ន សកម្មជនការពារបរិស្ថានតំបន់អារ៉ែងបានចេញពីពន្ធនាគារកាលពីថ្ងៃទី៣ ខែមីនា។ លោកត្រូវបានសាលាដំបូងខេត្តកោះកុង កាត់ទោសឲ្យជាប់ពន្ធនាគារចំនួន ១ឆ្នាំ ដោយព្យួរទោស។ យុវជនការពារបរិស្ថានទាំង ៣នាក់ដែលកំពុងជាប់ក្នុងពន្ធនាគារខេត្តកោះកុង មានឈ្មោះ សាន់ ម៉ាឡា ទ្រី សុវីគា និង ស៊ីម សំណាង ដែលបានតវ៉ាយ៉ាងសកម្មប្រឆាំងការបូមខ្សាច់របស់ក្រុមហ៊ុនវៀតណាម ត្រូវបានអាជ្ញាធរស្រុកបុទុមសាគរ ចាប់ខ្លួនបញ្ជូនទៅតុលាការ កាលពីថ្ងៃទី១៧ ខែសីហា តាមបណ្ដឹងរបស់អាជ្ញាធរឃុំ និងក្រុមហ៊ុនបូមខ្សាច់ឈ្មោះ ដាយរិក អ៊ិចសេស (Direct Access)។
ទាក់ទិននឹងសំណើទៅសហភាពអឺរ៉ុប និងអ្នកនាំពាក្យអង្គការសហប្រជាជាតិ នេះ លោក អាឡិក បញ្ជាក់ថា នៅក្រោយពេលទទួលបានលិខិតនេះ លោកត្រូវរង់ចាំរយៈពេល ១ខែទៀតយ៉ាងតិច ដើម្បីទទួលបានចម្លើយ៖ «អឺ.យូ (EU)ឬអង្គការសហប្រជាជាតិ ពុំមានសិទ្ធិបញ្ជាទៅលើរដ្ឋាភិបាលទេ ប៉ុន្តែគេអាចនឹងសួរដេញដោលចេញលិខិតជាសាធារណៈ ហើយក៏គេអាចទាក់ទងជាមួយ អឺ.យូ នៅអឺរ៉ុប និងអង្គការសហប្រជាជាតិ នៅទីក្រុងញីវយ៉ក (New York)។ វាមិនអាចទៅដោះលែងសកម្មជនយើងបានទេ តែវាជាផ្នែកមួយដែលនឹងជួយដាក់សម្ពាធទៅលើរដ្ឋាភិបាលបន្ថែម»។
វិទ្យុអាស៊ីសេរី មិនទាន់អាចទាក់ទងដើម្បីសុំការឆ្លើយតបពីសហភាពអឺរ៉ុប និងការិយាល័យអង្គការសហប្រជាជាតិ ចំពោះសំណើរបស់ស្ថាបនិកអង្គការមាតាធម្មជាតិ នេះនៅឡើយ។
ទោះបីជាយ៉ាងណា ស្ថាបនិកអង្គការមាតាធម្មជាតិ លោក អាឡិកហាន់ដ្រូ ហ្គន់ហ្សាឡេស ដេវិតសឹន សង្ឃឹមថានឹងទទួលបានលទ្ធផលល្អពីការស្នើសុំនេះ៕
Subscribe to:
Post Comments (Atom)
No comments:
Post a Comment