A Change of Guard
សូមស្តាប់វិទ្យុសង្គ្រោះជាតិ Please read more Khmer news and listen to CNRP Radio at National Rescue Party. សូមស្តាប់វីទ្យុខ្មែរប៉ុស្តិ៍/Khmer Post Radio.
Follow Khmerization on Facebook/តាមដានខ្មែរូបនីយកម្មតាម Facebook: https://www.facebook.com/khmerization.khmerican
Saturday 2 April 2016
ពលរដ្ឋ២នាក់ត្រូវប្ដឹងពីបទកាប់ឈើក្នុងព្រៃបម្រុងទុកនៅមណ្ឌលគិរី
ដោយ រដ្ឋា វិសាល
2016-04-01
សហគមន៍ជនជាតិព្នង នៅឃុំស្រែព្រះ ស្រុកកែវសីមា ខេត្តមណ្ឌលគិរី បង្ហាញរូបភាពកាប់ព្រៃឈើក្នុងសហគមន៍ នៅក្នុងសន្និសីទកាសែតនារាជធានីភ្នំពេញ នៅថ្ងៃទី១៨ មីនា ២០១៥។
Photo: RFA
សហគមន៍ជនជាតិដើមភាគតិចព្នង នៅឃុំដាក់ដាំ ស្រុកអូររាំង ខេត្តមណ្ឌលគិរី ចាប់ឃាត់រថយន្តដឹកជញ្ជូនឈើមួយគ្រឿងផ្ទុកឈើប្រភេទជន្លង់ម្រេចជាង ១០០ដើមចេញពីព្រៃ ត្រៀមបម្រុងសហគមន៍ដើម្បីធ្វើជំនួញខុសច្បាប់។ អ្នកភូមិចោទឈ្មួញជនជាតិខ្មែរ ពីរនាក់ ថាជាអ្នកពាក់ព័ន្ធកាប់ឈើនោះពីព្រៃសហគមន៍។
ពាក្យប្ដឹងចោទប្រកាន់កាប់បំផ្លាញព្រៃត្រៀមបម្រុងរបស់សហគមន៍ជនជាតិដើមភាគតិចត្រូវបានតំណាងអ្នកភូមិដាក់ជូនខណ្ឌរដ្ឋបាលព្រៃឈើ និងសមាគមអាដហុក (ADHOC) នៅថ្ងៃទី១ ខែមេសា សុំឲ្យចាត់វិធានការផ្លូវច្បាប់ទៅលើជនប្រព្រឹត្តល្មើស។
ពាក្យប្ដឹងនេះធ្វើឡើងបន្ទាប់ពីអ្នកភូមិជាង ១០នាក់ ចុះល្បាតព្រៃកាលពីថ្ងៃទី៣១ ខែមីនា និងស្ទាក់ឃាត់រថយន្តប្រភេទស្ទូចឈើមួយគ្រឿងផ្ទុកដោយឈើជន្លង់ម្រេច ១២០ដើម នៅចំណុចព្រៃពូទុង ភូមិពូត្រែង ក្នុងនោះដែរជនពាក់ព័ន្ធដឹកជញ្ជូនឈើនេះ គឺស្ត្រីឈ្មោះ ណាវី និងឈ្មោះ អូច ជាប្រជាពលរដ្ឋចំណាកស្រុកមករស់នៅឃុំដាក់ដាំ ហើយប្រកបរបរទិញឈើជន្លង់ម្រេចលក់។
តំណាងសហគមន៍ឃុំដាក់ដាំ លោក ទឺយ ធិ ឲ្យដឹងនៅថ្ងៃទី១ ខែមេសា ថា នេះគឺជាសកម្មភាពឃុបឃិតកាប់បំផ្លាញព្រៃសហគមន៍ត្រៀមទុកចុះបញ្ជីជាព្រៃសហគមន៍ការពារ។ លោកថា សហគមន៍ទាមទារឲ្យជនជាប់ពាក់ព័ន្ធផ្ដល់សំណងខូចខាតព្រៃ និងសុំឲ្យអាជ្ញាធរពាក់ព័ន្ធផ្ដន្ទាទោសពួកគេដោយគ្មានការលើកលែង៖ «យើងទាន់ជាក់ស្ដែង កាប់ពីព្រៃសហគមន៍។សហគមន៍ទាមទារសំណងខូចខាតព្រៃ និងឈើ»។
របាយការណ៍របស់សហគមន៍ឃុំដាក់ដាំ ឲ្យដឹងថា នៅរសៀលថ្ងៃទី១ ខែមេសា តំណាងសហគមន៍បានធ្វើកំណត់ហេតុប្រគល់វត្ថុតាងបទល្មើសទាំងអស់ជូនមន្ត្រីសង្កាត់រដ្ឋបាលព្រៃឈើយកមករក្សាទុកនៅទីស្នាក់ការខណ្ឌរដ្ឋបាលព្រៃឈើខេត្តមណ្ឌលគិរី។
ទាក់ទិនករណីនេះដែរ នាយសង្កាត់រដ្ឋបាលព្រៃឈើអូររាំង លោក ទុង វីរ មានប្រសាសន៍ឲ្យដឹងដែរថា សហគមន៍និងមន្ត្រីសង្កាត់រដ្ឋបាលព្រៃឈើប្រមូលវត្ថុតាងបទល្មើសព្រៃឈើនេះដើម្បីកសាងសំណុំរឿងរកជនពាក់ព័ន្ធឲ្យចូលខ្លួនមកទទួលខុសត្រូវបទល្មើសនេះ។
លោកថា អត្តសញ្ញាណជនល្មើសត្រូវបានសហគមន៍រាយការណ៍ជូនអាជ្ញាធររួចហើយ៖ «យើងកំពុងអង្កេតបន្តធ្វើនីតិវិធីរក្សាទុកនៅខណ្ឌរដ្ឋបាលព្រៃឈើ»។
ទោះជាយ៉ាងនេះក្តី មន្ត្រីឃ្លាំមើលបញ្ហាព្រៃឈើខេត្តមណ្ឌលគិរី លោក សុក រដ្ឋា ចាត់ទុកការបង្ក្រាបបទល្មើសព្រៃឈើនេះថា ជាការចូលរួមនិងយកចិត្តទុកដាក់ខ្ពស់របស់សហគមន៍ក្នុងកិច្ចការពារធនធានធម្មជាតិ។លោកអំពាវនាវសុំឲ្យមន្ត្រីរដ្ឋបាលព្រៃឈើស៊ើបអង្កេតរកជនពាក់ព័ន្ធដឹកជញ្ជូនឈើ និងអ្នកពាក់ព័ន្ធកាប់ឈើក្នុងព្រៃមកផ្ដន្ទាទោសតាមច្បាប់៖ «គាត់ដឹងទាំងម្ចាស់ជន្លង់ម្រេច ដឹងទាំងអ្នករកស៊ី អ្នកទិញ។ អ៊ីចឹងគាត់ប្ដឹងទាំងអ្នករកស៊ី អ្នកទិញទៀត»។
ព្រៃត្រៀមបម្រុងសហគមន៍ដាក់ដាំ មានផ្ទៃដីប្រមាណ ២ពាន់ហិកតារ ក៏ប៉ុន្តែប៉ុន្មានឆ្នាំកន្លងទៅ ព្រៃនេះត្រូវបានគេលួចកាប់យកឈើមានតម្លៃអស់ស្ទើរគ្មានសល់។ រហូតបច្ចុប្បន្នព្រៃឈើនៅសល់ក៏ត្រូវគេលួចកាប់បន្តយកឈើធ្វើជន្លង់ម្រេច ខណៈសហគមន៍អភិរក្សព្រៃនេះទុកដើម្បីចុះបញ្ជីជាព្រៃការពារ ព្រៃតំណម និងជាកន្លែងកប់សពសហគមន៍ជនជាតិដើមភាគតិច៕
Subscribe to:
Post Comments (Atom)
No comments:
Post a Comment