ដោយ ខែ សុណ
កញ្ញា ខុម ចាន់តារាទី ហៅ ស្រីមុំ (ស្ដាំ) ឆ្លើយសំណួរអ្នកកាសែត ក្រោយចេញពីបន្ទប់សាកសួររបស់សាលាដំបូងរាជធានីភ្នំពេញ នៅថ្ងៃទី១៩ ខែមេសា ឆ្នាំ២០១៦។
RFA/Phann Yasy
ព្រះរាជអាជ្ញារងនៃសាលាដំបូងរាជធានីភ្នំពេញ លោក សៀង សុខ បានបញ្ចប់ការសាកសួរ កញ្ញា ខុម ចាន់តារាទី ហៅ ស្រីមុំ នៅថ្ងៃអង្គារ ទី១៩ ខែមេសា ដែលត្រូវបានគេចោទថា មានស្នេហាលួចលាក់ជាមួយ លោក កឹម សុខា អនុប្រធានគណបក្សសង្គ្រោះជាតិ។ ការសាកសួរ បានប្រើពេលជាច្រើនម៉ោង យោងរបាយការណ៍របស់សមត្ថកិច្ចនៃនាយកដ្ឋានប្រឆាំងអំពើភេរវកម្ម និងឧក្រិដ្ឋកម្មឆ្លងដែន នៃក្រសួងមហាផ្ទៃ ពាក់ព័ន្ធករណីផ្ដល់សក្ខីកម្មក្លែង និងមានអំពើពេស្យាចារ តាមបណ្ដឹងរបស់ កញ្ញា ធី សុវណ្ណថា។
ទាំងមេធាវី និងកញ្ញា ខុម ចាន់តារាទី ហៅ ស្រីមុំ បានប្រយ័ត្នប្រយែងក្នុងការផ្ដល់បទសម្ភាសន៍ឲ្យអ្នកសារព័ត៌មាន បន្ទាប់ពីតុលាការបញ្ចប់ការសាកសួរនៅព្រឹកថ្ងៃទី១៩ មេសា ដោយនាងអំពាវនាវឲ្យរកយុត្តិធម៌ចំពោះរឿងនេះ។
កញ្ញា ខុម ចាន់តារាទី បានដើរសំដៅយ៉ាងលឿនចូលរថយន្ត មិនចង់ឲ្យអ្នកសារព័ត៌មានសួរនាំនាងនោះទេ។ នាងបានត្រឹមបដិសេធថា នាងឆ្លើយតែការពិតប្រាប់ទៅតុលាការ ប៉ុន្តែនាងមិនអត្ថាធិប្បាយឡើយថា នាងប្រាប់ពីរឿងអ្វីខ្លះដល់តុលាការនោះទេ៖ «ខ្ញុំអត់មាននិយាយអីច្រើនទេ ព្រោះថាអ្វីដែលខ្ញុំចង់និយាយ គឺការពិត និងរកភាពយុត្តិធម៌ឲ្យខ្ញុំតែប៉ុណ្ណឹងទេ»។
ប៉ុន្តែមេធាវីការពារក្ដីនៃសមាគមអាដហុក (ADHOC) អ្នកស្រី ទ្រី ឈូន មានប្រសាសន៍បន្ទាប់ពីតុលាការបញ្ចប់ការសាកសួរថា អ្នកស្រីសង្ឃឹមថា កូនក្ដីអ្នកស្រីរួចផុតពីការចោទប្រកាន់ ពីព្រោះកូនក្ដីរបស់អ្នកស្រីជាជនរងគ្រោះ ហើយកូនក្ដីអ្នកស្រី ក៏មិនពាក់ព័ន្ធនឹងបទល្មើសដូចរបាយការណ៍ដែលផ្ដល់ឲ្យដោយនាយកដ្ឋានប្រឆាំងអំពើភេរវកម្ម និងឧក្រិដ្ឋកម្មឆ្លងដែនដែរ។ អ្នកស្រីបញ្ជាក់ថា ការសាកសួររបស់តុលាការ បានផ្ដោតលើបញ្ហាសំខាន់ពីរ គឺរឿងខ្សែអាត់សំឡេង និងរឿងទំនាក់ទំនងរវាងកូនក្ដីអ្នកស្រី និងបុគ្គលម្នាក់ទៀត។ ដ្បិតតែថាការសាកសួរជុំវិញបញ្ហាទាំងពីរនេះក្ដី ប៉ុន្តែអ្នកស្រីមិននិយាយលម្អិតថាយ៉ាងណានោះទេ៖ «សំណួរដែលសំខាន់ គឺតំណាងអយ្យការបានតាំងច្រើនពាក់ព័ន្ធទៅលើខ្សែអាត់សំឡេង និងការទំនាក់ទំនងរវាងកូនក្ដីខ្ញុំ និងអ្នកពាក់ព័ន្ធ ដូចជាមិនមានការដាក់បន្ទុកអីទេ ព្រោះតុលាការបានបង្ហាញនូវភស្តុតាងខ្លះៗដែលតុលាការមាន ដើម្បីធ្វើការបញ្ជាក់ចំពោះកូនក្ដីខ្ញុំ»។
វិទ្យុអាស៊ីសេរី មិនអាចទាក់ទងព្រះរាជអាជ្ញារងនៃសាលាដំបូងរាជធានីភ្នំពេញ លោក សៀង សុខ បានទេនៅថ្ងៃទី១៩ មេសា។
ថ្វីត្បិតតែ កញ្ញា ស្រីមុំ និងមេធាវីរបស់នាង មិនផ្ដល់អត្ថាធិប្បាយលម្អិតពីបញ្ហានេះ ប៉ុន្តែសារព័ត៌មានក្នុងស្រុកដែលស្និទ្ធនឹងរដ្ឋាភិបាល បានចុះផ្សាយថា ព្រះរាជអាជ្ញារងនៃសាលាដំបូងរាជធានីភ្នំពេញ លោក សៀង សុខ ប្រាប់ថា កញ្ញា ស្រីមុំ បានឆ្លើយសារភាពទទួលស្គាល់ខ្សែអាត់ដែលបែកធ្លាយតាមហ្វេសប៊ុក (Facebook) ជាសំឡេងពិតដែលសន្ទនារវាងនាងជាមួយ លោក កឹម សុខា។ នៅក្នុងអំឡុងពេលសាកសួរ កញ្ញា ស្រីមុំ បានស្នើឲ្យតំណាងអយ្យការជួយរកយុត្តិធម៌ឲ្យរូបនាងតាមផ្លូវច្បាប់។
ចំណែកនៅខាងក្រៅរបងតុលាការ ក៏មានយុវជនមួយចំនួនរង់ចាំស្ដាប់លទ្ធផលសាកសួរដែរ។
យុវជន ស្រី ចំរើន ដែលតែងតាមរំខាន និងទាមទារឲ្យ លោក កឹម សុខា បកស្រាយរឿងនេះកន្លងមកនោះ បានថ្លែងថា ពួកគេចង់ដឹងពីដំណើរសាច់រឿងដែល កញ្ញា ស្រីមុំ ចូលខ្លួនបំភ្លឺនៅតុលាការ ហើយស្នើឲ្យតុលាការ ចាត់វិធានការតាមច្បាប់ដើម្បីបញ្ចប់រឿងដែលពាក់ព័ន្ធ លោក កឹម សុខា ដែលជាបុគ្គលសាធារណៈ។
ករណីបញ្ចេញខ្សែអាត់សំឡេង និងការចោទប្រកាន់ កញ្ញា ស្រីមុំ នេះ ត្រូវបានអ្នកតាមដានស្ថានការណ៍នយោបាយលើកឡើងថា ជារឿងរៀបចំផ្នែកនយោបាយដែលមានផែនការច្បាស់លាស់ ដើម្បីវាយបំបាក់ប្រជាប្រិយភាពគណបក្សប្រឆាំង។
រីឯអ្នកធ្វើការលើកស្ទួយសិទ្ធិស្ត្រី មិនចាប់អារម្មណ៍ចំពោះការឆ្លើយសារភាពថាសំឡេងពិត ឬមិនពិតនោះទេ។
នាយិកាអង្គការសីលការ អ្នកស្រី ធីតា ឃឹះ មានប្រសាសន៍ថា ស្ថាប័នតុលាការដែលជាស្ថាប័នឯករាជ្យ ត្រូវប្រើតួនាទីរបស់ខ្លួនប្រកបដោយតម្លាភាព យុត្តិធម៌ និងរក្សានូវសេចក្ដីថ្លៃថ្នូររបស់ជីវិតជាឯកជន ហើយជនដែលពាក់ព័ន្ធក្នុងករណីនេះ ត្រូវចូលរួមទទួលខុសត្រូវ និងបញ្ឈប់ជាបន្ទាន់នូវការយកស្ត្រីជាកម្មវត្ថុ ដើម្បីទាញយកប្រយោជន៍នយោបាយ៖ «នរណាពាក់ព័ន្ធរឿងនេះ គួរតែចេញមុខមកជួយឆ្លើយ ដើម្បីកុំឲ្យនារីក្មេងមួយនេះទទួលបាននូវសម្ពាធទម្ងន់តែម្នាក់ឯង។ លើឯកឧត្ដម កឹម សុខា ឬមួយអ្នកណាដែលបង្កើតរឿងហ្នឹង ក៏ត្រូវតែចេញមកដោះស្រាយ និងបញ្ឈប់ការងារអស់នេះ»។
កាលពីថ្ងៃទី១១ មីនា នាយកដ្ឋានប្រឆាំងអំពើភេរវកម្ម និងឧក្រិដ្ឋកម្មឆ្លងដែន បានកោះហៅ កញ្ញា ស្រីមុំ ម្ដងរួចមកហើយឲ្យចូលខ្លួនតាមបណ្ដឹងរបស់ កញ្ញា ធី សុវណ្ណថា ដែលប្ដឹងពីបទបរិហារកេរ្តិ៍ ឲ្យរកម្ចាស់សំឡេងសន្ទនាដែលគេអះអាងថាជាការសន្ទនាជាមួយ លោក កឹម សុខា៕
No comments:
Post a Comment