ដោយ រដ្ឋា វិសាល
2015-12-12 rfa
 |
| ជនភៀសខ្លួនម៉ុងតាញ៉ាវៀតណាម មួយចំនួន ក្នុងចំណោម ១៧នាក់ ដែលស្ម័គ្រចិត្តទៅស្រុកកំណើតវិញ នៅសណ្ឋាគារមួយ ក្នុងខេត្តរតនគិរី មុនចេញដំណើរទៅច្រកទ្វារអន្តរជាតិអូរយ៉ាដាវ នៅព្រឹកថ្ងៃទី២៤ វិច្ឆិកា ឆ្នាំ២០១៥។
RFA/Ratha Visal
|
ជនភៀសខ្លួនម៉ុងតាញ៉ា វៀតណាម មួយក្រុមមានគ្នា ៨នាក់ ដែលកំពុងលាក់ខ្លួននៅក្រុងភ្នំពេញ ដើម្បីស្វែងរកសិទ្ធិសុំជ្រកកោនផ្នែកនយោបាយកំពុងស្វែងរកលទ្ធភាព វិលត្រឡប់ទៅលំនៅឋានវិញ។ ម៉ុងតាញ៉ាទាំងនោះព្រួយបារម្ភខ្លាចអាជ្ញាធរវៀតណាម ធ្វើទុក្ខបុកម្នេញប្រសិនពួកគេត្រឡប់ទៅវិញ ដោយមិនមានការជួយជ្រោមជ្រែងពីការិយាល័យអន្តរជាតិទទួលបន្ទុក ជនភៀសខ្លួន ឬសិទ្ធិមនុស្ស។
ជនភៀសខ្លួនម៉ុងតាញ៉ាវៀតណាម ៨នាក់ នៅថ្ងៃទី១២ ខែធ្នូ អំពាវនាវសុំឲ្យមន្ត្រីការិយាល័យឧត្ដមស្នងការអង្គការសហប្រជាជាតិ ទទួលបន្ទុកជនភៀសខ្លួន (UNHCR) និងការិយាល័យនៃឧត្ដមស្នងការអង្គការសហប្រជាជាតិទទួលបន្ទុកសិទ្ធិ មនុស្សប្រចាំកម្ពុជា (UNOHCHR) ស្វែងរកលទ្ធភាពបញ្ជូនពួកគេបានវិលត្រឡប់ទៅលំនៅឋានវិញ ដោយមិនមានការធ្វើទុក្ខទោសពីអាជ្ញាធរវៀតណាម។
ម៉ុងតាញ៉ា ទាំង ៨នាក់នេះ សុទ្ធសឹងជាបុរសបានលួចឆ្លងដែនចូលមកដល់ក្រុងភ្នំពេញ កាលពីថ្ងៃទី២៨ ខែតុលា ឆ្នាំ២០១៥ ក៏ប៉ុន្តែពួកគេមិនបានទទួលចុះឈ្មោះដើម្បីកំណត់អត្តសញ្ញាណ ជនភៀសខ្លួនពីនាយកដ្ឋានជនភៀសខ្លួនក្រសួងមហាផ្ទៃ ឡើយ។ លើសពីនេះទៀត ពួកគេរស់នៅលាក់ខ្លួននៅទីក្រុងភ្នំពេញ ដោយមិនមានការទំនុកបម្រុងស្បៀងអាហារ ឬកន្លែងស្នាក់នៅដោយអង្គការអន្តរជាតិទាំងពីរដូចម៉ុងតាញ៉ាវៀតណាម ផ្សេងទៀតឡើយ។
តំណាងម៉ុងតាញ៉ាទាំង ៨នាក់និយាយក្នុងលក្ខខណ្ឌសុំមិនបញ្ចេញឈ្មោះប្រាប់វិទ្យុអាស៊ីសេរី តាមទូរស័ព្ទថា ស្ថានភាពរស់នៅលាក់ខ្លួនរបស់ពួកគេកាន់តែលំបាកដោយសារខ្វះខាត ប្រាក់កាសទិញស្បៀងអាហារ។ រីឯរដ្ឋាភិបាលកម្ពុជា ក៏មិនព្រមឲ្យពួកគេចុះឈ្មោះកំណត់អត្តសញ្ញាណជាជនភៀសខ្លួនទៀត បើទោះបីពួកគេភៀសខ្លួនចេញពីប្រទេសដោយសាររងការគាបសង្កត់សេរីភាព និងជំនឿសាសនាក្ដី។ បច្ចុប្បន្នពួកគេអស់លទ្ធភាពទ្រាំទ្រនៅកន្លែងលាក់ខ្លួនបានតទៅទៀត ទើបស្វែងរកជំនួយសង្គ្រោះវិលត្រឡប់ទៅលំនៅឋានពីអង្គការអន្តរជាតិ ដើម្បីគាំពារកុំឲ្យអាជ្ញាធរវៀតណាម ដាក់ទោសទណ្ឌពួកគេនៅពេលវិលត្រឡប់ទៅវិញនេះ។
ម៉ុងតាញ៉ាទាំង ៨នាក់ ឲ្យដឹងទៀតថា កន្លងទៅនេះ ពួកគេមានគ្នា ៣១នាក់ បានរត់ទៅលាក់ខ្លួនក្នុងព្រៃក្បែរព្រំដែនកម្ពុជា-វៀតណាម ដើម្បីគេចចេញពីការធ្វើទុក្ខបុកម្នេញពីអាជ្ញាធរមូលដ្ឋាន ក៏ប៉ុន្តែពួកគេមិនមានលទ្ធភាពឆ្លងចូលប្រទេសកម្ពុជា បាន ទើបសម្រេចចិត្តវិលត្រឡប់ទៅលំនៅឋានវិញ ក៏ប៉ុន្តែក្រុមអាជ្ញាធរមូលដ្ឋានបានដាក់ទោសទណ្ឌខ្លះជាប់ពន្ធនាគារ ខ្លះត្រូវបង្ខំឲ្យមកបង្ហាញមុខរៀងរាល់ខែជាមួយអាជ្ញាធរមូលដ្ឋាន ខ្លះទៀតត្រូវរឹតបន្តឹងការធ្វើដំណើរ ឬការជួបជុំគ្នាជាដើម។
វិទ្យុអាស៊ីសេរី នៅថ្ងៃទី១២ ខែធ្នូ មិនអាចទាក់ទងសុំការបញ្ជាក់ពីមន្ត្រីតំណាងការិយាល័យឧត្ដមស្នងការ អង្គការសហប្រជាជាតិទទួលបន្ទុកជនភៀសខ្លួន និងទទួលបន្ទុកសិទ្ធិមនុស្សបានទេ។
យ៉ាងនេះក្តី មន្ត្រីសិទ្ធិមនុស្សក្នុងស្រុកនៃសមាគមអាដហុក (ADHOC) ខេត្តរតនគិរី លោក ឆាយ ធី មានប្រសាសន៍បញ្ជាក់ថា សមាគមលោកក៏ទទួលបានព័ត៌មានទាក់ទិនការស្នើសុំជួយអន្តរាគមន៍របស់ ម៉ុងតាញ៉ា ទាំង ៨នាក់នេះរួចហើយ។ លោកថា នឹងផ្ដល់ព័ត៌មាននេះទៅស្ថាប័នអន្តរជាតិដើម្បីជួយផ្ដល់កិច្ចគាំពារ នៃដំណើរវិលត្រឡប់ដោយស្ម័គ្រចិត្តរបស់ម៉ុងតាញ៉ាទាំងនោះ។
លោក ឆាយ ធី៖ «ក្រុមនេះយើងនឹងបញ្ជូនព័ត៌មានទៅខាងយូ.អិនផងដែរ ពីគោលបំណងពួកគាត់។បើសិនខាងយូ.អិន ក៏ដូចរាជរដ្ឋាភិបាល ទាក់ទងទៅខាងរដ្ឋាភិបាលវៀតណាម ដើម្បីសិទ្ធិសេរីភាពពួកគាត់ អាហ្នឹងការវិលត្រឡប់នៃជនភៀសខ្លួនមិនមានការព្រួយបារម្ភអ្វីទៀត ទេ»។
ទោះជាយ៉ាងណាក៏ដោយ តំណាងការិយាល័យឧត្ដមស្នងការអង្គការសហប្រជាជាតិទទួលបន្ទុកជនភៀសខ្លួន អ្នកស្រី វីវៀន តាន់ (Vivian Tan) កាលពីចុងខែធ្នូ បញ្ជាក់តាមសារអេឡិចត្រូនិកប្រាប់វិទ្យុអាស៊ីសេរីថា ចាប់ពីខែកក្កដា ឆ្នាំ២០១៥ មកទល់បច្ចុប្បន្ន យូ.អិន.អេច្ច.ស៊ី.អា ធ្លាប់បានសម្របសម្រួលការវិលត្រឡប់ដោយស្ម័គ្រចិត្តរបស់ម៉ុងតាញ៉ា ពីភ្នំពេញ ទៅប្រទេសវៀតណាម ប្រមាណ ៥០នាក់ហើយ។ អ្នកស្រីបន្តថា ការវិលត្រឡប់របស់ម៉ុងតាញ៉ាវៀតណាម នេះក៏ជាឱកាសផ្ដល់ឲ្យ យូ.អិន.អេច្ច.ស៊ី.អា ចូលទៅពិនិត្យមើលស្ថានភាពពួកគេពេលវិលត្រឡប់ទៅវិញនេះដែរ។
ចាប់ ពីខែកក្កដា រហូតមកដល់បច្ចុប្បន្ន មានក្រុមម៉ុងតាញ៉ា ៥ក្រុម មានគ្នាសរុប ៩៤នាក់ បានស្ម័គ្រចិត្តវិលត្រឡប់ទៅប្រទេសវៀតណាមវិញ ក្នុងនោះបីក្រុមមានគ្នា ៤២នាក់ ចាកចេញពីប្រទេសថៃ និងបីក្រុមទៀតមានគ្នា ៥២នាក់ ចាកចេញពីក្រុងភ្នំពេញ៕
No comments:
Post a Comment