ដោយ ខែ សុណង
2015-12-15 rfa
 |
| ៣-ធ្នូ-២០១៣៖ អង្គភាពប្រឆាំងអំពើពុករលួយ។
Photo: RFA
|
អង្គភាពប្រឆាំងអំពើពុករលួយ ហៅកាត់ថា អេ.ស៊ី.យូ (ACU) បានប្រកាសឲ្យបុគ្គលជាប់កាតព្វកិច្ច ទៅប្រកាសទ្រព្យសម្បត្តិ និងបំណុល តាមរបបពីរឆ្នាំម្ដងក្នុងឆ្នាំ២០១៦ ដែលនឹងចាប់ផ្ដើមទទួលឯកសារប្រកាសចាប់ពីថ្ងៃទី១ ដល់ថ្ងៃទី៣១ ខែមករា ឆ្នាំ២០១៦ ដើម្បីឆ្លើយតបទៅនឹងការប្រយុទ្ធប្រឆាំងអំពើពុករលួយ។ ចំណែកមន្ត្រីសង្គមស៊ីវិល លើកឡើងថា ការប្រកាសនេះពុំមានតម្លាភាព និងប្រសិទ្ធភាពនោះទេ។
សង្គមស៊ីវិល ស្នើឲ្យរដ្ឋាភិបាលធ្វើវិសោធនកម្មមាត្រាមួយចំនួនក្នុងច្បាប់ប្រឆាំងអំពើពុករលួយ ដើម្បីឲ្យការប្រកាសទ្រព្យសម្បត្តិមានតម្លាភាព ជៀសវាងប្រកាសដោយសម្ងាត់ដែលគ្មានប្រសិទ្ធភាពដល់ការប្រយុទ្ធប្រឆាំងអំពើពុករលួយ។
ប្រធានអង្គការតម្លាភាពកម្ពុជា ហៅកាត់ថា ធី.អាយ (TI) លោក ព្រាប កុល មានប្រសាសន៍នៅថ្ងៃទី១៥ ធ្នូ ថា លោកចង់ឃើញឲ្យមានការធ្វើវិសោធនកម្មមាត្រាមួយចំនួនក្នុងច្បាប់នេះ។ លោកថា ក្នុងជំពូក៤ ស្ដីពីសមាសភាពបុគ្គលដែលត្រូវប្រកាសទ្រព្យសម្បត្តិ និងបំណុល ក្នុងច្បាប់ប្រឆាំងអំពើពុករលួយ មានមាត្រាពាក់ព័ន្ធមួយចំនួនចាប់ពីមាត្រា១៧ ដល់មាត្រា២០ ដែលចែងជុំវិញនីតិវិធីនៃការប្រកាសទ្រព្យសម្បត្តិ ពិសេសមាត្រា២០ ដែលចែងឲ្យរក្សាការសម្ងាត់ចំពោះឯកសាររបស់បុគ្គលជាប់កាតព្វកិច្ចនោះ។ លោកបញ្ជាក់ថា ការអនុវត្តដោយអង្គភាពនាពេលបច្ចុប្បន្ន ធ្វើឡើងតាមច្បាប់នេះ មិនបានធ្វើជាចំហឲ្យប្រជាពលរដ្ឋ និងសាធារណជន ឬស្ថាប័នដទៃទៀតបានដឹងនោះទេ។ នេះ គឺជាបញ្ហាដែលនាំឲ្យគ្មានតម្លាភាព។
លោក ព្រាប កុល៖ «យើងធ្លាប់ធ្វើការតស៊ូមតិ។ យើងធ្លាប់បានដាក់អនុសាសន៍ហ្នឹងទៅស្ថាប័នពាក់ព័ន្ធ ពិសេសអង្គភាពប្រឆាំងអំពើពុករលួយ។ លោកថារាល់ថ្ងៃនេះ លោកមានតួនាទីអនុវត្តច្បាប់ ដែលរដ្ឋសភាបានអនុម័តរួចហើយ។ អ្នកដែលត្រូវកែច្បាប់ និងធ្វើវិសោធនកម្ម ទាល់តែរដ្ឋសភាតំណាងរាស្ត្រធ្វើវិសោធនកម្ម។ យើងមើលនិន្នាការគណបក្សសង្គ្រោះជាតិ បើតាមយើងធ្លាប់ទំនាក់ទំនងជាមួយ លោកស្វាគមន៍ចំពោះការធ្វើវិសោធនកម្ម ប៉ុន្តែតំណាងរាស្ត្រក្នុងជួរគណបក្សកាន់អំណាច មិនទាន់ឯកភាពទេ ដោយមានហេតុផលជាច្រើន ដែលថាការធ្វើវិសោធនកម្មមិនអាចធ្វើទៅបាន។ ដូច្នេះយើងបន្តធ្វើការតស៊ូមតិតទៅទៀត»។
 |
ប្រធានអង្គការតម្លាភាពកម្ពុជា លោក ព្រាប កុល ថ្លែងក្នុងសន្និសីទកាសែតស្ដីពី ការឆ្លើយតបនឹងសំណើសុំអនុសាសន៍ពីអង្គការតម្លាភាព ទៅលើសេចក្តីព្រាងស្ដីពីបទបញ្ជា និងនីតិវិធីក្នុងការចុះឈ្មោះបោះឆ្នោត ដើម្បីរៀបចំបញ្ជីឈ្មោះបោះឆ្នោតថ្មីឆ្នាំ២០១៦ នៅថ្ងៃទី៦ ខែសីហា ឆ្នាំ២០១៥។ RFA/Um Rainsey
|
មាត្រា២០ ដែលស្ដីពីការរក្សាទុកឯកសារប្រកាសទ្រព្យសម្បត្តិ និងបំណុល ក្នុងច្បាប់ប្រឆាំងអំពើពុករលួយ ចែងថា សំណុំឯកសារផ្ទាល់ខ្លួនម្នាក់ៗនៃអ្នកប្រកាសទ្រព្យសម្បត្តិ និងបំណុល ត្រូវទុកជាសម្ងាត់ខ្ពស់បំផុត និងធ្វើជាទម្រង់អេឡិចត្រូនិក ដោយមានលេខសម្ងាត់ ឬធ្វើជាលិខិតជាពីរច្បាប់ តាមគំរូដែលកំណត់ដោយអង្គភាពប្រឆាំងអំពើពុករលួយ ហើយដាក់ក្នុងស្រោមសំបុត្រពីរដាច់ដោយឡែកពីគ្នា គឺមួយច្បាប់រក្សាទុកដោយសាមីខ្លួន និងមួយច្បាប់ទៀត រក្សាទុកនៅអង្គភាព។ ចំណែកលើស្រោមសំបុត្រដែលបិទជិត ត្រូវប្រថាប់ត្រា និងចុះហត្ថលេខាដោយប្រធានអង្គភាព ឬតំណាង ព្រមទាំងផ្ដិតម្រាមដៃសាមីខ្លួនផង។ ឯនីតិវិធីក្នុងការបើកស្រោមសំបុត្រឯកសារប្រកាសទ្រព្យ និងបំណុលនេះ កំណត់ដោយសេចក្ដីសម្រេចពីអង្គភាព។
ការលើកឡើងរបស់មន្ត្រីសង្គមស៊ីវិលនេះ ស្របពេលដែលអង្គភាពប្រឆាំងអំពើពុករលួយ ប្រកាសឲ្យបុគ្គលជាប់កាតព្វកិច្ចទៅប្រកាសទ្រព្យសម្បត្តិ និងបំណុល តាមរបបពីរឆ្នាំម្ដងក្នុងឆ្នាំ២០១៦។ ការប្រកាស នឹងធ្វើឡើងជារៀងរាល់ថ្ងៃ មិនគិតថ្ងៃបុណ្យចាប់ពីម៉ោង ៨ព្រឹក រហូតដល់ម៉ោង ៥ល្ងាច រយៈពេលមួយខែនៅអង្គភាពប្រឆាំងអំពើពុករលួយ ឬផ្ញើតាមក្រុមជនបង្គោលប្រឆាំងអំពើពុករលួយប្រចាំក្រសួង ស្ថាប័នក្ដី ឬផ្ញើតាមប៉ុស្តិ៍ប្រៃសណីយ៍ក៏បាន។
សេចក្តីប្រកាសរបស់អង្គភាពប្រឆាំងអំពើពុករលួយ នៅថ្ងៃទី១៤ ធ្នូ ឲ្យដឹងថា អ្នកជាប់កាតព្វកិច្ចប្រកាសទ្រព្យសម្បត្តិ និងបំណុល មានមន្ត្រីរាជការស៊ីវិលដែលមានឋានៈចាប់ពីប្រធាននាយកដ្ឋាន និងមន្ត្រីយោធា កងរាជអាវុធហត្ថ នគរបាលជាតិដែលមានឋានន្តរសក្ដិចាប់ពីវរសេនីយ៍ឯកឡើងទៅ។ ក្រៅពីនេះ មន្ត្រីសាធារណៈដែលមានអាណត្តិជ្រើសតាំងការបោះឆ្នោតបានបន្តមុខតំណែងបច្ចុប្បន្នដូចគ្នា សមាជិកក្រុមប្រឹក្សារាជធានី ខេត្ត ក្រុង ស្រុក ខណ្ឌ ឃុំ សង្កាត់ សមាជិកព្រឹទ្ធសភា សមាជិករដ្ឋសភា និងសមាជិករាជរដ្ឋាភិបាល ចៅក្រមអាសនៈ ចៅក្រមអយ្យការ សារការី ក្រឡាបញ្ជី និងអាជ្ញាសាលា ជាដើម។
បន្ថែមលើសេចក្ដីប្រកាសនេះ ប្រធានស្ដីទីនាយកដ្ឋានប្រកាសទ្រព្យសម្បត្តិ និងបំណុល នៃអង្គភាពប្រឆាំងអំពើពុករលួយ លោក ចេង ប៊ុនឃៀង មានប្រសាសន៍ថា នេះជាយុទ្ធនាការប្រយុទ្ធប្រឆាំងអំពើពុករលួយដ៏មានប្រសិទ្ធភាព។ លោកថា បុគ្គលជាប់កាតព្វកិច្ចទៅប្រកាសទ្រព្យសម្បត្តិ និងបំណុលតាមរបបពីរឆ្នាំម្ដងក្នុងឆ្នាំ២០១៦ នៅមិនទាន់មានអ្នកមកបំពេញបែបបទនៅឡើយ ប៉ុន្តែនៅចន្លោះឆ្នាំនេះ នាយកដ្ឋានបានទទួលអ្នកដែលទើបមានការតែងតាំងថ្មី ផ្លាស់ប្ដូរ ចូលនិវត្តន៍ និងលាឈប់ មកប្រកាសទ្រព្យសម្បត្តិជាបណ្ដើរៗដែរ។
លោក ចេង ប៊ុនឃៀង៖ «ជាគោលការណ៍របស់រដ្ឋាភិបាល ដែលច្បាប់ប្រឆាំងអំពើពុករលួយបានកំណត់ចំពោះបុគ្គល ដែលគាត់បានប្រកាសលើកទី១ ក្នុងថ្ងៃខែឆ្នាំណាក៏ដោយ គឺត្រូវធ្វើការប្រកាសក្នុងពីរឆ្នាំបន្ទាប់របស់ខ្លួនក្នុងខែមករា ដើមឆ្នាំហ្នឹងតែម្ដង ក្នុងករណីដែលគាត់មិនទាន់ប្រកាសមាត្រា៣៨ គឺត្រូវដាក់ទោសជាប់ពន្ធនាគារពី ១ខែទៅ ១ឆ្នាំ ពិន័យជាប្រាក់ពី ១សែនរៀលទៅ ២លានរៀល»។
ទោះយ៉ាងណា ការប្រកាសទ្រព្យសម្បត្តិ និងបំណុល ដែលធ្វើឡើងជាសម្ងាត់នេះ ទាំងមន្ត្រីអង្គភាពប្រឆាំងអំពើពុករលួយ និងសង្គមស៊ីវិលអះអាងថា បុគ្គលដែលជាប់កាតព្វកិច្ច បានចូលបំពេញកាតព្វកិច្ចរបស់ខ្លួនបានយ៉ាងល្អ។ សង្គមស៊ីវិលថា បុគ្គលជាប់កាតព្វកិច្ចជាង ៩០% បានអនុវត្តនៅមានចំនួនតិចតួចប៉ុណ្ណោះដែលមានភាពយឺតយ៉ាវ។
អង្គភាពប្រឆាំងអំពើពុករលួយ បានអនុវត្ត និងបានប្រកាសឲ្យបុគ្គលជាប់កាតព្វកិច្ច ទៅប្រកាសទ្រព្យសម្បត្តិ និងបំណុល រយៈពេល ៥ឆ្នាំហើយ តាំងពីឆ្នាំ២០១១ មកដល់ឆ្នាំ២០១៥៕
No comments:
Post a Comment