Wed, 9 September 2015 ppp
ផាក់ ស៊ាងលី
 |
| លោក ជា ហ៊ាន ស្លៀកពាក់ពណ៌ទឹកប៊ិកក្នុងពេលមន្ត្រីសួរនាំនៅតំបន់អភិរក្សកន្លងមក។ រូបថត NRWPO |
កំពង់ស្ពឺៈ អង្គការសង្គមស៊ីវិលមួយបានចោទប្រកាន់មន្ត្រីនគរបាល និងបរិស្ថានចំនួន ៨ នាក់ថាបានរំលោភយកដីដែនជម្រកសត្វព្រៃភ្នំឱរ៉ាល់ជាង ១០០ ហិកតាហើយទាមទារឲ្យតុលាការដកហូតមកវិញ និងនាំមន្ត្រីទាំងនោះយកទៅកាត់ទោស។
អង្គការប្រឆាំងអំពើពុករលួយទប់ស្កាត់ការបំផ្លាញធនធានធម្មជាតិ និងការពារសិទ្ធិពលរដ្ឋបានដាក់ពាក្យបណ្តឹងមួយទៅតុលាការខេត្ត កំពង់ស្ពឺដើម្បីស្នើឲ្យចេញដីកាសម្រេចដកហូតដីជាង ១០០ ហិកតាដែលជាដីការពារដោយព្រះរាជក្រឹត្យក្នុងដែនជម្រកសត្វព្រៃ ភ្នំឱរ៉ាល់។
ពាក្យបណ្តឹងដែលតុលាការបានប្រថាប់ត្រាទទួលកាលពីថ្ងៃចន្ទហើយ ភ្នំពេញ ប៉ុស្តិ៍ ទទួលបាន កាលពី ម្សិលមិញ បានសរសេរថាអង្គការបានចុះធ្វើការស៊ើបអង្កេតពីការកាប់បំផ្លាញព្រៃ និងទន្ទ្រានដីនៅដែនជម្រកហើយបានរកឃើញថាលោកពិវ វ៉េង (ពីវ វែង) អធិការរងនគរបាលស្រុកឱរ៉ាល់ និងមន្ត្រីឧទ្យានុរក្សបរិស្ថានចំនួន ៧ នាក់បានចូលកាប់វាតយកដីបីទីតាំងសរុប ១០០ ហិកតាកន្លះដោយខុសច្បាប់តាំងពីឆ្នាំ ២០០៨ មក។
អង្គការនេះបានបង្ហាញឈ្មោះមន្ត្រីអនុរក្សបរិស្ថានទាំងនោះដែល រួមមានឈ្មោះ នួនចក់, ហ៊ី ចាន់, ឡាន រុំ, ខន សុខុន, ជា យុទ្ធា (ហៅ ចាន់ណា) លឹម ថុល និងប៊ុត ធន។
លិខិតនេះបានបញ្ជាក់ថា៖ «ក្រុមមន្ត្រីបានជួលពលរដ្ឋឲ្យកាន់កាប់បំផ្លាញព្រៃឈើយកដីតំបន់ ការពារដោយព្រះរាជក្រឹត្យធ្វើជាកម្មសិទ្ធិផ្ទុយពីច្បាប់។ យើងស្នើឲ្យតុលាការដកហូតដីនោះទុកជាសម្បត្តិរដ្ឋវិញ និងស្វែងរកចាប់ខ្លួនអ្នកប្រព្រឹត្តបទល្មើសយកទៅផ្តន្ទាទោសតាម ច្បាប់»។
ក្រៅពីដាក់ទៅតុលាការលិខិតនេះក៏មានចម្លងជូនទៅខុទ្ទកាល័យ ព្រះមហាក្សត្រខុទ្ទកាល័យនាយករដ្ឋមន្ត្រី អង្គភាពប្រឆាំងអំពើពុករលួយ ក្រសួងយុត្តិធម៌ ក្រសួងបរិស្ថាន និងការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស នៅកម្ពុជាផងដែរ។
លោក ជា ហ៊ាន ប្រធានអង្គការនេះបានអះអាងថាលោកអធិការរង ពីវ វេង បានទន្ទ្រានយកដីប្រមាណជា ៥០ ហិកតាហើយបានធ្វើការលក់ដូរអស់ប្រហែលជា ៣០ ហិកតាហើយដោយក្នុងមួយហិកតាតម្លៃ ១ ពាន់ដុល្លារ។ ក្រៅពីនោះមន្ត្រីអនុរក្សបរិស្ថានទាំងនោះបានកាន់កាប់ដីផ្សេងទៀត ហើយមកទល់ពេលនេះពួកគេបាននិងកំពុងប្រើដីនោះដាំដំណាំ។
លោកបានថ្លែងថា៖ «ដំបូងគេកាប់ព្រៃហើយយកដី។ វាជាការឃុបឃិតគ្នាបើមិនអ៊ីចឹងទេគេមិនអាចកាន់កាប់ដីនៅតំបន់ ការពារបែបនេះបានទេ។ ពួកគេក៏ធ្លាប់គំរាមសម្លាប់ខ្ញុំ និងចាប់ដាក់គុកដោយសារតែរឿងទន្ទ្រានយកដីនោះ»។
ទោះយ៉ាងណាលោក ពីវ វែង បានបដិសេធចំពោះការចោទប្រកាន់នោះដោយថ្លែងថាលោកមិនដែលពាក់ព័ន្ធ នឹងដីក្នុងតំបន់ដែនជម្រកសត្វព្រៃភ្នំឱរ៉ាល់នោះទេ។
លោកបានបញ្ជាក់ថា៖ «គាត់ដាក់ពាក្យបណ្តឹងដាក់ទៅ។ តែខ្ញុំអត់ដឹងអីទេ។ អត់មានពាក់ព័ន្ធផង»។
លោក ខន សុខុន ប្រធានក្រុមល្បាតដែនជម្រកនៅភ្នំឱរ៉ាល់មិនអាចទាក់ទងសុំការអត្ថាធិប្បាយបានទេកាលពីម្សិលមិញ។
លោក ហេង គួន ប្រធានមន្ទីរបរិស្ថានខេត្តកំពង់ស្ពឺបានថ្លែងកាលពីម្សិលមិញថាលោក មិនជឿថាមន្ត្រីអនុរក្សបរិស្ថានហ៊ានទន្ទ្រានយកដីដែនជម្រកដែល ខ្លួនមានតួនាទីការពារបែបនោះទេ។
លោកបានបញ្ជាក់ថា៖ «ដាក់ទៅតុលាការទុកឲ្យតុលាការដោះស្រាយសិនទៅ។ ដាក់មកខ្ញុំក៏បានដែរ ឲ្យតែមានឯកសារដែលពាក់ព័ន្ធ។ តែខ្ញុំដូចជាមិនជឿថាមន្ត្រីអនុរក្សហ៊ានធ្វើអ៊ីចឹងទេ»។
លោក ជា ហ៊ាន ក៏បានឲ្យដឹងផងដែរថាបន្ទាប់ពីលិខិតរបស់លោកអង្គការត្រូវបាន ប្រថាប់ត្រាទទួលយកនោះមន្ត្រីតុលាការបានដាក់ជូនលោក ខ្លូត ពេជ្រ ប្រធានតុលាការខេត្តកំពង់ស្ពឺដើម្បីពិនិត្យនៅថ្ងៃដដែលនោះ។
ភ្នំពេញ ប៉ុស្តិ៍ មិនអាចទាក់ទងលោក ខ្លូត ពេជ្រ ដើម្បីសុំអត្ថាធិប្បាយបានទេកាលពីម្សិលមិញព្រោះទូរស័ព្ទលោកមិន ដំណើរការ៕
No comments:
Post a Comment