2015-09-04 rfa
 |
| សិស្សប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុបនៅថ្ងៃទី១ នាមណ្ឌលព្រះស៊ីសុវត្ថិ កាលពីព្រឹកថ្ងៃទី២៤ ខែសីហា ឆ្នាំ២០១៥។
RFA/Sireymuny
|
នៅសល់តែជាង ១០ថ្ងៃទៀតប៉ុណ្ណោះ លទ្ធផលនៃការប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុប សម្រាប់ឆ្នាំសិក្សា២០១៤-២០១៥ នឹងត្រូវប្រកាសឲ្យដឹង។ ក្រសួងអប់រំ បានបង្ហាញសុទិដ្ឋិនិយមថា បេក្ខជនជាច្រើននឹងជាប់ការប្រឡងលើកនេះ ពីព្រោះពួកគេភាគច្រើន បានខិតខំប្រឹងប្រែងសិក្សាតាំងពីដើមឆ្នាំដើម្បីទទួលបានលទ្ធផលល្អ។
មន្ត្រីក្រសួងអប់រំ យុវជន និងកីឡា រំពឹងថា ចំនួនបេក្ខជនដែលជាប់បាក់ឌុបនៅឆ្នាំនេះ នឹងមានចំនួនច្រើនជាងឆ្នាំមុន។ ការលើកឡើងបែបនេះ គឺបន្ទាប់ពីក្រសួងបានបញ្ចប់ការកែវិញ្ញាសាជាស្ថាពរនៅថ្ងៃទី២ កញ្ញា និងត្រូវស្រង់ ព្រមទាំងបូកពិន្ទុតាមប្រព័ន្ធកុំព្យូទ័រជាបន្តទៀត។ ដំណើរការស្រង់បូកពិន្ទុ និងពិនិត្យផ្ទៀងផ្ទាត់ ត្រូវប្រព្រឹត្តទៅនៅការិយាល័យនាយកដ្ឋានមធ្យមសិក្សាចំណេះទូទៅ ចាប់ពីថ្ងៃទី៣ ដល់ថ្ងៃទី១៣ ខែកញ្ញា។
អ្នកនាំពាក្យក្រសួងអប់រំ លោក រស់ សាលីន បានឲ្យវិទ្យុអាស៊ីសេរី ដឹងនៅថ្ងៃទី៣ កញ្ញា ថា ចំនួនអ្នកជាប់បាក់ឌុបនៅឆ្នាំនេះ នឹងមានការកើនឡើង ដោយហេតុតែបេក្ខជនភាគច្រើនសុទ្ធតែបានត្រៀមខ្លួនរួចរាល់សម្រាប់ការប្រឡង។ លោកបញ្ជាក់ថា ការប្រឡងនៅឆ្នាំនេះ នឹងស្ដែងឲ្យឃើញពីសមត្ថភាពពិតរបស់បេក្ខជន ត្បិតក្រសួងពុំឃើញមានភាពមិនប្រក្រតីណាមួយ ដូចជាការចម្លងជាដើមនៅលើសន្លឹកកិច្ចការរបស់បេក្ខជននោះឡើយ៖ «តាមព័ត៌មានបឋម យើងឃើញថា នៅក្នុងថ្នាក់នីមួយៗ ដុំកូពីដែលកែ ករណីសន្លឹកកិច្ចការណាមួយបានពិន្ទុខ្ពស់ ខ្ពស់មែនទែន ប៉ុន្តែសន្លឹកកិច្ចការអ្នកដែលនៅជាប់ក្បែរគ្នា គឺពិន្ទុខុសគ្នា។ អ៊ីចឹងមានន័យថា បេក្ខជនទាំងអស់ហ្នឹងពិតជាមិនអាចមើលគ្នាបានពិតប្រាកដមែន ហើយពិតជាមិនអាចធ្វើអ្វីបានក្រៅពីសមត្ថភាពផ្ទាល់របស់ខ្លួនគាត់តែម្តង»។
ការប្រឡងសញ្ញាបត្រមធ្យមសិក្សាទុតិយភូមិនៅឆ្នាំ២០១៥ នេះ មានបេក្ខជនចុះឈ្មោះប្រឡងសរុបជាង ៨ម៉ឺននាក់ (៨៤.៩៣០នាក់) ក្នុងនោះស្រីមានជាង ៤ម៉ឺននាក់ (៤០.៩៧២នាក់)។ បេក្ខជនដែលអវត្តមានក្នុងពេលប្រឡងទាំងពីរថ្ងៃមានចំនួន ១.៥៨៩នាក់។ វិញ្ញាសាសម្រាប់ការប្រឡង ត្រូវបានបែងចែកទៅតាមថ្នាក់វិទ្យាសាស្ត្រ និងវិទ្យាសាស្ត្រសង្គម ដែលមានរបបពិន្ទុអតិបរមា ៥០០ពិន្ទុ។ ដោយសារតែមុខវិជ្ជាភាសាបរទេស ជាវិញ្ញាសាតាមស្ម័គ្រ នាំឲ្យពិន្ទុដែលជាប់ស្មើនឹង ៥០០ ដក ២៥ រួចចែកនឹង ២។ ដូចនេះ បេក្ខជននឹងប្រឡងជាប់ត្រឹមលំដាប់ពិន្ទុ ២៣៧ពិន្ទុ។
លទ្ធផលប្រឡងបាក់ឌុបនៅឆ្នាំនេះ នឹងត្រូវប្រកាសជូននៅរសៀលថ្ងៃទី១៥ ខែកញ្ញា ចំពោះមណ្ឌលប្រឡងក្នុងរាជធានីភ្នំពេញ និងខេត្តកណ្ដាល ចំណែកបណ្ដាខេត្តផ្សេងទៀត នឹងត្រូវប្រកាសឲ្យដឹងនៅព្រឹកថ្ងៃទី១៦ ខែកញ្ញា។ បេក្ខជនអាចទៅមើលលទ្ធផលរបស់ខ្លួននៅតាមមណ្ឌលប្រឡង ឬតាមបណ្ដាញសង្គមហ្វេសប៊ុក (Facebook) ផ្លូវការរបស់ក្រសួងអប់រំ។
ក្រសួងអប់រំ យុវជន និងកីឡា បានប្រកាសថា បេក្ខជន មាតាបិតា អាណាព្យាបាល ឬអ្នកពាក់ព័ន្ធណាដែលមិនពេញចិត្តនឹងលទ្ធផលនៃការប្រឡង ពួកគេមានសិទ្ធិប្ដឹងតវ៉ាក្នុងរយៈពេល ៣០ថ្ងៃ ចាប់ពីថ្ងៃប្រកាសលទ្ធផលប្រឡង។ ក្រសួងបញ្ជាក់ទៀតថា អ្នកប្ដឹងតវ៉ាត្រូវសរសេរជាលាយលក្ខណ៍អក្សរត្រឹមត្រូវ មានភស្តុតាង មានឈ្មោះ មុខរបរ អាសយដ្ឋានច្បាស់លាស់ និងមានការទទួលខុសត្រូវចំពោះមុខច្បាប់ជាធរមាន ហើយជាការឆ្លើយតប ក្រសួងនឹងបង្កើតគណៈកម្មការកោសល្យវិច័យ ក្នុងករណីមានពាក្យបណ្ដឹង ឬពិនិត្យឃើញថា ការប្រឡងមានភាពមិនប្រក្រតីលើកិច្ចការរបស់បេក្ខជន និងលើការអនុវត្តភារកិច្ចរបស់គណៈមេប្រយោគ។
ទាក់ទងនឹងលទ្ធផលនៃការប្រឡងវិញ លោក រស់ សាលីន បានណែនាំដល់បេក្ខជនទាំងអស់ឲ្យតាំងស្មារតីឲ្យរឹងមាំ ទោះបីជាលទ្ធផលនោះយ៉ាងណាក៏ដោយ។ លោកបានផ្តល់ជាអនុសាសន៍មួយចំនួនដល់អ្នកបេក្ខជន ទាំងអ្នកដែលជឿជាក់ និងមិនជឿជាក់សមត្ថភាពរបស់ខ្លួន៖ «ពេលដែលគាត់ជឿជាក់លើខ្លួនឯងថាជាប់ អ៊ីចឹងគាត់សម្លឹងមើលថា តើគួរតែរើសជំនាញអ្វី ដែលត្រូវតាមទេពកោសល្យខ្លួនផង ត្រូវតាមបរិបទនៃតម្រូវការទីផ្សារ និងបរិបទនៃសេដ្ឋកិច្ចរបស់យើងផង។ ចំពោះបេក្ខជនដែលមិនមានការជឿជាក់ថាជាប់ អ៊ីចឹងគាត់មានលទ្ធភាពគិតថា គួរតែរៀនមួយឆ្នាំឡើងវិញដើម្បីពង្រឹងសមត្ថភាព ឬមួយគាត់អាចចាប់យកជំនាញវិជ្ជាជីវៈតែម្តង ឬមួយគាត់ត្រៀមដើម្បីទៅបរិញ្ញាបត្ររងតាមកម្រិតជំនាញគាត់ តាមចំណង់ចំណូលចិត្ត និងអ្វីដែលជាតម្រូវការនិន្នាការទីផ្សាររបស់យើងនាពេលអនាគត»។
កាលពីឆ្នាំ២០១៤ អ្នកជាប់បាក់ឌុបនៅទូទាំងប្រទេសមានចំនួនតែជាង ២ម៉ឺននាក់ (២៣.១២៦នាក់) ប៉ុណ្ណោះ ក្នុងចំណោមបេក្ខជនសរុបជិត ៧ម៉ឺននាក់ (៦៨.០០០នាក់) ប៉ុន្តែដោយមានអន្តរាគមន៍ពីប្រមុខរដ្ឋាភិបាល ក្រសួងអប់រំ បានរៀបចំឲ្យមានការប្រឡងលើកទី២ ដែលមានអ្នកជាប់ជាង ១ម៉ឺននាក់ (១២.១៩៩នាក់) បន្ថែមទៀត។ ដោយឡែកនៅឆ្នាំនេះ ក្រសួងអប់រំ បានប្រកាសជាឱឡារិកថា នឹងមិនមានការប្រឡងលើកទី២ ជាដាច់ខាត៕
No comments:
Post a Comment