ប្រជាពលរដ្ឋនៅឃុំឃ្សឹម ស្រុកស្នួល ខេត្តក្រចេះ បាននាំគ្នាឃាត់គ្រឿងចក្ររបស់ក្រុមហ៊ុនអភិវឌ្ឍន៍របស់វៀតណាម មួយ ដែលបានយកគ្រឿងចក្រទៅឈូសឆាយព័ទ្ធធ្វើព្រំដីលើដីចម្ការរបស់ពួកគាត់។
ប្រជាពលរដ្ឋឱ្យដឹងថា ប្រសិនបើគ្មានការដោះស្រាយណាមួយលើបញ្ហាដីរបស់ពួកគាត់ទេ គ្រឿងចក្រដែលក្រុមហ៊ុនបានជួលមកឈូសឆាយដីនោះ ក៏មិនអាចប្រគល់ឱ្យវិញឡើយ។ ចំណែកតំណាងក្រុមហ៊ុនបញ្ជាក់ថា ដីតំបន់នោះ គឺជាដីរបស់រដ្ឋ មិនមែនជាដីរបស់ក្រុមហ៊ុននោះទេ ហើយការដោះស្រាយយ៉ាងណានោះ គឺអាស្រ័យលើអាជ្ញាធរ និងពលរដ្ឋ ចំណែកក្រុមហ៊ុនមិនពាក់ព័ន្ធឡើយ។
សកម្មភាពឃាត់គ្រឿងចក្ររបស់ពលរដ្ឋនៅឃុំឃ្សឹម ស្រុកស្នួល ប្រមាណជាបីថ្ងៃមកហើយ ដោយរង់ចាំតំណាងក្រុមហ៊ុន ឬអាជ្ញាធរ ដើម្បីដោះស្រាយជុំវិញការឈូសឆាយរំលោភលើដីរបស់ពួកគាត់ ប៉ុន្តែមិនទាន់មានការឆ្លើយតបនៅឡើយទេ។
តំណាងពលរដ្ឋម្នាក់រស់នៅភូមិប៉ោដើមស្វាយ ឃុំឃ្សឹម លោក ហេង គង់ ឱ្យដឹងថា ពួកគាត់បាននាំគ្នាចូលកាន់កាប់ដីតំបន់នោះតាំងពីឆ្នាំ២០០៩ ឬបន្តបន្ទាប់នេះ ដែលមានដាំដំណាំជាហូរហែ។ លោកបន្តថា នៅដើមឆ្នាំ២០១៤ អាជ្ញាធរដាក់កម្លាំងជាច្រើននាក់ចុះរុះរើ និងដុតបំផ្លាញរោងស្នាក់នៅ និងផ្ទះប្រជាពលរដ្ឋអស់ជាច្រើនរយគ្រួសារ ក្រោមហេតុផលថា ពួកគាត់ចូលកាន់កាប់ដីបម្រុងទុករបស់រដ្ឋដោយខុសច្បាប់។ លោកបន្ថែមទៀតថា កន្លងមកក្រុមអាជ្ញាធរបានដាក់កម្លាំងលើដីតំបន់នោះ មិនឱ្យប្រជាពលរដ្ឋវិលត្រឡប់ចូលរស់នៅវិញឡើយ ប៉ុន្តែដោយសារពួកគាត់មិនមានដីសម្រាប់រស់នៅ ក៏សម្រេចចិត្តចូលកាន់កាប់ដីរបស់ខ្លួនឡើងវិញ កាលពីខែកក្កដា ហើយស្រាប់តែថ្មីៗនេះ បែរជាខាងក្រុមហ៊ុន អេសស្ទើន រ៉ាប់ប៊ឺ ខេមបូឌា (Eastern Rubber Cambodia ) របស់វៀតណាម បានជួលគ្រឿងចក្រពីរគ្រឿង ដើម្បីជីកព័ទ្ធជាប្រឡាយលើដីរបស់ពួកគាត់ ទើបធ្វើឱ្យពលរដ្ឋចាប់យកគ្រឿងចក្រមករក្សាទុកតែម្តង។
លោក ហេង គង់៖ «ក្រុមហ៊ុនមកដោះស្រាយគ្រឿងចក្រហ្នឹងទៅ និងចង់សំណូមពរឱ្យអាជ្ញាធរដែនដីនេះ ឱ្យមានបញ្ហាអីឱ្យមកជួយដោះស្រាយជូនប្រជាពលរដ្ឋឱ្យបានលឿនៗ។ ហើយប្រសិនជាយល់ល្អ ប្រជាពលរដ្ឋទាំងអស់គ្នា ស្នើសុំឱ្យពួកគាត់រៀបចំភូមិករថ្មី ឱ្យមានច្បាប់រដ្ឋបាលអីត្រឹមត្រូវណាបង! ហើយវាស់វែងដីធ្លីនេះជូនប្រជាជនវិញមក ព្រោះដីនេះវាអត់មានប៉ះពាល់លើដីក្រុមហ៊ុនទេ។ ហើយបើថាដីនេះអភិរក្ស ក៏វាមិនសមវាកន្លែងអភិរក្សទៀតដែរ ព្រោះតំបន់នេះប្រជាជនបានកាន់កាប់ដាំដំណាំអស់ហើយ»។
តំណាងប្រជាពលរដ្ឋដដែលបន្ថែមថា ពួកគាត់រង់ចាំខាងតំណាងក្រុមហ៊ុន ឬអាជ្ញាធរ ដើម្បីចូលដោះស្រាយជុំវិញបញ្ហានេះ និងដើម្បីដាក់ខសន្យាថា ត្រូវបញ្ឈប់ការឈូសឆាយតទៅទៀត។ ប្រជាពលរដ្ឋដែលកំពុងមានបញ្ហាដីធ្លីមានចំនួនពីរភូមិ គឺភូមិប៉ោដើមស្វាយ និងភូមិប៉ោដើមចេក ដែលមានប្រជាពលរដ្ឋជាង ៤០០គ្រួសារ (៤១៩) លើផ្ទៃដីប្រមាណជាង ១ពាន់ហិកតារ (១.២៨៥,៣៤)។
តំណាងក្រុមហ៊ុន អេសស្ទើន រ៉ាប់ប៊ឺ ខេមបូឌា ដោយសុំមិនឱ្យបញ្ចេញឈ្មោះ ឱ្យដឹងថា ដីតំបន់នោះ គឺជាដីបម្រុងទុករបស់រដ្ឋ ឬព្រៃអភិរក្សជីវចម្រុះ ប៉ុន្តែដោយសាររដ្ឋាភិបាលបានសុំឱ្យខាងក្រុមហ៊ុនសហការជាមួយ ដើម្បីទប់ស្កាត់ការទន្ទ្រានចូលកាន់កាប់ដោយខុសច្បាប់តទៅទៀត និងម្យ៉ាង ដីនោះមានព្រំប្រទល់ជាប់ដីក្រុមហ៊ុនផង ទើបអាជ្ញាធរឱ្យក្រុមហ៊ុនជាអ្នកមើលការខុសត្រូវ៖ «មិនមែនស្ថិតក្រោមការគ្រប់គ្រងរបស់ក្រុមហ៊ុនទេ គឺស្ថិតនៅក្រោមការគ្រប់គ្រងរបស់រដ្ឋ ដីរបស់រដ្ឋ ដីរក្សាទុក គ្រាន់តែរដ្ឋផ្ដាំផ្ញើឱ្យក្រុមហ៊ុនជួយមើល ជួយការពារ ខ្លាចក្រែងប្រជាជនចូលតាមច្រកធំៗអ៊ីចឹងណា។ ក្រុមហ៊ុនគ្រាន់តែជួយការពារឱ្យទេ ហើយបញ្ហាផ្សេងៗ គឺខាងរដ្ឋាភិបាលរបស់ខាងអាជ្ញាធរ»។
អភិបាលស្រុកស្នួល លោក គង់ គឹមនី មានប្រសាសន៍នៅរសៀលថ្ងៃទី២៦ សីហា ថា ខាងលោកបានទទួលដំណឹងនេះហើយ ប៉ុន្តែមិនទាន់ចុះស្រាវជ្រាវលម្អិតនៅឡើយទេ ពីព្រោះអាជ្ញាធរថ្នាក់ជាតិ រួមនឹងខាងខេត្ត ជាប់រវល់ដោះស្រាយបញ្ហាដីធ្លីជូនពលរដ្ឋដែលត្រឡប់ពីភ្នំពេញជាមុនសិន។ ដូចនេះ លោកមិនទាន់អាចជម្រាបជូនពិស្ដារជុំវិញបញ្ហានេះបានទេ៖ «ខ្ញុំអត់ទាន់ចុះដល់ទីតាំង ខ្ញុំអត់ទាន់និយាយបានទេ ព្រោះវាភ្លៀងខ្លាំង។ ចាំខ្ញុំចុះដល់ទីតាំងពិនិត្យជាក់ស្តែងហើយ ចាំខ្ញុំនិយាយបាន»។
កាលពីពេលកន្លងទៅ តំណាងប្រជាពលរដ្ឋជាច្រើននាក់ បាននាំគ្នាឡើងទៅភ្នំពេញ ដើម្បីស្វែងរកដំណោះស្រាយ ប៉ុន្តែត្រូវអាជ្ញាធរខេត្តហៅពួកគាត់ត្រឡប់មកវិញ ដោយសន្យាថានឹងធ្វើការដោះស្រាយជូនពួកគាត់ ប៉ុន្តែពេលពួកគាត់ត្រឡប់មកនោះ ខាងអាជ្ញាធរនៅតែមិនអាចបំពេញតាមសេចក្តីត្រូវការរបស់ពួកគាត់ ដែលចង់រស់នៅកន្លែងដដែលនោះបានឡើយ។
យ៉ាងណាក៏ដោយ កាលពីពេលថ្មីៗនេះ លោកនាយករដ្ឋមន្ត្រី ហ៊ុន សែន បានព្រមានខ្លាំងៗទៅដល់មន្ត្រីថ្នាក់ក្រោមដែលពាក់ព័ន្ធទាំងអស់ ពិសេសអាជ្ញាធរខេត្តតែម្តង ឱ្យដោះស្រាយបញ្ហាដីធ្លីទាំងការរំលោភដីធ្លីពីសំណាក់ក្រុមហ៊ុន និងការកាន់កាប់ដីរបស់រដ្ឋ ជាដើម គឺត្រូវមានការដោះស្រាយជូនពលរដ្ឋ។ លោកថែមទាំងព្រមានថា ប្រសិនបើបញ្ហាដីធ្លីនៅតែកើតមានឡើងនៅខេត្តដែលខ្លួនគ្រប់គ្រងទៀត អភិបាលខេត្តទាំងនោះ អាចប្រឈមនឹងការដកចេញពីតំណែងទៀតផង៕
No comments:
Post a Comment