Hun Sen warned the opposition not to stage a coup like in Thailand, Egypt, Libya or Tunisia. It will be crushed! ហ៊ុន សែន ព្រមាន​គណបក្ស​សង្គ្រោះ​ជាតិ​កុំ​ធ្វើ​ដូច​ទីក្រុងបាងកក និង​ប្រទេស​ដទៃ​ទៀត​​

ដោយ៖​ ស៊ុន ណារិន​ | ថ្ងៃអង្គារ ទី10 មិថុនា 2014,

លោកនាយករដ្ឋមន្រ្តី ហ៊ុន សែន កាលពីកន្លងទៅ(រូបថតដោយតាត ឧត្តម)

លោកនាយក​រដ្ឋមន្ត្រី ហ៊ុន សែន នៅ​ថ្ងៃ​អង្គារ​នេះ ព្រមាន​គណបក្ស​សង្គ្រោះ​ជាតិ​កុំ​ឲ្យ​ចាត់​ទុក​កម្ពុជា​ដូច​ប្រទេស​ថៃ និង​ប្រទេស​ដទៃ​ទៀត​ដែល​បាន​ធ្វើ​រដ្ឋប្រហារ និង​ប្រឆាំង​លទ្ធផល​បោះឆ្នោត​។​

​ក្នុង​ពិធី​សំណេះសំណាល​ជាមួយ​យោធិន​ពិការ​នៅ​ខេត្ត​កំពត  លោកនាយក​រដ្ឋមន្ត្រី ព្រមាន​គណបក្ស​សង្គ្រោះ​ជាតិ កុំឲ្យ​ប្រថុយធ្វើ​ដូ​ចនឹង​ប្រទេស​ថៃ អេ​ហ្ស៊ី​ប ទុយ​នេ​ស៊ី និង​ប្រទេស​លី​ប៊ី​។ លោកនាយក​រដ្ឋមន្ត្រី​បញ្ជាក់ថា​«​អ្វី​ដែល​ខ្ញុំ​និយាយ គឺជា​រឿង​ពិត ហើយ​កុំ​ប្រថុយ​នឹង​ធ្វើ ហើយ​សុំ​កុំ​ឃើញ​នៅអេ​ហ្ស៊ី​ប គេ​ធ្វើ​បាន​កាលពីមុន​នៅ​ទុយ​នេ​ស៊ី នៅ​លី​ប៊ី គេ​ធ្វើ​បាន​។ នេះ​កម្ពុជា​ណា ហើយ​តិច​ថា​នៅ​បាងកក គេ​ធ្វើ​បាន នៅ​កម្ពុជា ចង់​ធ្វើ​ដែរ​។ មួយ​នៅ​បាងកក មួយ​នៅ​ភ្នំពេញ ខុស​គ្នា​ណា ហើយ​មួយ​ថៃ មួយ​កម្ពុជា ខុស​គ្នា​ណា​។​ហើយ​មួយ​យី​ង​ឡាក់ មួយ​ហ៊ុន សែន ខុស​គ្នា​ណា​។ ប្រាប់​ឲ្យ​ច្បាស់ ប្រដៅ​ឲ្យចំ​»​។​

​លោកនាយក​រដ្ឋមន្ត្រី ហ៊ុន សែន ក៏​បាន​ព្រមាន​ចាប់​ខ្លួន​ថ្នាក់ដឹកនាំ​គណបក្ស​សង្គ្រោះ​ជាតិ ក្នុង​ករណី​ចាំបាច់​ណាមួយ ប្រសិន​បើ​លោក​អស់​ការអត់ធ្មត់​នឹង​គណបក្ស​ប្រឆាំង​ដែល​តែងតែ​បំផ្លើសការពិត និង​ដើរ​តវ៉ា​ជា​បន្តបន្ទាប់​។​លោក​បន្តថា បរទេស​កុំ​ជ្រែ​ត​ជ្រែក​ក្នុង​កិច្ចការ​កម្ពុជា ព្រោះ​ប្រទេស​នេះ​មាន​ច្បាប់ និង​មាន​រដ្ឋាភិបាល​។​

​លោកនាយក​រដ្ឋមន្ត្រី ឲ្យដឹងទៀតថា សភាពការណ៍​ពេលនេះ មិនទាន់​អត់​រូបលោក​បាន​ទ ហើយ​លោក​ម្នាក់​គត់​ដែល​អាច​បញ្ជា​កម្លាំង​នគរបាល ទាហាន និង​ប៉េអឹម​បាន​។

បេក្ខជន​តំណាងរាស្ត្រ​ជាប់ឆ្នោត​របស់​គណបក្ស​សង្គ្រោះ​ជាតិ លោក សុន ឆ័យ មានប្រសាសន៍ថា ការព្រមាន​របស់​លោក ហ៊ុន សែន គឺជា​សិទ្ធិ​របស់​លោក តែ​ថា​ក្នុងនាម​ជា​អ្នកនយោបាយ​មិន​គួរ​ធ្វើ​អ្វី​តាមតែ​កំហឹង​របស់​ខ្លួន​នោះទេ ត្រូវ​គិត​ពី​ប្រយោជន៍​ជាតិ​ជា​ធំ​។ លោក​បន្តថា ក្នុង​បញ្ហា​នយោបាយ​មិន​ត្រូវយក​អំណាច​មក​គំរាមកំហែង​អ្នកណា​មួយ​នោះទេ ព្រោះ​ការរិះគន់​ខ្លះ​ក៏​ជួយ​ឆ្លុះបញ្ចាំង​ដល់​ខ្លួន​ផងដែរ​៕​

​សរសេរ​មកកាន់​លោក ស៊ុន ណារិន តាមរយៈ​sun_narin@vodhotnews.com