ដោយ៖ ជន ស្រីណុច | ថ្ងៃចន្ទ ទី13 ខែមករា ឆ្នាំ2014, VOD
ស្តាប់សំឡេង៖ | ចម្លងទុក |
សន្និសីទសារព័ត៌មាន ស្តីអំពីបញ្ឈប់អំពើហិង្សា ដោះលែង ស៊ើបអង្កេត និងសំណង នាព្រឹកថ្ងៃទី១៣ ខែមករា ឆ្នាំ២០១៤(រូបភាពដោយ ជន ស្រីណុច)
អង្គការសង្គមស៊ីវិលចំនួន៦៥ នៅថ្ងៃចន្ទនេះ ជំរុញឲ្យរដ្ឋាភិបាលកម្ពុជា សងការខូចខាតដល់ជនរងគ្រោះ ដែលត្រូវបាន កម្លាំងប្រដាប់ អាវុធបាញ់បង្ក្រាបលើប្រជាពលរដ្ឋក៏ដូចជាអ្នកតវ៉ា និងទាមទារឲ្យបើកការស៊ើបអង្កេតឡើងវិញ។
នៅក្នុងសន្និសីទសារព័ត៌មាន ស្តីអំពីបញ្ឈប់អំពើហិង្សា ដោះលែង ស៊ើបអង្កេត និងសំណង នាព្រឹកថ្ងៃទី១៣ខែមករានេះ នាយិកាអង្គការយេនឌ័រ និងអភិវឌ្ឍន៍ដើម្បីកម្ពុជា លោកស្រី រស់ សុភាព ថ្កោលទោសរដ្ឋាភិបាល ដែលប្រើកម្លាំងប្រដាប់អាវុធបាញ់គ្រាប់ពិត ទៅបង្ក្រាបលើប្រជាពលរដ្ឋក៏ដូចជាកម្មករ តវ៉ាកន្លងមក។ លោកស្រីស្នើឲ្យរដ្ឋាភិបាល ដោះលែងសកម្មជនដែលត្រូវបានចាប់ខ្លួន ដោយគ្មានលក្ខណ្ឌ និងផ្តល់សំណងទៅដល់ជនរងគ្រោះទាំងនោះ <<សុំឲ្យមានការដោះលែងនិងស៊ើបអង្កេត និងសំណង យើងខ្ញុំជាអង្គការសង្គមស៊ីវិលកម្ពុជា និងអន្តរជាតិ សូមថ្កោលទោសចំពោះការប្រើប្រាស់ប្រដាប់អាវុធ កំណើតអំពើហិង្សាប្រឆាំងនឹងប្រជាពលរដ្ឋកម្ពុជា នៅដើមឆ្នាំ២០១៤ ក្រោយពេលមានបាតុកម្មដោយសន្តិវិធីរយៈពេលបីសប្តាហ៍នៅរាជធានីភ្នំពេញ ភាពតានតឹងបានកើនឡើងយ៉ាងលឿននៅពេលដែលអាជ្ញាធរបានបង្ក្រាបយ៉ាងសាហាវលើកម្មកររោចក្រកាត់ដេរ » ។
អ្នកស្រាវជ្រាវសង្គមឯករាជ្យ លោក កែម ឡី មានប្រសាសន៍ថា ការសម្លាប់និងចាប់ការចាប់ខ្លួនមនុស្ស ក៏ដូចជាសកម្មជនសិទ្ធិមនុស្សកន្លងមក សុទ្ធតែពាក់ព័ន្ធនឹងនយោបាយ ហើយនេះគឺជារឿងខុសច្បាប់ ព្រោះការចាប់ខ្លួនត្រូវបានដោះលែងវិញ ដោយសារតែមិនមានភស្តុងគ្រប់គ្រាន់ ក្នុងការដាក់បន្ទុក។ លោក សំណូមពរឲ្យរាជរដ្ឋាភិបាលកម្ពុជា បញ្ឈប់ទង្វើទាំងនេះជាបន្ទាន់។
ប្រធានអង្គការក្រុមអ្នកច្បាប់ការពារសិទ្ធិកម្ពុជា លោក សុក សំអឿន មានប្រសាសន៍ថា ស្របពេលដែលស្ថានការណ៍សង្គមបច្ចុប្បន្នមានការធួរស្រាល សភាកម្ពុជាគួរតែគិតឡើងវិញអំពីករណីយកកម្លាំងយោធាទៅបង្ក្រាបប្រជាពលរដ្ឋ ធ្វើឲ្យស្លាប់ និងរបួសជាច្រើននាក់ ដោយលោកចាត់ទុកការបង្ក្រាបនៅផ្លូវវ៉េងស្រេង គឺខុសច្បាប់។
អ្នកនាំពាក្យក្រសួងមហាផ្ទៃ លោក ខៀវ សុភ័គ មានប្រសាសន៍ថា ទាក់ទងនឹងការស៊ើបអង្កេតរដ្ឋាភិបាលបាននិងកំពុងបង្កើតគណៈ កម្មាការស៊ើបអង្កេតហើយ រួមទាំងសំណងផងដែរ។ លោកបន្តថា បើតាមការយល់ឃើញរបស់លោក អាចដោះលែងអ្នកជាប់ឃុំនៅថ្ងៃនោះបាន លុះត្រាណាតែមានការចរចាផ្នែកនយោបាយ «ប្រសិនបើស្ថានការណ៍ល្អប្រសើរ ពូយល់ថាដូចឯកឧត្តមសម រង្ស៊ី លោកធ្លាប់មានប្រសាសន៍ចឹង អានេះជារឿងនយោបាយ អ្នកដែលអុកឡុកគេ អ្នកដែលញុះញង់ឲ្យគេហ្នឹង អាចនឹងដោះស្រាយទៅបញ្ចប់ដោយរឿងនយោបាយ ចរចាគ្នាទៅពិភាក្សាគ្នាដោយអីៗក៏ចេញបានដែរតាមពូយល់ផ្ទាល់ខ្លួន បាទប្រសិនបើចូលចរចាគ្នាបន្តទៀតទៅរឿងអីក៏អាចដោះស្រាយបាន និយាយរួមគណបក្សប្រជាជនលោកបើកទ្វារចំហរហូត ប៉ុន្តែមានតែគណបក្សសម រង្ស៊ីចេះតែមានលក្ខខណ្ឌចេះលក្ខខណ្ឌរហូត>> ។
លោក សម រង្ស៊ី ប្រធានគណបក្សសង្គ្រោះជាតិ មានប្រសាសន៍ថា រដ្ឋាភិបាលមិនគួរយកប្រជាជនជាចំណាប់ខ្មាំងនយោបាយ ដើម្បីដាក់សម្ពាធឲ្យគណបក្សលោកចូលតុចរចាទេ «មិនមែនទាក់ទងជាមួយគណបក្សសង្គ្រោះជាតិ ហើយមិនទៅទាក់ទងជាមួយរឿងនយោបាយផង ដូច្នេះគួរ ហើយត្រូវតែដោះលែងពួកគាត់ កុំយកលេសថាពួកគាត់ទៅទាក់ទងរឿងនយោបាយជាមួយគណបក្សសង្គ្រោះជាតិវាអត់ទាល់តែសោះ ខ្ញុំបាននិយាយអំបាញ់មិញហើយមិនត្រឹមត្រូវទេជាលេសដើម្បីគាបសង្កត់ សហជីព គៀបសង្កត់អ្នកដែលការពារក្រុមវិជ្ជាជីវៈផ្សេងៗ ជាផលប្រយោជន៍ផ្សេងៗ ជាផលប្រយោជន៍របស់ពួកគេ ប៉ិនមិនមែនជារឿងនយោបាយទាក់ទងនឹងគណបក្សសង្គ្រោះជាតិទេ ដូច្នេះសូមបញ្ឈប់ការចោទប្រកាន់បែបហ្នឹង ហើយគួរតែដោះលែងអ្នកទាំងនោះជាបន្ទាន់ » ។
សង្គមស៊ីវិលជាង១០០ បានរកឃើញថា ជនស៊ីវិល៤នាក់ត្រូវបានកងកម្លាំងប្រដាប់អាវុធបាញ់សម្លាប់ និងមានប្រជាពលរដ្ឋយ៉ាង ហោចណាស់៣៩នាក់ផ្សេងទៀត បានរងរបួស ដោយរួមបញ្ចូលទាំងក្មេងប្រុសអាយុ១៧ឆ្នាំម្នាក់ ស្ត្រីមានផ្ទៃពោះម្នាក់ និងបុរស១៣នាក់ផ្សេងទៀតត្រូវបានចាប់ខ្លួន នៅជិតសួនឧស្សាហកម្មកាណាឌីណា ផ្លូវវ៉េងស្រេង នាទីក្រុងភ្នំពេញ។ មុននោះពីរបីថ្ងៃ ក្នុងការប៉ះទង្គិចរវាងកងកម្លាំងប្រដាប់អាវុធ ជាមួយនឹងបាតុកម្មរបស់កម្មករនៅមុខរោងចក្រ យ៉ាក ជីន លើផ្លូវជាតិលេខ៤ បុរសចំនួន១០នាក់ត្រូវបានកង ទ័ព នៃកងពលពិសេស៩១១ចាប់ខ្លួន។ ការចាប់ខ្លួននោះរួមមានក្រុមអ្នកការពារសិទ្ធិមនុស្ស និងប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ លោក វ៉ន ពៅ លោក ថេង សាវឿន មកពីសម្ព័ន្ធសហគមន៍កសិករកម្ពុជា លោក ចាន់ ពុទ្ធិស័ក្កិ មកពីសហគមន៍បឹងកក់។ អ្នកជាប់ឃុំមួយចំនួនបានរងនូវការវាយដំយ៉ាងធ្ងន់ធ្ងរ និងទុកចោលដោយគ្មានការព្យាបាលអស់រយៈពេលជាច្រើនថ្ងៃ៕
សូមសរសេរមកកាន់ កញ្ញា ជន ស្រីណុច តាមរយៈ chornsreynoch@vodhotnews.com
No comments:
Post a Comment