ប្រជាពលរដ្ឋជិត ២០០នាក់ មកពី ៦ភូមិក្នុងឃុំលើកដែក ស្រុកកោះធំ ខេត្តកណ្ដាល បានប្រមូលផ្តុំគ្នានៅមុខប៉ុស្តិ៍នគរបាល និងសាលាឃុំលើកដែក នៅព្រឹកថ្ងៃទី១២ ខែធ្នូ ដើម្បីការពារតំណាងរបស់ខ្លួន ២នាក់ ដែលអាជ្ញាធរកោះហៅមកសួររឿងចាប់ទូក និងឧបករណ៍នេសាទរបស់ជនជាតិវៀតណាម ដែលអ្នកភូមិចោទថា ជនជាតិវៀតណាម ទាំងនោះនេសាទខុសច្បាប់នៅក្នុងមូលដ្ឋាន។
ដោយ ទេព សុរ៉ាវី
2013-12-12
ស្ដាប់ ឬ ទាញយកសំឡេង
ជំទប់ទី២ឃុំលើកដែក លោក ជា ផា មកពីគណបក្ស សម រង្ស៊ី ឲ្យដឹងថា ជនជាតិវៀតណាម បានតាំងទីលំនៅក្នុងឃុំលើកដែក និងបានលួចនេសាទខុសច្បាប់ ដោយដាក់ដាយ ឬអួនក្រឡាល្អិតនាំឲ្យហិនហោចមច្ឆាជាតិ។
លោកបន្តថា កាលពីថ្ងៃទី៩ ខែធ្នូ ពលរដ្ឋជាច្រើនភូមិបានសហការគ្នាទៅចាប់ទូកនេសាទខុសច្បាប់របស់ជនជាតិវៀតណាម ២គ្រឿង ដែលកំពុងដាក់ដាយ ឬអួននៅកណ្ដាលដៃទន្លេមួយនៅក្នុងឃុំទាំងយប់ ដើម្បីទប់ស្កាត់បទល្មើសនេសាទ។ តែបែរជាអាជ្ញាធរចោទពលរដ្ឋទាំងនោះថាជាចោរទៅលួចទូក និងត្រីរបស់ជនជាតិវៀតណាម ទៅវិញ។
«សំឡេង»
លោកបន្តថា ប៉ូលិសប៉ុស្តិ៍លើកដែក បានកោះហៅអ្នកភូមិ ២នាក់ គឺលោក ម៉ៅ ឡេន និងលោក ស៊ុន ប៊ុនសេង ដើម្បីសាកសួរជុំវិញរឿងនេះនៅព្រឹកថ្ងៃទី១២ ខែធ្នូ។ ប៉ុន្តែ អ្នកភូមិជិត ២០០នាក់ បាននាំគ្នាអមដំណើរទៅជាមួយបុរសទាំងពីរនាក់នោះ ខ្លាចក្រែងមានការចាប់ខ្លួនណាមួយ។
យ៉ាងណា លោក ម៉ៅ ឡេន និងលោក ស៊ុន ប៊ុនសេង អ្នកទាំងពីរមិនត្រូវបានប៉ូលិស និងមេឃុំសាកសួរតាមការកោះហៅទេ ក្រោយពីឃើញពលរដ្ឋលើកគ្នាទៅតវ៉ាច្រើនពេក និងបានជំរុញឲ្យពួកគេទៅដោះស្រាយរឿងនេះនៅសាលាស្រុកកោះធំ វិញ ដោយប្រាប់អ្នកម្ចាស់ទូកបានដាក់ពាក្យបណ្ដឹងរឿងនេះនៅសាលាស្រុក។
លោក ស៊ុន ប៊ុនសេង ពលរដ្ឋម្នាក់ដែលមានឈ្មោះកោះហៅឲ្យចូលបំភ្លឺនៅប៉ុស្តិ៍នគរបាលលើកដែក បដិសេធថា អ្នកភូមិមិនទៅសាលាស្រុកទេ ព្រោះសាលាស្រុកមិនបានកោះហៅពួកគេឡើយ គឺខាងប៉ុស្តិ៍ដែលបានកោះហៅឲ្យចូលបំភ្លឺរឿងអ្នកភូមិរឹបអូសទូកនេសាទខុសច្បាប់របស់ជនជាតិវៀតណាម។ លោក ស៊ុន ប៊ុនសេង បញ្ជាក់ថា អ្នកភូមិបានរាយការណ៍ច្រើនដងច្រើនសាទៅអាជ្ញាធរឃុំ រួមមានមេឃុំ និងប៉ូលិសឃុំឲ្យទៅជួយទប់ស្កាត់ជនជាតិវៀតណាម ដែលកំពុងដាក់ដាយយ៉ាងវែងយកត្រីខុសច្បាប់។ ប៉ុន្តែ ទាំងមេឃុំ និងប៉ូលិសមិនបានអើពើ។
លោកថា នៅថ្ងៃទី៩ ធ្នូ ប្រជាពលរដ្ឋបាននាំគ្នាចុះទៅរឹបអូសទូកនេសាទវៀតណាម ពីរគ្រឿង ដែលអាចផ្ទុកទម្ងន់បានពី ១តោន ទៅ ២តោន និងរឹបអូសយកត្រីទម្ងន់ ៣០០គីឡូក្រាម ជាភស្តុតាង ដើម្បីយកមកប្ដឹងអាជ្ញាធរមូលដ្ឋានឲ្យជួយដោះស្រាយ។ អាជ្ញាធរបដិសេធសំណើរបស់អ្នកភូមិ ហើយបន្ទាប់មកបានចោទប្រជាពលរដ្ឋខ្មែរទាំងនោះថា ជាចោរលួចទ្រព្យជនជាតិវៀតណាម។
ប្រធានប៉ុស្តិ៍នគរបាលឃុំលើកដែក លោក ម៉ា ប៊ុនហ៊ បដិសេធមិនផ្តល់បទសម្ភាសន៍ទេ ដោយប្រាប់កំពុងជាប់រវល់ដោះស្រាយជាមួយពលរដ្ឋ ដែលឡើងទៅតវ៉ានៅមុខប៉ុស្តិ៍ និងបានជំរុញឲ្យទៅសួរនាំមេឃុំលើកដែក។
ជុំវិញការលើកឡើងរបស់ពលរដ្ឋនេះ មេឃុំលើកដែក លោក ជ្រា ហាក់ ប្រាប់ថា អ្នកភូមិមិនបានរាយការណ៍ប្រាប់អាជ្ញាធរមូលដ្ឋានពីការចុះទៅរឹបអូសទូកនេសាទនោះទេ។ ហើយថា អ្នកភូមិធ្វើការសម្រេចចិត្តដោយខ្លួនឯង ទៅរឹបអូសទ្រព្យសម្បត្តិនេសាទរបស់គេខុសច្បាប់។ លោកបន្តថា ម្ចាស់ទូកបានដាក់ពាក្យប្ដឹងអ្នកភូមិទាំងនោះថា បានលួចទូករបស់គេទៅប៉ូលិសប៉ុស្តិ៍ ដើម្បីឲ្យដោះស្រាយរឿងនេះ។
«សំឡេង»
លោកបដិសេធមិនប្រាប់ឈ្មោះម្ចាស់បណ្ដឹង ដែលត្រូវជាម្ចាស់ទូកនេសាទនោះទេ។ តែប្រាប់ថា ម្ចាស់ទូកនោះមិនមែនជាជនជាតិវៀតណាម ដូចការចោទប្រកាន់របស់អ្នកភូមិឡើយ។
អ្នកភូមិបានសម្រេចត្រឡប់ទៅផ្ទះរបស់ខ្លួនវិញនៅរសៀលថ្ងៃដដែល ហើយរង់ចាំអាជ្ញាធរឃុំដោះស្រាយរឿងនេះ ខណៈដែលមានព័ត៌មានខ្លះថា អាជ្ញាធរចង់បញ្ចប់រឿងនេះដោយការសម្របសម្រួលគ្នារវាងដើមបណ្ដឹង និងពលរដ្ឋក្រៅប្រព័ន្ធតុលាការ៕
No comments:
Post a Comment