ដោយ៖ បូ សាវី និង ពៅ មេត្តា | ថ្ងៃព្រហស្បតិ៍ ទី12 ខែធ្នូ ឆ្នាំ2013, VOD
ស្តាប់សំឡេង៖ | ចម្លងទុក |
លោក សម រង្ស៊ី នៅពេលចុះពិនិត្យស្ថានភាពព្រៃឡង់(រូបថតដោយ បូ សាវី)
ប្រធានគណបក្សសង្គ្រោះជាតិលោក សម រង្ស៊ី ថ្លែងថា លោកនឹងរៀបចំរបាយការណ៍ ពីការកាប់បំផ្លាញព្រៃឡង់ដាក់ជូនប្រទេស និងស្ថាប័នម្ចាស់ជំនួយសំខាន់ៗឲ្យដាក់សម្ពាធ លើរដ្ឋាភិបាលកម្ពុជា។
នៅពេលចុះទៅពិនិត្យស្ថានភាពព្រៃឡង់ នៅថ្ងៃពុធទី១១ខែធ្នូ លោក សម រង្ស៊ី ថ្លែងថា ក្រុមហ៊ុនបរទេសកំពុងកាប់ផ្លាញព្រៃឡង់ ជាសម្បតិ្តរបស់ប្រជាជនខ្មែរ ដោយមិនមានការទប់ស្កាត់ពីរាជរដ្ឋាភិបាលទេ។ លោកបន្តថា លោក នឹងរៀបចំរបាយការណ៍ពីការកាប់បំផ្លាញព្រៃនេះ ដាក់ជូនម្ចាស់ជំនួយសំខាន់ឲ្យដាក់សម្ពាធលើរដ្ឋាភិបាលកម្ពុជា ៖ “រឿងនេះ យើងត្រូវធ្វើឲ្យលឺ ធ្វើឲ្យខ្ទរខ្ទារទូទាំងពិភពលោក ដើម្បីប្រមូលកម្លាំងដែលគេអាចដាក់សម្ពាធមកលើរដ្ឋាភិបាល ដែលការពារក្រុមហ៊ុនខិលខូច ក្រុមហ៊ុនយួន ជាពិសេសនេះ ដូចគេកំពុងតែធ្វើសព្វថ្ងៃ”។
អ្នកនាំពាក្យទីស្តីការគណរដ្ឋមន្ត្រីលោក ផៃ ស៊ីផាន មិនឆ្លើយសំនួររបស់អ្នកព័ត៌មានVODទេ ដោយប្រាប់ថាជាប់រវល់។
កាលពីចុងឆ្នាំ២០១២ ទីស្តីការគណៈរដ្ឋមន្ត្រី បានប្រជុំសម្រេចស្តីពីការលុបចោលអាជ្ញាប័ណ្ណ ការផ្តល់ដីសម្បទានសេដ្ឋកិច្ចប្រមាណជាង ២០ក្រុមហ៊ុនក្នុងតំបន់ព្រៃឡង់។ ប៉ុន្តែមកដល់ថ្ងៃនេះ សកម្មជនព្រៃឡង់ប្រកាសថា មិនទាន់ឃើញក្រុមហ៊ុនណាមួយបានដកចេញ និងបញ្ឈប់សកម្មភាពរបស់ខ្លួននោះឡើយ ជាហេតុនាំឲ្យពួកគាត់បារម្ភពីការបាត់បង់ព្រៃនៅតំបន់នោះ។
តំណាងសហគមន៍ព្រៃឡង់ នៅស្រុកសណ្តាន់ខេត្តកំពង់ធំ លោក កែ ឈន ថ្លែងថា ការចុះល្បាតព្រៃកាលចុងខែវិច្ឆិកាឃើញ ការបំផ្លាញនៅតែមានច្រើន ៖ “ពួកខ្ញុំដើរល្បាតកាលពីថ្ងៃទី២៧ រហូតដល់ថ្ងៃ៣០ ទើបចេញមកវិញនោះ គឺប៉ះពាល់ច្រើន ទីមួយគាត់កំពុងតែកាប់ដកហូតឈើប្រណិតៗ ដូចជាបេង នាងនួន ធ្នុង ជាពិសេសគឺឈើធ្នុងតែម្តង ដឹកជញ្ជូនមួយយប់ៗ មួយថ្ងៃៗគ្មានពេលទំនេរ ហើយស្តុកនៅគ្រប់ទីកន្លែង ទីណាក៏ដោយ កន្លែងណាក៏ដោយ ពួកខ្ញុំមើលទៅ មួយកន្លែងៗ មានចាប់ពីម្ភៃកំណាត់ សាមសិបកំណាត់ ប៉ែតសិបកំណាត់ មួយរយហាសិបកំណាត់ រហូតដល់កន្លែងស្តុកនោះ ជាងមួយពាន់កំណាត់ក៏មានទៀត”។
នាយកអង្គការក្រុមកិច្ចការពិសេសសិទ្ធិមនុស្សកម្ពុជា លោក អ៊ូច ឡេង សិក្សាឃើញថា ក្នុងរយៈពេល១ឆ្នាំ ឬ២ឆ្នាំទៀតព្រៃមានតម្លៃនៅកម្ពុជា នឹងអស់បើមិនមានការទប់ស្កាត់ការកាប់បំផ្លាញនោះ ៖ “ព្រៃយើងនៅសល់តិចណាស់ ប្រហែលជាតិចណាស់ ប្រហែលជា១០ ទៅ២០ភាគរយប៉ុណ្ណឹង តិចមែនទែន ចំនែកប្រសិនជាព្រៃល្អៗគឺវាអស់ហើយ សល់តិចបំផុត ប្រសិនជាក្រញ៉ូងវិញស្ទើរតែដាច់ពូជ អាចថារកតែដើមក្រញ៉ូងមួយដើមទុកមើលមិនបានផង។ បារម្ភមែនទែន ខ្ញុំទស្សទាយថា មិនដល់ប្រាំឆ្នាំទៀត ត្រឹមតែមួយឆ្នាំក្រោយ ឬពីរឆ្នាំក្រោយគឺយើងលែងមានវាស្នាមើលព្រៃធំៗ ដើមឈើធំៗ ឬឈើមានតំលៃតទៅហើយ គឺអស់តែម្តង”។
របាយការណ៍សហគមន៍ព្រៃឡង់បង្ហាញថា ព្រៃឡង់មានទំហំ ប្រមាណ ៣៦០០គីឡូម៉ែត្រក្រឡា ជាប្រភពនៃអនុផលព្រៃឈើយ៉ាងសំខាន់ សម្រាប់ប្រជាពលរដ្ឋភាគច្រើន ជាជនជាតិភាគតិចប្រមាណជាង ៦០០០០គ្រួសារ ក្នុងភូមិជិត ៤០០ភូមិ ដែលស្ថិតនៅក្នុងខេត្តព្រះវិហារ កំពង់ធំ ស្ទឹងត្រែង និងក្រចេះ ដែលអ្នកខ្លះប្រកបរបរបោចវល្លិ៍ រកជ័រ និងបេះផ្លែឈើលក់ចិញ្ចឹមជីវិត។ ព្រៃឡង់ក៏ជាជម្រកជីវសាស្ត្រចម្រុះច្រើនប្រភេទ ដូចជា ជួយទប់ស្កាត់គ្រោះធម្មជាតិ និងជួយស្រូបយកឧស្ម័នកាបូនិក ដើម្បីកាត់បន្ថយការប្រែប្រួលអាកាសធាតុជាដើម៕
សូមសរសេរមកកាន់លោក បូ សាវី តាមរយៈ savy@vodhotnews.com
No comments:
Post a Comment