មេដឹកនាំសហជីពធំៗមួយចំនួនបានអះអាងថា នឹងដឹកនាំកម្មករបម្រើការក្នុងវិស័យកាត់ដេរ ឬស្បែកជើង ធ្វើមហាបាតុកម្ម ឬកូដកម្មទ្រង់ទ្រាយធំនៅទូទាំងប្រទេស បើការទាមទារស្នើដំឡើងប្រាក់ឈ្នួលអប្បបរមាជូនកម្មករត្រូវបរាជ័យ ឬមិនបានដូចបំណងនោះ។
ដោយ ដែន អយុធ្យា
2013-12-23
សេចក្ដីថ្លែងការណ៍របស់សហភាពសហជីពកម្ពុជា ចុះថ្ងៃទី២៣ ខែធ្នូ មានចុះហត្ថលេខា លោក រ៉ុង ឈុន បានទារឲ្យផ្នែកពាក់ព័ន្ធ ដូចជាថៅកែរោងចក្រ និងរដ្ឋាភិបាល ជួយដំឡើងប្រាក់ខែគោល ឬអប្បបរមាជូនកម្មករឲ្យបាន ១៦០ដុល្លារសហរដ្ឋអាមេរិកក្នុង១ខែសម្រាប់កម្មករម្នាក់។ ប្រាក់បៀវត្សអប្បបរមារបស់កម្មករកន្លងមកមានចំនួន ៨០ដុល្លារក្នុង១ខែ។
លោក រ៉ុង ឈុន ឲ្យដឹងបន្តថា មេដឹកនាំសហជីពនិងកម្មករ បានទាមទារដំឡើងប្រាក់បៀវត្សចំនួន ១៦០ដុល្លារក្នុង១ខែសម្រាប់រយៈពេល ៥ឆ្នាំ គិតចាប់ពីឆ្នាំ២០១៤ តទៅ ដោយមិនបូកបញ្ចូលប្រាក់អត្ថប្រយោជន៍ផ្សេងៗទេ។
បន្ថែមលើសេចក្ដីថ្លែងការណ៍ លោក រ៉ុង ឈុន បានព្រមានថា បើសិនជាការទាមទារដំឡើងប្រាក់បៀវត្សជូនក្រុមកម្មករ ផ្នែកពាក់ព័ន្ធមិនបានផ្តល់ជូនតាមការទាមទារទេ នឹងផ្ទុះមហាបាតុកម្ម ឬកូដកម្ម មិនចូលធ្វើការ ឬបញ្ហាផ្សេងៗ ពីសំណាក់ក្រុមកម្មករនៅទូទាំងប្រទេស។
លោកថា មហាបាតុកម្ម ឬកូដកម្មនេះ នឹងចាប់ផ្ដើមនៅដើមខែមករា ឆ្នាំ២០១៤ ខាងមុខ៖ «សហជីពកម្ពុជា ឲ្យកម្មករត្រៀមខ្លួនដើម្បីចូលរួមធ្វើមហាកូដកម្ម ឬបាតុកម្មនៅពេលដែលខាងគណៈកម្មការប្រឹក្សាការងារ ក៏ដូចជាក្រសួងការងារ មិនបានសម្រេចយកទៅតាមការស្នើសុំរបស់សហព័ន្ធសហជីពដែលមានចំនួន ១៨ស្ថាប័ន ដែលបានស្នើឡើងនៅថ្ងៃទី១៨ ខែធ្នូ កន្លងទៅ ដាក់ជូនក្រសួងការងារ»។
លោក រ៉ុង ឈុន ដែលជាប្រធានសមាគមគ្រូបង្រៀនកម្ពុជាឯករាជ្យផងនោះ បានឲ្យដឹងថា ការកំណត់ប្រាក់ខែទាបបំផុតជូនកម្មករកាត់ដេរ និងផលិតស្បែកជើងចំនួន ១៦០ដុល្លារ ក្នុង១ខែក្នុងម្នាក់ៗ ក៏ត្រូវអនុវត្តសម្រាប់កម្មករជាបុគ្គលិកបម្រើការតាមភោជនីយដ្ឋាន អ្នកបម្រើការនៅតាមហាងខារ៉ាអូខេ ឬអ្នកលក់ស្រាបៀជាដើម។
ទាក់ទិនបញ្ហានេះ មន្ត្រីក្រសួងការងារនិងបណ្ដុះបណ្ដាលវិជ្ជាជីវៈ មិនទាន់ធ្វើអត្ថាធិប្បាយទេជុំវិញការកំណត់ប្រាក់ឈ្នួលអប្បបរមាជូនកម្មករទេ នៅថ្ងៃច័ន្ទ ទី២៣ ខែធ្នូ។ ប៉ុន្តែបាននិយាយថា ខាងគណៈកម្មការប្រឹក្សាការងារ និងផ្នែកពាក់ព័ន្ធមានភាគីថៅកែរោងចក្រជាដើម នឹងប្រជុំសម្រេចចុងក្រោយអំពីលទ្ធផលនៃការដំឡើងប្រាក់ឈ្នួលជូនកម្មករ នៅថ្ងៃអង្គារ ទី២៤ ខែធ្នូ។
យ៉ាងណាក៏ដោយ លោក រ៉ុង ឈុន បានព្រមានថា បើសិនជាការសម្រេចនេះ ផ្ទុយពីសំណើរបស់សហព័ន្ធសហជីព ឬសហជីពការពារសិទ្ធិកម្មករ នឹងមានផ្ទុះមហាបាតុកម្ម ឬកូដកម្មនៅតាមបណ្តារោងចក្រនានា ពាសពេញផ្ទៃប្រទេស នៅដើមឆ្នាំ២០១៤។
បញ្ហានេះ សម្រាប់មេដឹកនាំសហជីពកម្មករច្រើនទៀត និងក្រុមកម្មករបម្រើការនៅតាមរោងចក្រមួយចំនួនក្នុងរាជធានីភ្នំពេញ បានអះអាងថា បានត្រៀមលក្ខណៈចូលរួមធ្វើមហាបាតុកម្ម ឬកូដកម្មចំពោះការកំណត់ប្រាក់ខែគោល ផ្ទុយពីការទាមទាររបស់កម្មករ។
កាលពីថ្ងៃទី១៨ ខែធ្នូ មានសហព័ន្ធសហជីព ចំនួន ១៨ស្ថាប័ន បានសម្រេចយករូបមន្តទី៣ របស់ក្រសួងការងារ ស្ដីពីការកំណត់ប្រាក់ឈ្នួលអប្បបរមាជូនកម្មករ គឺ ៨០ដុល្លារ បូក ៨០ដុល្លារ ឬស្មើ ១៦០ដុល្លារ ក្នុង១ខែ សម្រាប់ដំឡើងប្រាក់ខែជូនកម្មករក្នុងរយៈពេល ៥ឆ្នាំទៅមុខ ដោយមិនបូកបញ្ចូលប្រាក់អត្ថប្រយោជន៍ផ្សេងៗទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ៕
No comments:
Post a Comment