ដោយ៖ ជន ស្រីណុច និងដួង សុខា | ថ្ងៃចន្ទ ទី25 ខែវិច្ឆិកា ឆ្នាំ2013 | 3 ម៉ោង មុន
ស្តាប់សំឡេង៖ | ចម្លងទុក |
(រូបភាពពី google)
ក្រុមកិច្ចការពិសេសសិទ្ធិមនុស្សកម្ពុជា(CHRTF) ដែលបានចេញរបាយការណ៍បង្ហាញពីការកាប់ព្រៃឈើខុសច្បាប់របស់ក្រុមហ៊ុន លោកឧកញ៉ា ទ្រី ភាព នៅថ្ងៃចន្ទនេះ អំពាវនាវដល់អង្គការសិទ្ធិមនុស្សក្នុងស្រុក និងអន្តរជាតិ ជួយគាំទ្រផ្លូវច្បាប់ដល់ប្រជាជន២រូប ដែលទទួលរងបណ្តឹងពីក្រុមហ៊ុន។
កាលពីថ្ងៃទី២២ ខែវិច្ឆិកា តំណាងអយ្យការអមសាលាដំបូងខេត្តកណ្តាល លោក សំម ឬទ្ធីវាសនា បានចេញដីកាកោះឲ្យ លោក សេន សាន និងអ្នកស្រី អ៊ុក សំបូរ នៅឃុំត្បែង ស្រុកកណ្តាលស្ទឹង ខេត្តកណ្តាល ចូលមកបំភ្លឺនៅតុលាការ នៅថ្ងៃទី២៩ ខែវិច្ឆិកា។ ក្រុមហ៊ុនរបស់លោក ទ្រី ភាព បានប្តឹងអ្នកទាំងពីរ ពីបទបរិហារកេរ្តិ៍ជាសាធារណៈ បន្ទាប់ពីពួកគាត់បានធ្វើជាសាក្សីក្នុងរបាយការណ៍របស់ក្រុមកិច្ចការពិសេសសិទ្ធិមនុស្សកម្ពុជា។
ប្រធានក្រុមកិច្ចការពិសេសសិទ្ធិមនុស្សកម្ពុជា លោក អ៊ូច ឡេង យល់ថា ដីកាកោះរបស់តុលាការជាការគំរាមកំហែងដល់ពលរដ្ឋ ដែលហ៊ានចេញមុខនិយាយការពិត ៖ “ហើយបើសិនជារដ្ឋាភិបាលគាត់នៅតែលម្អៀងទៅខាងក្រុមហ៊ុន ការពារទៅលើខាងក្រុមហ៊ុនតទៅទៀត ជាពិសេសស្ថាប័នតុលាការ ដូច្នេះសុំឲ្យប្រជាពលរដ្ឋ អង្គការជាតិ អន្ដរជាតិ ប្រជាពលរដ្ឋទាំងក្នុងទាំងក្រៅប្រទេស ក៏ដូចជាម្ចាស់ជំនួយទាំងអស់ គឺថា នាំគ្នាផ្ដោត និងខិតខំខ្នះខ្នែងធ្វើយ៉ាងម៉េច ជួយធ្វើការរួមចំណែករឿងនេះទាំងអស់គ្នា តាំងពីពេលនេះតទៅ” ។
របាយការណ៍ស៊ើបអង្កេតជិត៥០ទំព័ររបស់ក្រុមកិច្ចការពិសេសសិទ្ធិមនុស្សកម្ពុជា ចេញផ្សាយកាលពីថ្ងៃទី២០ ខែវិច្ឆិកា ដកស្រង់ព័ត៌មានពីប្រជាពលរដ្ឋ ដោយភ្ជាប់ឈ្មោះ និងលេខទូរស័ព្ទ ប្រភពដែលផ្តល់ព័ត៌មានស៊ើបអង្កេតនោះ មកសរសេរថា ឧកញ៉ា ទ្រី ភាព បានចំណាយលុយប្រចាំខែ១លានដុល្លារអាមេរិកបង់ឲ្យក្រុមគ្រួសារលោកនាយករដ្ឋមន្ត្រី ហ៊ុន សែន ដើម្បីដឹកឈើពីស្រុកខ្មែរទៅលក់នៅប្រទេសវៀតណាម ឬចិន។ របាយការណ៍ដដែលបន្ថែមថា ប្រជាពលរដ្ឋទាំង២នោះ ក៏បង្ហាញពីប្រវត្តិ និងអំពើល្អ ដែលលោក ទ្រី ភាព បានធ្វើជាមួយអ្នកភូមិ និងអាជ្ញាធរមូលដ្ឋាន។
លោក អ៊ូច ឡេង ពន្យល់ថា មូលហេតុដែលគាត់បង្ហាញប្រភពច្បាស់លាស់នេះ គឺចង់បង្ហាញថា ប្រជាជនទាំងនោះហ៊ានចេញមុខនិយាយរឿងពិត ដោយសារពួកគាត់ឈឺចាប់នឹងការកាប់បំផ្លាញព្រៃឈើ។ លោកថា អង្គការលោកត្រៀមមេធាវីរួចហើយ ដើម្បីការពារអ្នកទាំងពីរ។
ប្រធានមជ្ឈមណ្ឌលសិទ្ធិមនុស្សកម្ពុជា(CCHR) លោក អ៊ូ វីរៈ មានប្រសាសន៍ថា លោកនឹងសិក្សារបាយការណ៍នេះឡើងវិញ។ លោកថា ប្រសិនបើការចោទប្រកាន់នោះមានភាពមិនប្រក្រតី លោកនឹងផ្តល់ជំនួយផ្នែកផ្លូវច្បាប់ដល់ប្រជាជនទាំងនោះ។
ក្រទ្បាបញ្ជីសាលាដំបូងខេត្តកណ្តាល លោក អាំង រតនា ដែលកាន់សំណុំរឿងនេះ គ្រាន់តែមានប្រសាសន៍ថា រឿងនេះស្ថិតក្នុងដំណាក់ការស៊ើបអង្កេត ៖ “វាស្ថិតនៅក្រោមការស៊ើបអង្កេតតិចណាបងកុំអាលណា កុំអាល បើមានការអីត្រូវការសាកសួរ មានឱកាសអញ្ជើញមកតិចមកៗ សួរ សាកសួរផ្ទាល់ចុះ នៅក្នុងរូបភាពបែបណា ចាំអញ្ជើញជួបអយ្យការផ្ទាល់ក៏បានដែរណាស់” ។
VODមិនអាចសុំអត្ថាអធិប្បាយពីក្រុមហ៊ុនរបស់លោក ទ្រី ភាព បានទេ៕
សូមសរសេរមកកាន់ កញ្ញា ជន ស្រីណុច តាមរយៈ chornsreynoch@vodhotnews.com
2 comments:
Get rid of ah kwaq save your country,get rid of ah Pheap Try save your forests!....All Khmers,that's your obligation,your duty for your Next generations to live free of oppression and enjoy prosperity.
Kdamjor
ah try oheap chea chun okret trey yok oy chrachea chun kat tors
Post a Comment