ដោយ៖ ថុល ស្រីលក្ខណ៍ និង អ៊ឹង ប៊ុនថន | ថ្ងៃអង្គារ៍ ទី15 ខែតុលា ឆ្នាំ2013, VOD
ស្តាប់សំឡេង៖ | ចម្លងទុក |
គណបក្សប្រជាជនកម្ពុជា
គណបក្សប្រជាជនកម្ពុជា ប្រកាសជាផ្លូវការពីកំណែទម្រង់ការបោះឆ្នោត នាពេលខាងមុខ ដោយស្នើឲ្យធ្វើវិសោធនកម្មច្បាប់ និងនីតិវិធីទាំងឡាយ ដែលពាក់ព័ន្ធនឹងការបោះឆ្នោត ឲ្យស្របតាមគោលការណ៍នៃលទិ្ធប្រជាធិបតេយ្យ និងនីតិរដ្ឋ។
ការប្រកាសនេះ ធ្វើឡើងខណៈដែលគណបក្សសង្រ្គោះជាតិ កំពុងប្រមូលស្នាមមេដៃពីពលរដ្ឋដើម្បីដាក់ជូនអង្គការសហប្រជាជាតិឲ្យជួយពិនិត្យពីភាពមិនប្រក្រតីនៃការបោះឆ្នោតនៅកម្ពុជា។
នៅក្នុងសេចក្តីថ្លែងការណ៍របស់គណបក្សប្រជាជនកម្ពុជា ចុះថ្ងៃទី១៤ខែតុលាឆ្នាំ២០១៣ បានឲ្យដឹងថា ការប្រកាសនូវជំហរ និងប្តេជ្ញាកែទម្រង់ការបោះឆ្នោតនេះ គឺផ្អែកលើរដ្ឋធម្មនុញ្ញ និងច្បាប់ជាធរមាននានា និងស្ថានការជាក់ស្តែងក្រោយការបោះឆ្នោតជ្រើសតាំងតំណាងរាស្ត្រកន្លងមក ព្រមទាំងយោងតាមជំនួបរវាងថ្នាក់ដឹកនាំគណបក្សប្រជាជនកម្ពុជា និងគណបក្សសង្គ្រោះជាតិ កាលពីថ្ងៃទី១៦ខែកញ្ញា ។
សេចក្តីថ្លែងការណ៍ដដែល ឲ្យដឹងទៀតថា គណបក្សនេះគ្រោងកែទម្រង់ការបោះឆ្នោតចំនួន៥ចំណុច រួមមាន ស្នើធ្វើវិសោធនកម្មច្បាប់ ស្តីពីការបោះឆ្នោត ច្បាប់ស្តីពីគណបក្សនយោបាយ បទបញ្ជា និងនីតិវិធីនៃការបោះឆ្នោត។ ស្នើសេចក្តីព្រាងច្បាប់ស្តីពីថវិកាគណបក្សនយោបាយ។ គណបក្សប្រជាជនកម្ពុជា ប្រកាន់គោលការណ៍បើកចំហ និងទទួលយកមកសិក្សានូវអនុសាសន៍នានាទាំងជាតិ និងអន្តរជាតិ ទាក់ទងនឹងការបោះឆ្នោត។ បង្កើតយន្តការដើម្បីសិក្សាស្រាវជ្រាវ បង្កើតឲ្យបានក្របខ័ណ្ឌកែទម្រង់ការបោះឆ្នោត ស្របតាមគោលការណ៍ប្រជាធិបតេយ្យ សេរី ត្រឹមត្រូវ និងយុត្តិធម៌ ជាដើម។
អ្នកនាំពាក្យគណបក្សសង្គ្រោះជាតិ លោកយឹម សុវណ្ណ មានប្រសាសន៍ថា ការប្រកាសរបស់គណបក្សប្រជាជននៅពេលនេះ គឺមិនមានប្រយោជន៍នោះទេ ដោយសារបញ្ហានយោបាយបន្តជាប់គាំងនៅត្រឹមរដ្ឋសភា។ លោកថា ការធ្វើកំណែទម្រង់ការបោះឆ្នោតជារឿងចាំបាច់ លុះត្រាតែមានការពិភាក្សារួមគ្នារវាងគណបក្សជាប់ឆ្នោតទាំងពីរ ទើបកំណែទម្រង់នេះអាចទទួលយកបាន ៖ "ហើយអ្វីដែលគណបក្សសង្គ្រោះជាតិចាប់ផ្តើមធ្វើ មិនមែនគ្រាន់តែកែទម្រង់នៅលើក្រដាស ឲ្យតែល្អមើលនោះទេ គឺយើងត្រូវតែសិក្សាដើម្បីផ្តាច់ឬសគល់បញ្ហាហ្នឹង ហើយនោះគឺជាការបង្កើតឲ្យមានតុល្យភាពនៅក្នុងការ ស្ថាប័នសំខាន់ជាតិធំៗ ដែលធ្វើសេចក្តីសម្រេចជាអាយុជីវិតជាតិ អញ្ចឹងហើយបានជាចាប់ផ្តើមចេញពីរដ្ឋសភា ចេញពីរដ្ឋាភិបាល ដែលត្រូវតែគោរពរដ្ឋធម្មនុញ្ញ ដែលត្រូវតែរៀបចំឡើងឲ្យស្របរដ្ឋធនុញ្ញ ហើយមានអំណាចតុល្យភាពនៅក្នុងស្ថាប័នជាតិសំខាន់ៗ ជាពិសេសរដ្ឋសភា ឥឡូវយើងមិនទាន់ចាកចេញពីចំណុចវិបត្តិនេះនៅឡើយទេ"។
នាយកគណៈកម្មាធិការដើម្បីការបោះឆ្នោតដោយសេរី និងយុត្តិធម៌ នៅកម្ពុជា ហៅកាត់ខុមហ្វ្រែល (Comfrel) លោក គល់ បញ្ញា បានស្វាគមន៍ចំពោះការប្តេជ្ញាធ្វើកំណែទម្រង់នេះ ប៉ុន្តែលោកថា អ្វីដែលសំខាន់ការធ្វើកំណែទម្រង់ការបោះឆ្នោត មិនអាចសម្រេចតែឯកបក្សបានទេ ៖ "សំខាន់កំណែទម្រង់បោះឆ្នោត គេត្រូវយកគោលការណ៍ចម្បងគឺគណបក្សដែលមានអាសនៈក្នុងសភាហ្នឹង គឺជាអ្នកដែលពិនិត្យមើលកំណែទម្រង់ ជាពិសេសគេហៅថាគណបក្សដែលមកប្រកួតប្រជែង ថាតើការកែទម្រង់ហ្នឹងគេអាចទទួលបានទាំងអស់គ្នាអត់? អាហ្នឹងសំខាន់ណាស់ ជាពិសេសគណបក្សដែលប្រកួតប្រជែងហ្នឹង ឥឡូវនេះបើនិយាយពីនៅក្នុងសភា គឺគណបក្សប្រជាជន និងគណបក្សសង្គ្រោះជាតិហ្នឹងឯង ដែលត្រូវតែពិនិត្យមើលរឿងអស់ហ្នឹង ហើយនាំគ្នាធ្វើការស្រុះស្រួលគ្នា ទៅលើកំណែទម្រង់ហ្នឹង ចំណុចសំខាន់ៗហ្នឹង ព្រោះជួនកាលកំណែទម្រង់ខ្លះវាអាចបានផលប្រយោជន៍ទៅក្រុមមួយ ហើយវាបាត់ផលប្រយោជន៍ទៅក្រុមមួយទៀត"។
ការធ្វើកំណែទម្រង់ប្រព័ន្ធបោះឆ្នោតនៅកម្ពុជា គឺរបៀបវារៈសំខាន់ ដែលគណបក្សជំទាស់ និងអង្គការជាតិ និងអន្តរជាតិ ពិសេសអ្នករាយការណ៏សិទ្ធិមនុស្សអង្គការប្រជាជាតិប្រចាំកម្ពុជា អំពាវនាវឲ្យរដ្ឋាភិបាលធ្វើកំណែទម្រង់ តាំងពីមុនការបោះឆ្នោតជាតិអាណត្តិទី៥នេះមកម្ល៉េះ៕
សរសេរមកកាន់អ្នកនាង ថុល ស្រីលក្ខណ៍ តាមរយៈ sreyleak@vodhotnews.com
No comments:
Post a Comment