ដោយ៖ នួន បូរិន | ថ្ងៃសុក្រ ទី25 ខែតុលា ឆ្នាំ2013, VOD
លោក សម រង្ស៊ី ប្រធាន និងលោក កឹម សុខា អនុប្រធានគណបក្សសង្គ្រោះជាតិ(រូបថតដោយ វីដា)
មេដឹកនាំគណបក្សសង្គ្រោះជាតិ បន្តជំរុញប្រទេសជាសមាជិកហត្ថលេខី នៃកិច្ចព្រមព្រៀងសន្តិភាពទីក្រុងប៉ារីស ២៣ តុលា ១៩៩១ មួយចំនួន ទៀតឲ្យជួយរកយុត្តិធម៌ ជូនអ្នកគាំទ្រគណបក្សសង្គ្រោះជាតិ ក្នុងករណីភាពមិនប្រក្រតីនៃការបោះឆ្នោតសភា កាលពីថ្ងៃ២៨ កក្កដា កន្លងទៅនេះ។
ការជំរុញរបស់ លោក សម រង្ស៊ី និងលោក កឹម សុខា បានឡើងធ្វើតាមរយៈលិខិតរបស់ខ្លួន ដែលមានចុះហត្ថលេខារួមគ្នា ផ្ញើជូនលោកប្រធានាធិបតី ឥណ្ឌូនេស៊ី នាយករដ្ឋមន្ត្រីជប៉ុន នាយករដ្ឋមន្ត្រីអូស្ត្រាលី និងនាយករដ្ឋមន្ត្រីរុស្ស៊ី ដែលគណបក្សសង្គ្រោះជាតិ បានយកញត្តិស្នាមមេដៃប្រជាជនកម្ពុជា ជាង២លាននាក់ ដែលបានដាក់ជូន ស្ថានទូតរបស់មេដឹកនាំប្រទេសទាំងបួន កាលពីព្រឹកថ្ងៃសុក្រនេះ។
ខ្លឹមសារនៃលិខិតរបស់មេដឹកនាំគណបក្សសង្គ្រោះជាតិ ដែលធ្វើឡើងក្នុងនាមជាប្រជាជនកម្ពុជា ហើយបានផ្ញើជូនមេដឹកនាំប្រទេស ទាំងបួននេះ បានឃើញចុះហត្ថលេខា នៅថ្ងៃទី២៣ តុលា បានរៀបរាប់ថា ដោយសារតែមានករណីភាពមិនប្រក្រតីនៃការបោះឆ្នោតសភា កាលពីថ្ងៃ២៨ ខែកក្កដា កន្លងទៅនេះ និងការមិនអនុវត្តតាមអនុសាសន៍របស់អ្នករាយការណ៍ពិសេស អ.ស.ប ចំពោះការកែទម្រង់ការបោះឆ្នោត នៅកម្ពុជា គឺជាកំហុសមួយប្រឆាំងនឹងឆន្ទៈរបស់ប្រជាជនកម្ពុជា។
លិខិតបាន បន្តថា ករណីការបង្កើតរដ្ឋសភា និងរដ្ឋាភិបាលដោយគ្មានសំឡេងបក្សប្រឆាំងចូលប្រជុំសភា គឺរឹតតែជាការបំពាន់មួយទៀត ទៅលើរដ្ឋធម្មនុញ្ញ និងប្រជាធិបតេយ្យសេរីពហុបក្ស ដែលបានធានាដោយកិច្ចព្រមព្រៀងសន្តិភាពទីក្រុងប៉ារីស ២៣ តុលា ១៩៩១ ហើយកំពុងធ្វើដំណើរទៅកាន់របបឯកបក្សមួយ ដែលមានចរន្តគ្រប់គ្រងដោយបក្សតែមួយផ្ដាច់មុខ។
ក្នុងន័យនេះ លិខិតរបស់មេដឹកនាំគណបក្សសង្គ្រោះជាតិ បានទទូចសុំមេដឹកនាំប្រទេសទាំងបួន ដែលជាភាគីហត្ថលេខីនៃកិច្ចព្រមព្រៀងសន្តិភាពទីក្រុងប៉ារីស ២៣ តុលា ១៩៩១ ឲ្យជួយប្រជាជនកម្ពុជា មានប្រជាធិបតេយ្យ ធានាអនុវត្តកិច្ចព្រមព្រៀងនេះឡើងវិញ ហើយជួយរកយុត្តិធម៌ជូនប្រជាជនកម្ពុជា ដែលត្រូវបានជិះជាន់ និងបំបិទសិទិ្ធម្ចាស់ឆ្នោត។
លិខិតបានបញ្ជាក់ថា តាមរយៈញត្តិស្នាមមេដៃជាង២លាននាក់របស់ប្រជាជនកម្ពុជា ដែលបានដាក់ជូនទៅអង្គការសហប្រជាជាតិ គឺជាសក្ខីកម្មមួយ ដែលប្រជាជនកម្ពុជាពិតជាត្រូវការការជួយឲ្យមានការធ្វើអន្តរាគមន៍ ពីប្រទេសហត្ថលេខីនៃកិច្ចព្រមព្រៀងសន្តិភាពទីក្រុងប៉ារីស ២៣ តុលា ១៩៩១ ក្នុងករណីការជាប់គាំងនយោបាយនៅកម្ពុជា។
កាលពីថ្ងៃព្រហស្បតិ៍ លោក សម រង្ស៊ី និងលោក កឹម សុខា ប្រធាន និងអនុប្រធានគណបក្សសង្គ្រោះជាតិ ក៏បានផ្ញើជូនប្រធានាធិបតីអាមេរិក នាយករដ្ឋអង់គ្លេស និងនាយករដ្ឋមន្ត្រីបារាំងផងដែរ ហើយមានខ្លឺមសារ ដូចលិខិតដែលផ្ញើជូនមេដឹកនាំប្រទេសបួននេះដែរ៕
សូមសរសេរមកកាន់ លោក នួន បូរិន តាមរយៈ narinnun@vodhotnews.com
No comments:
Post a Comment