ដោយ៖ ណាត សុភាព | ថ្ងៃសៅរ៍ ទី14 ខែកញ្ញា ឆ្នាំ2013 | VOD
មន្ត្រីគណបក្សសង្គ្រោះជាតិ អះអាងនៅថ្ងៃសៅរ៍នេះថា អ្នកគាំទ្រប្រមាណ៣០០០នាក់ នៅខេត្តកំពង់ស្ពឺ និងធ្វើដំណើរមកកាន់រាជធានីភ្នំពេញ នៅថ្ងៃស្អែកនេះ ដើម្បីចូលរួមមហាបាតុកម្មអហិង្សានៅទីលានប្រជាធិបតេយ្យ ជំរុញឲ្យមានយុត្តិធម៌ចំពោះលទ្ធផលបោះឆ្នោត។
តំណាងគណបក្សសង្គ្រោះជាតិ លោក យូ ស៊ាងហេង មានប្រសាសន៍ថា អ្នកគាំទ្រទាំងនោះនឹងចេញដំណើរពីខេត្តកំពង់ស្ពឺនៅម៉ោង៧ព្រឹក ដើម្បីចូលរួមមហាបាតុកម្មអហិង្សានៅរាជធានីភ្នំពេញ ដែលគ្រោងធ្វើចំនួន៣ថ្ងៃ ចាប់ពីថ្ងៃទី១៥ ដល់ថ្ងៃទី១៧ ខែកញ្ញា ខាងមុខនេះ។
មន្ត្រីរូបនោះក៏បានបញ្ជាក់ថា ការធ្វើដំណើរនោះ បើទោះបីជាមានការរារាំងពីសមត្ថកិច្ចយ៉ាងណាក៏ដោយ ក៏ពួកគេនៅតែធ្វើដំណើរមកកាន់ទីលានប្រជាធិបតេយ្យ ដើម្បីចូលរួមមហាបាតុកម្មអហិង្សានេះ ទាមទារឲ្យបង្កើតគណៈកម្មការឯករាជ្យ ស៊ើបអង្កេតរកភាពមិនប្រក្រតី ជុំវិញការបោះឆ្នោតថ្នាក់ជាតិនីតិកាលទី៥ កាលពីថ្ងៃទី២៨ ខែកញ្ញា ឆ្នាំ២០១៣ ជូនម្ចាស់ឆ្នោតឲ្យមានសុក្រិតភាព។
សូមជម្រាបថា កាលពីថ្ងៃទី០៧ ខែកញ្ញា គណបក្សសង្គ្រោះជាតិធ្លាប់ធ្វើមហាបាតុកម្មអហិង្សាម្តងរួចមកហើយ។ នេះជាលើកទីពីរ ដែលគណបក្សសង្គ្រោះជាតិចាប់ផ្តើមធ្វើមហាបាតុកម្មទ្រង់ទ្រាយធំ ចំនួន៣ថ្ងៃនៅទីលានប្រជាធិបតេយ្យ ដោយគណបក្សប្រឆាំងមួយនេះ រំពឹងថានឹងមានអ្នកចូលរួម មិនតិចជាង២ម៉ឺននាក់ នោះទេ៕
សូមសរសេរមកកាន់លោក ណាត សុភាព តាមរយៈ sopheap@vodhotnews.com
No comments:
Post a Comment