ដោយ៖ សេង ម៉ូលីនី និងញ៉ែត ស្រីពៅ | ថ្ងៃចន្ទ័ ទី9 ខែកញ្ញា ឆ្នាំ2013 | 21 នាទី មុន
លោក សោភ័ណ្ឌ ឡារី និងអ្នកនាង បូនីតា ដាដេណា នៅថ្ងៃមហាបាតុកម្ម/រូបថតពីហ្វេសប៊ុក
នៅ
ថ្ងៃមហាបាតុកម្មរបស់គណបក្សសង្គ្រោះជាតិ អ្វីដែលអ្នកតាមដានសង្គម
និងជីវិតតារា ចាប់អារម្មណ៍ គឺការលេចមុខតារាសម្តែងពីររូប
បង្ហាញការគាំទ្រទៅលើគណបក្សប្រឆាំង ដែលផ្ទុយពីក្រុមតារាភាគច្រើន
ដែលបានគាំទ្រគណបក្សប្រជាជនកម្ពុជា
កាលពីយុទ្ធនាការឃោសនារកសំឡេងឆ្នោត។
តារាសម្ដែង២រូបនោះ គឺ លោក សោភ័ណ្ឌ
ឡារី
ដែលត្រូវបានគេស្គាល់តាមរយៈការសម្ដែងបទចម្រៀងខារ៉ាអូខេរបស់
ផលិតកម្មហង្សមាស បទ«សង្សារលេងៗ» និងអ្នកនាង បូនីតា ដាដេណា។
ការចេញមុខរបស់អ្នកទាំងពីរ ធ្វើឲ្យអ្នកលេងហ្វេសប៊ុក
និងយុវជនមួយចំនួន ចាប់ផ្តើមចែករំលែករូបភាពជាបន្តបន្ទាប់
ដោយអ្នកខ្លះកោតសរសើរពីភាពក្លាហានរបស់អ្នកទាំងពីរ តែអ្នកខ្លះ
ក៏រិះគន់អ្នកទាំងពីរផងដែរ។
លោក សោភ័ណ្ឌ ឡារី
ប្រាប់VODនៅថ្ងៃចន្ទទី៩ខែកញ្ញានេះថា
លោកគាំទ្រគណបក្សសង្គ្រោះជាតិ ដោយសារតែលោក
ពេញចិត្តនឹងគោលនយោបាយរបស់គណបក្សនេះ និងកន្លងមកលោក
សង្កេតឃើញភាពមិនប្រក្រតីជាច្រើននៅក្នុងសង្គម
ដូចនេះលោកចង់ឲ្យមានការផ្លាស់ប្ដូរ។ លោកបញ្ជាក់ថា៖«
ពេលដែលខ្ញុំចូលរួមក្នុងគណបក្សសង្គ្រោះជាតិខ្ញុំចូលរួមក្នុងនាម
ជាពលរដ្ឋមួយរូប ហើយមូលហេតុដែលខ្ញុំចូលរួម
ដោយសារតែខ្ញុំមើលឃើញថាបច្ចុប្បន្នមានភាពអយុតិ្តធម៌ច្រើននៅក្នុង
សង្គម ហើយប្រជាពលរដ្ឋគាត់យល់ដឹងទើបគាត់ក្រោយឈរទាំងអស់គ្នា»។
លោក ឡារី ប្រាប់ថា មួយរយៈក្រោយនេះ
លោកនៅតែមានការអញ្ជើញ ដើម្បីថតជាចម្រៀងកាយវិការខារ៉ាអូខេ
និងអញ្ជើញចូលរួមពីស្ថានីទូរទស្សន៍មួយចំនួន
ប៉ុន្តែស្ថានីយ៍មួយចំនួនទៀត
បន្ទាប់ពីឃើញលោកគាំទ្រគណបក្សប្រឆាំងជាចំហ
រារែកក្នុងការអញ្ជើញលោកដើម្បីចូលរួម។លោកមានប្រសាសន៍ថា៖«
ខ្ញុំបារម្ភគឺបារម្ភហើយពេលដែលខ្ញុំចូលរួម ខ្ញុំដឹងច្បាស់ថា
ប្រហែលជាគេនឹងហៅថត ឬមិនហៅថតទៀតខ្ញុំ ក៏មិនដឹងដែរ»។
លោក សោភ័ណ្ឌ ឡារី បានចូលសិល្បៈនៅក្នុងឆ្នាំ២០០៦ ការសម្តែងដំបូងរបស់លោក គឺ ថតវីដេអូអប់រំស្ពីពី «សុវត្តិភាពក្នុងពេលបើកបរដោយពាក់មួយសុវត្ថិភាព»។
កាលពីថ្ងៃទី៧ខែកញ្ញា
គណបក្សសង្គ្រោះជាតិ បានធ្វើមហាបាតុកម្មអហិង្សានៅទីលានប្រជាធិបតេយ្យ
ដែលមានអ្នកគាំទ្រប្រមាណជាង៣ម៉ឺនអ្នកចូលរួម។ តារាសម្តែងភាពយន្ត
និងជាចាងហ្វាំងផលិតកម្មភាពយន្តអធិមង្គល អ្នកនាង បូនីតា ដាដេណា
ក៏បានចូលរួមសកម្ម ភាពរបស់គណបក្សសង្គ្រោះជាតិផងដែរ។ VOD
មិនទាន់អាចសុំការបញ្ជាក់ពីអ្នកនាងលើបញ្ហានេះ បាននៅឡើយទេ។
(អ្នកនាង បូនីតា ដាដេណា ចូលរួមកម្មវិធីអាណាចក្រតារា កាលពីថ្ងៃទី១៥ខែសីហា ឆ្នាំ២០១៣/រូបថតដោយ សេង ម៉ូលីនី)
ប្រធានមជ្ឃមណ្ឌលប្រជាពលរដ្ឋដើម្បី
អភិវឌ្ឍន៍ និងសន្តិភាព លោក យ៉ង់ គឹមអេង បានប្រសាសន៍ថា
តារាក៏ជាប្រជាពលរដ្ឋ
ដូចនេះគាត់មានសិទ្ធក្នុងការចូលរួមក្នុងនយោបាយ។លោកបន្តថា
មិនមែនមានតែតារាពីររូបនេះ ដែលគ្រាំទ្រគណបក្សប្រឆាំងទេ
តារាផ្សេងៗទៀតក៏ធ្លាប់ចូលរួមក្នុងគណបក្សដទៃទៀតដែរ។
នៅថ្ងៃយុទ្ធនាការបោះឆ្នោត តារាសម្តែង
តារាចម្រៀង តារាកំប្លែង និងពិធីករ
រងការរិះគន់ជាបន្តបន្តបន្ទាប់ពីសំណាក់អ្នកលេងហ្វេសប៊ុក
ពីការចេញមុខគាំទ្រគណបក្សប្រជាជនកម្ពុជា។
លោក ជួង ជី ហៅនាយកុយ
ដែលបានគាំទ្រគណបក្សប្រជាជនកម្ពុជា ធ្លាប់ប្រាប់VODថា
ការសម្តែងរឿងនយោបាយ ឬគាំទ្រគណ បក្ស
កាន់អំណាចវាជាសិទ្ធិរបស់បុគ្គលម្នាក់ ហើយលោកមិន
ខ្វល់ខ្វាយចំពោះការធ្លាក់ប្រជាប្រិយភាពនោះទេ។
ក្រុមតារាកំប្លែង
គេឃើញចូលរួមឃោសនាឲ្យគណបក្សនយោបាយនោះរួមមាននាយក្រឹម នាយកុយ
នាយពែកមី និងតារាចម្រៀងល្បីៗមួយចំនួនទៀតដូចជា កញ្ញា សុគន្ធ នីសា
លោកឆនសុវណ្ណរាជ លោកករុណា ពេជ្រ លោកណុប បាយ៉ារិទ្ធ
រួមទាំងតារាល្បីៗជាច្រើនរូបទៀត៕
សរសេរមកកាន់ កញ្ញា សេង ម៉ូលីនី តាមរយៈmoliny@gmail.com
No comments:
Post a Comment