ដោយ៖ ស៊ុន ណារិន | ថ្ងៃសុក្រ ទី6 ខែកញ្ញា ឆ្នាំ2013 | VoD
រូបភាពដោយកែវ រតនៈ
ក្រុមយុវជនសន្តិភាពប្រមាណជា៥០នាក់ នៅម៉ោងជិត៥ថ្ងៃសុក្រនេះ
បានត្រៀមខ្លួនលើកបដា និងចែកផ្កាដល់កងទ័ព
ខណៈសមត្ថកិច្ចចម្រុះរាប់រយនាក់
ត្រូវបានដាក់បញ្ឈរជើងខាងមុខក្រសួងការពារជាតិ ត្រៀមទប់ស្កាត់
និងការពារ ។
អ្នកយកព័ត៌មានរបស់VODរាយការណ៍មកថា
សមត្ថកិច្ច បានព្រមានទៅលើក្រុមយុវជនថា ប្រសិនបើមានការលើកបដា
សមត្ថកិច្ច នឹងចាប់ខ្លួនយុវជនទាំងនោះ។ យុវជន
បានស្រែកច្រៀងមុននឹងចាប់ផ្តើមសកម្មភាពចែកផ្កា។
សមាជិកក្រុមយុវជនសន្តិភាពមួយរូប លោក
ហេង សំណាង ប្រាប់VODថា ក្រុមយុវជនរបស់គេ នឹងចែកផ្កាចំនួន៣ពាន់ទង
ដល់កងកម្លាំងប្រដាប់អាវុធ នៅមុខក្រសួងការពារជាតិ
ព្រមទាំងមានការសម្តែង និងថ្លែងសារមួយចំនួន
ក្នុងគោលបំណងស្វែងរកសន្តិភាព
បន្ទាប់ពីការបោះឆ្នោតបានបញ្ចប់។សមត្ថកិច្ច និងកម្លាំងប្រដាប់អាវុធ
បានបដិសេធទទួលផ្កាពីក្រុមយុវជន ដោយហេតុផលថា ក្រុមយុវជនមានសិទ្ធិចែកផ្កា
តែកម្លាំងប្រដាប់អាវុធ ក៏មានសិទ្ធិមិនទទួលយកផ្កាដែរ។
ការចែកផ្កាដល់កម្លាំងប្រដាប់អាវុធ
នេះ ធ្វើឡើងបន្ទាប់ពីមានការចល័តទ័ព នៅរាជធានីភ្នំពេញ
ធ្វើឲ្យប្រជាពលរដ្ឋមានការភ្ញាក់ផ្អើល និងភ័យខ្លាច
ថាអាចនឹងមានសង្គ្រាមកើតឡើង។
គួរបញ្ជាក់ថា កាលពីថ្ងៃទី១៧ខែសីហា
កន្លងទៅ សមាជិករបស់ក្រុមយុវជនសន្តិភាព៤រូបឈ្មោះ ទត់ ចាន់បញ្ញា ហ៊ើយ
បូរិន ឡុង លីផេង និង កញ្ញា សុខ ដាលីស ត្រូវប៉ូលិសឃាត់ខ្លូន
ពីបទញុះញង់ឲ្យមានហិង្សាប្រដាប់អាវុធ ផ្តួលរំលំរដ្ឋាភិបាល
បន្ទាប់ពីយុវជនទាំងនោះបានទៅយកផ្កា
សម្រាប់ចែកដល់កម្លាំងប្រដាប់អាវុធ៕
សរសេរមកកាន់ លោក ស៊ុន ណារិន តាមរយៈ sun_narin@vodhotnews.com
No comments:
Post a Comment