ដោយ៖ សេង ម៉ូលីនី និងស៊ុន ណារិន | ថ្ងៃអង្គារ៍ ទី10 ខែកញ្ញា ឆ្នាំ2013 | VoD
មន្ត្រីគណបក្សសង្គ្រោះជាតិ ឲ្យដឹងថា
ថ្នាក់ដឹកនាំគណបក្ស ប្រមាណជា២០នាក់
ដែលជាប់ឆ្នោតជាតំណាងរាស្ត្រសម្រាប់នីតិកាលទី៥នេះ
នឹងទៅទទួលព្រះមហាក្សត្រព្រះបាទនរោត្តមសីហមុនី
នៅអាកាសយានដ្ឋានអន្តរជាតិភ្នំពេញ។
ព្រះមហាក្សត្រព្រះបាទនរោត្តមសីហមុនី
គ្រោងយាងមកដល់កម្ពុជា នៅម៉ោង៤រសៀលថ្ងៃពុធ ស្អែកនេះ
ដោយនឹងមានការទៅទទួលពីសំណាក់ថ្នាក់ដឹកនាំគណបក្សប្រជាជនកម្ពុជា
មានលោក មាន ហេង សំរិន លោកនាយករដ្ឋមន្ត្រី ហ៊ុន សែន
និងមន្ត្រីជាន់ខ្ពស់ផ្សេងៗទៀត។
អ្នកនាំពាក្យគណបក្សសង្គ្រោះជាតិ លោក
យឹម សុវណ្ណប្រាប់VODនៅថ្ងៃអង្គារនេះថា
តំណាងខាងគណបក្សសង្គ្រោះជាតិ ប្រមាណ២០នាក់ នឹងទៅទទួលព្រះមហាក្សត្រ
នៅថ្ងៃទី១១ខែកញ្ញា។ លោកបន្ថែមថា ថ្នាក់ដឹកនាំគណបក្សសង្គ្រោះជាតិ
នឹងចូលគាល់ព្រះមហាក្សត្រ តែមិនទាន់អាចបញ្ជាក់ពីលម្អិតពីអ្វី
ដែលនឹងជម្រាបថ្វាយព្រះមហាក្សត្រនៅឡើយទេ។
គណបក្សសង្គ្រោះជាតិ
បានដាក់ញត្តិថ្វាយព្រះមហាក្សត្រ សុំឲ្យព្រះអង្គព្រះរាជអន្តរាគមន៍
ទៅលើភាពមិនប្រក្រតីនៃការបោះឆ្នោត ដើម្បីយុត្តិធម៌ជូនម្ចាស់ឆ្នោត។
កាលពីថ្ងៃចន្ទ ព្រះករុណា
ព្រះបាទសម្តេចព្រះបរមនាថ នរោត្តម សីហមុនី បានចេញព្រះរាជសារ
ជាការកោះអញ្ជើញបេក្ខជនជាប់ឆ្នោតតំណាងរាស្ត្រ នីតិកាលទី៥
ចូលរួមប្រជុំរដ្ឋសភា ជាលើកដំបូង នាព្រឹកថ្ងៃទី២៣ ខែកញ្ញា ឆ្នាំ២០១៣
នៅវិមានរដ្ឋសភា។ តែគណបក្សសង្គ្រោះជាតិ
ពហិការចូលប្រជុំសភាលើកដំបូងនៅពេលនេះ
ខណៈភាពមិនប្រក្រតីនៃការបោះឆ្នោត មិនត្រូវបានដោះស្រាយ។
ឆ្លើយតបទៅនឹងសំណួរអ្នកសារព័ត៌មាន
ក្នុងពេលជួបប្រជាពលរដ្ឋនៅផ្សារអូរឫស្សី នៅព្រឹកថ្ងៃអង្គារនេះ លោក
សម រង្ស៊ី ថ្លែងថា ការកោះប្រជុំពិតប្រាកដ គឺព្រះមហាក្សត្រ
នឹងផ្ញើព្រះរាជលិខិត មកកាន់តំណាងរាស្ត្រជាប់ឆ្នោតដោយផ្ទាល់ ៖
“ព្រះមហាក្សត្រ មិនទាន់កោះហៅទេ បើលោកកោះហៅ លោកនឹងសរសេរព្រះរាជសារ
ប្រទានដល់អ្នកតំណាងរាស្ត្រ មិនមែនសរសេរតាមរយៈ ចោរ អ៊ឹម សួស្តី នោះទេ
ទាល់តែមានការផ្តល់យុត្តិធម៌ ជូនប្រជារាស្ត្រ
រកដំណោះស្រាយសមស្របបានយើងចូលរួមប្រជុំ”។
អ្នកវិភាគ អះអាងថា
ព្រះរាជសាររបស់ព្រះមហាក្សត្រ ដែលកោះហៅបេក្ខជនជាប់ឆ្នោតរបស់គណបក្ស
ឲ្យចូលប្រជុំសភាលើកដំបូងនោះ មិនអាចធ្វើបានទេ
បើគូភាគីមិនយល់ព្រមទទួលស្គាល់នូវលទ្ធផលបោះឆ្នោតផ្លូវការ៕
សរសេរមកកាន់កញ្ញា សេង ម៉ូលីនី តាមរយៈsengmoliny@gmail.com
No comments:
Post a Comment