- Thursday, 15 August 2013
Phnom Penh Post - លាង ផាន់ណារ៉ា
ភ្នំពេញៈ
ទោះបីជាមានសេចក្តីអំពាវនាវពីមេដឹកនាំគណបក្សប្រឆាំងលោក សម រង្ស៊ី
ពីក្រៅប្រទេស ឲ្យរដ្ឋាភិបាលកម្ពុជា បញ្ឈប់ការបង្កើនកម្លាំងទ័ព
និងបញ្ឈប់ការចល័តកងកម្លាំងប្រដាប់អាវុធ
ដើម្បីកុំឲ្យប្រជាពលរដ្ឋមានការភ័យខ្លាច ក៏នៅទីក្រុងភ្នំពេញ
គេសង្កេតឃើញមានវត្តមានកងកម្លាំងប្រដាប់អាវុធ
និងរថយន្តពន្លត់អគ្គីភ័យបានដាក់ពង្រាយបន្ថែមទៀត
ជាពិសេសនៅម្តុំវត្តបុទុមវត្តី
ដែលជាកន្លែងនៅក្បែររដ្ឋសភានិងផ្ទះលោកនាយករដ្ឋមន្ត្រីហ៊ុន សែន។
ការដាក់ពង្រាយកងកម្លាំងប្រដាប់អាវុធនេះ
ខាងមន្ត្រីជាន់ខ្ពស់នៃគណបក្សកាន់អំណាចធ្លាប់បានអះអាងថា
គឺគ្រាន់តែការពារសន្តិសុខសណ្តាប់ធ្នាប់សង្គមតែប៉ុណ្ណោះ
មិនមែនទៅច្បាំងរាំងជល់ជាមួយអ្នកណានោះទេ។
ប៉ុន្តែការចល័តកងកម្លាំងប្រដាប់អាវុធមកទីក្រុងភ្នំពេញនេះ
ត្រូវបានគេមើលឃើញថា គឺទុកទប់ស្កាត់ការពារ
ការធ្វើមហាបាតុកម្មរបស់គណបក្សសង្គ្រោះជាតិ។
ចាប់តាំងពីក្រោយការបោះឆ្នោតមក គណបក្សសង្គ្រោះជាតិ
បានធ្វើការបដិសេធដាច់ខាត
ចំពោះលទ្ធផលបោះឆ្នោតជ្រើសតាំងតំណាងរាស្ត្រអាណត្តិទី៥
របស់គណកម្មាធិការជាតិរៀបចំការបោះឆ្នោត (គ.ជ.ប)
និងបានព្រមានធ្វើមហាបាតុកម្មអហិង្សា
ប្រសិនបើគណៈកម្មការចម្រុះមួយដែលដឹកនាំដោយអង្គការសហប្រជាជាតិ
មិនត្រូវបានបង្កើតឡើង ទៅតាមការទាមទាររបស់ខ្លួន
ដើម្បីធ្វើការស៊ើបអង្កេតទៅលើភាពមិនប្រក្រតីក្នុងការបោះឆ្នោតទេ
នោះ។
លោក សម រង្ស៊ី ប្រធានគណបក្សសង្គ្រោះជាតិ
គ្រោងនឹងវិលត្រលប់មកប្រទេសកម្ពុជាវិញ នៅថ្ងៃសុក្រស្អែកនេះ
បន្ទាប់ពីជំនួបជាមួយនឹងមន្ត្រីអង្គការសហប្រជាជាតិ
នៅទីក្រុងញូវយ៉ក។
នៅឯទីស្នាក់ការកណ្តាលគណបក្សសង្គ្រោះជាតិវិញ
នៅរសៀលថ្ងៃព្រហស្បតិ៍នេះ គណបក្សប្រឆាំងនេះកំពុងធ្វើពិធីជួបជុំ
ដើម្បីពិភាក្សាគ្នាអំពីវិវត្តន៍ ក្រោយពីការប្រកាសលទ្ធផលបោះឆ្នោត។
ខណៈពេល គ.ជ.ប គ្រោងនឹងបើកការដោះស្រាយបណ្តឹងជំទាស់នឹង
លទ្ធផលបោះឆ្នោត ដែលគណបក្សសង្គ្រោះជាតិ
បានដាក់កាលពីម្សិលមិញដែលមានចំនួន ១៧ បណ្តឹង។
ដោយឡែកនៅថ្ងៃនេះផងដែរ អង្គការឃ្លាំមើលការបោះឆ្នោត ខុមហ្វ្រែល
ក៏បានបង្ហាញរបាយការណ៍ស្តីពីការរកឃើញ ភាពមិនប្រក្រតីជាង
១ម៉ឺនករណី ទាំងមុនថ្ងៃបោះឆ្នោត ថ្ងៃបោះឆ្នោត
និងថ្ងៃរាប់សន្លឹកឆ្នោត។
ឡានទឹកត្រូវបានគេដាក់ពង្រាយនៅមុខវត្តបុទុម និងរបាំងបន្លាលោះ នៅក្នុងស្នងការរាជធានីភ្នំពេញ ទុកត្រៀមបង្រ្កាបបាតុកម្ម។ រូបថត ម៉ៃ វីរៈ និងហេង ជីវ័ន
No comments:
Post a Comment