ដោយ៖ តាំង វីដា និងដួង សុខា | ថ្ងៃសុក្រ ទី16 ខែសីហា ឆ្នាំ2013 | VoD
អគ្គស្នងការដ្ឋាននគរបាលជាតិ នៅថ្ងៃសុក្រនេះ ឲ្យដឹងថា
មូលហេតុនៃការចាប់ខ្លួនយុវជន ដែលជាអ្នករៀបចំកម្មវិធីទិញផ្កា
និងទឹកសុទ្ធជូនក្រុមទាហាន និងនគរបាលចល័ត នៅរាជធានីភ្នំពេញ
នៅល្ងាចថ្ងៃព្រហស្បតិ៍ម្សិលមិញ គឺដោយសារយុវជននោះ មានបំណងផ្ញើសារ
ញុះញង់ប្រជាពលរដ្ឋ នគរបាល និងទាហានឲ្យផ្តួលរំលំរដ្ឋាភិបាល។
អ្នកនាំពាក្យអគ្គស្នងការដ្ឋាននគរបាលជាតិ លោក គៀត ច័ន្ទថារិទ្ធ
ប្រាប់VODថា កម្លាំងសមត្ថកិច្ចបានស្រាវជ្រាវដឹង និងចាប់ខ្លួន
យុវជនម្នាក់ឈ្មោះ តត់ ចាន់បញ្ញា អាយុ២៧ឆ្នាំ
ដែលជាអ្នករៀបចំកម្មវិធីទិញផ្កា និងទឹកសុទ្ធជូនទាហានចល័ត
នៅរាជធានីភ្នំពេញ ខណៈយុវជននោះ កំពុងបោះខិតប័ណ្ណ ចងភ្ជាប់នឹងផ្កា
ដោយមានសរសេរសារ ក្នុងន័យមួយដើម្បីអំពាវនាវដល់សាធារណៈ
និងក្រុមទាហាន ឲ្យផ្តួលរំលំរដ្ឋាភិបាល។
លោកបន្តថា តាមការស្រាវជ្រាវរបស់មន្ត្រីនគរបាលជំនាញ គឺយុវជននេះ
ធ្វើសកម្មភាពទាំងនោះ តាមការបញ្ហាពី ឈ្មោះ សួន សេរីរដ្ឋា
ដែលត្រូវបានគេស្គាល់ថាជាមេដឹកនាំចលនាអំណាចពលរដ្ឋខ្មែរ ៖
"ទិញផ្ការួចហើយមកចងជាមួយខិតប័ណ្ណហ្នឹង
ចែកអំពាវនាវឲ្យមានការប្រឆាំងផ្តួលរំលំរដ្ឋាភិបាល
អញ្ចឹងយើងឃាត់មូលហេតុហ្នឹង
អាហ្នឹងជាខិតប័ណ្ណដែលដាក់ខ្លឹមសារក្នុងហ្នឹង ខ្ញុំសង្ខេបគឺថា
ផ្ញើជូនកងទ័ពដើម្បីឲ្យបង្វែរអាវុធ តម្រង់ទៅរកជនផ្តាច់ការ
ខ្លឹមសារហ្នឹងគឺជាការញ៉ុះញង់ហើយ តាំងពីញ៉ុះញ់ងមក
ដូចថាប្រឆាំងរដ្ឋាភិបាល វាមានន័យប្រហាក់ប្រហែលដូចថា
ឲ្យធ្វើរដ្ឋប្រហាររដ្ឋាភិបាល"។
ប៉ុន្តែ មិត្តភក្តិយុវជនរូបនោះ
និងជាអ្នកផ្តល់គំនិតក្នុងការរៀបចំកម្មវិធីនេះ លោក កែវ សាមឌី
អះអាងថា សារដែលត្រៀមនឹងចងភ្ជាប់ជាមួយផ្កានោះ គឺបានសរសេរថា ប៉ូលីស
ទាហាន ប៉េអឹម គឺជាគ្រួសារតែមួយ ខ្មែរតែមួយ
យើងមិនបង្ហូរឈាមខ្មែរឡើយ។ លោកថា
សារនេះត្រូវបានបង្ហោះឡើងនៅលើបណ្តាញសង្គមហ្វេសប៊ុក Learn For
Khmer ដែលមានកាលបរិច្ឆេទតាំងពីថ្ងៃទី៩ ខែសីហាម្ល៉េះ ៖
"នៅក្នុងក្រដាសហ្នឹង គឺអត់មានសរសេរន័យអីទេ យើងគ្រាន់តែន័យថា
យើងមិនសម្លាប់មិនបង្ហូរឈាម មិនឲ្យមានហិង្សានឹងគ្នាទេ
យើងជារវាងកងកម្លាំងទាហន ហើយនិងប្រជាពលរដ្ឋហ្នឹង
គឺជាគ្រួសារខ្មែរតែមួយ ហើយយើងគោរពស្រលាញ់កងកម្លាំងទាហ៊ាន
ដូចថ្ងៃដែលពួកគាត់ចុះទៅខាងព្រះវិហារអញ្ចឹង
គឺយើងមានចែករំលែកជាទឹកសុទ្ធ
ជាអ្វីដែលបង្ហាញទឹកចិត្តថាយើងគោរពស្រលាញ់ពួកគាត់"។
មន្ត្រីស៊ើបអង្កេតជាន់ខ្ពស់អង្គការលីកាដូ លោក អំ សំអាត
ដែលបានតាមដានហេតុការណ៍នេះ ឲ្យដឹងថា ក្រុមការងាររបស់លោក
នៅមិនទាន់បានឃើញខិតប័ណ្ណសារនោះ ដើម្បីកំណត់ថា ជាសារញុះញង់
ឬជាសារក្នុងការបញ្ចេញមតិនោះទេ។ លោកថា រហូតមកទល់ពេលនេះ
គឺសមត្ថកិច្ចមិនអនុញ្ញាឲ្យក្រុមគ្រួសារ
ឬជនណាម្នាក់ចូលជួបយុវជននោះឡើយ ៖ "ពិនិត្យថាតើសារហ្នឹង
គ្រាន់តែជាសារក្នុងការបញ្ចេញមតិ ឬក៏ជាសារក្នុងការញ៉ុះញង់
ឲ្យមានការប្រព្រឹត្តបទឧក្រិដ្ឋ ឬក៏បទមជ្ឈឹម
បើសិនជាសារគ្រាន់តែជាសិទ្ធិសេរីភាពនៅក្នុងការបញ្ចេញមតិទេ
នោះមិនមានផលអ្វីប៉ះពាល់ទេ"។
នៅរសៀលថ្ងៃនេះ អ្នកប្រើប្រាស់បណ្តាញសង្គមហ្វេសប៊ុកជាច្រើន
បានចូលរួមចែករំលែកព័ត៌មានពាក់ព័ន្ធនឹងការចាប់ខ្លួន យុវជនរូបនោះ
ដោយអ្នកខ្លះងឿងឆ្ងល់ពីមូលហេតុនៃការចាប់នេះ ហើយខ្លះលើកឡើងថា
នេះជាទង្វើគំរាមរបស់សមត្ថកិច្ចទៅកាន់ ក្រុមអ្នកទាមទារសន្តិភាព។
គួរបញ្ជាក់ថា គម្រោងនៃការទិញផ្កា និងទឹកសុទ្ធ
ដើម្បីជូនទៅក្រុមនគរបាល ទាហាន នៅម្តុំស្ថានីយ៍រថភ្លើង
នៅល្ងាចម្សិលមិញនេះ ត្រូវបានលុបចោល បន្ទាប់ពីអ្នករៀបចំរូបនោះ
បានបាត់ខ្លួន ដោយមិនមានដំណឹង។ យុវជនរូបនោះ
ត្រូវបានឃុំខ្លួននៅស្នងការដ្ឋាននគរបាលរាជធានីភ្នំពេញ៕
សូមសរសេរមកកាន់ លោក តាំង វីដា តាមរយៈ vida@vodhotnews.com
- See more at: http://vodhotnews.com/15403#sthash.J2FVmfJI.dpuf
No comments:
Post a Comment