គោលនយោបាយរបស់រដ្ឋាភិបាលក្នុងការផ្ដល់ដីសម្បទានសេដ្ឋកិច្ច
គឺដើម្បីជំរុញឲ្យមានការអភិវឌ្ឍសេដ្ឋកិច្ចជាតិ
តាមរយៈផ្ដល់ឱកាសឲ្យក្រុមហ៊ុនទាំងឡាយដែលទទួលបានដីពីរដ្ឋាភិបាល
នោះ ធ្វើការអភិវឌ្ឍវិស័យកសិកម្ម។
យ៉ាងណា
គណបក្សប្រឆាំងបានចោទរាជរដ្ឋាភិបាលថាបានប្រគល់ដីសម្បទាន
សេដ្ឋកិច្ចយ៉ាងច្រើនលើសលប់
និងកំពុងធ្វើឲ្យប្រជាពលរដ្ឋគ្មានដីសម្រាប់បង្កបង្កើនផល
និងបាត់បង់ធនធានធម្មជាតិព្រៃឈើនៅកម្ពុជា។
តើរហូតមកដល់សព្វថ្ងៃនេះ
រាជរដ្ឋាភិបាលសម្រេចប្រគល់ដីសម្បទានសេដ្ឋកិច្ចទំហំប៉ុន្មានឲ្យ
ក្រុមហ៊ុនវិនិយោគ
ហើយក្រុមហ៊ុនប្រទេសណាដែលទទួលបានដីច្រើនជាងគេនោះ?
រយៈពេល ១៧ឆ្នាំ រាជរដ្ឋាភិបាលកម្ពុជា បានចុះហត្ថលេខាប្រគល់ដី
១,៥លានហិកតារ នៅទូទាំងប្រទេសសម្រាប់ឲ្យក្រុមហ៊ុនឯកជនវិនិយោគ។
រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក ច័ន្ទ សារុន
ប្រកាសក្នុងរដ្ឋសភាកាលពីថ្ងៃទី៨ ខែឧសភា ថា គិតចាប់ពីឆ្នាំ១៩៩៦
មកដល់សព្វថ្ងៃនេះ រាជរដ្ឋាភិបាលតាមរយៈក្រសួងកសិកម្ម រុក្ខាប្រមាញ់
និងនេសាទ និងក្រសួងបរិស្ថាន
បានផ្តល់ដីសម្បទានសេដ្ឋកិច្ចដល់ក្រុមហ៊ុនចំនួន១១៧
ដែលគ្របដណ្ដប់លើផ្ទៃដីទំហំ ១,៥លានហិកតារ៖ «ចាប់ពីឆ្នាំ១៩៩៦ មក
ក្រុមហ៊ុនមាន ១១៧ក្រុមហ៊ុន លើផ្ទៃដីសរុប ១,១៨លានហិកតារប៉ុណ្ណឹងទេ
ខ្ញុំអាចបង្ខិតតួលេខនេះទៀតថា ១,២លានហិកតារ ដល់ថែមក្រសួងបរិស្ថាន
បន្តិចទៀតមក ក៏បាន ១,៥លានហិកតារ។ តួលេខមានប៉ុណ្ណឹង ខ្ញុំសុំអះអាង
ហើយក្រសួងសមត្ថកិច្ចកាន់កាប់រឿងនេះ»។
ប៉ុន្តែ តួលេខដែលចេញដោយរដ្ឋមន្ត្រីក្រសួងកសិកម្ម រុក្ខាប្រមាញ់
និងនេសាទ នេះ
តិចជាងឆ្ងាយទៅនឹងតួលេខរកឃើញដោយអង្គការសិទ្ធិមនុស្សអាដហុក
(Adhoc) ដែលចេញកាលពីចុងឆ្នាំ២០១២ មានជាង ២លានហិកតារ។
អ្នកស៊ើបអង្កេតជាន់ខ្ពស់នៃសមាគមអាដហុក លោក ចាន់ សុវ៉េត
ឲ្យដឹងថា អាដហុក រកឃើញថា
រាជរដ្ឋាភិបាលបានប្រគល់ដីសម្បទានសេដ្ឋកិច្ចច្រើនជាងតួលេខរបស់
ក្រសួងកសិកម្មបង្ហាញ។ លោកពន្យល់ថា
ក្រសួងកសិកម្មមិនមែនជាក្រសួងតែមួយដែលមានសិទ្ធិចុះហត្ថលេខា
ប្រគល់អាជ្ញាប័ណ្ណនោះទេ គឺនៅមានក្រសួងបរិស្ថាន ក្រសួងឧស្សាហកម្ម
រ៉ែ និងថាមពល និងមានក្រុមហ៊ុនជាច្រើនទៀត កំពុងធ្វើសកម្មភាព
ដោយសំអាងលើលិខិតជូនដំណឹងរបស់ទីស្ដីការគណៈរដ្ឋមន្ត្រី (ស.ជ.ណ)។
លោក ចាន់ សុវ៉េត៖ «ការផ្តល់ដីសម្បទានសេដ្ឋកិច្ចនេះ
គឺវាមានទ្រង់ទ្រាយខុសៗគ្នា
បើសិនជាការផ្តល់ដីសម្បទានសេដ្ឋកិច្ចក្នុងលក្ខខណ្ឌរុករករ៉ែ
ឬក៏ព្រៃឈើ ឬក៏អីផ្សេងៗទៀតនោះ
អាហ្នឹងជារឿងផ្សេងទៀតដែលអាចថាមានផ្ទៃដីលើសពីហ្នឹង។ អ៊ីចឹង
បើយើងនិយាយពីក្រសួងកសិកម្មមួយ ជារឿងដែលខ្ញុំគិតថាត្រឹមត្រូវ
តែបើគិតថារឿងទាំងអស់នៅកម្ពុជា តែម្តង
យើងគិតថាមិនទាន់ត្រឹមត្រូវទេ ព្រោះថានៅកម្ពុជា
មានអ្នកផ្តល់ដីសម្បទានសេដ្ឋកិច្ច មិនមែនមានតែក្រសួងកសិកម្ម
មួយទេ មានទាំងក្រសួងបរិស្ថាន ក្រសួងឧស្សាហកម្ម រ៉ែ និងថាមពល
មានពេលខ្លះទៀត ក្រុមហ៊ុនមួយចំនួនគាត់អនុវត្តតាម ស.ជ.ណ
មិនទាន់បានចុះបញ្ជីអីជាដើម។ អ៊ីចឹង ផ្ទៃដីដែលមាននោះ
វាអាចមានលើសហ្នឹង
នេះសម្រាប់ការធ្វើដីសម្បទានសេដ្ឋកិច្ចសម្រាប់ប្រទេសកម្ពុជា»។
តាមរបាយការណ៍សមាគមអាដហុក រកឃើញថា មកដល់ឆ្នាំ២០១២
រាជរដ្ឋាភិបាលប្រគល់ដីសម្បទានសេដ្ឋកិច្ចឲ្យក្រុមហ៊ុនចំនួន២២៥
ដែលគ្របដណ្ដប់លើផ្ទៃដីទំហំជាង ២លានហិកតារ។
ត្បិតមានការប្រកាសបញ្ឈប់ការផ្តល់ដីសម្បទានសេដ្ឋកិច្ចជាផ្លូវ
ការ កាលពីថ្ងៃទី៧ ខែឧសភា ឆ្នាំមុន ដោយលោកនាយករដ្ឋមន្ត្រី ហ៊ុន សែន
ក៏ពិតមែន ប៉ុន្តែរាជរដ្ឋាភិបាលក៏នៅតែបានចេញអនុក្រឹត្យចំនួន៦៦
ដោយបម្រុងដីចំនួនជាង ៣សែនហិកតារ
ទុកឲ្យក្រុមហ៊ុនឯកជនវិនិយោគបន្ថែមទៀត
ដែលភាគច្រើនដីទាំងនោះប៉ះពាល់លើតំបន់ការពារ។
អ្នកស្រី មូរ សុខហួរ តំណាងរាស្ត្រគណបក្ស សម រង្ស៊ី
រិះគន់នៅក្នុងរដ្ឋសភាថា
ការផ្តល់ដីសម្បទានសេដ្ឋកិច្ចច្រើនដោយខ្វះការគ្រប់គ្រង
ជាមូលហេតុនៃការបង្កជម្លោះដីធ្លីដ៏រ៉ាំរ៉ៃនៅកម្ពុជា។
អ្នកស្រីក៏បានបង្ហាញតួលេខថា
សព្វថ្ងៃនេះរាជរដ្ឋាភិបាលបានផ្តល់ដីសម្បទានសេដ្ឋកិច្ចដល់
ក្រុមហ៊ុនចំនួន២៥០ លើផ្ទៃដីប្រមាណ ៣លានហិកតារ។
ក្រុមហ៊ុនភាគច្រើនដែលទទួលបានដីសម្បទានសេដ្ឋកិច្ចនោះ
គឺជាក្រុមហ៊ុនវៀតណាម៖ «យើងឃើញថា
គំហុកធំការផ្តល់ដីសម្បទានសេដ្ឋកិច្ច គឺក្នុងរង្វង់ឆ្នាំ២០១០-២០១១
និងឆ្នាំ២០១២ ដាក់អត់មានអាណិតអាសូរ ដាក់អស់មួយទំហឹងៗដៃ
រហូតដល់ទៅដីសម្បទានសេដ្ឋកិច្ចទាំងព្រៃឈើនៃប្រទេសជាតិយើង
៣លានហិកតារ
ពាក់កណ្ដាលនៃទំហំព្រៃឈើសម្រាប់ប្រជាពលរដ្ឋទាំងមូលជាងពាក់កណ្ដាល
នេះយកទៅឲ្យក្រុមហ៊ុនជាង ២៥០
មកកាន់ដីគ្រប់គ្រងដីរបស់កសិកររបស់ប្រទេសជាតិយើង»។
យ៉ាងណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក ច័ន្ទ
សារុន ចាត់ទុកតួលេខរកឃើញរបស់គណបក្សប្រឆាំង
ថាជាតួលេខផ្ដេសផ្ដាសមិនដឹងបានមកពីណា។ លោកបញ្ជាក់ថា
ក្នុងចំណោមក្រុមហ៊ុន១១៧ ដែលទទួលដីសម្បទានសេដ្ឋកិច្ចនោះ
មិនមែនមានក្រុមហ៊ុនវៀតណាម ច្រើនជាងគេដូចការចោទប្រកាន់នោះឡើយ។
លោកបង្ហាញរបាយការណ៍ថា ក្នុងចំណោមក្រុមហ៊ុនទាំងនោះ
មានក្រុមហ៊ុនកម្ពុជា ចំនួន ៣៩ក្រុមហ៊ុន នៅលើផ្ទៃដី ៥៩៣ពាន់ហិកតារ។
ក្រុមហ៊ុនវៀតណាម ចំនួន ៣១ក្រុមហ៊ុន នៅលើផ្ទៃដី ២៣១ពាន់ហិកតារ។
ក្រុមហ៊ុនចិន ២៥ក្រុមហ៊ុន លើផ្ទៃដីទំហំ ១៩៣ពាន់ហិកតារ។
ក្រុមហ៊ុនសាធារណរដ្ឋកូរ៉េ ៥ក្រុមហ៊ុន លើផ្ទៃដីទំហំ ៣៧ពាន់ហិកតារ។
ក្រុមហ៊ុនថៃ ចំនួន ៥ក្រុមហ៊ុន លើផ្ទៃដី ៣៨ពាន់ហិកតារ។
ក្រុមហ៊ុនសហរដ្ឋអាមេរិក ចំនួន ២ក្រុមហ៊ុន លើផ្ទៃដី ១៩ពាន់ហិកតារ។
ក្រុមហ៊ុនឥណ្ឌា ចំនួន ៣ក្រុមហ៊ុន លើផ្ទៃដី ១៧ពាន់ហិកតារ។
ក្រុមហ៊ុនម៉ាឡេស៊ី ចំនួន ៣ក្រុមហ៊ុន ទំហំដី ២៣ពាន់ហិកតារ
និងក្រុមហ៊ុនមួយចំនួនទៀត។
ទោះជាក្រសួងកសិកម្ម ទម្លាយរបាយការណ៍បញ្ជាក់ថាក្រុមហ៊ុនវៀតណាម
មិនឈរលំដាប់លេខ១ ក្នុងការទទួលដីសម្បទានសេដ្ឋកិច្ចក្តី
ប៉ុន្តែគេហទំព័រវិទ្យុ និងទូរទស្សន៍ជាតិវៀតណាម ឈ្មោះ កឹង ថើ
បានចុះផ្សាយកាលពីថ្ងៃទី៦ ខែធ្នូ ឆ្នាំ២០១២ ឲ្យដឹងថា
ក្រុមហ៊ុនវៀតណាម ចំនួន៣៩
បានទទួលដីសម្បទានសេដ្ឋកិច្ចពីរដ្ឋាភិបាលកម្ពុជា លើផ្ទៃដី
២៧០ពាន់ហិកតារ។ តួលេខនេះច្រើនជាងការអះអាងរបស់លោក ច័ន្ទ សារុន
ដែលថាមានក្រុមហ៊ុនវៀតណាម ចំនួន៣១ នៅលើផ្ទៃដី ២៣១ពាន់ហិកតារ។
ស្ថិតិដែលចេញដោយអង្គការអាដហុក កាលពីឆ្នាំមុនរកឃើញថា
បើយកចំនួនដីសម្បទានសេដ្ឋកិច្ច សម្បទានរ៉ែ និងសម្បទានព្រៃឈើ
បូកបញ្ចូលគ្នា នោះផ្ទៃដីប្រហែល ៣៩%
នៃផ្ទៃដីទាំងមូលរបស់ប្រទេសកម្ពុជា
ត្រូវបានផ្តល់ទៅឲ្យក្រុមហ៊ុនឯកជនវិនិយោគ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
1 comment:
Imagine .
Khmer King Chey Chetha 2 granted a 5 years permission to
Vietnam King to use Prey Nokor for military training camp .
Vietnam hasn't returned it to Cambodia , instead it flooded
the area with million of immigrants then the name Prey Nokor was changed to Saigon ( present Ho Chi Minh Cty ) and it has became one of the Vietnam provinces .
Today , Khmer King Hai Phuc ( Hun Sen ) has granted the
so called Economic Land to Communist Vietnam for 99
years ; without checking what activity it has done within the
Concessioned area ( there is a rumor that The Communist
Vietnam is building military base in Kg Thom' Prey Lang ) ? , Cambodia will definitely become one of Vietnam Province
before 99 years lease is over , thank to Hun Sen and his NEC .
Post a Comment