ព្រះវិហារ:
សត្វខ្ទីង១ហ្វូងដែលជាសត្វស្ទើរផុតពូជនៅកម្ពុជា
ត្រូវបានអ្នកយកពត៌មាន CEN ប្រទះឃើញដោយផ្ទាល់ ដែល
ពួកវាកំពុងដើរឆ្លងកាត់ផ្លូវក្រាលក្រួសក្រហមមួយខ្សែ
ស្ថិតនៅចំណុចព្រៃអូរគគីរ ក្នុងឃុំទឹកក្រហម ស្រុកជាំក្សាន្ដ
ខេត្ដព្រះវិហារ។ សត្វខ្ទីងទាំងនេះ ត្រូវបានប្រទះឃើញ
នៅវេលាម៉ោង៤រសៀល ថ្ងៃទី៧ ខែឧសភា ឆ្នាំ២០១៣។
អ្នកយកពត៌មាន
CEN បានធ្វើដំណើរទៅកាន់តំបន់នោះ
ដោយមានការជូនដំណើរដោយផ្ទាល់ពីលោកឧត្ដមសេនីយ៏ឯក ខេង សុមេធ
អគ្គស្នងការរងនគរបាលជាតិទទួលបន្ទុកព្រំដែនយោធភូមិភាគទី៤
ខណៈពេលដែលលោកឧត្ដមសេនីយ៏ឯក
អញ្ចើញទៅពិនិត្យស្ថានភាពនៅភូមិសាស្ដ្រ និងពិនិត្យកំលាំងនគរបាលជាតិ
ដែលឈរជើងនៅតំបន់ព្រំដែន នាចំណុចស្រមោច និងចំណុចមុំបី។
សត្វខ្ទីងដែលយើងមើលឃើញពីចំងាយ គឺមានចំនួន ប្រមាណពី
១០ទៅ១៥ក្បាល។ សត្វខ្ទីងទាំងនោះ មានមេ មានបា និងមាន កូនតូចធំ
តាមលំដាប់ បានបណ្ដើរគ្នាឆ្លងកាត់ផ្លូវក្រាលក្រួសក្រហមមួយខ្សែ
មានន័យថា ឆ្លងពីព្រៃម្ខាង ទៅព្រៃម្ខាងដើម្បី
រកស៊ីទៅតាមទម្លាប់ប្រចាំថ្ងៃរបស់ពួកវា។
សត្វខ្ទីងទាំងនោះ
មានភាពធំធាត់ ហើយហាក់បីដូចជាមិនខ្លាចមនុស្សទាល់តែសោះ។
តែទោះបីយ៉ាងណាក៏ដោយ យើងមិនអាចទៅជិតវាបានឡើយ ហើយបានថតរូបវាពីចំងាយ
ហើយបានថតពីក្នុងរថយន្ដដែលមើលទៅហាក់បីដូចជា
ពួកវាមានភាពសុំាជាមួយនឹងមនុស្សទៅហើយ។
លោកឧត្ដមសេនីយ៏ឯក
ខេង សុមេធ បានមានប្រសាសន៏ថា សត្វខ្ទីង
និងសត្វប្រើស,សត្វទន្សោង,សត្វឈ្លូស,សត្វខ្លាឃ្មុំ,សត្វដំរី
និងសត្វដទៃទៀត ត្រូវបានលោកប្រទះឃើញស្ទើរជាញឹកញាប់
ដែលពួកវាឆ្លងកាត់នៅតាមតំបន់នោះ និងតំបន់ផ្សេងៗទៀត
នៅក្នុងស្រុកជាំក្សាន្ដ ខេត្ដព្រះវិហារ។
លោកឧត្ដមសេនីយ៏
ឯក បានមានប្រសាសន៏ទៀតថា សត្វទាំងនោះ
វាមានភាពស៊ាំជាមួយនឹងមនុស្សទៅហើយ។ ដោយឡែក
សត្វខ្ទីងដែលយើងថតបានខាងលើ ត្រូវបានលោកនិយាយថា
វាបានឆ្លងកាត់ផ្លូវនោះជាញឹកញាប់ ហើយសត្វខ្ទីងទាំងនោះ វាមិនខ្លាច
និងមិនអើពើនឹងរថយន្ដ ដែលបើកឆ្លងកាត់នៅតំបន់នោះទៀតផង។
សូមបញ្ជាក់ថា តំបន់ព្រៃស្រុកជាំក្សាន្ដ ខេត្ដព្រះវិហារទាំងអស់ គឺជាព្រៃដែនជំរកការពារសត្វព្រៃបឹងពែរ។ ទីនោះត្រូវ
បានការពារយ៉ាងរឹងមាំដោយព្រះរាជក្រឹត្យ ដើម្បីការពារសត្វព្រៃ ដែលរស់នៅដោយកម្រ ហើយពួកវាបានទៅជ្រកកោនធំធាត់
និងបន្ដពូជពង្សនៅតំបន់ព្រៃចុងក្រោយនាតំបន់ខាងលើ។
ក្រៅពីវត្ដមានសត្វព្រៃដ៏កម្រដែលរកឃើញនៅក្នុងតំបន់នោះ
ទីនោះក៏បានការពារយ៉ាងម៉ឹងម៉ាត់ផងដែរ។ តែទោះបីយ៉ាងណាក៏ដោយ
សត្វព្រៃក៏នៅមានការបរបាញ់ពីព្រាន
ដែលធ្វើឱ្យមានការបាត់បង់មួយចំនួនផងដែរ
នេះបើតាមសេចក្ដីរាយការណ៏ពីប្រជាពលរដ្ឋ។
គេនៅចាំបានថា
កាលពីប៉ុន្មានឆ្នាំមុននេះ មានទាហានប្រដាប់ដោយអាវុធយ៉ាងតិច៤នាក់
ត្រូវបានចាប់ខ្លួនដោយអង្គភាពរបស់ពួកគេ
ហើយបញ្ជូនមកតុលាការតាមពាក្យបណ្ដឹងរបស់អភិរក្សការពារសត្វព្រៃបឹង
ពែរដោយសារតែទាហានទាំងនោះ ធ្វើសកម្មភាពបាញ់សត្វខ្ទីងដ៏ធំមួយក្បាល
ដើម្បីយកសាច់មកចែកគ្នាបរិភោគ។ ករណីនេះ
ត្រូវបានអាជ្ញាធរការពារសត្វព្រៃ ជាអំពើខុសច្បាប់
ហើយមិនអាចអត់អោនឱ្យបានឡើយចំពោះអ្នកប្រព្រឹត្ដ។
ក្រៅពី
សត្វដ៏កម្រមានវត្ដមាននៅតំបន់ព្រៃខាងលើ
គេក៏បានឃើញសត្វស្លាបដ៏កម្រជាច្រើនប្រភេទ ក៏បានរស់នៅដ៏សុខសាន្ដ
ស្ថិតនៅក្នុងដែនជំរកសត្វព្រៃបឹងពែរ។ ព្រៃនោះដែរ
គេបានឃើញខាងអភិរក្សបង្កប់កាមេរ៉ាថតដោយស្វយ័ប្រវត្ដិ
ដើម្បីតាមដានសត្វព្រៃដ៏កម្រជាច្រើនប្រភេទ
ដែលកំពុងរស់រានមានជីវិតនៅទីនោះ។
ការរកឃើញសត្វព្រៃដ៏កម្រជាច្រើនប្រភេទតាម
រយៈការឃើញដោយការថតពីកាមេរ៉ាដោយស្វយ័ប្រវត្ដិតែម្ដង៕
No comments:
Post a Comment