Khmerization: Vietnamese authority released the editor of "Prey Nokor" newspaper and his family after extorting $1500 from him អាជ្ញាធរវៀតណាមដោះលែងគ្រួសារចាងហ្វាងកាសែតព្រៃនគរមកកម្ពុជា

The Vietnamese authority has released the editor of "Prey Nokor" newspaper and his family after extorting $1500 from him. He and his family was detained for 2 days at the Vietnamese border after he travelled to visit his mother at his birth place in Kampuchea Krom during the Khmer New Year. His newspaper is known to have published information about the persecution and human rights abuses of Khmer Krom people, the information which is very sensitive to the Vietnamese authority.

ចាងហ្វាងបោះពុម្ពផ្សាយកាសែតជាភាសាខ្មែរ ឈ្មោះ "ព្រៃនគរ" លោក លី ឈួន និងក្រុមគ្រួសារ ត្រូវបានអាជ្ញាធរវៀតណាម ដោះលែងវិញហើយ នៅថ្ងៃទី១៤ ខែមេសា បន្ទាប់ពីចាប់ឃុំខ្លួន និងឆែកឆេរអស់រយៈពេល ៤៨ម៉ោង កាលពីថ្ងៃសុក្រ ទី១២ មេសា។

ដោយ វណ្ណ វិចារ RFA Service
2013-04-14

ស្ដាប់ ឬ ទាញយកសំឡេង

ចាងហ្វាងបោះពុម្ពផ្សាយកាសែតព្រៃនគរ លោក លី ឈួន និងភរិយាឈ្មោះ ដាញ់ ធីដៀម ក្រោយពេលត្រឡប់មកដល់ផ្ទះនៅរាជធានីភ្នំពេញ នៅថ្ងៃទី១៤ ខែមេសា ឆ្នាំ២០១៣។ RFA/Quoc Viet. The editor-in-chief of Prey Nokor newspaper, Mr. Ly Chhuon and his wife, Mrs. Danh Thi Diem, shows reporters their passport after arriving at their house in Phnom Penh on 14th April, 2013.

លោក លី ឈួន ឲ្យដឹងថា ការឃុំខ្លួននោះ វៀតណាម បានដាក់ការសង្ស័យថា លោកមានបំណងប្រឆាំងនឹងរដ្ឋាភិបាលវៀតណាម ក្រោយមកទៀត បានប្ដូរបទចោទទៅជាករណីឆ្លងដែនខុសច្បាប់វិញម្តង។

អ្នកគ្រប់គ្រងការផ្សាយកាសែតព្រៃនគរ និងក្រុមគ្រួសារ ដែលជាខ្មែរកម្ពុជាក្រោម ត្រូវបានអាជ្ញាធរវៀតណាម ពិន័យប្រាក់ ៣០លានដុង ដែលអាចស្មើនឹង ១.៥០០ដុល្លារ ជាថ្នូរនឹងការដោះលែងឲ្យមានសេរីភាពវិញ។ អាជ្ញាធរវៀតណាម ចោទគ្រួសារអ្នកកាសែតនេះថា ឆ្លងដែនចូលទៅវៀតណាម ដោយខុសច្បាប់។

ចាងហ្វាងកាសែតព្រៃនគរ លោក លី ឈួន នៅថ្ងៃទី១៤ មេសា មានប្រសាសន៍ថា អាជ្ញាធរវៀតណាម ចាប់ឃុំខ្លួនលោក និងប្រពន្ធ កូន កាលពីថ្ងៃទី១២ មេសា ដើម្បីសួរចម្លើយ និងឆែកឆេរតាំងពីក្បាលដល់ចុងជើង ហើយបង្ខំឲ្យគាត់បើកអ៊ីមែលឲ្យឆែកទៀត។ លោកបន្តថា គ្រួសារលោកគ្រាន់តែចង់ទៅស្រុកកំណើត ដើម្បីជួបជុំក្រុមគ្រួសារ និងសាច់ញាតិក្នុងឱកាសបុណ្យចូលឆ្នាំប្រពៃណីជាតិប៉ុណ្ណោះ តែអាជ្ញាធរវៀតណាម បែរចោទថា ក្រុមគ្រួសាររបស់លោកមានបំណងប្រឆាំងនឹងរដ្ឋាភិបាលវៀតណាម ទៅវិញ។ លោកបញ្ជាក់ថា បន្ទាប់ពីឆែកឆេររកភស្តុតាងល្មើសច្បាប់ពីបទបង្កអសន្តិសុខជាតិ វៀតណាម មិនបាន ពួកគេក៏ចោទថា រូបគាត់នាំប្រពន្ធ កូន ឆ្លងចូលវៀតណាម ដោយខុសច្បាប់វិញម្តង។

វិទ្យុអាស៊ីសេរី មិនអាចទាក់ទងអាជ្ញាធរវៀតណាម ដើម្បីបំភ្លឺបញ្ហានេះបានទេ នៅថ្ងៃទី១៤ មេសា ឆ្នាំ២០១៣។

ទោះយ៉ាងណាក្តី នាយកកម្មវិធីនៃសមាគមខ្មែរកម្ពុជាក្រោម ដើម្បីសិទ្ធិមនុស្ស និងអភិវឌ្ឍន៍ លោក សឺន ជុំជួន បានហៅការចាប់ខ្លួនទារប្រាក់នេះថា អាចជាអំពើពុករលួយនៅវៀតណាម និងជាការបំបិទសិទ្ធិសេរីភាពខ្មែរកម្ពុជាក្រោម។ លោកបន្តថា ពលរដ្ឋវៀតណាម ជាច្រើនធ្វើអន្តោប្រវេសន៍ខុសច្បាប់មកនៅស្រុកខ្មែរ ហើយអាជ្ញាធរខ្មែរមិនដែលរឹតបន្តឹងទេ ប៉ុន្តែវៀតណាម វិញបែរជាមិនអត់ឱនជនជាតិខ្មែរក្រោមឡើយ។ លោកបញ្ជាក់ថា វៀតណាម តែងធ្វើទុក្ខខ្មែរក្រោម ដូចជា ចាប់ដាក់គុក បណ្ដេញចេញពីលំនៅឋាន រឹបអូសដីធ្លី និងរារាំងមិនឲ្យទៅស្រុកកំណើតវិញជាដើម៖ «យើងឃើញ ថា នៅកម្ពុជា យើង វៀតណាម ចូលមកដោយសេរីតែម្តង សម្រាប់យើងវិញជាម្ចាស់ទឹកម្ចាស់ដីទៅវៀតណាម ក៏ត្រូវបានពិន័យទៅវិញ ជាការរំលោភផ្លូវច្បាប់មួយដែរ»។

ចាងហ្វាងកាសែតព្រៃនគរ លោក លី ឈួន និងក្រុមគ្រួសារ ត្រូវបានវៀតណាម ចាប់ខ្លួន កាលពីថ្ងៃទី១២ ខែមេសា ក្នុងពេលដែលលោក និងក្រុមគ្រួសារ ធ្វើដំណើរទៅលេងស្រុកក្នុងទឹកដីកម្ពុជាក្រោម។ កាលពីខែមីនា កន្លងទៅ ឧត្តមប្រឹក្សាផ្ទាល់ព្រះមហាក្សត្រ លោក សឺន ស៊ូប៊ែរ ក៏ត្រូវបានមន្ត្រីនគរបាលវៀតណាម រារាំងមិនឲ្យចូលទឹកដីខ្មែរកម្ពុជាក្រោមដែរ។

ស្ថិតិរបស់សង្គមស៊ីវិល រកឃើញថា ពលរដ្ឋវៀតណាម កំពុងរស់នៅលើទឹកដីកម្ពុជា ជាច្រើនម៉ឺននាក់។ ពលរដ្ឋវៀតណាម រស់នៅទឹកដីខ្មែរស្ទើរទូទាំងប្រទេស គ្រប់ខេត្តក្រុង ហើយទីដែលវៀតណាម រស់នៅច្រើនជាងគេ មានភ្នំពេញ កំពង់ឆ្នាំង សៀមរាប កំពង់ចាម ក្រចេះ និងក្នុងតំបន់បឹងទន្លេសាប ប៉ុន្តែមន្ត្រីរដ្ឋាភិបាលមិនដែលចុះពិនិត្យឡើយថា ជនជាតិវៀតណាម ទាំងអស់នៅខុសច្បាប់ ឬស្របច្បាប់នោះទេ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។

A Change of Guard

Sunday 14 April 2013

Vietnamese authority released the editor of "Prey Nokor" newspaper and his family after extorting $1500 from him អាជ្ញាធរវៀតណាមដោះលែងគ្រួសារចាងហ្វាងកាសែតព្រៃនគរមកកម្ពុជា

No comments: