(ថ្ងៃទី 15 មេសា 2013,) | ដោយ: លី សិលា CEN
ភ្នំពេញ:
សវនាការជំនុំជម្រះផ្ទាល់មាត់
នៅតុលាការយុត្តិធម៌អន្តរជាតិទីក្រុងឡាអេ នឹងចាប់នៅម៉ោង ១០ ព្រឹក
ម៉ោងនៅប្រទេសហូឡង់ ត្រូវនឹងម៉ោង ៣ រសៀល ម៉ោងនៅប្រទេសកម្ពុជា
នាថ្ងៃទី១៥ មេសា ឆ្នាំ២០១៣។ សវនាការនោះ នឹងបន្តរហូតដល់ថ្ងៃទី១៩
ខែមេសា ឆ្នាំ២០១៣។ ជាសវនាការផ្ទាល់មាត់ចុងក្រោយ
នៃនីតិវិធីរបស់តុលាការអន្តរជាតិ ក្នុងចំណាត់ការ
នៃបណ្តឹងរបស់កម្ពុជា
ដែលបានស្នើអោយតុលាការរបស់អង្គការសហប្រជាជាតិមួយនេះ បកស្រាយឡើងវិញ
សាលក្រមឆ្នាំ១៩៦២ ស្តីពីព្រំដែនប្រាសាទព្រះវិហារ។
កម្ពុជា
បានដាក់បណ្តឹងទៅកាន់តុលាការឡាអេ កាលពីថ្ងៃទី២៨ ខែមេសា ឆ្នាំ២០១១
បន្ទាប់ពីរដ្ឋាភិបាលថៃរបស់លោកអតីតនាយករដ្ឋមន្ត្រី អាប់ភីស៊ីត
វេចាជីវ៉ា បានទាមទារកាន់កាប់ដីទំហំ ៤,៦ គីឡូម៉ែត្រក្រឡា
ជុំវិញប្រាសាទព្រះវិហារ។
ដំណើរការសវនាការផ្ទាល់មាត់
លើសំណុំរឿងប្រាសាទព្រះវិហារ នៅតុលាការឡាអេ កម្ពុជា និងថៃ
ត្រូវតតាំងគ្នាចំនួន ២ជុំ ដែលត្រូវបានកំណត់ ដោយតុលាការអន្តរជាតិ
នៅប្រទេសហូឡង់។
ដំណើរការសវនាការនោះ
នឹងត្រូវផ្សាយផ្ទាល់តាមប្រព័ន្ធអ៊ីនថឺណេត
ក្នុងគេហទំព័ររបស់តុលាការយុត្តិធម៌អន្តរជាតិ www.icj-cij.org
និងតាមទូរទស្សន៍ “UN Web TV” http://webtv.un.org/ ឬក៏
http://webtv.un.org/meetings-events/ ។
សេចក្តីប្រកាសរបស់តុលាការទីក្រុងឡាអេ បង្ហាញពីកាលវិភាគសវនាការ ជាពីរជុំ រួមមាន៖
-
ជុំទី១ នៅថ្ងៃចន្ទ ទី១៥ ខែមេសា ឆ្នាំ២០១៣ ចាប់ពីម៉ោង ១០ ព្រឹក
ដល់ម៉ោង ១ រសៀល ( ម៉ោងនៅប្រទេសហូឡង់ ) និងនៅម៉ោង ៣ ដល់ម៉ោង ៤ និង
៣០ នាទី រសៀល ជាវេទិកាទាញអំណះអំណាងផ្ទាល់មាត់របស់ភាគីកម្ពុជា។
ម៉ោងនៅកម្ពុជា ដើរលើសម៉ោងនៅប្រទេសហូឡង់ ៥ ម៉ោង។
ចំណែកនៅ
ថ្ងៃពុធ ទី១៧ ខែមេសា ឆ្នាំ២០១៣ ចាប់ពីម៉ោង ១០ ព្រឹក ដល់ម៉ោង ១ រសៀល
និងចាប់ពីម៉ោង ៣ ដល់ម៉ោង ៤ និង ៣០ នាទី រសៀល ជាវេទិការបស់ភាគីថៃ។
-
ជុំទី២ សវនាការនឹងធ្វើឡើងនៅថ្ងៃព្រហស្បតិ៍ ទី១៨ ខែមេសា
ឆ្នាំ២០១៣ ចាប់ពីម៉ោង ៣ ដល់ម៉ោង ៥ រសៀល ជាវេទិការបស់ភាគីកម្ពុជា។
ចំណែកនៅថ្ងៃសុក្រ ទី១៩ ខែមេសា ឆ្នាំ២០១៣ ចាប់ពីម៉ោង ៣ ដល់ម៉ោង ៥ រសៀល ជាវេទិការបស់ភាគីថៃ។
ភាគីកម្ពុជា ដឹកនាំដោយលោកឧបនាយករដ្ឋមន្ត្រី ហោ ណាំហុង
រដ្ឋមន្ត្រីការបរទេស។ ប្រតិភូអ្នកជំនាញ
និងអ្នកច្បាប់តំណាងប្រទេសកម្ពុជា មានជាង ១០ រូប
បានចេញដំណើរទៅកាន់ទីក្រុងឡាអេ ចាប់តាំងពីព្រលប់ថ្ងៃទី៩ ខែមេសា
ឆ្នាំ២០១៣។
ប្រមុខការទូតកម្ពុជា លោក ហោ ណាំហុង
មានសុទិដ្ឋិនិយមចំពោះសំណុំរឿងបកស្រាយសាលក្រម ស្តីពី
ប្រាសាទព្រះវិហារ ព្រោះថាកម្ពុជាមានមូលហេតុច្បាស់លាស់
ពោលគឺទាំងអង្គហេតុ និងទាំងអង្គច្បាប់ តាមរយៈសាលក្រមឆ្នាំ១៩៦២
សុទ្ធតែបានបញ្ជាក់អំពីភាពជាម្ចាស់របស់កម្ពុជាលើ
តំបន់ប្រាសាទប្រាសាទព្រះវិហារ៕
- See more at: http://www.cen.com.kh/localnews/show_detail/19?token=NjY1N2YzOD#sthash.8ul0MHfH.dpuf
No comments:
Post a Comment