Khmerization: Cambodian people worry about losing lands on the western (Thai) borders ប្រជាពលរដ្ឋខ្មែរមានការព្រួយបារម្ភកាន់តែខ្លាំងខ្លាចបាត់បង់បូរណភាពទឹកដីនៅភាគខាងលិច

៕

By មនសិការខ្មែរ On March 26, 2013 In ព័ត៌មានជាតិ

អតីតអ្នកតស៊ូខ្មែរដែលរស់នៅតាមព្រំដែនជាប់ជាមួយ ប្រទេសសៀមក៏ដូចជាប្រជាពលរដ្ឋទូទៅមានសេចក្តីព្រួយបារម្ភខ្លាចដី ខ្មែរមួយផ្នែកត្រូវបាត់បង់ទៅខាងប្រទេស សៀម ដូចករណីដែលប្រជាកសិករខ្មែរនៅព្រំដែនប៉ែកខាងកើតអះអាងអំពី ការបាត់បង់បូរណភាពទឹកដីដោយសារអំពើឈ្លានពានរបស់យួន។ សេចក្តីព្រួយបារម្ភនេះបានកើតឡើងនៅពេលដែលក្រុមអ្នកស្រាវជ្រាវរកឃើញថា បង្គោលលេខ១៧ ធ្វើពីស៊ីម៉ងត៍ នៅចំណុចភ្នំប៉ោយ លើខ្នងភ្នំដងរែក ខេត្តឧត្តរមានជ័យ ត្រូវបានភាគីសៀមរំកិលចូលដីខ្មែរប្រមាណជិត៥០០ម៉ែត្រពីព្រំប្រទល់ ចាស់ ក្នុងសម័យអាណានិគមបារាំង។ ដោយហេតុថារហូតមកដល់ពេលនេះរដ្ឋាភិបាលលោក ហ៊ុន សែន មិនសូវយកចិត្តទុកចំពោះការបាត់បង់បូរណភាពទឹកដីនៅភាគខាងលិចនោះទេ មុនពេលដែលការបោះបង្គោលព្រំដែនខ្មែរ-សៀម ត្រូវចាប់ផ្តើមនាពេលខាងមុខ។ លើសនេះទៅទៀតទាហានសៀមឈរជើងតាមព្រំដែនតែងតែធ្វើសកម្មភាពរំលោភចូល ទឹកដីខ្មែរស្រេចតែអំពើចិត្ត ហើយសមត្ថកិច្ចនិងអាជ្ញាធរខ្មែរតាមព្រំដែនមិនហ៊ានប្រឈមមុខជាមួយ ទាហានសៀមឈ្លានពានម្តងណាឡើយ។

ក្រុមអ្នកតាមដានបញ្ហាព្រំដែនខ្មែរជាមួយប្រទេសជិតខាងបានលើកឡើងថា មិនមែនតែប្រជាក សិករខ្មែររស់នៅតាមតំបន់ព្រំដែនជាប់ជាមួយប្រទេសយួនប៉ុណ្ណោះទេ ដែលព្រួយបារម្ភអំពីការបាត់បង់ដីស្រែចំការតាមរយៈដំណើរការបោះបង្គោល ព្រំដែនគោកខ្មែរ-យួននាពេលកន្លងមក។ នៅតាមព្រំដែនសៀមឯណោះវិញ ក៏ប្រជាកសិករខ្មែរព្រួយបារម្ភអំពីការបាត់បង់ដីធ្លីស្រែចំការដែល ពួកគាត់ធ្លាប់រស់នៅ និងប្រកបរបរចិញ្ចឹមជីវិតជាយូរឆ្នាំមកហើយនោះដែរ។ សេចក្តីព្រួយបារម្ភរបស់ប្រជាពលរដ្ឋខ្មែររស់នៅតាមតំបន់ព្រំដែនខ្មែរ -សៀម បានកើតមាននៅក្នុងខេត្តឧត្តរមានជ័យព្រះវិហារ បន្ទាយមានជ័យ និងខេត្តប៉ៃលិនជាដើម ព្រោះពួកគាត់មើលឃើញថាសព្វថ្ងៃនេះទឹកដីខ្មែរតាមបណ្តោយព្រំដែន មួយផ្នែកដែលធ្លាប់គ្រប់គ្រងដោយអតីតយោធាខ្មែរក្រហម រណសិរ្សជាតិរំដោះពលរដ្ឋខ្មែរ និង រណសិរ្សហ្វ៊ុនស៊ិនបុិចត្រូវបានទាហានសៀមចូលមកកាន់កាប់ស្ទើរតែ ទាំងស្រុង។

តាមសេចក្តីរាយការណ៍ពីអ្នកសង្កេតការណ៍ និងសកម្មជនព្រំដែនមួយចំនួនបានរិះគន់ថារដ្ឋាភិបាលក្រុងបាងកកបានយក បង្គោលថ្មជាច្រើនបង្គោលមកកប់តាមព្រំដែនជាឯកតោភាគីបន្ថែមទៀត ប៉ុន្តែរដ្ឋាភិបាលខ្មែររបស់លោកនាយករដ្ឋមន្ត្រី ហ៊ុន សែន មិនអើពើចំពោះបញ្ហានោះទាល់តែសោះ។ បង្គោលថ្មីដែលរដ្ឋាភិបាលក្រុងបាងកកយកមកកប់តាមព្រំដែនជាឯកតោភាគី មានដូចជានៅក្នុងស្រុកបន្ទាយអម្ពិល ខេត្តឧត្តរមានជ័យ តាមជួរភ្នំដងរែក ក្រុងសំរោង ម្តុ្តុំច្រកព្រំដែនអូរស្មាច់ នៅម្តុំច្រកជាំស្រងាំ ស្រុកអន្លង់វែង នៅព្រំដែនស្រុកថ្មពួក ខេត្តបន្ទាយមានជ័យនិងនៅក្នុងសង្កាត់បរយាខា ក្រុងប៉ៃលិនជាដើម។ សកម្មភាពមិនប្រក្រតីរបស់ភាគីសៀមគឺពុំមានប្រតិកម្មពីរដ្ឋាភិបាល ខ្មែរដឹកនាំដោយលោកនាយករដ្ឋមន្ត្រី ហ៊ុន សែន ទាល់តែសោះ ប្រការនេះអាចធ្វើឱ្យការរុករក ឬកំណត់បង្គោលព្រំដែនគោករវាងខ្មែរ-សៀម នាថ្ងៃអនាគតប្រហែលជារដ្ឋាភិបាលខ្មែរមិនអាចថែរក្សា និងការពារបូរណភាពទឹកដីរបស់ខ្លួនឱ្យគង់វង្សទេ។

ប្រជាពលរដ្ឋខ្មែររស់នៅតាមតំបន់ព្រំដែនបានលើកឡើងថារដ្ឋាភិបាល លោក ហ៊ុន សែន មិនហ៊ានចេញមុខប្រឈមជាមួយសៀម ឬខ្លាចសៀម ទើបមិនហ៊ានតតាំង ហើយខ្លាំងបានតែជាមួយខ្មែរគ្នាឯងប៉ុណ្ណោះ។ ជាក់ស្តែងរដ្ឋាភិបាលលោក ហ៊ុន សែន បានដឹងថាភាគីសៀមដាក់ពង្រាយទាហានចូលឈរជើងលើទឹកដីខ្មែរតាមព្រំដែន នៃតំបន់មួយចំនួន ប៉ុន្តែមិនហ៊ានបញ្ចេញប្រតិកម្មប្រឈមជាមួយភាគីសៀមទេ ហើយបែរជាប្រកាន់ជំហរសម្របសម្រួលជាមួយសៀមយ៉ាងទន់ភ្លន់ទៅវិញ។ កត្តាទាំងនេះហើយដែលធ្វើឱ្យប្រជាពលរដ្ឋរស់នៅតាមតំបន់ព្រំដែនខ្មែរ- សៀម ព្រួយបារម្ភខ្លាចរដ្ឋាភិបាលខ្មែរមិនអាចការពារទឹកដីរបស់ខ្លួនបាននា ថ្ងៃអនាគត ព្រោះគេគិតថាសកម្មភាពរុករកបង្គោល ឬផែនការបោះបង្គោលកំណត់ព្រំដែនគោករវាងប្រទេសទាំងពីរមិនទាន់ ដំណើរការផង បែរជាទាហានសៀមបំពានចូលឈរជើងលើទឹកដីខ្មែរដោយគ្មានខ្លាចក្រែងអ្វី ទាំងអស់។ សកម្មភាពរបស់ភាគីសៀមប្រហែលមកពីគេដឹងថាមេដឹកនាំខ្មែរជាពិសេស លោកនាយករដ្ឋមន្ត្រី ហ៊ុន សែន មានជំហរទន់ជ្រាយគិតគូរតែរឿងអំណាច និងផលប្រយោជន៍ផ្ទាល់ខ្លួន ហើយមិនដែលគិតគូរអំពីផលប្រយោជន៍ជាតិ និងការពារបូរណភាពទឹកដីឱ្យបានគង់វង្ស។

សកម្មជនព្រំដែនបានលើកឡើងថានៅពេលដែលលោក សមរង្ស៊ី អតីតប្រធានគណបក្សសមរង្ស៊ីដែលបច្ចុប្បន្នជាប្រធានគណបក្សសង្គ្រោះ ជាតិ រួមជាមួយប្រជាពលរដ្ឋដកតម្រុយបង្គោលព្រំដែនលេខ១៨៥ នៅភូមិកោះក្បានកណ្តាលឃុំសំរោង ស្រុកចន្ទ្រា ខេត្តស្វាយរៀង គឺរដ្ឋាភិបាលលោក ហ៊ុន សែន បញ្ចេញប្រតិកម្មយ៉ាងខ្លាំង។ តុលាការខេត្តស្វាយរៀងបានកាត់ទោសលោក សម រង្ស៊ី ដោយចោទប្រកាន់ពីបទបំផ្លាញទ្រព្យសម្បត្តិសាធារណៈ និងញុះញង់ឱ្យមានការរើសអើងជាតិសាសន៍ ប៉ុន្តែការពិតលោក សម រង្ស៊ី គ្រាន់តែបំពេញតួនាទីជាអ្នកតំណាងរាស្ត្រដើម្បីការពារដីស្រែ ប្រជាពលរដ្ឋ និងការពារបូរណភាពទឹកដីដែលជាអាយុជីវិតជាតិប៉ុណ្ណោះ។ នៅពេលដែលលោក សម រង្ស៊ី និងពលរដ្ឋដកតម្រុយបង្គោលព្រំដែនលេខ១៨៥ គឺរដ្ឋាភិបាលលោក ហ៊ុន សែន បញ្ចេញប្រតិកម្មយ៉ាងទទឹងទិស ប៉ុន្តែនៅពេលដែលទាហានសៀមបំពានចូលគ្រប់គ្រងដីខ្មែរតាមព្រំដែន បែរជារដ្ឋាភិបាលលោក ហ៊ុន សែន រក្សាភាពស្ងៀមស្ងាត់ទៅវិញ។

មន្ត្រីអង្គការក្រៅរដ្ឋាភិបាលមួយចំនួនបានរិះគន់ថាភាពស្ងៀមស្ងាត់ របស់រដ្ឋាភិបាលលោក ហ៊ុន សែន ចំពោះអំពើឈ្លានពានរបស់សៀម ជាភស្តុតាងបង្ហាញថាលោក ហ៊ុន សែន ខ្លាំងបានតែជាមួយខ្មែរគ្នាឯងប៉ុណ្ណោះ ហើយនៅពេលសៀមឈ្លានពានបែរជាមិនហ៊ានតបតឡើយ។ កន្លងមកទាហានសៀមបានរំលោភចូលឈរជើងលើទឹកដីខ្មែរដូចជានៅវត្តកែវ សិក្ខាគិរីស្វារៈ ប្រាសាទតាមាន់ ប្រាសាទតាក្របី ខេត្តឧត្តរមានជ័យ និងតំបន់ព្រំដែនមួយចំនួនទៀតស្រេចតែអំពើចិត្ត។ ប្រការនេះមកពីរដ្ឋាភិបាលលោក ហ៊ុន សែន មានសុទិដ្ឋិនិយមហួសហេតុចំពោះទំនាក់ទំនងការទូត នយោបាយ និងសេដ្ឋកិច្ចពាណិ ជ្ជកម្មជាមួយសៀម ហើយភ្លេចគិតពីល្បិចកលអាក្រក់របស់សៀមក្នុងការរំលោភឈ្លានពានទឹកដី ខ្មែរ។ អាចនិយាយបានថា ការដែលទាហានសៀមហា៊នធ្វើសកម្មភាពរំលោភឈ្លានពានទឹកដីខ្មែរស្រេច តែអំពើចិត្ត គឺមកពីរដ្ឋាភិបាលលោក ហ៊ុន សែន មានជំហរទន់ជ្រាយនិងគ្មានឆន្ទៈទប់ទល់អំពើរំលោភឈ្លានពានពីសំណាក់ ប្រទេសជិតខាង។

ថ្មីៗកន្លងទៅនេះទាហានសៀមឈុតខ្មៅបានចូលមកហាមឃាត់ប្រជាពលរដ្ឋ ខ្មែររស់នៅតាមតំបន់ព្រំដែនមិនឱ្យដាំដំណាំឬសង់ផ្ទះថ្មីលើដីដែល ពួកគាត់ធ្លាប់រស់នៅនិងប្រកបរបរកសិកម្មជាយូរឆ្នាំមកហើយ។ ជាក់ស្តែងនៅក្បែរច្រកជាំស្រងាំ ស្រុកអន្លង់វែង និងនៅច្រកអូរស្មាច់ ច្រកជប់គគីរ ស្រុកបន្ទាយអម្ពិលជាដើម គឺទាហានសៀមមកគំរាមមិនឱ្យប្រជាពលរដ្ឋខ្មែរសង់លំនៅដ្ឋាន ឬបង្កបង្កើនផលលើដីស្រែចំការរបស់ខ្លួនទេ។ លើសនេះទៅទៀតសូម្បីតែសមត្ថកិច្ចខ្មែរសង់ប៉ុស្តិ៍យាមនៅច្រកព្រំដែន ក៏ត្រូវទាហានសៀមចូលមកហាមឃាត់ដែរចំណែកភាគីសៀមវិញអាចធ្វើអ្វីៗ ស្រេចតែអំពើចិត្តដោយគ្មានញញើត អ្វីឡើយ។ ចំណុចគួរឱ្យកត់សម្គាល់នោះទាហានសៀមបានហាមខ្មែរមិនឱ្យស្ថាបនាផ្លូវ ឡើងលើប្រាសាទព្រះវិហារកាត់មុខគោបុរៈទី៥ និងហាមឃាត់មិនឱ្យសមត្ថកិច្ចព្រំដែនខ្មែរសាងសង់បុស្តិ៍ឈរជើងនៅតាម ព្រំដែន។ រហូតមកដល់ពេលនេះមិនទាន់ឃើញរដ្ឋាភិបាលលោក ហ៊ុន សែន បញ្ចេញប្រតិកម្មអ្វីទាំងអស់ចំពោះអំពើរំលោភបំពានពីសំណាក់ភាគីសៀម បើទោះបីទាហានសៀមរំលោភលើអធិបតេយ្យភាព និងបូរណភាពទឹកដីខ្មែរស្រេចតែអំពើចិត្តយ៉ាងណាក៏ដោយ។

ក្រុមអ្នកវិភាគស្ថានការណ៍បានវាយតម្លៃថាសកម្មភាពរបស់ភាគីសៀមមួយ រយៈពេលចុងក្រោយ នេះជាភស្តុតាងបង្ហាញថាមេដឹកនាំសៀមនៅតែមានមហិច្ឆតាឈ្លានពានទឹកដី ខ្មែរ មិនថាពីអតីតកាល ឬសព្វថ្ងៃនេះទេ។ ជាក់ស្តែងសព្វថ្ងៃនេះសៀមនៅតែមានមហិច្ឆតាចង់ដណ្តើមគ្រប់គ្រងដីទំហំ ៤,៦គីឡូម៉ែត្រក្រឡា នៅជុំវិញប្រាសាទព្រះវិហារ បើទោះបីសាលក្រមតុលាការយុត្តិធម៌អន្តរជាតិក្រុងឡាអេ ចុះថ្ងៃទី១៥ ខែមិថុនា ឆ្នាំ១៩៦២ បានចែងយ៉ាងច្បាស់ថាប្រាសាទព្រះវិហារ និងតំបន់ជុំវិញនោះគឺជាកម្មសិទ្ធិរបស់ខ្មែរក៏ដោយ។ មហិច្ឆតារបស់សៀមក្នុងការឈ្លានពានទឹកដីខ្មែរគឺគ្មានទីបញ្ចប់ឡើយ រួចប្រសិនបើមេដឹកនាំខ្មែរនៅតែមានជំហរទន់ជ្រាយតទៅទៀត គឺសៀមអាចសម្រេចតាមគំនិតដ៏ខ្មៅងងឹតរបស់ខ្លួនជាមិនខាន។ ដូច្នេះមេដឹកនាំខ្មែរជាពិសេសលោកនាយករដ្ឋមន្ត្រី ហ៊ុន សែន ដែលកំពុងគ្រប់គ្រង់អំណាចមិនត្រូវមានជំហរទន់ជ្រាយតទៅទៀតទ៕

A Change of Guard

Thursday, 28 March 2013

1 comment: