Khmerization: Kong Korm: When the Cambodia National Rescue Party won the election, no land tax and cut interest rates dramatically គង់ គាំ ៖ នៅពេលគណបក្សសង្គ្រោះជាតិឈ្នះឆ្នោតនឹងបញ្ចុះការប្រាក់ឱ្យបានលឿនបំផុត ហើយមិនយកពន្ធដីធ្លី ដើម្បីជួយដល់ប្រជាពលរដ្ឋ

By មនសិការខ្មែរ On March 27, 2013 In ព័ត៌មានស៊ើបអង្កេត

នៅក្នុងពេលជួបសំណេះសំណាលជាមួយសកម្មជន និងអ្នក គាំទ្រគណបក្សសង្គ្រោះជាតិនៅសង្កាត់ក្បាលកោះ ខណ្ឌមានជ័យរាជធានីភ្នំពេញ កាលពីព្រឹកថ្ងៃអាទិត្យ ទី២៤ ខែមីនា ឆ្នាំ២០១៣ លោក គង់ គាំ ប្រធានគណបក្សសមរង្ស៊ី និងជាសមាជិកព្រឹទ្ធសភាបានលើកឡើងអំពីការលំបាករបស់ប្រជាពលរដ្ឋ នៅពេលដែលតម្លៃស្រូវចុះថោក ហើយការប្រាក់ដែលខ្ចីបុលពីធនាគារខ្ពស់ហួសហេតុ។ លោក គង់ គាំ បានមានប្រសាសន៍ថាតម្លៃស្រូវ ១គីឡូក្រាម ៧០០រៀល ធ្វើឱ្យប្រជាពលរដ្ឋជួបការលំបាកយ៉ាងខ្លាំង ព្រោះតម្លៃស្រូវថោកហើយម្ចាស់បំណុលបង្ខំទារលុយជាហេតុធ្វើឱ្យជីវភាព រស់នៅរបស់ប្រជាពលរដ្ឋប្រឈមនឹងការធ្លាក់ចុះជាលំដាប់។ ប្រជាពលរដ្ឋគ្មានជម្រើសអ្វីក្រៅពីបង្ខំចិត្តលក់កសិផលក្នុងតម្លៃថោក ដើម្បីយកលុយសងទៅម្ចាស់បំណុលវិញនោះទេបើមិនអ៊ីចឹងការប្រាក់នឹងឡើង ទ្វេមួយជាពីរ ឬអាចឈានដល់ការរឹបអូសដីស្រែ ហើយអ្នកមានអំណាចសព្វថ្ងៃមិនបានយកចិត្តទុកដាក់ជួយដល់ប្រជាកសិករ ក្រីក្រទេ។

លោក គង់ គាំ មានប្រសាសន៍ថានៅពេលគណបក្សសង្គ្រោះជាតិឈ្នះឆ្នោត បញ្ចុះការប្រាក់ឱ្យបានលឿនបំផុត ដើម្បីជួយដល់ប្រជាពលរដ្ឋ ហើយប្រជាពលរដ្ឋមិន ត្រូវចាញ់ឃោសនារបស់តេជោ សែន ទេ គឺត្រូវតែមានការជឿជាក់លើគោលនយោបាយរបស់គណបក្សសង្គ្រោះជាតិ។ លោក គង់ គាំ បានបញ្ជាក់ថានៅពេលបក្សសង្គ្រោះជាតិឈ្នះឆ្នោត នឹងធ្វើឱ្យស្រូវមានតម្លៃ១គីឡូក្រាម១០០០រៀល គឺមិនឱ្យទាបជាង ១០០០រៀលនោះឡើយ។ គោលនយោបាយរបស់គណបក្សសង្គ្រោះជាតិ ជាគោលនយោបាយច្បាស់លាស់មិនមែន ជាគោលនយោបាយផែនការទេ គណបក្សសង្គ្រោះជាតិប្រកាន់យកគោលការណ៍ទីផ្សារសេរី ដែលមានការប្រកួតប្រជែងគ្នា។ លោក គង់ គាំ បានរិះគន់ចំៗថា សព្វថ្ងៃនេះអំណាចរបស់តេជោ សែន អនុវត្តន៍គោលនយោបាយផ្តាច់មុខអត់មានការប្រកួតប្រជែងនោះទេ ឧទាហរណ៍ការចិញ្ចឹមជ្រូកគឺមានសមាគមជ្រូកជាអ្នកទិញ ហើយដោយសារពុំមានការប្រកួតប្រជែងគេឱ្យតម្លៃប៉ុន្មានក៏ត្រូវតែលក់ ឱ្យគេដែរ។ តែសម្រាប់គោលនយោបាយរបស់គណបក្សសង្គ្រោះជាតិត្រូវធ្វើឱ្យមាន ការប្រកួតប្រជែងគ្នា គឺគណបក្សសង្គ្រោះជាតិប្រកាន់យកសេដ្ឋកិច្ចទីផ្សារសេរី ហើយត្រូវមានការប្រកួតប្រជែងគ្រប់ទំនិញ និងផលិតផលរបស់កសិករ។

គោលនយោបាយរបស់គណបក្សសង្គ្រោះជាតិត្រូវបានលោក គង់ គាំ គូសបញ្ជាក់ថាកសិផល ឬផលិតផលរបស់ប្រជាពលរដ្ឋគឺអ្នកណាហ៊ានឱ្យថ្លៃខ្ពស់អាចលក់ឱ្យ អ្នកនោះ ធ្វើដូច្នេះទើបប្រជាពលរដ្ឋអាចទទួលបានប្រយោជន៍សមស្របពិតប្រាកដ។ ប៉ុន្តែជាមួយតេជោ សែន គឺបើគេឱ្យ ៧០០រៀល ក្នុង១គីឡូក្រាម គឺត្រូវតែលក់ឱ្យគេ ពុំមានអ្នកណាហ៊ានប្រជែងទិញទៀតទេដូច្នេះប្រជាកសិករត្រូវពិនិត្យមើល ឱ្យបានច្បាស់លាស់ចំពោះគោលនយោបាយគណបក្សសង្គ្រោះជាតិដែលផ្តោតសំខាន់ ទៅលើការលើកកម្ពស់ជីវភាពរស់នៅរបស់ប្រជាពលរដ្ឋឱ្យប្រសើរជាងមុន។ នៅពេលដែលគណបក្សសង្គ្រោះជាតិឈ្នះឆ្នោតអាចធ្វើឱ្យតម្លៃប្រេងសាំង ធ្លាក់ចុះព្រោះរដ្ឋាភិបាលគណបក្សសង្គ្រោះជាតិមិនទិញប្រេងសាំងបន្ត ពីប្រទេសយួនទេ គឺត្រូវទៅទិញពីប្រ ទេសដែលយួនទៅទិញប្រេងពីគេនោះដែរ ដើម្បីឱ្យតម្លៃប្រេងសាំងនៅកម្ពុជា មានតម្លៃប្រហាក់ប្រហែលប្រទេសជិតខាង។

លោក គង់ គាំ បានបញ្ជាក់ទៀតថានៅពេលគណបក្សសង្គ្រោះជាតិឈ្នះឆ្នោតដឹកនាំរដ្ឋាភិបាល គឺជួយសម្រួលសព្វបែបយ៉ាងដល់ជីវភាពរស់នៅរបស់ប្រជាពលរដ្ឋទាំងការធានា តម្លៃកសិផល និងផលិតផលរបស់កសិករខ្មែរ ទាំងការបញ្ចុះតម្លៃប្រេងសាំង ទំនិញលើទីផ្សារ អគ្គិសនី ជីកសិកម្ម និងទំនិញផ្សេងៗទៀតជាសេចក្តីត្រូវការចាំបាច់របស់ប្រជាពលរដ្ឋ។ លើសនេះទៅទៀតនៅពេលដែលគណបក្សសង្គ្រោះជាតិឈ្នះឆ្នោតមិនយកពន្ធដីធ្លី ប្រជាពលរដ្ឋដូចគេចោទប្រកាន់ទេ គឺមិនដូចអ្វីដែលគណបក្សកាន់អំណាចកំពុងបំភ័យបន្លាចប្រជាពលរដ្ឋខ្មែរ ទូទៅនោះឡើយ។ នៅពេលដែលគណបក្សសង្គ្រោះជាតិឈ្នះឆ្នោត នឹងអនុវត្តន៍ឱ្យបានជោគជ័យតាមគោលនយោបាយរបស់ខ្លួនក្នុងការផ្តល់ប្រាក់ ឧបត្ថម្ភដល់ប្រជាពលរដ្ឋមានវ័យចាស់ជរាចាប់ពីអាយុ ៦៥ឆ្នាំឡើងទៅក្នុងម្នាក់៤មុឺនរៀលក្នុងមួយខែ។ នៅពេលបក្សសង្គ្រោះជាតិឈ្នះឆ្នោត នឹងដំឡើងប្រាក់បៀវត្សរ៍ដល់មន្ត្រីរាជការ និងកម្លាំងប្រដាប់អាវុធទូទៅឱ្យបាន១លានរៀល ឬ ២៥០ដុល្លារ ក្នុងមួយខែ ព្រមទាំងដំឡើងប្រាក់ខែដល់កម្មករ-កម្មការិនីឱ្យបាន ១៥០ ដុល្លារ ឬ ៦០មុឺនរៀលក្នុងមួយខែ។

លោក គង់ គាំ បានថ្លែងទៅកាន់ប្រជាពលរដ្ឋ សកម្មជន និង អ្នកគាំទ្រគណបក្សសង្គ្រោះជាតិនៅសង្កាត់ក្បាលកោះ ខណ្ឌមានជ័យទៀតថា គណបក្សប្រជាជនបានសន្យាមិនយកពន្ធដីពីប្រជាពលរដ្ឋទេ គឺគេយកដីប្រជាពលរដ្ឋតែម្តង។ដូច្នេះប្រជាពលរដ្ឋខ្មែរត្រូវគិតគូរ ឱ្យបានវែងឆ្ងាយចំពោះបញ្ហានេះព្រោះអីគណបក្សសង្គ្រោះជាតិមិនបាន មួលបង្កាច់គេទេ គឺនិយាយតាមស្ថានភាពជាក់ស្តែងពីរឿងរដ្ឋាភិបាលដឹកនាំដោយគណបក្ស ប្រជាជនរំលោភយកដីធ្លីប្រជាពលរដ្ឋទៅប្រគល់ឱ្យក្រុមហ៊ុន និងឈ្មួញមានអំណាចធ្វើឱ្យប្រជាពលរដ្ឋរងទុក្ខវេទនាគ្មានទីបញ្ចប់។ មានន័យថាប្រជាពលរដ្ឋត្រូវជឿជាក់ទៅលើ គោលនយោបាយរបស់គណបក្សសង្គ្រោះជាតិ ព្រោះនៅពេលដែលគណបក្សនេះឈ្នះឆ្នោតប្រជាពលរដ្ឋខ្មែរទូទៅ នឹងទទួលបានផលប្រយោជន៍សមស្របតាមគោលនយោបាយរបស់គណបក្សសង្គ្រោះជាតិ ជាមិនខាន។ សូម្បីតែបញ្ហាលើកកម្ពស់សុខភាពរបស់ប្រជាពលរដ្ឋក៏បក្សសង្គ្រោះជាតិ មានគោលនយោ បាយច្បាស់លាស់ ដើម្បីសម្រួលដល់ការរស់នៅរបស់ពលរដ្ឋដែរ។

ទាក់ទងនឹងបញ្ហាសុខភាពនេះលោក គង់ គាំ បានគូសបញ្ជាក់ថានៅស្រុកយួនអាយុភាគច្រើនដែលអាចរស់ជាមធ្យមក្នុង កម្រិតប្រមាណ៧០ឆ្នាំ នៅសៀមអាយុប្រជាពលរដ្ឋជាមធ្យម ៨០ឆ្នាំចំណែកនៅស្រុកខ្មែរអាយុមធ្យមរបស់ប្រ ជាពលរដ្ឋអាចរស់បាន ៦០ ឆ្នាំ។ តាមពិនិត្យជាក់ស្តែងនៅតាមតំបន់ជនបទប្រជាពលរដ្ឋដែលមានអាយុ៤០ទៅ៥០ ឆ្នាំ គឺមានសុខភាពទ្រុឌទ្រោម មានជំងឺបៀតបៀនច្រើនប្រភេទ ហើយដល់អាយុ៦០ឆ្នាំអាចស្លាប់បាត់បង់ជីវិត។ ដូច្នេះគោលនយោបាយរបស់គណបក្សសង្គ្រោះជាតិមិនអាចទុកឱ្យសុខភាព ប្រជាពលរដ្ឋមានភាពទន់ខ្សោយដូចសព្វថ្ងៃនេះទេ គឺត្រូវគិតគូរលើកកម្ពស់វិស័យសុខាភិបាល យកចិត្តទុកដាក់ចំពោះសុខភាពរបស់ប្រជាពលរដ្ឋឱ្យបានប្រសើរ។ ជាពិសេសគណបក្សសង្គ្រោះជាតិមិនបណ្តោយឱ្យឈ្មួញទុច្ចរិតនាំថ្នាំពេទ្យ ហួសកាលកំណត់ប្រើប្រាស់ និងគ្មានគុណភាពមកបំផ្លាញសុខភាពរបស់ប្រជាពលរដ្ឋខ្មែរទូទាំងប្រទេស នោះទេ។

លោក គង់ គាំ បានលើកឡើងទៀតថានៅពេលគណបក្សសង្គ្រោះជាតិឈ្នះឆ្នោតត្រូវពង្រឹងវិស័យ សុខាភិបាលឱ្យបានល្អប្រសើរដើម្បីលើកកម្ពស់សុខភាពរបស់ប្រជាពលរដ្ឋនៅ ទូទាំងប្រទេស។ ការយកចិត្តទុកដាក់ចំពោះជីវភាពរស់នៅរបស់ប្រជាពលរដ្ឋគឺជារឿងសំខាន់ ណាស់ដើម្បីកុំឱ្យប្រជាពលរដ្ឋដែលមានជំងឺត្រូវស្លាប់ដោយសារតែគ្មាន លុយចូលទៅព្យាបាលជំងឺក្នុងមន្ទីរពេទ្យតទៅទៀត។ គណបក្សសង្គ្រោះជាតិមានគោលនយោបាយសំខាន់ៗជាច្រើនដើម្បីកែទម្រង់វិស័យ សុខាភិបាលឱ្យស្របតាមសេចក្តីត្រូវការចាំបាច់របស់ប្រជាពលរដ្ឋរាប់ តាំងសេវាដឹកជញ្ជូនពលរដ្ឋដែលមានជំងឺពីមូលដ្ឋានទៅកាន់មន្ទីរពេទ្យ ផងដែរ។ គោលនយោបាយបក្សសង្គ្រោះជាតិមិនដូចគោលនយោបាយរបស់គណបក្សប្រជាជន សព្វថ្ងៃនេះទេព្រោះគណបក្សសង្គ្រោះជាតិបង្កើតឡើងដើម្បីសង្គ្រោះ ប្រជាពលរដ្ឋពីទុក្ខលំបាក និងសង្គ្រោះប្រទេសជាតិឱ្យរួចផុតពីគ្រោះថ្នាក់។ ដូច្នេះប្រជាពលរដ្ឋខ្មែរនៅទូទាំងប្រទេសមានតួនាទីសំខាន់ណាស់ក្នុង ការចូល រួមជាមួយគណបក្សសង្គ្រោះជាតិដើម្បីស្រេោចស្រង់ប្រទេសជាតិឱ្យបាន ទាន់ពេលវេលា និងលើកកម្ពស់ជីវភាពរស់នៅរបស់ខ្លួនឱ្យបានល្អប្រសើរជាងបច្ចុប្បន្ន។

សូមបញ្ជាក់ដែរ មួយរយៈពេលចុងក្រោយនេះថ្នាក់ដឹកនាំ និងមន្ត្រីជាន់ខ្ពស់គណបក្សសង្គ្រោះជាតិបានចុះជួបប្រជាពលរដ្ឋ សកម្មភាពដល់ថ្នាក់មូលដ្ឋានដើម្បីផ្សព្វផ្សាយគោលនយោបាយជូនដល់ពលរដ្ឋ ក្នុងគោលបំណងឱ្យពលរដ្ឋពិចារណាឱ្យបានដិតដល់ចំពោះផលប្រយោជន៍នៃ ការបោះឆ្នោតផ្លាស់ប្តូរមេដឹកនាំនៅថ្ងៃទី២៨ ខែកក្កដា ឆ្នាំ២០១៣។ ជាមួយគ្នានេះក្រុមមន្ត្រីសង្គមស៊ីវិល និងអ្នកសង្កេតការណ៍ឯករាជ្យដែលឃ្លាំមើលស្ថានការណ៍នយោបាយក្នុងប្រទេស កម្ពុជាបានទទួលស្គាល់ថាគោលនយោបាយបក្សសង្គ្រោះជាតិកំពុងមានការគាំទ្រ ពីពលរដ្ឋកាន់តែច្រើនឡើងៗ ហើយអាចឈានទៅរកជោគជ័យតាមការគ្រោងទុកជាមិនខាន៕

A Change of Guard

Thursday, 28 March 2013

No comments: