មន្ត្រីសង្គមស៊ីវិល និងមន្ត្រីគណបក្សប្រឆាំង
ស្នើឲ្យរដ្ឋាភិបាលបារាំង
ជួយធ្វើអន្តរាគមន៍លើករណីពលរដ្ឋខ្មែរសញ្ជាតិបារាំង ចំនួន ២នាក់
ដែលកំពុងជាប់ក្នុងពន្ធនាគារ
និងជាប់ការចោទប្រកាន់ពីរដ្ឋាភិបាលឲ្យមានសេរីភាពវិញ។
លោក ស៊ែហ្ស ម៉ូស្ទូរ៉ា (Serge Mostura, French ambassador to Cambodia)
ឯកអគ្គរដ្ឋទូតបារាំង ប្រចាំប្រទេសកម្ពុជា ក្នុងសន្និសីទកាសែត
នាស្ថានទូតបារាំង កាលពីថ្ងៃអង្គារ ទី៥ ខែកុម្ភៈ ឆ្នាំ២០១៣។
ខ្មែរសញ្ជាតិបារាំង ទាំងពីរមាន លោក សម រង្ស៊ី ប្រធានគណបក្សប្រឆាំង
និងលោក ម៉ម សូណង់ដូ នាយកវិទ្យុសំបុកឃ្មុំ
និងជាប្រធានសមាគមន៍អ្នកប្រជាធិបតេយ្យ។
មន្ត្រីគណបក្សប្រឆាំង និងសង្គមស៊ីវិលមួយចំនួន
បានទទូចស្នើឲ្យរដ្ឋាភិបាលបារាំង
ជួយអន្តរាគមន៍ទៅប្រមុខរាជរដ្ឋាភិបាលកម្ពុជា ឬស្ថាប័នពាក់ព័ន្ធ
ឲ្យដោះលែងលោក ម៉ម សូណង់ដូ និងលើកលែងការចោទប្រកាន់លោក សម រង្ស៊ី
ដែលកំពុងនិរទេសខ្លួននៅក្រៅប្រទេសឲ្យមានសេរីភាព
បានចូលរួមបោះឆ្នោតសភាឆ្នាំ២០១៣។
សំណើនេះធ្វើឡើងស្របពេលដែលដំណើរទស្សនកិច្ចពីរថ្ងៃមកកម្ពុជា
របស់លោក ហ្សង់-ម៉ាក អេរ៉ូ (Jean-Marc Ayrault)
នាយករដ្ឋមន្ត្រីនៃសាធារណរដ្ឋបារាំង
ដើម្បីចូលរួមព្រះរាជពិធីថ្វាយព្រះភ្លើងព្រះមហាវីរក្សត្រ
ព្រះករុណា សម្ដេចព្រះ នរោត្តម សីហនុ។
លោក យឹម សុវណ្ណ មន្ត្រីនាំពាក្យ និងជាសមាជិកសភាគណបក្ស សម រង្ស៊ី
មានប្រសាសន៍ថា ទាំងរដ្ឋាភិបាលបារាំង និងអន្តរជាតិ កំពុងតាមដាន
និងផ្ដោតការយកចិត្តទុកដាក់ទៅលើករណីលោក សម រង្ស៊ី និងលោក ម៉ម
សូណង់ដូ។ លោកអះអាងថា ករណីប្ដឹងចោទប្រកាន់
និងចាប់ដាក់ពន្ធនាគារទៅលើមេដឹកនាំបក្សប្រឆាំង
និងប្រធានសមាគមអ្នកប្រជាធិបតេយ្យ ជារឿងនយោបាយ។
លោក យឹម សុវណ្ណ៖ «ទាំងប្រទេសបារាំង អង្គការសហប្រជាជាតិ
ក៏ដូចជាប្រទេសមហាអំណាចធំៗ
គេព្រួយបារម្ភអំពីការដើរថយក្រោយនៃលទ្ធិប្រជាធិបតេយ្យនៅក្នុង
ប្រទេសកម្ពុជា។ អ៊ីចឹងហើយ
នេះជាវិធានការមួយជំរុញធ្វើម៉េចដើម្បីឲ្យឯកឧត្តម សម រង្ស៊ី
បានចូលរួមក្នុងការបោះឆ្នោត ក៏ដូចជាដោះលែងលោក ម៉ម សូណង់ដូ
ដែលកំពុងជាប់ក្នុងពន្ធនាគារ។ ពីព្រោះរឿងទាំងអស់នេះ ជារឿងនយោបាយ
មិនមែនជាទោសព្រហ្មទណ្ឌអ្វីទេ។
ហើយគេដឹងឮទូទាំងពិភពលោកថាជារឿងនយោបាយ។ អ៊ីចឹង
រដ្ឋាភិបាលត្រូវតែដោះស្រាយបញ្ហាហ្នឹង
និងពិសេសបង្កទំនាក់ទំនងល្អជាមួយបណ្ដាប្រទេសទាំងអស់លើសកលលោក
ដើម្បីផលប្រយោជន៍ជាតិ»។
មន្ត្រីបក្សប្រឆាំងរូបនេះសង្កត់ធ្ងន់ថា រដ្ឋាភិបាលបារាំង
និងអន្តរជាតិ ត្រូវមានវិធានការជួយ ឬអន្តរាគមន៍ទៅរដ្ឋាភិបាលកម្ពុជា
លើករណីលោក សម រង្ស៊ី និងករណីលោក ម៉ម សូណង់ដូ ដែលត្រូវតុលាការ
ឬរដ្ឋាភិបាលប្ដឹងចោទ និងចាប់ដាក់គុកដោយអយុត្តិធម៌។
ចំណែក លោក អ៊ូ វីរៈ ប្រធានមជ្ឈមណ្ឌលសិទ្ធិមនុស្សកម្ពុជា
ក៏បានរិះគន់រដ្ឋាភិបាលបារាំង ដែលហាក់រើសអើង
ឬមិនរវល់អើពើចំពោះពលរដ្ឋខ្មែរសញ្ជាតិបារាំង ដូចជាករណីលោក សម
រង្ស៊ី និងលោក ម៉ម សូណង់ដូ
ដែលតុលាការផ្ដន្ទាទោសឲ្យពន្ធនាគារទាំងអយុត្តិធម៌។
លោកថា រដ្ឋាភិបាលបារាំង ត្រូវតែជួយអន្តរាគមន៍លើករណីលោក សម
រង្ស៊ី និងលោក ម៉ម សូណង់ដូ ដើម្បីផ្តល់យុត្តិធម៌ជូនជនរងគ្រោះ
ព្រោះថាការប្ដឹងចោទបុគ្គលទាំងពីរដាក់ពន្ធនាគារជារឿងនយោបាយ
សុទ្ធសាធ។
លោក អ៊ូ វីរៈ៖ «បើសិនជាជនជាតិបារាំង
ស្បែកសច្រមុះស្រួចនៅក្នុងពន្ធនាគារ សញ្ជាតិបារាំង ដែរ
ប្រហែលជារដ្ឋាភិបាលបារាំងយកចិត្តទុកដាក់ជាងករណីលោក ម៉ម សូណង់ដូ
នេះជាការឆ្លុះបញ្ចាំងមួយទៅរដ្ឋាភិបាលបារាំង
ធ្វើមិនល្អទាល់តែសោះ។ ចំពោះខ្ញុំ ប្រទេសបារាំង
គឺមានកាតព្វកិច្ចក្នុងការជំរុញបន្ថែមឲ្យមាននីតិរដ្ឋក្នុងប្រទេស
កម្ពុជា។ បារាំង បានអះអាងថា ខ្លួនបានជួយនីតិរដ្ឋនៅកម្ពុជា
ប៉ុន្តែចំពោះខ្ញុំ បារាំង គឺអត់បានជួយនីតិរដ្ឋប៉ុន្មានទេ។
បញ្ហានីតិរដ្ឋនៅកម្ពុជា គឺបញ្ហាឯករាជភាពរបស់តុលាការកម្ពុជា
ជារឿងមួយមិនទាន់មានការរីកចម្រើនទាល់តែសោះ»។
លោក អ៊ូ វីរៈ បានស្នើទៅរដ្ឋាភិបាលបារាំង
ឲ្យយកចិត្តទុកដាក់ទៅលើពលរដ្ឋខ្មែរមានសញ្ជាតិបារាំង
ដូចជាករណីលោក សម រង្ស៊ី និងលោក ម៉ម សូណង់ដូ ឲ្យដូចជនជាតិបារាំង
ក្នុងប្រទេសបារាំង ដូចគ្នាដែរ។
ទាក់ទិនបញ្ហានេះ លោក ស៊ែហ្ស ម៉ូស្ទូរ៉ា (Serge Mostura)
ឯកអគ្គរដ្ឋទូតបារាំង តែងតាំងប្រចាំកម្ពុជា
មានប្រសាសន៍ក្នុងសន្និសីទកាសែត ថ្ងៃអង្គារ ទី៥ ខែកុម្ភៈ
នាស្ថានទូតបារាំង តាមសំឡេងអ្នកបកប្រែភាសាថា
ក្នុងដំណើរទស្សនកិច្ចពីរថ្ងៃមកកម្ពុជា របស់លោក ហ្សង់-ម៉ាក អេរ៉ូ
នាយករដ្ឋមន្ត្រីនៃសាធារណរដ្ឋបារាំង ថ្ងៃទី៣ ទី៤ ខែកុម្ភៈ ឆ្នាំ២០១៣។
លោក ហ្សង់-ម៉ាក អេរ៉ូ ក្នុងជំនួបជាមួយលោកនាយករដ្ឋមន្ត្រី ហ៊ុន សែន
បានលើកយកករណីលោក សម រង្ស៊ី និងលោក ម៉ម សូណង់ដូ មកពិភាក្សា
ហើយកិច្ចពិភាក្សានេះលោករំពឹងថាប្រមុខដឹកនាំខ្មែរ
នឹងផ្តល់ចម្លើយវិជ្ជមាន។
លោក ស៊ែហ្ស ម៉ូស្ទូរ៉ា៖ «លោកនាយករដ្ឋមន្ត្រីបារាំង
បានជួបជាមួយលោកនាយករដ្ឋមន្ត្រី ហ៊ុន សែន ហើយគាត់លើកដំបូង
គឺបញ្ហានយោបាយ។ ជំនួបនោះគាត់បានលើកយកនូវបញ្ហាមួយចំនួន
ដូចជាករណីលោក សម រង្ស៊ី លោក ម៉ម សូណង់ដូ និងអ្នកកាសែតបារាំង ឈ្មោះ
ដានីញ៉ែល ឡែនណេ ដែលអ្នកទាំងអស់នោះសុទ្ធតែមានសញ្ជាតិបារាំង។
ជំនួបនោះ លោកនាយករដ្ឋមន្ត្រី ហ៊ុន សែន
ក៏បានកត់ត្រានូវអ្វីដែលគាត់បានលើកឡើង
និងបង្ហាញចំណាប់អារម្មណ៍នេះផងដែរ ហើយការពិភាក្សានោះ
មានលក្ខណៈបើកចំហ ហើយគាត់សង្ឃឹមថានឹងមានការឆ្លើយតបជាវិជ្ជមាន»។
ត្រង់ចំណុចនេះ លោក យឹម សុវណ្ណ បានកោតសរសើរចំពោះរដ្ឋាភិបាលបារាំង
ដែលកន្លងមកបានយកចិត្តទុកដាក់ជំរុញឲ្យកម្ពុជា
មានលទ្ធិប្រជាធិបតេយ្យ និងសិទ្ធិមនុស្ស។ ប៉ុន្តែពេលនេះ
លោកស្នើឲ្យរដ្ឋាភិបាលបារាំង ជួយពិនិត្យលើករណីលោក សម រង្ស៊ី និងលោក
ម៉ម សូណង់ដូ ដែលត្រូវតុលាការផ្ដន្ទាទោសឲ្យជាប់ពន្ធនាគារពីជាង
១០ឆ្នាំ ទៅ ២០ឆ្នាំ។
លោក យឹម សុវណ្ណ៖ «ខ្ញុំសូមអគុណណាស់ចំពោះលោកនាយករដ្ឋមន្ត្រី
បារាំង ឬប្រទេសបារាំង
ដែលតែងតែយកចិត្តទុកដាក់ជំរុញឲ្យប្រទេសកម្ពុជា
មានលទ្ធិប្រជាធិបតេយ្យពិតប្រាកដ មានតម្លៃលើសអ្វីៗទាំងអស់។
ពេលណាដែលយើងមានលទ្ធិប្រជាធិបតេយ្យ
ពេលណាដែលមានការគោរពសិទ្ធិមនុស្សឲ្យបានត្រឹមត្រូវ
ពេលនោះហើយដែលប្រទេសកម្ពុជា យើងទទួលបាននូវភាពសុខសាន្ត
ហើយនឹងមានការអភិវឌ្ឍសេដ្ឋកិច្ចប្រកបដោយសមធម៌។
បើសិនជាមិនមានលទ្ធិប្រជាធិបតេយ្យទេ មិនគោរពសិទ្ធិមនុស្សទេ
ទោះបីជាមានជំនួយបរទេសប៉ុន្មានក៏ដោយ ក៏ជំនួយបរទេសទាំងនោះ
នឹងហូរចូលទៅក្នុងកណ្ដាប់ដៃជនមួយក្តាប់តូច
ដែលជាជនពុករលួយតែប៉ុណ្ណោះ»។
មន្ត្រីបក្សប្រឆាំង ថ្លែងថា
លទ្ធផលនៃការបោះឆ្នោតជ្រើសរើសតំណាងរាស្ត្រអាណត្តិទី៥ ឆ្នាំ២០១៣
នឹងគ្មានតម្លៃ និងមិនអាចទទួលយកបានទេ
បើគ្មានវត្តមានមេដឹកនាំគណបក្សប្រឆាំង លោក សម រង្ស៊ី
ចូលរួមប្រកួតប្រជែងការបោះឆ្នោតដោយស្មើភាពជាមួយគណបក្សកាន់
អំណាចទេនោះ។
ទោះយ៉ាងណា មន្ត្រីជាន់ខ្ពស់រាជរដ្ឋាភិបាល
ពិសេសលោកនាយករដ្ឋមន្ត្រី ហ៊ុន សែន កន្លងមកនេះ
បានថ្លែងប្រាប់លោកប្រធានាធិបតីអាមេរិក បារ៉ាក់ អូបាម៉ា (Barack Obama)
ថា ករណីលោក សម រង្ស៊ី និងលោក ម៉ម សូណង់ដូ មិនមែនជារឿងនយោបាយទេ
ព្រោះពួកគេបានប្រព្រឹត្តបទឧក្រិដ្ឋល្មើសច្បាប់
និងត្រូវតុលាការកាត់ទោស។ បញ្ហានេះ
រាជរដ្ឋាភិបាលមិនអាចជ្រៀតជ្រែកចូលក្នុងឯករាជភាព
ឬកិច្ចការរបស់តុលាការកម្ពុជា បានទេ។
យ៉ាងណាក៏ដោយ ការផ្ដន្ទាទោសលោក សម រង្ស៊ី និងលោក ម៉ម សូណង់ដូ
ត្រូវបានមជ្ឈដ្ឋានជាតិ និងអន្តរជាតិ រួមមានសហរដ្ឋអាមេរិក បារាំង
និងសហភាពអឺរ៉ុប ជាដើម ចេញសេចក្តីថ្លែងការណ៍ថ្កោលទោស
និងចាត់ទុកការជម្រះក្តីនេះ មិនឯករាជ និងលូកដៃពីរដ្ឋាភិបាល។
លោក សម រង្ស៊ី ត្រូវបានតុលាការកាត់ទោសឲ្យជាប់ពន្ធនាគារជាង
១០ឆ្នាំ ក្រោមបទចោទចំនួន៤។ ទី១
បំផ្លិចបំផ្លាញទ្រព្យសម្បត្តិរដ្ឋដោយខុសច្បាប់។ ទី២
ញុះញង់ឲ្យមានការរើសអើង។ ទី៣ ក្លែងឯកសារសាធារណៈ និងទី៤
ផ្ដល់ព័ត៌មានមិនពិតទាក់ទិននឹងការដកបង្គោលតម្រុយព្រំដែន
កម្ពុជា-វៀតណាម និងការផ្សព្វផ្សាយផែនទីតាមអ៊ីនធឺណិត (Internet)
ដើម្បីបង្ហាញពីការចោទប្រកាន់ របស់គាត់ថា វៀតណាម
បានទន្ទ្រានយកដីកម្ពុជា។ រីឯលោក ម៉ម សូណង់ដូ
ត្រូវបានតុលាការប្រកាសសាលក្រមផ្ដន្ទាទោសដាក់ពន្ធនាគារចំនួន
២០ឆ្នាំ ចោទពីបទញុះញង់បង្កើតតំបន់អបគមន៍ប្រឆាំងរដ្ឋាភិបាល
តាមរយៈជម្លោះដីធ្លីនៅភូមិប្រម៉ា ឃុំកំពង់ដំរី ស្រុកឆ្លូង
ខេត្តក្រចេះ៕
No comments:
Post a Comment