A Change of Guard

សូមស្តាប់វិទ្យុសង្គ្រោះជាតិ Please read more Khmer news and listen to CNRP Radio at National Rescue Party. សូមស្តាប់វីទ្យុខ្មែរប៉ុស្តិ៍/Khmer Post Radio.
Follow Khmerization on Facebook/តាមដានខ្មែរូបនីយកម្មតាម Facebook: https://www.facebook.com/khmerization.khmerican

Tuesday 31 July 2012

International organisations request the Cambodian government to release Mam Sonando

Three organisations, Article 19, FORUM-ASIA and SEAPA, have written to PM Hun Sen to protest against the arrest of Mam Sonando and request for the his immediate release.
អង្គការ​អន្តរជាតិ​ស្នើ​ឲ្យ​រដ្ឋាភិបាល​ខ្មែរ​ដោះ​លែង​លោក ម៉ម សូណង់ដូ 
ដោយ ហាស់ សាន និង វិជ័យ អានន្ទ 2012-07-31 នៅ​ថ្ងៃ​ទី​៣០ ខែ​កក្កដា 

អង្គការ​ក្រៅ​រដ្ឋាភិបាល​បី​នៅ​បរទេស បាន​ស្នើ​សុំ​ឲ្យ​រដ្ឋាភិបាល​កម្ពុជា ដោះ​លែង​លោក ម៉ម សូណង់ដូ ប្រធាន​វិទ្យុ​សំបុក​ឃ្មុំ និង​ជា​ប្រធាន​សមាគម​អ្នក​ប្រជាធិបតេយ្យ។

RFA/Uon Chhin, Mam Sonando's supporters rallied in front of Phnom Penh Court on 16 July asking for his release.
អ្នក​គាំទ្រ​ឈរ​ស្រែក​ទាមទារ​ឲ្យ​តុលាការ​ ដោះលែង​លោក ម៉ម សូណង់ដូ នៅ​ខាង​មុខ​សាលាដំបូង​រាជធានី​ភ្នំពេញ កាល​ពី​ព្រឹក​ថ្ងៃ​ទី​១៦ កក្កដា ឆ្នាំ​២០១២។
អង្គការ​ឈ្មោះ Article 19, FORUM-ASIA និង SEAPA បាន​ផ្ញើ​លិខិត​រួម​គ្នា​មួយ​ទៅ​ជូន​លោក​នាយករដ្ឋមន្រ្តី ហ៊ុន សែន ប្រមុខ​រដ្ឋាភិបាល ដើម្បី​សំដែង​នូវ​ការ​តវ៉ា​ចំពោះ​ការ​ចាប់​ខ្លួន និង​ឃុំ​ខ្លួន​លោក ម៉ម សូណង់ដូ ហើយ​ស្នើ​សុំ​ឲ្យ​ដោះ​លែង​រូប​លោក​ឲ្យ​មាន​សេរីភាព​ឡើង​វិញ​ឲ្យ​ឆាប់​រហ័ស។
អង្គការ​ទាំង​នោះ​បាន​អំពាវនាវ​ឲ្យ​រដ្ឋ​អំណាច​ដក​ពាក្យ​ចោទ​ទាំង​អស់​ ដែល​យោង​តាម​មាត្រា​ទាំង​៦ ក្នុង​ក្រមព្រហ្មទណ្ឌ​ដែល​លោក ម៉ម សូណង់ដូ អាច​ជាប់​ពន្ធនាគារ​ដល់​ទៅ ៣០​ឆ្នាំ​នោះ។ អង្គការ​ទាំង​នោះ​សរសេរ​យោង​ទៅ​លើ​ហេតុការណ៍​មួយ​ចំនួន​ដែល​ថា ការ​ផ្ដន្ទាទោស​លោក ម៉ម សូណង់ដូ បែប​នោះ​ជា​អំពើ​គំរាម​ដល់​សេរីភាព​ផ្នែក​សារព័ត៌មាន និង​គំរាម​ដល់​សិទ្ធិ​ក្នុង​ការ​ប្រើ​សេរីភាព​ស្រប​ច្បាប់ ដើម្បី​បញ្ចេញ​មតិ។
អង្គការ​ទាំង​នោះ សរសេរ​ទៀត​ថា មូលហេតុ​ដែល​រដ្ឋ​អំណាច​ចោទ​ថា លោក ម៉ម សូណង់ដូ បាន​ចូល​រួម​ក្នុង​ការ​ដាក់​ពាក្យ​ប្ដឹង​រដ្ឋាភិបាល​កម្ពុជា ដឹក​នាំ​ដោយ​លោក ហ៊ុន សែន នៅ​ឯ​ទីក្រុង​ឡាអេ ប្រទេស​ហុឡង់ដ៍ ហើយ​ដែល​ផ្សាយ​តាម​វិទ្យុ​សំបុក​ឃ្មុំ នៅ​ថ្ងៃ​២៥ ឧសភា នោះ ក៏​ជា​រឿង​មិន​ត្រឹមត្រូវ​ដែរ។ រដ្ឋាភិបាល​ចោទ​លោក​ថា មាន​ពាក់ព័ន្ធ​នឹង​ចលនា​អំណាច​ពលរដ្ឋ​ខ្មែរ​ដឹក​នាំ​ដោយ​លោក សួន សេរីរដ្ឋា ពី​សហរដ្ឋ​អាមេរិក ហើយ​ជួប​គ្នា​នៅ​ក្រុង​ឡាអេ ប្រទេស​ហុឡង់ដ៍។
ចំពោះ​ការ​ចោទ​នេះ លោក ម៉ម សូណង់ដូ បក​ស្រាយ​ប្រាប់​វិទ្យុ​អាស៊ីសេរី កាល​ពី​ចុង​ខែ​មិថុនា ថា លោក​គ្រាន់​តែ​ធ្វើ​ការងារ​របស់​លោក​ជា​អ្នក​កាសែត​តែប៉ុណ្ណោះ៖ «ជាតិ​ជា ​អ្នក​សារព័ត៌មាន ដូច​ត្មាត​អ៊ីចឹង កន្លែង​ណា​ស្អុយ​ទៅ កន្លែង​ហ្នឹង​ហើយ​ទៅ​ចឹក ទៅ​ចោះ យក​ព័ត៌មាន។ រឿង​ជួប​មិន​ជួប​នៅ​ឯ​ណា មិន​មែន​ជា​រឿង​អី​ទេ ខ្ញុំ​ជា​អ្នក​កាសែត។ រឿង​សំខាន់ ជា​រឿង​គោរព​សិទ្ធិ គោរព​ច្បាប់។ បើ​ថា លោក សួន សេរីរដ្ឋា ធ្វើ​ឲ្យ​ប៉ះពាល់​ដល់​ប្រទេស​ជាតិ​ខ្មែរ សម្តេច ហ៊ុន សែន សរសេរ​ប្ដឹង​ទៅ​សហរដ្ឋ​អាមេរិក​ទៅ»
រី​ឯ​ការ​ចោទ​ថា លោក ម៉ម សូណង់ដូ មាន​ជំពាក់ជំពិន​ក្នុង​សកម្មភាព​ប្រជាពលរដ្ឋ ចង់​បះបោរ​ផ្ដាច់​ខ្លួន​នៅ​ខេត្ត​ក្រចេះ នោះ​វិញ អង្គការ​ទាំង​បី​ក៏​និយាយ​ថា ជា​រឿង​មិន​ត្រឹមត្រូវ និង​គ្មាន​មូលដ្ឋាន​ដែរ ព្រោះ​លោក ម៉ម សូណង់ដូ មិន​ដែល​ធ្វើ​ដំណើរ​ទៅ​កាន់​ទី​នោះ ហើយ​មេធាវី​របស់​លោក​ក៏​បញ្ជាក់​ថា លោក ម៉ម សូណង់ដូ មិន​មាន​ការ​ពាក់ព័ន្ធ​អំពី​តំបន់​អបគមន៍ ដែល​រដ្ឋាភិបាល​អះអាង​នោះ​ឡើយ។
លិខិត​នោះ​បញ្ជាក់​ទៀត​ថា ការ​ពិត ព្រឹត្តិការណ៍​ក្នុង​ខែ​ឧសភា នោះ វា​គឺ​ជា​ការ​ប្រឈម​មុខ​ដាក់​គ្នា​រវាង​អ្នក​ភូមិ និង​កង​ប្រដាប់​អាវុធ​របស់​រដ្ឋាភិបាល​ដោយសារ​រឿង​ជម្លោះ​ដីធ្លី មិន​មែន​ជា​រឿង​បំបែក​ខ្លួន​ជា​តំបន់​អបគមន៍ ដូច​ការ​អះអាង​របស់​រដ្ឋាភិបាល​នោះ​ទេ។
ទោះ​ជា​យ៉ាង​ណា​ក៏ដោយ អ្នក​នាំ​ពាក្យ​ទីស្ដីការ​គណៈរដ្ឋមន្ត្រី លោក ផៃ ស៊ីផាន បាន​មាន​ប្រសាសន៍​បង្ហាញ​អំពី​ជំហរ​របស់​រដ្ឋាភិបាល​ថា គួរ​តែ​ទុក​ឱកាស​ឲ្យ​តុលាការ​ស្វែង​រក​ខុស​ត្រូវ​ក្នុង​រឿង​នេះ ព្រោះ​កម្ពុជា ជា​ប្រទេស​មាន​ច្បាប់៖ «ការ​ប្រមូល​ម្រាមដៃ ដាក់​គំនាប​ទៅ​លើ​តុលាការ ការ​សរសេរ​សុំ​ឲ្យ​ស្ថាប័ន​នីតិប្រតិបត្តិ ដាក់​សម្ពាធ​លើ​តុលាការ ជា​អំពើ​មិន​សមរម្យ​ទេ ព្រោះ​យើង​ទាំង​អស់​គ្នា​គោរព​នីតិរដ្ឋ។ យើង​ចង់​ឃើញ​ថា ការ​ដាក់​បន្ទុក​លើ​លោក ម៉ម សូណង់ដូ សមរម្យ ឬ​ទេ ឲ្យ​តុលាការ​វិនិច្ឆ័យ​តាម​អ្វី​ដែល​ជា​ភស្តុតាង​នៃ​ការ​ចោទ​ប្រកាន់»
ឆ្លើយ​តប​ទៅ​នឹង​ការ​អះអាង​ពី​អង្គការ​ការពារ​សិទ្ធិ​មនុស្ស​ទាំង​បី​ដែល ​ថា លោក ម៉ម សូណង់ដូ ពុំ​មាន​ពាក់ព័ន្ធ​នឹង​សកម្មភាព​ចង់​ផ្ដាច់​ខ្លួន​អ្វី​ទេ​នោះ។ លោក ផៃ ស៊ីផាន មាន​ប្រសាសន៍​ថា គេ​គួរ​តែ​ឲ្យ​តុលាការ​ធ្វើ​ការ​រក​យុត្តិធម៌​ជា​មុន​សិន៖ «ចៅក្រម​ តុលាការ​ប្រហែល​ជា​មាន​សមត្ថភាព​ក្នុង​ការ​រក​យុត្តិធម៌​ឲ្យ​លោក ម៉ម សូណង់ដូ។ យើង​ថា លោក​ពុំ​មាន​កំហុស ចុះ​បើ​សិន​ជា​តុលាការ​រក​ទៅ​ឃើញ​ថា មាន​កំហុស តើ​អង្គការ​ទាំង​នោះ​ទទួល​ខុស​នឹង​គេ​ទេ? អា​ហ្នឹង​ដែល​ខ្ញុំ​ឆ្ងល់។ អង្គការ​ទាំង​អស់​នោះ គួរ​តែ​មាន​លក្ខណៈ​ស៊ីវិល័យ រង់ចាំ​បន្តិច​មើល ព្រោះ​តុលាការ​នឹង​រក​យុត្តិធម៌​ឲ្យ​លោក ម៉ម សូណង់ដូ»
អង្គការ Article 19, FORUM-ASIA និង SEAPA បញ្ជាក់​ថា ករណី​លោក ម៉ម សូណង់ដូ មិន​មែន​ជា​លើក​ទី​មួយ​ទេ ដែល​ថា សិទ្ធិ​សេរីភាព​របស់​លោក​ត្រូវ​រដ្ឋ​អំណាច​បំពាន​នោះ ហើយ​ទទូច​ឲ្យ​ដោះលែង​ជា​បន្ទាន់។ ប៉ុន្តែ​បើ​សិន​ជា​តុលាការ​បើក​សវនាការ​វិនិច្ឆ័យ​រូប​លោក អង្គការ​ទាំង​នោះ​រំឭក​អំពី​សិទ្ធិ​ដែល​លោក ម៉ម សូណង់ដូ ត្រូវ​ទទួល​បាន គឺ​យុត្តិធម៌​ឥត​លំអៀង ដែល​ធានា​ដល់​ពលរដ្ឋ​ខ្មែរ​គ្រប់​រូប​តាម​ច្បាប់​កម្ពុជា និង​កាតព្វកិច្ច​អន្តរជាតិ ស្ដី​អំពី​ភាព​ស្មើ​គ្នា​ចំពោះ​មុខ​ច្បាប់។
អ្នក​គាំទ្រ​លោក ម៉ម សូណង់ដូ រក​អន្តរាគមន៍​ពី​ស្ថានទូត​មួយ​ចំនួន
ទាក់ទង​នឹង​ការ​ទាមទារ​អោយ​ដោះលែង​លោក ម៉ម សូណង់ដូ នេះ​ដែរ ក្រុម​អ្នក​គាំទ្រ​លោក​ពី​សមាគម​អ្នក​ប្រជាធិបតេយ្យ បាន​ដាក់​លិខិត​ដាច់​ដោយ​ឡែក​ពី​គ្នា​ទៅ​កាន់​ស្ថានទូត​ចំនួន ៩ នៅ​កម្ពុជា នៅ​ព្រឹក​ថ្ងៃ​ទី​៣០ ខែ​កក្កដា ឆ្នាំ​២០១២ ដើម្បី​ស្វែង​រក​កិច្ច​អន្តរាគមន៍​ការ​ទូត​ពី​ស្ថានទូត​ទាំង​នោះ។
លោកស្រី ហួត ផាន់ណារី អគ្គលេខាធិការ​រង​សមាគម​អ្នក​ប្រជាធិបតេយ្យ ដែល​មាន​លោក ម៉ម សូណង់ដូ ជា​ប្រធាន បាន​ឲ្យ​ដឹង​ថា ញត្តិ​ទាំង​នោះ​ធ្វើ​ឡើង​ដោយ​ប្រធាន​សាខា​សមាគម​អ្នក​ប្រជាធិបតេយ្យ ដែល​ស្ថិត​នៅ ១២ ខេត្ត-​រាជធានី ក្នុង​ចំណោម ២៤ ខេត្ត-​រាជធានី ទូទាំង​ប្រទេស។
កម្មវត្ថុ​នៃ​ញត្តិ​ដែល​មាន​អត្ថន័យ​ដូច​គ្នា​នោះ គឺ​សំណើ​សុំ​អន្តរាគមន៍​ជួយ​ដោះលែង​លោក ម៉ម សូណង់ដូ ប្រធាន​សមាគម​អ្នក​ប្រជាធិបតេយ្យ និង​ជា​ប្រធាន​វិទ្យុ​សំបុក​ឃ្មុំ។ ញត្តិ​ទាំង​នោះ ត្រូវ​បាន​ដាក់​ទៅ​កាន់​ស្ថានទូត​ចំនួន ៩ នៅ​ភ្នំពេញ រួម​មាន ស្ថានទូត​អាមេរិក អូស្ត្រាលី កាណាដា បារាំង អង់គ្លេស អាល្លឺម៉ង់ ជប៉ុន ថៃ និង​ស្ថានទូត​សិង្ហបុរី។
តំណាង​សមាគម​អ្នក​ប្រជាធិបតេយ្យ​ក៏​បាន​ឲ្យ​ដឹង​ថា សមាគម​ក៏​បាន​ប្រមូល​ស្នាម​មេដៃ​របស់​មហាជន​ដែល​បាន​ចាប់​ផ្ដើម​កាល​ពី​ថ្ងៃ ​ទី​២៣ កក្កដា ឆ្នាំ​២០១២ មក​ដល់​ពេល​នេះ​សមាគម​ប្រមូល​ស្នាម​បាន​ជាង ៤​ម៉ឺន​នាក់​ហើយ។
ស្នាម​មេដៃ​មហាជន​ទាំង​នោះ ធ្វើ​ឡើង​ក្នុង​ញត្តិ​ដើម្បី​ស្នើ​សុំ​ការ​ដោះ​លែង​លោក ម៉ម សូណង់ដូ ហើយ​សមាគម​នឹង​ដាក់​ទៅ​កាន់​ស្ថានទូត​នានា​នៅ​ពេល​ខាង​មុខ៖ «ញត្តិ​នេះ​ បង​ដាក់​ហ្នឹង​ដែល​តំណាង​ខេត្ត​ទាំង ១២ ខេត្ត បង​ដាក់​អា​ហ្នឹង​មុន ហើយ​មេដៃ​ប្រជាពលរដ្ឋ​ហ្នឹង បង​នឹង​ដាក់​បន្តៗ​ទៀត ឥឡូវ​ហ្នឹង​បង​មិន​ទាន់​ដឹង​ច្បាស់​ថា ថ្ងៃ​ណា​ត្រូវ​ដាក់​ទៀត ព្រោះ​ឥឡូវ​កំពុង​ប្រមូល​ជា​បន្ត​ទៀត»
លោក ម៉ម សូណង់ដូ ត្រូវ​បាន​ប៉ូលិស​ចាប់​ខ្លួន កាល​ពី​ថ្ងៃ​ទី​១៥ កក្កដា ឆ្នាំ​២០១២ បន្ទាប់​ពី​លោក​បាន​វិល​ត្រឡប់​មក​ពី​សហរដ្ឋ​អាមេរិក​បាន​បី​ថ្ងៃ។ តុលាការ​បាន​សម្រេច​ឃុំ​ខ្លួន​លោក ម៉ម សូណង់ដូ នៅ​ពន្ធនាគារ​ព្រៃ​ស ក្រោម​ការ​ចោទ​ប្រកាន់​ពី​បទ​ផ្ដួចផ្ដើម​គំនិត​ប្រឆាំង​អ្នក​សាធារណៈ ធ្វើ​កុបកម្ម​ជ្រៀត​ជ្រែក​ខុស​ច្បាប់​នៅ​ក្នុង​ការ​បំពេញ​មុខ​ងារ​សាធារណៈ ញុះញង់​ឲ្យ​ប្រជាពលរដ្ឋ​កាន់​កាប់​អាវុធ​ខុស​ច្បាប់ និង​ប្រឆាំង​នឹង​អាជ្ញាធរ​ស្រប​ច្បាប់។
ការ​ចោទ​ប្រកាន់​លើ​លោក ម៉ម សូណង់ដូ គឺ​តុលាការ បាន​ភ្ជាប់​នឹង​ករណី​ជម្លោះ​ដី​ដែល​អាជ្ញាធរ​ចោទ​ថា បង្ក​ឡើង​ដោយ​ប្រជាពលរដ្ឋ​មួយ​ក្រុម ដែល​ជា​សាខា​សមាគម​អ្នក​ប្រជាធិបតេយ្យ​នៅ​ភូមិ​ប្រម៉ា ឃុំ​កំពង់ដំរី ស្រុក​ឆ្លូង ខេត្ត​ក្រចេះ។
ករណី​ជម្លោះ​ដី​ដែល​រដ្ឋាភិបាល​ចោទ​ថា អ្នក​ទាំង​នោះ​ចាប់​ដី​រដ្ឋ​បង្កើត​តំបន់​អបគមន៍ ហើយ​ត្រូវ​រដ្ឋាភិបាល​ប្រើ​អាវុធ​បាញ់​បង្ក្រាប និង​បណ្ដេញ​ចេញ​កាល​ពី​ថ្ងៃ​ទី​១៦ ឧសភា ឆ្នាំ​២០១២ បណ្ដាល​ឲ្យ​ក្មេង​ស្រី​ម្នាក់​ស្លាប់ និង​មនុស្ស​មួយ​ចំនួន​ត្រូវ​បាន​ចាប់​ខ្លួន៕

No comments: