ដោយ រដ្ឋា វិសាល
2016-06-30
ផែនទីខេត្តមណ្ឌលគិរី
Photo: RFA
សហគមន៍អភិរក្សព្រៃឈើឃុំដាក់ដាំ ស្រុកអូររាំង ខេត្តមណ្ឌលគិរី អះអាងថា ដើមឈើនៅក្នុងព្រៃបម្រុងទុកចុះបញ្ជីជាព្រៃការពារសហគមន៍ រងការកាប់យកឈើធ្វើជន្លង់ម្រេចកាន់តែច្រើនឡើង។ សហគមន៍បារម្ភថា បើគ្មានការទប់ស្កាត់ជាក់លាក់ទេ ព្រៃបម្រុងទុកនេះវិនាសបាត់បង់នាពេលខាងមុខឆាប់ៗនេះ។
សហគមន៍ការពារព្រៃឈើឃុំដាក់ដាំ នៅថ្ងៃទី៣០ ខែមិថុនា អំពាវនាវសុំឲ្យអាជ្ញាធរខេត្តមណ្ឌលគិរី ចាត់វិធានការជាក់លាក់បង្ក្រាប និងទប់ស្កាត់ការកាប់ឈើធ្វើជន្លង់ម្រេច ដែលធ្វើឲ្យហិនហោចព្រៃសហគមន៍អភិរក្ស។
ការអំពាវនាវនេះ ធ្វើឡើងបន្ទាប់ពីក្រុមល្បាតសហគមន៍ចាប់ឃាត់រថយន្តដឹកជញ្ជូនឈើជន្លង់ម្រេចមួយគ្រឿងចេញពីព្រៃសហគមន៍ កាលពីអាធ្រាត្រថ្ងៃទី២២ ខែមិថុនា ក៏ប៉ុន្តែបានដោះលែងវិញ ដោយសារតែសហគមន៍មិនអាចរារាំងក្រុមអ្នកដឹកជញ្ជូនឈើទាំងនោះបាន។
តំណាងសហគមន៍ លោក ទឺយ ធិ បង្ហាញការបារម្ភ ដោយសារតែឈ្មួញភាគច្រើនជាប្រជាពលរដ្ឋចំណាកស្រុក និងអ្នកមានអំណាច នាំគ្នាជួលកម្មករចូលព្រៃអាររំលំឈើក្នុងព្រៃសហគមន៍ ហើយអារច្រៀកជាឈើជន្លង់ម្រេច ដឹកជញ្ជូនចូលចម្ការរបស់ខ្លួននៅវេលាយប់ ដោយគ្មានសមត្ថកិច្ចបង្ក្រាប។ លោកថា សហគមន៍មានលទ្ធភាពទប់ស្កាត់បានតិចតួច ដោយសារក្រុមល្បាតសហគមន៍គ្មានមធ្យោបាយរារាំងជនល្មើស គ្រារកឃើញវត្ថុតាង និងជនល្មើសនៅក្នុងព្រៃ៖ «សុំអាជ្ញាធរភូមិ-ឃុំ និងសមត្ថកិច្ចក្នុងឃុំ ធ្វើម៉េចសហការគ្នាទប់ស្កាត់បទល្មើសព្រៃឈើនេះឲ្យបាន។ សកម្មភាពនៅតែមានបារម្ភដែរ ខ្លាចអស់ព្រៃឈើប្រជាពលរដ្ឋរើសអនុផលព្រៃឈើ»។
សហគមន៍ឃុំដាក់ដាំ បានរៀបចំឯកសារស្នើសុំព្រៃឈើចំនួន ២ពាន់ហិកតាររក្សាទុកជាតំបន់ព្រៃការពារសហគមន៍ ក៏ប៉ុន្តែក្រសួងពាក់ព័ន្ធមិនទាន់បំពេញលក្ខខណ្ឌផ្លូវច្បាប់ក្នុងការអភិរក្សព្រៃឈើនេះ ប្រគល់ជូនសហគមន៍នៅឡើយ។ រហូតមកទល់នឹងបច្ចុប្បន្ន ព្រៃឈើនៅតំបន់នោះត្រូវគេលួចកាប់យកឈើមានតម្លៃអស់គ្មានសល់ សូម្បីដើមឈើផលិតជ័រទឹកសហគមន៍ ក៏ត្រូវគេលួចកាប់អស់ច្រើនរយដើម។ លើសពីនោះទៀត ដើមឈើនៅសេសសល់ ក៏ត្រូវគេកាប់បន្តលក់ឲ្យឈ្មួញធ្វើជន្លង់ម្រេច។
ទាក់ទិនការអំពាវនាវនេះ នាយខណ្ឌរដ្ឋបាលព្រៃឈើខេត្តមណ្ឌលគិរី លោក វង សុកសិរី ទទួលស្គាល់ថា ការកាប់ឈើធ្វើជន្លង់ម្រេច ពិតជាកើតមានដោយសារប្រជាពលរដ្ឋនៅតំបន់នោះជាអ្នកជួលកម្មករចូលព្រៃកាប់ឈើធ្វើជន្លង់ម្រេច ក្នុងរូបភាពគ្រួសារ។ ហេតុនេះ សមត្ថកិច្ចជំនាញពិបាកទប់ស្កាត់។ យ៉ាងណា លោកថាមន្ត្រីជំនាញមិនបណ្តែតបណ្តោយឲ្យសកម្មភាពនេះកើតមានច្រើនបានឡើយ៖ «ពិបាកដល់ហើយជន្លង់ម្រេចហ្នឹង រូបភាពតូចប្រជាជន។ អ៊ីចឹងយើងពិបាកដែរ យើងចាប់បានណែនាំ ហើយលែងវិញ។ នឹកឃើញគាត់យកទៅដាំ។ ចាំខ្ញុំឲ្យមន្ត្រីសង្កាត់គេមើល»។
ចំណែកមន្ត្រីឃ្លាំមើលបញ្ហាព្រៃឈើនៃសមាគមអាដហុក (ADHOC) ខេត្តមណ្ឌលគិរី លោក សុក រដ្ឋា ចាត់ទុកការកាប់ឈើធ្វើជន្លង់ម្រេច ថាជាសកម្មភាពកាប់បំផ្លាញព្រៃឈើសេសសល់ ដែលសហគមន៍បានស្នើសុំរក្សាទុកជាតំបន់ព្រៃការពារ។ លោកថា សហគមន៍មិនអាចទប់ស្កាត់បទល្មើសព្រៃឈើនេះបាន ដោយគ្មានការសហការពីសមត្ថកិច្ចពាក់ព័ន្ធបានឡើយ៖ «ស្នើឲ្យមន្ត្រីមានសមត្ថកិច្ចជំនាញព្រៃឈើ អ្នកគ្រប់គ្រងនៅតំបន់ហ្នឹង គាត់គួរតែសហការជាមួយសហគមន៍ឲ្យបានល្អ មិនត្រូវចោលពួកគាត់ទេ ព្រោះកម្លាំងគាត់មានកម្រិត»។
កាលពីដើមខែមីនា ក្រុមល្បាតសហគមន៍ក៏បានប្រទះឃើញ និងនាំគ្នាឃាត់រថយន្តប្រភេទស្ទូចឈើមួយគ្រឿងផ្ទុកដោយឈើជន្លង់ម្រេច ១២០ដើម នៅចំណុចព្រៃពូទុង ភូមិពូត្រែង។ ក្នុងនោះដែរ ជនពាក់ព័ន្ធដឹកជញ្ជូនឈើនេះ គឺស្ត្រីឈ្មោះ ណាវី និងឈ្មោះ អូច ជាប្រជាពលរដ្ឋចំណាកស្រុកមករស់នៅឃុំដាក់ដាំ ហើយប្រកបរបរទិញឈើជន្លង់ម្រេចលក់។ បន្ទាប់ពីឃាត់បានវត្ថុតាងបទល្មើសព្រៃឈើនេះ សហគមន៍បានធ្វើកំណត់ហេតុ និងនាំយកវត្ថុតាងឈើ និងរថយន្ត ទៅប្រគល់ជូនមន្ត្រីខណ្ឌរដ្ឋបាលព្រៃឈើចាត់វិធានការតាមច្បាប់៕
No comments:
Post a Comment