A Change of Guard

សូមស្តាប់វិទ្យុសង្គ្រោះជាតិ Please read more Khmer news and listen to CNRP Radio at National Rescue Party. សូមស្តាប់វីទ្យុខ្មែរប៉ុស្តិ៍/Khmer Post Radio.
Follow Khmerization on Facebook/តាមដានខ្មែរូបនីយកម្មតាម Facebook: https://www.facebook.com/khmerization.khmerican

Wednesday 6 July 2016

សត្វ​ខ្ទីង​ពីរ​ក្បាល​ងាប់​ដោយសារ​ជាប់​អន្ទាក់​ព្រាន​ព្រៃ​ក្នុង​តំបន់​អភិរក្ស​ខេត្ត​បាត់ដំបង



សត្វ​ខ្ទីង​ពីរ​ក្បាល​ងាប់​ដោយសារ​ជាប់​អន្ទាក់​ព្រាន​ព្រៃ​ក្នុង​តំបន់​អភិរក្ស​ខេត្ត​បាត់ដំបង
ដោយ ហ៊ុំ ចំរើន
2016-07-05


សត្វ​ខ្ទីង បាត់ដំបង ២០១៦ ៨៥៥
៤-កក្កដា-២០១៦៖ សត្វ​ខ្ទីង​ដែល​ជាប់​អន្ទាក់​របស់​ព្រាន​ព្រៃ​ក្នុង​តំបន់​ព្រៃ​ឈើ​ប្រើប្រាស់​ច្រើន​យ៉ាង​សំឡូត ស្រុក​សំឡូត ខេត្ត​បាត់ដំបង។ Photo by MJP
 Photo by MJP


មន្ត្រី​ឧទ្យានុរក្ស​គ្រប់គ្រង​នៅ​តំបន់​ប្រើប្រាស់​ច្រើន​យ៉ាង​ស្រុក​សំឡូត សហការ​ជាមួយ​មន្ត្រី​អង្គការ អិម.ជេ.ភី (MJP) នៅ​ខេត្ត​បាត់ដំបង កំពុង​តាម​រក​មុខ​សញ្ញា​ព្រាន​ព្រៃ​ដែល​លួច​ដាក់​អន្ទាក់​សត្វ​ខ្ទីង​នៅ​ក្នុង​ព្រៃ​តំបន់​អភិរក្ស ដើម្បី​យក​មក​ផ្ដន្ទាទោស​តាម​ផ្លូវ​ច្បាប់។ សមត្ថកិច្ច​បាន​ដុត​សត្វ​ខ្ទីង​ចំនួន ២​ក្បាល​ដែល​បាន​ងាប់​បន្តបន្ទាប់​គ្នា​ដោយសារ​ជាប់​អន្ទាក់​របស់​ព្រាន​ព្រៃ​រយៈពេល​ប្រមាណ​មួយ​ថ្ងៃ​នៅ​ក្នុង​ព្រៃ​តំបន់​អភិរក្ស​នោះ។

នាយក​គ្រប់គ្រង​តំបន់​ប្រើប្រាស់​ច្រើន​យ៉ាង​សំឡូត លោក ថន គិមហុង មាន​ប្រសាសន៍​នៅ​ថ្ងៃ​ទី​៥ កក្កដា ថា កម្លាំង​សមត្ថកិច្ច​សហការ​ជាមួយ​បុគ្គលិក​ការពារ​ព្រៃ​ឈើ​របស់​អង្គការ អិម.ជេ.ភី ប្រមាណ ៣០​នាក់ កាល​ពី​រសៀល​ថ្ងៃ​ទី​៣ កក្កដា ចុះ​ល្បាត​ក្នុង​ព្រៃ​ប្រទះ​ឃើញ​សត្វ​ខ្ទីង​ចំនួន ២​ក្បាល ដែល​ជា​មេ និង​កូន​អាយុ​ប្រមាណ ២​ឆ្នាំ ជាប់​អន្ទាក់​របស់​ព្រាន​ព្រៃ​នៅ​ចំណុច​អូរ​ស្លេវ នៃ​តំបន់​ប្រើប្រាស់​ច្រើន​យ៉ាង​សំឡូត។

លោក​អះអាង​ថា កូន​ខ្ទីង​ទម្ងន់​ប្រមាណ ១០០​គីឡូក្រាម​បាន​ងាប់​នៅ​នឹង​កន្លែង ចំណែក​មេ​របស់​វា​ទម្ងន់​ប្រហែល ៧០០​គីឡូក្រាម បាន​ងាប់​នៅ​រសៀល​ថ្ងៃ​ទី​៤ កក្កដា៖ «ខ្ទីង​វា​ជាប់​អន្ទាក់​ខ្សែ​ជើង​របស់​វា ហើយ​រើ​ពេញ​ព្រៃ។ យើង​លួច​ថត​សឹងតែ​មិន​បាន។ បច្ចេកទេស​បាញ់​ឲ្យ​វា​សន្លប់ មាន​នៅ​អង្គការ​អភិរក្ស​សត្វ​ព្រៃ​នៅ​ភ្នំ​តាមៅ ហើយ​យើង​បាន​ទាក់ទង​គេ​តាំង​ពី​ថ្ងៃ​ទី​៣ គេ​ក៏​បាន​ចេញ​មក ហើយ​ស្រាប់​តែ​ថ្ងៃ​ទី​៤ ខ្ទីង​ងាប់​តែ​ម្ដង»។



អនុប្រធាន​ផ្នែក​អនុវត្តន៍​ច្បាប់​របស់​អង្គការ អិម.ជេ.ភី ប្រចាំ​នៅ​តំបន់​ព្រៃឈើ​ប្រើប្រាស់​ច្រើន​យ៉ាង​សំឡូត​ខេត្ត​បាត់ដំបង លោក ចាន់ សុជាតិ អះអាង​ថា អ្នក​ដាក់​អន្ទាក់​ខ្ទីង គឺ​ជា​ពលរដ្ឋ​រស់នៅ​តំបន់​នោះ ចំណែក​សមត្ថកិច្ច និង​បុគ្គលិក​របស់​អង្គការ អិម.ជេ.ភី បាន​ចុះ​ល្បាត​ក្នុង​ព្រៃ​នោះ​ជា​ប្រចាំ ដើម្បី​តាម​រក​មុខ​សញ្ញា និង​ចាប់​ព្រាន​ព្រៃ​ឲ្យ​ទទួល​ទោស​តាម​នីតិវិធី៖ «ខ្ញុំ​បាន​ការ​ព្រួយ​បារម្ភ​យ៉ាង​ខ្លាំង ព្រោះ​ក្រុម​ការងារ​របស់​យើង​បាន​ដើរ​ចេញ​ល្បាត​រាល់​ខែ ឃើញ​ខ្សែ​អន្ទាក់​ច្រើន​នៅ​ក្នុង​ព្រៃ ដែល​ជន​មួយ​ចំនួន​លួច​យក​ទៅ​ដាក់​ទាក់​សត្វ ដោយ​មិន​បាន​គិត​ពី​សារសំខាន់​នៃ​ធនធាន​ធម្មជាតិ»។

ប្រធាន​អង្គការ​មូលនិធិ​សត្វ​ព្រៃ​ពិភពលោក​កម្ពុជា (WWF Cambodia) លោក ឈិត សំអាត មាន​ប្រសាសន៍​ថា សត្វ​ខ្ទីង​ជា​ប្រភេទ​សត្វ​កម្រ​ជិត​ផុត​ពូជ​នៅ​ក្នុង​ពិភពលោក ដែល​ប្រជាពលរដ្ឋ​គ្រប់​រូប​ត្រូវ​តែ​អភិរក្ស​សត្វ​ដ៏​កម្រ​នេះ​ឲ្យ​បាន​គង់វង្ស ទុក​ជា​សម្បត្តិ​របស់​ប្រទេស​ជាតិ៖ «អ៊ីចឹង​យើង​សូម​ចូលរួម​ចំណែក​ការពារ​ទាំងអស់​គ្នា។ យើង​ឈប់​ញ៉ាំ​សាច់​ព្រៃ​ទៅ និង​ឈប់​ដាក់​អន្ទាក់​សត្វ​ព្រៃ​ត​ទៅ​ទៀត ព្រោះ​សត្វ​ព្រៃ​ជា​សម្បត្តិ​ធនធាន​ធម្មជាត​របស់​ប្រទេស​ជាតិ​ដ៏​សំខាន់ សម្រាប់​ទាក់ទាញ​ភ្ញៀវ​ទេសចរ​មក​កម្សាន្ត​ក្នុង​ប្រទេស​យើង។ បើ​យើង​បន្ត​បរបាញ់ វា​នឹង​ហិនហោច​អស់​ពី​ប្រទេស​ជា​មិន​ខាន​ឡើយ»។

ច្បាប់​ស្ដីពី​ព្រៃ​ឈើ តម្រូវ​ឲ្យ​ផ្ដន្ទាទោស​ថ្នាក់​ទី​១ ដែល​ត្រូវ​ជាប់​ពន្ធនាគារ​ពី ៥​ឆ្នាំ​ទៅ ១០​ឆ្នាំ ចំពោះ​ជន​ទាំងឡាយ​ណា​ដែល​បរបាញ់​សត្វ​ក្នុង​ព្រៃ​ការពារ​សម្លាប់​ធ្វើ​ពាណិជ្ជកម្ម ឬ​នាំ​ចេញ​ប្រភេទ​សត្វ​ក្រុម​ជិត​ផុត​ពូជ។ ប្រសិន​ជន​នោះ​មិន​រាង​ចាល នឹង​ត្រូវ​ផ្ដន្ទាទោស​នេះ​ទ្វេដង។

តំបន់​ប្រើប្រាស់​ច្រើន​យ៉ាង​សំឡូត មាន​ផ្ទៃដី​ប្រមាណ ៤​ម៉ឺន​ហិកតារ គ្រប​ដណ្ដប់​លើ​ខេត្ត​ចំនួន​២ គឺ​ខេត្ត​បាត់ដំបង និង​ខេត្ត​ប៉ៃលិន។ នាយក​តំបន់​អភិរក្ស ឲ្យ​ដឹង​ថា ព្រៃ​នៅ​តំបន់​នេះ​មាន​សត្វ​កម្រ​ជាច្រើន​ប្រភេទ​រស់នៅ មាន​ដូចជា សត្វ​ដំរី ជ្រូក​ព្រៃ ឈ្លូស និង​សត្វ​ខ្ទីង​ជាដើម ដែល​ជា​សត្វ​កម្រ​នៅ​កម្ពុជា៕

No comments: